ಸೌದಿ ಅರೇಬಿಯಾವನ್ನು ಪೆಟ್ರೋಲ್‌ ಮಾರುಕಟ್ಟೆಯಲ್ಲಿ ಸೂಪರ್‌ ಪವರ್‌ ಮಾಡಿದ್ದ ಮಾಜಿ ಪೆಟ್ರೋಲಿಯಂ ಸಚಿವ ಶೇಖ್‌ ಅಹ್ಮದ್‌ ಝಾಕಿ ಯಮಾನಿ (೯೧) ನಿಧರಾದರು.
ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದ ಅವರು ಲಂಡನ್‌ನಲ್ಲಿ ನಿಧನರಾಗಿದ್ದಾರೆ. 1962ರಲ್ಲಿ ಸೌದಿಯ ಇಂಧನ ಸಚಿವಾಗಿದ್ದ ಅವರು, ಪೆಟ್ರೋಲಿಯಂ ಮಾರುಕಟ್ಟೆಯಲ್ಲಿ ಸೌದಿಯನ್ನು ಸೂಪರ್‌ ಪವರ್‌ ಆಗಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.
ಗಲ್ಫ್‌ನ ಇತರೆ ರಾಷ್ಟ್ರಗಳಿಗೆ ಹೋಲಿಕೆ ಮಾಡಿದರೆ ಪೆಟ್ರೋಲಿಯಂ ಉತ್ಪನ್ನಗಳ ಉತ್ಪಾದನೆ, ಮಾರಾಟದಲ್ಲಿ ಸೌದಿ ಅರೇಬಿಯಾ ಭಾರೀ ಹಿಂದೆ ಬಿದ್ದಿತ್ತು. ಆದರೆ ಪೆಟ್ರೋಲಿಯಂ ಸಚಿವನಾಗಿ ಅಧಿಕಾರ ಸ್ವೀಕರಿಸ ಬಳಿಕ ಅವರು ಸುಧಾರಣಾ ಕ್ರಮಗಳನ್ನು ತಂದರು. ತೈಲ ಉತ್ಪಾದಿಸಿ ರಫ್ತು ಮಾಡುವ ರಾಷ್ಟ್ರಗಳ ಒಕ್ಕೂಟವಾದ ಒಪೆಕ್‌ನಲ್ಲಿ ಸೌದಿ ಅರೇಬಿಯಾದ ಮೊದಲ ಪ್ರತಿನಿಧಿಯಾಗಿ ಆಯ್ಕೆಯಾದ ಹೆಗ್ಗಳಿಕೆ ಶೇಖ್‌ ಯಮಾನಿಯವರದ್ದು.
ಇಸ್ರೇಲ್‌ ಜತೆಗಿನ ಯುದ್ಧದ ವೇಳೆ ಪೆಟ್ರೋಲ್‌ ಮಾರುಕಟ್ಟೆಯನ್ನು ನಿಯಂತ್ರಿಸಿದ್ದ ಇವರ ಚಾಕಚಕ್ಯತೆ ಮೆಚ್ಚುಗೆ ಗಳಿಸಿತ್ತು. ಅಲ್ಲದೇ ಆದಾಯದಲ್ಲಿ ವಿಶ್ವದ ಅತೀ ದೊಡ್ಡ ತೈಲ ಬಾವಿ ಅರಾಮ್ಕೋವನ್ನು ರಾಷ್ಟ್ರೀಕರಣಗೊಳಿಸುವಲ್ಲಿಯೂ ಇವರ ಪಾತ್ರವಿತ್ತು. 1930ರಲ್ಲಿ ಮೆಕ್ಕಾದಲ್ಲಿ ಜನಿಸಿದ ಯಮಾನಿ ಈಜಿಪ್ಟ್‌ನ ಕೈರೋದಲ್ಲಿ ಕಾನೂನು ಪದವಿ ಮುಗಿಸಿ, ನ್ಯೂಯಾರ್ಕ್‌ ವಿಶ್ವವಿದ್ಯಾಲಯದಿಂದ ಉನ್ನತ ಶಿಕ್ಷಣ ಪಡೆದುಕೊಂಡಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ