ಅಮೆರಿಕದಲ್ಲಿ ಭಾರತೀಯರ ಮೇಲೆ ಒಂದರ ಹಿಂದೊಂದು ಜನಾಂಗೀಯ ದಾಳಿಯ ನಂತರ, ಪೋಲೆಂಡ್‌ನ ರಾಜಧಾನಿ ವಾರ್ಸಾದಲ್ಲಿ ಭಾರತೀಯನ ವಿರುದ್ಧ ಅಮೇರಿಕನ್ ವ್ಯಕ್ತಿಯೊಬ್ಬನ ಜನಾಂಗೀಯ ನಿಂದನೆ ಮಾಡಿದ ಹೊಸ ವೀಡಿಯೊ ಕಾಣಿಸಿಕೊಂಡಿದೆ.
ದಿನಾಂಕವಿಲ್ಲದ ಈ ವೀಡಿಯೊದಲ್ಲಿ, ಒಬ್ಬ ಬಿಳಿಯ ವ್ಯಕ್ತಿ, ಅಮೆರಿಕನ್ ಪ್ರವಾಸಿ, ಅನುಮತಿಯಿಲ್ಲದೆ ಭಾರತೀಯ ವ್ಯಕ್ತಿಯನ್ನು ಚಿತ್ರೀಕರಿಸಲು ಪ್ರಾರಂಭಿಸುತ್ತಾನೆ ಮತ್ತು ಭಾರತೀಯನಿಗೆ ಜನಾಂಗೀಯ ಪ್ರೇರಿತ ಪ್ರಶ್ನೆಗಳನ್ನು ಕೇಳುತ್ತಾನೆ, ಕಿರುಕುಳ ನೀಡುತ್ತಾನೆ.
ಚಿತ್ರೀಕರಿಸಲ್ಪಟ್ಟ ವ್ಯಕ್ತಿಯು ತನ್ನ ಒಪ್ಪಿಗೆಯಿಲ್ಲದೆ ಏಕೆ ಚಿತ್ರೀಕರಿಸುತ್ತೀರಿ ಎಂದು ಕೇಳುತ್ತಾರೆ ಮತ್ತು ಆ ವ್ಯಕ್ತಿಗೆ ಚಿತ್ರೀಕರಣವನ್ನು ನಿಲ್ಲಿಸಲು ಹೇಳುತ್ತಾರೆ, ಆದರೆ ಇನ್ನೊಬ್ಬ ವ್ಯಕ್ತಿಯು ಅದನ್ನು ಮುಂದುವರಿಸುತ್ತಾರೆ. ಕ್ಲಿಪ್‌ನಲ್ಲಿ ಭಾರತೀಯ ವ್ಯಕ್ತಿಯನ್ನು “ಪರಾವಲಂಬಿ” ಮತ್ತು “ನರಮೇಧಕಾರ” ಎಂದೆಲ್ಲ ಕರೆಯುತ್ತಾನೆ.
ಅಮೆರಿಕದಲ್ಲಿ, ನಿಮ್ಮಲ್ಲಿ ತುಂಬಾ ಮಂದಿ ಇದ್ದಾರೆ. ಆದರೆ ನೀವು ಪೋಲೆಂಡ್‌ನಲ್ಲಿ ಏಕೆ ಇದ್ದೀರಿ? ನೀವು ಪೋಲೆಂಡ್ ಅನ್ನು ಆಕ್ರಮಿಸಬಹುದು ಎಂದು ನೀವು ಭಾವಿಸುತ್ತೀರಾ? ನಿಮಗೆ ನಿಮ್ಮದೇ ಆದ ದೇಶವಿದೆ, ನೀವು ಅಲ್ಲಿಗೆ ಏಕೆ ಹಿಂತಿರುಗಬಾರದು ಎಂದು ಕ್ಯಾಮೆರಾದ ಹಿಂದಿನ ವ್ಯಕ್ತಿ ಹೇಳುತ್ತಾನೆ.
ಆತ ಭಾರತೀಯನನ್ನು ಹಿಂಬಾಲಿಸುತ್ತಲೇ ಇರುತ್ತಾನೆ. ಭಾರತೀಯ ವ್ಯಕ್ತಿಗೆ “ಬಿಳಿಯರ ಭೂಮಿಗೆ” ಏಕೆ ಬಂದಿದ್ದೀಯಾ ಎಂದು ಪ್ರಶ್ನಿಸುತ್ತಾನೆ ಮತ್ತು “ನಮ್ಮ ಕಠಿಣ ಪರಿಶ್ರಮದಿಂದ” ನೀವು ಬದುಕುತ್ತಿದೀರಿ ಎಂದು ಆರೋಪಿಸಿದ್ದಾನೆ.
ನೀವು ಏಕೆ ಪರಾವಲಂಬಿಯಾಗಿದ್ದೀರಿ? ನೀವು ನಮ್ಮ ಜನಾಂಗವನ್ನು ನರಮೇಧ ಮಾಡುತ್ತಿದ್ದೀರಿ. ನೀವು ಆಕ್ರಮಣಕಾರರು. ಮನೆಗೆ ಹೋಗು, ಆಕ್ರಮಣಕಾರ. ನೀವು ಯುರೋಪ್‌ನಲ್ಲಿ ಇರುವುದು ನಮಗೆ ಬೇಡ” ಎಂದು ಅಮೆರಿಕದ ಪ್ರವಾಸಿ ಹೇಳುತ್ತಾನೆ.
ಜನಾಂಗೀಯ ನಿಂದನೆಗಳು ಮತ್ತು ಅಶ್ಲೀಲ ಮಾತುಗಳಿಂದ ಕೂಡಿದ ನಾಲ್ಕು ನಿಮಿಷಗಳ ವೀಡಿಯೊವನ್ನು ರೆಡ್ಡಿಟ್‌ನಲ್ಲಿ ಹಂಚಿಕೊಳ್ಳಲಾಗಿದೆ ಮತ್ತು ಈಗ ಟ್ವಿಟರ್ ಮತ್ತು ಇತರ ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ವೈರಲ್ ಆಗಿದೆ.
ನೆಟಿಜನ್‌ಗಳು ವ್ಯಕ್ತಿಯನ್ನು ಜಾನ್ ಮಿನಾಡಿಯೊ ಜೂನಿಯರ್ ಎಂದು ಗುರುತಿಸಿದ್ದಾರೆ, ಅವರು ಟ್ವಿಟರ್ ಬಳಕೆದಾರರ ಪ್ರಕಾರ, ಬಿಳಿ ರಾಷ್ಟ್ರೀಯತಾವಾದಿ ಮತ್ತು ಯೆಹೂದ್ಯ ವಿರೋಧಿ ಚಾನೆಲ್ ಗೋಯಿಮ್ ಟಿವಿ ಎಂಬ ದ್ವೇಷದ ಗುಂಪಿನ ಮುಖ್ಯಸ್ಥನಾಗಿದ್ದಾನೆ.
ಈ ಘಟನೆಯು ವಿದೇಶದಲ್ಲಿ ಭಾರತೀಯರ ವಿರುದ್ಧ ಜನಾಂಗೀಯ ದಾಳಿಯ ಇತ್ತೀಚಿನ ನಿದರ್ಶನವಾಗಿದೆ. ಕಳೆದ ವಾರದಲ್ಲಿ, ಕ್ಯಾಲಿಫೋರ್ನಿಯಾದಲ್ಲಿ ಭಾರತೀಯ-ಅಮೆರಿಕನ್ ಒಬ್ಬರನ್ನು “ಕೊಳಕು ಹಿಂದೂ” ಎಂದು ಕರೆದರು, ಟೆಕ್ಸಾಸ್‌ನಲ್ಲಿ ಭಾರತೀಯ ಮಹಿಳೆಯರ ಗುಂಪಿಗೆ “ಹಿಂತಿರುಗಿ ಹೋಗಿ” ಎಂದು ಹೇಳಲಾಯಿತು ಏಕೆಂದರೆ ಅವರು ಅಮೆರಿಕವನ್ನು “ಹಾಳು” ಮಾಡುತ್ತಿದ್ದಾರಂತೆ.
ನಿಮ್ಮ ಕಾಮೆಂಟ್ ಬರೆಯಿರಿ