ಅಹ್ಮದಾಬಾದ್: ಗುಜರಾತ್‌ನ ಮೊರ್ಬಿಯಲ್ಲಿನ ಮಚ್ಚು ಅಣೆಕಟ್ಟಿನ ಮೇಲಿನ ತೂಗು ಸೇತುವೆ ಕುಸಿದಿದ್ದರಿಂದ ಮಕ್ಕಳು ಸೇರಿದಂತೆ 140 ಕ್ಕೂ ಹೆಚ್ಚು ಜನರು ಮೃತಪಟ್ಟಿದ್ದಾರೆ. ಹಲವರಿಗಾಗಿ ಇನ್ನೂ ಹುಡುಕಾಟ ನಡೆದಿದೆ.
ಇದೀಗ ಸೇತುವೆಯ ಮೇಲೆ ನೂರಾರು ಜನರು ಜಿಗಿಯುವುದ, ಓಡುವುದು ಮಾಡುತ್ತಿರುವ ವಿಡಿಯೋವೊಂದು ಹೊರಬಿದ್ದಿದೆ. ಈ ವೇಳೆ ಕೇಬಲ್ ಸೇತುವೆ ಜೋರಾಗಿ ತೂಗಾಡುತ್ತಿರುವುದು ಕಂಡುಬಂದಿದೆ. ಕೆಲವು ಯುವಕರು ತೂಗು ಸೇತುವೆಯನ್ನು ಅಲ್ಲಾಡಿಸಿದರು, ಸಿಬ್ಬಂದಿಗೆ ಎಚ್ಚರಿಕೆ ನೀಡಿದರೂ ಅವರು ಉದಾಸೀನರಾಗಿದ್ದರು ಎಂದು ಸಂದರ್ಶಕರು ಹೇಳಿದ್ದಾರೆ
ಅಹ್ಮದಾಬಾದ್ ನಿವಾಸಿ ವಿಜಯ್ ಗೋಸ್ವಾಮಿ ಮತ್ತು ಅವರ ಕುಟುಂಬ ಸದಸ್ಯರು ಭಾನುವಾರ ಮಧ್ಯಾಹ್ನ ಗುಜರಾತ್‌ನ ಮೊರ್ಬಿಯಲ್ಲಿರುವ ತೂಗು ಸೇತುವೆಗೆ ಭೇಟಿ ನೀಡಿದ್ದರು. ಆದರೆ ಸೇತುವೆ ಮೇಲಿದ್ದ ಗುಂಪಿನ ಕೆಲವು ಯುವಕರು ಅದನ್ನು ಅಲುಗಾಡಿಸಲು ಪ್ರಾರಂಭಿಸಿದ ನಂತರ ತಾವು ಹಾಗೂ ಕುಟುಂಬವದರು ಭಯದಿಂದ ಸೇತುವೆಯ ಮೂಲಕ ಅರ್ಧದಾರಿಯಲ್ಲೇ ಹಿಂತಿರುಗಿರುವುದಾಗಿ ಹೇಳಿದ್ದಾರೆ.
ಕೆಲವು ಗಂಟೆಗಳ ನಂತರ, ಪ್ರವಾಸಿ ಆಕರ್ಷಣೆಯಾದ ಮಚ್ಚು ನದಿಯ ಸೇತುವೆಯು ಅದೇ ದಿನ ಸಂಜೆ 6:30 ರ ಸುಮಾರಿಗೆ ಕುಸಿದು ಬಿದ್ದು ನೂರಕ್ಕೂ ಹೆಚ್ಚು ಜನರು ಸಾವಿಗೀಡಾಗಿದ್ದಾರೆ.
ಬ್ರಿಟಿಷರ ಕಾಲದ ಸೇತುವೆ ಏಳು ತಿಂಗಳ ಕಾಲ ನವೀಕರಣ ಕಾಮಗಾರಿಗಾಗಿ ಮುಚ್ಚಿದ್ದ ನಾಲ್ಕು ದಿನಗಳ ಹಿಂದಷ್ಟೇ ಸಾರ್ವಜನಿಕರಿಗೆ ತೆರೆಯಲಾಗಿತ್ತು.
ದೀಪಾವಳಿ ರಜೆಯನ್ನು ಆನಂದಿಸಲು ಕುಟುಂಬದೊಂದಿಗೆ ಮೋರ್ಬಿಗೆ ಹೋಗಿರುವುದಾಗಿ ಗೋಸ್ವಾಮಿ ಹೇಳಿದ್ದಾರೆ.
ಸೇತುವೆಯ ಮೇಲೆ ಭಾರಿ ಜನಸಂದಣಿ ಇತ್ತು. ಕೆಲವು ಯುವಕರು ಉದ್ದೇಶಪೂರ್ವಕವಾಗಿ ಸೇತುವೆಯನ್ನು ಅಲುಗಾಡಿಸಲು ಪ್ರಾರಂಭಿಸಿದಾಗ ನನ್ನ ಕುಟುಂಬ ಮತ್ತು ನಾನು ಸೇತುವೆಯ ಮೇಲೆ ಇದ್ದೆವು. ಜನರು ಯಾವುದೇ ಬೆಂಬಲವಿಲ್ಲದೆ ನಿಲ್ಲಲು ಅಸಾಧ್ಯವಾಗಿತ್ತು. ಇದು ಅಪಾಯಕಾರಿ ಎಂದು ಸಾಬೀತುಪಡಿಸಬಹುದು ಎಂಬ ಭಾವನೆ ನನ್ನಲ್ಲಿತ್ತು. ಸೇತುವೆಯ ಮೇಲೆ ಸ್ವಲ್ಪ ದೂರ ಕ್ರಮಿಸಿದ ನಂತರ ಕುಟುಂಬ ಮತ್ತು ನಾನು ಹಿಂತಿರುಗಿದೆವು” ಎಂದು ಗೋಸ್ವಾಮಿ ಅಹ್ಮದಾಬಾದ್ ತಲುಪಿದ ನಂತರ ಸುದ್ದಿಗಾರರಿಗೆ ತಿಳಿಸಿದರು.
ಸ್ಥಳದಿಂದ ಹೊರಡುವ ಮೊದಲು, ಜನರು ಸೇತುವೆಯನ್ನು ಅಲುಗಾಡದಂತೆ ತಡೆಯಲು ನಾನು ಕರ್ತವ್ಯ ನಿರತ ಸಿಬ್ಬಂದಿಯನ್ನು ಎಚ್ಚರಿಸಿದೆ. ಆದರೆ, ಅವರು ಟಿಕೆಟ್ ಮಾರಾಟದಲ್ಲಿ ಮಾತ್ರ ಆಸಕ್ತಿ ಹೊಂದಿದ್ದರು ಮತ್ತು ಜನಸಂದಣಿಯನ್ನು ನಿಯಂತ್ರಿಸಲು ಯಾವುದೇ ವ್ಯವಸ್ಥೆ ಇಲ್ಲ ಎಂದು ಹೇಳಿದರು. ನಾವು ಹೋದ ಗಂಟೆಗಳ ನಂತರ, ನಮ್ಮ ಭಯ ಅಂತಿಮವಾಗಿ ಸೇತುವೆ ಕುಸಿದು ನಿಜವಾಯಿತು,” ಎಂದು ಅವರು ಹೇಳಿದರು.
ಸೇತುವೆಯು ಹಠಾತ್ತನೆ ಕುಸಿದಾಗ ಭಾರಿ ಜನಸಂದಣಿ ಇತ್ತು. ನಾನು ನೇತಾಡುವ ಹಗ್ಗವನ್ನು ಹಿಡಿದು ನಿಧಾನವಾಗಿ ಮೇಲಕ್ಕೆ ಏರಿದ್ದರಿಂದ ನಾನು ಬದುಕುಳಿದೆ. ಆದರೆ ನನ್ನ ತಂದೆ ಮತ್ತು ತಾಯಿ ಇನ್ನೂ ಕಾಣೆಯಾಗಿದ್ದಾರೆ” ಎಂದು 10 ವರ್ಷದ ಬಾಲಕ ಸುದ್ದಿಗಾರರಿಗೆ ತಿಳಿಸಿದರು.
ದುರಂತದಲ್ಲಿ ಬದುಕುಳಿದವರಲ್ಲಿ ಒಬ್ಬರಾಗಿರುವ ಮೆಹುಲ್ ರಾವಲ್, ಸೇತುವೆ ಕುಸಿದಾಗ ಸೇತುವೆಯ ಮೇಲೆ ಭಾರೀ ಜನಸ್ತೋಮ ಇತ್ತು ಎಂದು ಹೇಳಿದ್ದಾರೆ. ನಾವು ಸೇತುವೆಯ ಮೇಲೆ ಇದ್ದಾಗ ಸೇತುವೆಯು ಹಠಾತ್ತನೆ ಕುಸಿದಿದೆ. ಎಲ್ಲಾ ಜನರು ಕೆಳಗೆ ಬಿದ್ದರು. ಅನೇಕ ಜನರು ಸಾವಿಗೀಡಾಗಿದ್ದಾರೆ ಮತ್ತು ಅನೇಕರು ಗಾಯಗೊಂಡಿದ್ದಾರೆ. ಸೇತುವೆಯು ಮುಖ್ಯವಾಗಿ ಜನದಟ್ಟಣೆಯಿಂದ ಕುಸಿದಿದೆ” ಎಂದು ಮೋರ್ಬಿ ಸಿವಿಲ್ ಆಸ್ಪತ್ರೆಗೆ ದಾಖಲಾದ ರಾವಲ್, ಆಸ್ಪತ್ರೆಯ ಬೆಡ್‌ನಿಂದ ಸುದ್ದಿಗಾರರಿಗೆ ತಿಳಿಸಿದರು.
ಗುಜರಾತ್ ಸರ್ಕಾರದಿಂದ 5 ಸದಸ್ಯರ ತನಿಖಾ ಸಮಿತಿ ರಚನೆ
ಗುಜರಾತ್ ಮುಖ್ಯಮಂತ್ರಿ ಭೂಪೇಂದ್ರ ಪಟೇಲ್ ಅವರು ಭಾನುವಾರ ಮೊರ್ಬಿ ಪಟ್ಟಣದಲ್ಲಿ ತೂಗು ಸೇತುವೆ ಕುಸಿತದ ಬಗ್ಗೆ ತನಿಖೆ ನಡೆಸಲು ಐಎಎಸ್ ಅಧಿಕಾರಿಯ ನೇತೃತ್ವದಲ್ಲಿ ಐದು ಸದಸ್ಯರ ವಿಶೇಷ ತನಿಖಾ ತಂಡವನ್ನು (ಎಸ್‌ಐಟಿ) ರಚಿಸಿದ್ದಾರೆ.
ಎಸ್‌ಐಟಿಯ ನೇತೃತ್ವವನ್ನು ಪೌರಾಡಳಿತ ಆಯುಕ್ತ ರಾಜ್‌ಕುಮಾರ್ ಬೇನಿವಾಲ್ ಮತ್ತು ಇತರ ಸದಸ್ಯರು ರಸ್ತೆ ಮತ್ತು ಕಟ್ಟಡ ಇಲಾಖೆ ಕಾರ್ಯದರ್ಶಿ ಸಂದೀಪ್ ವಾಸವ, ಪೊಲೀಸ್ ಮಹಾನಿರೀಕ್ಷಕ ಸುಭಾಷ್ ತ್ರಿವೇದಿ ಮತ್ತು ರಚನಾತ್ಮಕ ಮತ್ತು ಗುಣಮಟ್ಟ ನಿಯಂತ್ರಣದಲ್ಲಿ ಪರಿಣತಿ ಹೊಂದಿರುವ ಇಬ್ಬರು ಎಂಜಿನಿಯರ್‌ಗಳು.
ರಾಜ್ಯ ಸರ್ಕಾರವು ನಾಲ್ಕು ಎನ್‌ಡಿಆರ್‌ಎಫ್ ತಂಡಗಳನ್ನು ಮತ್ತು ರಕ್ಷಣಾ ಸಿಬ್ಬಂದಿಯನ್ನು ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಯಲ್ಲಿ ನಿಯೋಜಿಸಿದೆ ಮತ್ತು ಸುತ್ತಮುತ್ತಲಿನ ಜಿಲ್ಲೆಗಳಿಂದ ಈಜುಗಾರರು ಮತ್ತು ಡೈವರ್‌ಗಳನ್ನು ಸಹ ಕರೆಸಿದೆ.
ಸ್ಥಳೀಯರ ಪ್ರಕಾರ ಸೇತುವೆಯ ಗುತ್ತಿಗೆದಾರ ಪ್ರವಾಸಿಗರಿಂದ 12 ಮತ್ತು 17 ರೂ.ಗಳ ಶುಲ್ಕ ಪಡೆಯುತ್ತಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ