ನೂತನ ವರ್ಷದ ಮೊದಲ ವಾರದಲ್ಲಿಯೇ ಕಂಪನಿಯೊಂದು ಎರಡು ನಿಮಿಷದಲ್ಲಿಯೇ ದೊಡ್ಡ ಪ್ರಮಾಣದಲ್ಲಿ ಉದ್ಯೋಗಿಗಳನ್ನು ವಜಾವನ್ನು ಪ್ರಾರಂಭಿಸಿದೆ.
ಅಮೆರಿಕದ ಟೆಕ್ ಸ್ಟಾರ್ಟ್ಅಪ್ ಕಂಪನಿ ಫ್ರಂಟ್ಡೆಸ್ಕ್ ಮಂಗಳವಾರ ತನ್ನ 200 ನೌಕರರನ್ನು ಎರಡು ನಿಮಿಷಗಳ ಗೂಗಲ್‌ ಮೀಟ್‌ ಕರೆಯ ಮೂಲಕ ವಜಾ ಮಾಡಿದೆ ಎಂದು ವರದಿಯಾಗಿದೆ. ಈ ಮೂಲಕ 2024 ರಲ್ಲಿ ಉದ್ಯೋಗಿಗಳನ್ನು ವಜಾಗೊಳಿಸಿದ ಮೊದಲ ಟೆಕ್ ಸ್ಟಾರ್ಟ್ಅಪ್ ಎಂಬ ಕುಖ್ಯಾತಿಗೆ ಪಾತ್ರವಾಗಿದೆ.
ಪೂರ್ಣಾವಧಿ, ಅರೆಕಾಲಿಕ ಕೆಲಸಗಾರರು ಮತ್ತು ಗುತ್ತಿಗೆದಾರರ ಮೇಲೆ ಪರಿಣಾಮ ಬೀರುವ ವಜಾಗೊಳಿಸುವಿಕೆಯನ್ನು ಎರಡು ನಿಮಿಷಗಳ ಗೂಗಲ್‌ ಮೀಟ್‌ (Google Meet) ಕರೆಯ ಮೂಲಕ ತಿಳಿಸಲಾಗಿದೆ ಎಂದು ಟೆಕ್ ಕ್ರಂಚ್‌ (TechCrunch) ವರದಿ ಮಾಡಿದೆ.
ಫ್ರಂಟ್ಡೆಸ್ಕ್ ಸಿಇಒ ಜೆಸ್ಸಿ ಡಿಪಿಂಟೊ ಅವರು, ಗೂಗಲ್‌ ಮೀಟ್‌ ಕರೆ ಸಮಯದಲ್ಲಿ ಕಂಪನಿಯ ಹಣಕಾಸಿನ ಪರಿಸ್ಥಿತಿಯ ಬಗ್ಗೆ ಉದ್ಯೋಗಿಗಳಿಗೆ ಮಾಹಿತಿ ನೀಡಿದರು, ದಿವಾಳಿತನದ ಪರ್ಯಾಯವಾದ ಸರ್ಕಾರಿ ರಿಸೀವರ್‌ಶಿಪ್‌ಗಾಗಿ ಸಲ್ಲಿಸುವ ಕಂಪನಿಯ ಉದ್ದೇಶವನ್ನು ಬಹಿರಂಗಪಡಿಸಿದರು ಎಂದು ವರದಿ ಹೇಳಿದೆ.
2017 ರಲ್ಲಿ ಸ್ಥಾಪನೆಯಾದ ಫ್ರಂಟ್ಡೆಸ್ಕ್ ಸ್ಟಾರ್ಟ್‌ ಅಪ್‌ ಕಂಪನಿಯು, ಅಮೆರಿಕದಾದ್ಯಂತ 1,000 ಸುಸಜ್ಜಿತ ಅಪಾರ್ಟ್‌ಮೆಂಟ್‌ಗಳನ್ನು ನಿರ್ವಹಿಸುವಲ್ಲಿ ಪರಿಣತಿ ಹೊಂದಿದೆ. ವಿಸ್ಕಾನ್ಸಿನ್ ಮೂಲದ ಸಣ್ಣ ಪ್ರತಿಸ್ಪರ್ಧಿಯಾದ ಝೆನ್ಸಿಟಿಯನ್ನು ಖರೀದಿಸಿದ ಕೇವಲ ಏಳು ತಿಂಗಳ ನಂತರ ಕಂಪನಿಯು ಈ ಕಠಿಣ ಕ್ರಮ ತೆಗೆದುಕೊಂಡಿತು. ಕಂಪನಿಯು ಆಸ್ತಿ ಬಾಡಿಗೆ ಪಾವತಿಗಳೊಂದಿಗೆ ಹೆಣಗಾಡುತ್ತಿರುವಾಗ ಹಣಕಾಸಿನ ಸವಾಲುಗಳನ್ನು ಎದುರಿಸಿತು. ಸಂವಹನ ಸಮಸ್ಯೆಗಳಿಂದಾಗಿ ಭೂಮಾಲೀಕರೊಂದಿಗೆ ಸಂಬಂಧ ಹದಗೆಟ್ಟಿತು. ಆದಾಗ್ಯೂ ಜೆಟ್‌ಬ್ಲೂ ವೆಂಚರ್ಸ್, ವೆರಿಟಾಸ್ ಇನ್ವೆಸ್ಟ್‌ಮೆಂಟ್ಸ್ ಮತ್ತು ಸ್ಯಾಂಡ್ ಹಿಲ್ ಏಂಜಲ್ಸ್‌ನಂತಹ ಹೂಡಿಕೆದಾರರಿಂದ $26 ಮಿಲಿಯನ್ ಹಣ ಸಂಗ್ರಹಿಸಿದ್ದರೂ, ಹೆಚ್ಚುವರಿ ಬಂಡವಾಳವನ್ನು ಪಡೆದುಕೊಳ್ಳಲು ಫ್ರಂಟ್ಡೆಸ್ಕ್ ಕಂಪನಿಯ ಪ್ರಯತ್ನ ವಿಫಲವಾಯಿತು.
ಕೇವಲ ಎರಡು ತಿಂಗಳ ಹಿಂದೆ ಲಿಂಕ್ಡ್‌ಇನ್‌ನಲ್ಲಿ ಉದ್ಯೋಗಾವಕಾಶಗಳ ಪೋಸ್ಟ್ ಮಾಡಿದ್ದ ಕಂಪನಿ ಈ ತೊಂದರೆಗಳಿಂದಾಗಿ ಗಮನಾರ್ಹ ಸಂಖ್ಯೆಯ ಉದ್ಯೋಗಿಗಳನ್ನು ವಜಾಗೊಳಿಸುವ ಕಠಿಣ ನಿರ್ಧಾರವನ್ನು ತೆಗೆದುಕೊಂಡಿತು, ಇದು ಉದ್ಯೋಗಿಗಳಿಗೆ ತೀವ್ರ ತೊಂದರೆ ಉಂಟುಮಾಡಿತು.
ಫ್ರಂಟ್‌ಡೆಸ್ಕ್‌ನ ಇತ್ತೀಚಿನ ಸಾಮೂಹಿಕವಾಗಿ ನೌಕರರನ್ನು ಕೆಲಸದಿಂದ ತೆಗೆದುಹಾಕಿರುವುದು ಅಲ್ಪಾವಧಿಯ ಬಾಡಿಗೆ ವಲಯದಲ್ಲಿ ಇದೇ ರೀತಿಯ ಕಂಪನಿಗಳ ಕಾರ್ಯಸಾಧ್ಯತೆಯ ಬಗ್ಗೆ ಸಂದೇಹ ಮೂಡುವಂತೆ ಮಾಡಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ