ಚೀನಾದ ಕಂಪನಿಯೊಂದು ಅಭಿವೃದ್ಧಿಪಡಿಸಿದ ಡ್ರೋನ್ ವಿಶ್ವದ ಅತ್ಯಂತ ಎತ್ತರದ ಮೌಂಟ್ ಎವರೆಸ್ಟ್ ಮೇಲೆ ಹಾರಾಟ ನಡೆಸಿದೆ. ಡ್ರೋನ್ ಅತ್ಯಾಧುನಿಕ ತಂತ್ರಜ್ಞಾನ ಬಳಸಿ ಸೆರೆ ಹಿಡಿದ ದೃಶ್ಯಗಳು ಈಗ ವೈರಲ್‌ ಆಗಿದೆ.
ಡ್ರೋನ್ ತಯಾರಕರಾದ ಡಿಜೆಐ ಹಾಗೂ 8KRAW ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ಈ ಸಾಧನಕ್ಕೆ ಡಿಜೆಐ ಮೇವಿಕ್ 3 ಡ್ರೋನ್ ಎಂದು ಹೆಸರಿಡಲಾಗಿದೆ.
ನಾಲ್ಕು ನಿಮಿಷಗಳ ಈ ವೀಡಿಯೊದಲ್ಲಿ ಸಮುದ್ರ ಮಟ್ಟದಿಂದ 5,300 ಮೀಟರ್ ಎತ್ತರದಲ್ಲಿರುವ ಬೇಸ್‌ ಕ್ಯಾಂಪ್‌ನಿಂದ ಹಿಡಿದು, 6 ಸಾವಿರ ಮೀಟರ್ ಎತ್ತರದಲ್ಲಿರುವ ಕ್ಯಾಂಪ್‌ ಸೈಟ್‌, ಕುಂಬು ಐಸ್‌ಫಾಲ್‌ ಸುತ್ತಮುತ್ತಲಿನ ನೀರ್ಗಲ್ಲುಗಳನ್ನು ಸಹ ಸೆರೆ ಹಿಡಿದಿದೆ.
ಬಿಳಿ ಮಂಜು ಹೊದ್ದ ಎವರೆಸ್ಟ್‌ನ ಕಣಿವೆ ಹಾದಿಯಲ್ಲಿನ ಬೇಸ್‌ ಕ್ಯಾಂಪ್‌ನಲ್ಲಿ ಬಣ್ಣ ಬಣ್ಣದ ಟೆಂಟ್‌ಗಳು ಕಾಣುತ್ತವೆ. ಈ ವೀಡಿಯೊಕ್ಕೆ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.
ಹಿಮಾಲಯ ಪರ್ವತ ಶ್ರೇಣಿಯಲ್ಲಿರುವ ಮೌಂಟ್ ಎವರೆಸ್ಟ್ ಜಗತ್ತಿನ ಅತಿ ಎತ್ತರದ ಪರ್ವತ. ಸಮುದ್ರ ಮಟ್ಟದಿಂದ 8,848 ಮೀಟರ್ ಎತ್ತರದಲ್ಲಿರುವ ಈ ಪರ್ವತ ನೇಪಾಳ ಹಾಗೂ ಟಿಬೆಟ್‌ ಗಡಿಯನ್ನು ಹಂಚಿಕೊಳ್ಳುತ್ತದೆ. ಅತಿ ಎತ್ತರ, ಪ್ರತಿಕೂಲ ಹವಾಮಾನ ಹಾಗೂ ಕಠಿಣ ಹಾದಿಯಿಂದಾಗಿ ಇಂದಿಗೂ ಪರ್ವತಾರೋಹಿಗಳಿಗೆ ಇದು ಸವಾಲಾಗಿದೆ. 1953ರಲ್ಲಿ ಶೇರ್ಪಾ ತೇನ್‌ಸಿಂಗ್ ಹಾಗೂ ಎಡ್ಮಂಡ್ ಹಿಲೇರಿ ಅವರು ಮೊದಲ ಬಾರಿಗೆ ಎವರೆಸ್ಟ್‌ನ ತುದಿ ತಲುಪಿದ್ದರು.
ಈ ಅದ್ಭುತ ವೀಡಿಯೊಕ್ಕೆ ಅನೇಕರು ಪ್ರತಿಕ್ರಿಯಿಸಿದ್ದಾರೆ. ‘ಅಷ್ಟು ಎತ್ತರದಲ್ಲಿ ಡ್ರೋನ್ ಹಾರಾಟ ನಡೆಸಿದೆ ಎಂಬುದೇ ಅಚ್ಚರಿ. ಹಿಂದೆಂದೂ ನೋಡದ ಅದ್ಭುತ ವೀಡಿಯೊ ‘ ಎಂದು ಒಬ್ಬರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ‘ಈ ವೀಡಿಯೊ ನೋಡಿದ ಮೇಲೆ ಪರ್ವತಾರೋಹಣದ ನನ್ನ ಪಟ್ಟಿಯಿಂದ ಎವರೆಸ್ಟ್ ಕೈಬಿಡುತ್ತೇನೆ’ ಎಂದು ಮತ್ತೊಬ್ಬರು ಹೇಳಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ