ಜಗತ್ತಿನಲ್ಲಿ ಅನೇಕ ಜೀವಿಗಳಿವೆ, ಅವುಗಳ ಬಗ್ಗೆ ಜನರಿಗೆ ಕಡಿಮೆ ಜ್ಞಾನವಿದೆ. ಅವುಗಳಲ್ಲಿ ಕೆಲವು ಬಹಳ ಅನನ್ಯ ಮತ್ತು ಉಪಯುಕ್ತವಾಗಿವೆ. ಅನೇಕ ಸಂದರ್ಭಗಳಲ್ಲಿ ಮಾನವ ಜೀವನವು ಈ ಜೀವಿಗಳ ಮೇಲೆ ಅವಲಂಬಿತವಾಗಬೇಕಾಗುತ್ತದೆ. ಈ ಜಗತ್ತಿನಲ್ಲಿ ಅತ್ಯಂತ ದುಬಾರಿ ರಕ್ತವನ್ನು ಹೊಂದಿರುವ ಜೀವಿ ಇದೆ ಎಂದು ತಿಳಿದಿದೆಯೇ? ಮನುಷ್ಯರಂತೂ ಅಲ್ಲ, ಈ ಜೀವಿಯ ರಕ್ತವು ಪ್ರಪಂಚದಲ್ಲೇ ಅತ್ಯಂತ ದುಬಾರಿ ರಕ್ತ ಎಂದು ಹೇಳಿದರೆ ಆಶ್ಚರ್ಯವಾಗುತ್ತದೆ; ಇದು ತುಂಬಾ ದುಬಾರಿಯಾಗಿದೆ, ಅದನ್ನು ಸಂಗ್ರಹಿಸಲಾಗುತ್ತದೆ ಮತ್ತು ವೈದ್ಯಕೀಯ ಉದ್ದೇಶಗಳಿಗಾಗಿ ಬಳಸಲಾಗುತ್ತದೆ.
ನಾವು ಹಾರ್ಸ್‌ಶೂ ಏಡಿ ಬಗ್ಗೆ ಮಾತನಾಡುತ್ತಿದ್ದೇವೆ. ವರದಿಗಳ ಪ್ರಕಾರ, ಹಾರ್ಸ್‌ಶೂ ಏಡಿ 45 ಕೋಟಿ ವರ್ಷಗಳಷ್ಟು ಹಳೆಯದಾದ ಜೀವಿಯಾಗಿದ್ದು, ಇದು ಡೈನೋಸಾರ್‌ಗಳಿಗಿಂತ ಹಳೆಯದು ಎಂದು ಹೇಳಲಾಗುತ್ತದೆ. ಈ ಏಡಿಗಳ ರಕ್ತವು ವಿಶ್ವದಲ್ಲೇ ಅತ್ಯಂತ ದುಬಾರಿಯಾಗಿದೆ.
ಅವುಗಳ ದೇಹದಲ್ಲಿ ಚಿಪ್ಪುಗಳು ಮತ್ತು ಬಾಲವಿದೆ. ಈ ಏಡಿಗಳ ರಕ್ತವು ನೀಲಿ ಬಣ್ಣವನ್ನು ಹೊಂದಿರುತ್ತದೆ, ಏಕೆಂದರೆ ಅವುಗಳ ರಕ್ತವು ಹಿಮೋಸಯಾನಿನ್ ಮಿಶ್ರಣವಾಗಿದೆ. ಇದು ತಾಮ್ರ ಆಧಾರಿತ ಉಸಿರಾಟದ ವರ್ಣದ್ರವ್ಯವಾಗಿದೆ. ವರದಿಗಳ ಪ್ರಕಾರ, ಈ ಏಡಿಗಳು ಅತ್ಯಂತ ಮೌಲ್ಯಯುತವಾಗಿವೆ; ಇದರ ರಕ್ಕಕ್ಕೆ ಚಿನ್ನಕ್ಕಿಂತ ಹೆಚ್ಚಿನ ಬೆಲೆಯಿದೆ. ಹೀಗಾಗಿ ಇವುಗಳ ರಕ್ತವನ್ನು ನೀಲಿ ಚಿನ್ನ ಎಂದೂ ಕರೆಯುತ್ತಾರೆ.
ವರದಿಗಳ ಪ್ರಕಾರ, 1 ಲೀಟರ್ ರಕ್ತದ ಬೆಲೆ 15 ಸಾವಿರ ಡಾಲರ್ ಅಥವಾ ಅಂದಾಜು 12,58,221 ರೂ. ಈ ರಕ್ತಕ್ಕೆ ಇಷ್ಟೊಂದು ಬೆಲೆ ಯಾಕೆ ಗೊತ್ತಾ? ವಾಸ್ತವವಾಗಿ, ಈ ರಕ್ತದ ಔಷಧೀಯ ಮೌಲ್ಯವು ತುಂಬಾ ಹೆಚ್ಚಾಗಿದೆ. ಈ ಜೀವಿಯ ರಕ್ತವು ಲಿಮುಲಸ್ ಅಮೆಬೋಸೈಟ್ ಲೈಸೇಟ್ (LAL) ಎಂಬ ಪ್ರೋಟೀನ್ ಅನ್ನು ಹೊಂದಿರುತ್ತದೆ. ಇದನ್ನು ಔಷಧ ಮತ್ತು ವೈದ್ಯಕೀಯ ಉಪಕರಣ ತಯಾರಕರು ತಮ್ಮ ಉತ್ಪನ್ನಗಳನ್ನು ಪರೀಕ್ಷಿಸಲು ಬಳಸುತ್ತಾರೆ. ಇದರ ನೀಲಿ ಬಣ್ಣ ಮತ್ತು ಸೂಕ್ಷ್ಮ ಪ್ರಮಾಣದ ಬ್ಯಾಕ್ಟೀರಿಯಾದ ಮಾಲಿನ್ಯವನ್ನು ಪತ್ತೆಹಚ್ಚುವ ಸಾಮರ್ಥ್ಯವು ಇದನ್ನು ಹಲವಾರು ವಿಧಗಳಲ್ಲಿ ವಿಶೇಷಗೊಳಿಸುತ್ತದೆ. ಹಾರ್ಸ್‌ಶೂ ಏಡಿ ರಕ್ತದಲ್ಲಿ ಕಂಡುಬರುವ ವಿಶಿಷ್ಟವಾದ ಅಮೆಬೋಸೈಟ್ ಅನ್ನು ಪ್ರತ್ಯೇಕಿಸಲಾಗುತ್ತದೆ ಮತ್ತು ನಂತರ ಎಫ್‌ಡಿಎ ಪರೀಕ್ಷೆಯಲ್ಲಿ ಬಳಸಿಕೊಳ್ಳಲಾಗುತ್ತದೆ.
ತಮ್ಮ ಉತ್ಪನ್ನಗಳಲ್ಲಿ ಎಂಡೋಟಾಕ್ಸಿನ್ ಇರುವಿಕೆಯನ್ನು ಪರೀಕ್ಷಿಸಲು ಅವರು ಈ ರಕ್ತವನ್ನು ಬಳಸುತ್ತಾರೆ. 1960 ರ ದಶಕದಲ್ಲಿ, ವಿಜ್ಞಾನಿಗಳು ಹಾರ್ಸ್‌ಶೂ ಏಡಿ ರಕ್ತವನ್ನು ರೋಗಕಾರಕ ಬ್ಯಾಕ್ಟೀರಿಯಾದ ಸೂಕ್ಷ್ಮ ಮಟ್ಟವನ್ನು ಗುರುತಿಸಲು ಬಳಸಬಹುದು ಎಂದು ಕಂಡುಹಿಡಿದರು. ನಮ್ಮ ಯಾವುದೇ ಚುಚ್ಚುಮದ್ದುಗಳು, ಪ್ರತಿರಕ್ಷಣೆಗಳು ಅಥವಾ ಶಸ್ತ್ರಚಿಕಿತ್ಸಾ ಇಂಪ್ಲಾಂಟ್‌ಗಳು ಕಲುಷಿತವಾಗಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ಔಷಧೀಯ ವಲಯವು ಅದನ್ನು ಬಳಸುತ್ತಿದೆ.
ಈ ಬ್ಯಾಕ್ಟೀರಿಯಾದ ವಸ್ತುಗಳು ಮಾನವರಲ್ಲಿ ಜ್ವರವನ್ನು ಉಂಟುಮಾಡಬಹುದು ಮತ್ತು ಕೆಲವೊಮ್ಮೆ ಮಾರಕವಾಗಬಹುದು. ಈ ಜೀವಿಗಳು ಅಮೆರಿಕದ ಅಟ್ಲಾಂಟಿಕ್ ಸಾಗರದ ತೀರದಲ್ಲಿ ಕಂಡುಬರುತ್ತವೆ. ಈ ಜೀವಿಗಳ ರಕ್ತಸ್ರಾವ ಪ್ರಕ್ರಿಯೆಯ ನಂತರ, 10 ರಿಂದ 30 ಪ್ರತಿಶತ ಏಡಿಗಳು ಬದುಕುಳಿಯುವುದಿಲ್ಲ.
ವರದಿಗಳ ಪ್ರಕಾರ, ವೈದ್ಯಕೀಯ ಉದ್ಯಮವು ಸುಮಾರು 60,00,000 ಹಾರ್ಸ್‌ಶೂ ಏಡಿಗಳನ್ನು ಹಿಡಿಯುತ್ತವೆ. ಏಡಿಗಳು ತಮ್ಮ ರಕ್ತದಲ್ಲಿ 30 ಪ್ರತಿಶತದಷ್ಟು ಬರಿದಾಗುತ್ತವೆ ಮತ್ತು 30 ಪ್ರತಿಶತ ಏಡಿಗಳು ಈ ಪ್ರಕ್ರಿಯೆಯಲ್ಲಿ ಬದುಕುವುದಿಲ್ಲ. ಬದುಕುಳಿದವುಗಳನ್ನು ನೀರಿಗೆ ಪುನಃ ಬಿಡಲಾಗುತ್ತದೆ, ಆದರೆ ಅವುಗಳ ಎಷ್ಟು ಚೆನ್ನಾಗಿ ಚೇತರಿಸಿಕೊಂಡಿವೆ ಎಂದು ಯಾರಿಗೂ ತಿಳಿದಿಲ್ಲ.
ಅಮೇರಿಕನ್ ಹಾರ್ಸ್‌ಶೂ ಏಡಿಯನ್ನು 2016 ರಲ್ಲಿ ಇಂಟರ್ನ್ಯಾಷನಲ್ ಯೂನಿಯನ್ ಫಾರ್ ದಿ ಕನ್ಸರ್ವೇಶನ್ ಆಫ್ ನೇಚರ್‌ನ ಕೆಂಪು ಪಟ್ಟಿಯಲ್ಲಿ ʼದುರ್ಬಲʼ ಎಂದು ಪಟ್ಟಿ ಮಾಡಲಾಗಿದೆ, ಇದು ಅಳಿವಿನಂಚಿನಲ್ಲಿರುವ ಜೀವಿಗಳಿಗಿಂತ ಒಂದು ಹಂತ ಕಡಿಮೆಯಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ