ರೈಲು ಪ್ರಯಾಣದ ವೇಳೆ ಪ್ರಯಾಣಿಕ ಹೃದಯಾಘಾತಕ್ಕೆ ಒಳಗಾದ ನಂತರ ಟಿಕೆಟ್ ಪರೀಕ್ಷಕರೊಬ್ಬರು ಸುಮಾರು 15 ನಿಮಿಷಗಳ ಕಾಲ ವಯಸ್ಸಾದ ವ್ಯಕ್ತಿಗೆ ಸಿಪಿಆರ್ ಮಾಡಿ ಆತನ ಜೀವ ಉಳಿಸಿದ್ದಾರೆ.
ಬಿ.ಪಿ. ಕರ್ಣ ಮತ್ತು ಅವರ ಸಹೋದರ ಬಿಹಾರದ ದರ್ಬಂಗಾದಿಂದ ಉತ್ತರ ಪ್ರದೇಶದ ವಾರಣಾಸಿಗೆ ಪವನ್ ಎಕ್ಸ್‌ಪ್ರೆಸ್‌ನ ಪ್ರಥಮ ದರ್ಜೆ ಕೋಚ್‌ನಲ್ಲಿ ಪ್ರಯಾಣಿಸುತ್ತಿದ್ದಾಗ ಕರ್ಣ ಅವರಿಗೆ ಎದೆನೋವು ಕಾಣಿಸಿಕೊಂಡು ಪ್ರಜ್ಞೆ ಕಳೆದುಕೊಂಡರು. ಅವರ ಸಹೋದರ ತಕ್ಷಣವೇ ರೈಲ್ವೇಸ್‌ನ ರೈಲ್‌ ಮದದ್‌ ಪೋರ್ಟಲ್ ಮೂಲಕ ಅಲರ್ಟ್‌ ನೀಡಿದರು.
ಎನ್‌ಡಿಟಿವಿ ವರದಿಯ ಪ್ರಕಾರ, ಟಿಕೆಟ್ ಪರೀಕ್ಷಕ ಸವಿಂದಕುಮಾರ ಅಲರ್ಟ್‌ ಸ್ವೀಕರಿಸಿ ತಕ್ಷಣವೇ ಕೋಚ್‌ಗೆ ಧಾವಿಸಿದರು.
ಏತನ್ಮಧ್ಯೆ, ಪ್ರಯಾಣಿಕರ ಸಹೋದರ ಅವರ ಕುಟುಂಬ ವೈದ್ಯರನ್ನು ಸಂಪರ್ಕಿಸಿದರು, ಅವರು ಕಾರ್ಡಿಯೋ ಪಲ್ಮನರಿ ರೆಸಸಿಟೇಶನ್ (CPR) ನೀಡುವಂತೆ ಸಲಹೆ ನೀಡಿದರು. ಟಿಕೆಟ್ ಪರೀಕ್ಷಕ ಸವಿಂದಕುಮಾರ ವೈದ್ಯರ ಸೂಚನೆಗಳನ್ನು ಅನುಸರಿಸಿದರು ಮತ್ತು ವಯಸ್ಸಾದ ಪ್ರಯಾಣಿಕರಿಗೆ ಪ್ರಜ್ಞೆ ಬರುವವರೆಗೆ ಸುಮಾರು 15 ನಿಮಿಷಗಳ ಕಾಲ ಸಿಪಿಆರ್ ಅನ್ನು ಮಾಡುತ್ತಲೇ ಇದ್ದರು.
ಮೊದಲೇ ಅಲರ್ಟ್‌ ಮಾಡಿದ್ದರಿಂದ ರೈಲು ಛಪ್ರಾ ನಿಲ್ದಾಣಕ್ಕೆ ಬಂದಾಗ ರೈಲ್ವೇ ವೈದ್ಯಕೀಯ ತಂಡವು ಅಲ್ಲಿ ಕಾಯುತ್ತಿತ್ತು. ವೃದ್ಧ ಪ್ರಯಾಣಿಕನನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ರವಾನಿಸಲಾಗಿದೆ.
ಟಿಕೆಟ್ ಪರೀಕ್ಷಕ ಸವಿಂದಕುಮಾರ ಅವರನ್ನು ಸನ್ಮಾನಿಸಿ, ಅವರ ಶ್ರಮಕ್ಕೆ ನಗದು ಬಹುಮಾನ ನೀಡಲಾಗುವುದು ಎಂದು ವಿಭಾಗೀಯ ರೈಲ್ವೆ ವ್ಯವಸ್ಥಾಪಕ ವಿವೇಕಭೂಷಣ ಸೂದ್ ಪ್ರಕಟಿಸಿದ್ದಾರೆ. ಅವರ ಈ ಕಾರ್ಯಕ್ಕೆ ರೈಲ್ವೆ ಅಧಿಕಾರಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ದೆಹಲಿ ವಿಮಾನ ನಿಲ್ದಾಣದಲ್ಲಿ ವೃದ್ಧನ ಜೀವ ಉಳಿಸಿದ ವೈದ್ಯರು
ಜುಲೈ 17 ರಂದು ದೆಹಲಿ ವಿಮಾನ ನಿಲ್ದಾಣದಲ್ಲಿ ವೈದ್ಯರ ಸಮಯೋಚಿತ ಕ್ರಮವು ಹೃದಯಾಘಾತದಿಂದ ಬಳಲುತ್ತಿದ್ದ ವಯೋವೃದ್ಧರೊಬ್ಬರ ಜೀವವನ್ನು ಉಳಿಸಿದೆ. ಇಂದಿರಾಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್ 2 ರಲ್ಲಿ ಹೃದಯಾಘಾತಕ್ಕೆ ಒಳಗಾದ ನಂತರ ವೃದ್ಧರು ಮೂರ್ಛೆ ಹೋದರು ಹಾಗೂ ಅವರ ನಾಡಿಮಿಡಿತ ನಿಂತುಹೋಗಿತ್ತು ಎಂದು ವರದಿಯಾಗಿತ್ತು.ವೈದ್ಯರು ತಮ್ಮ ನಾಡಿಮಿಡಿತ ವಾಪಸ್‌ ಬರುವವರೆಗೆ ಕಾರ್ಡಿಯೋಪಲ್ಮನರಿ ರೆಸಸಿಟೇಶನ್ (CPR) ಮಾಡಿದರು. ವೈದ್ಯರ ಪ್ರಯತ್ನಗಳು ಫಲ ನೀಡಿತು. ವೃದ್ಧರು ಎಚ್ಚರಗೊಂಡರು. ಈ ಘಟನೆಯ ವೀಡಿಯೊ ವೈರಲ್ ಆಗಿತ್ತು.
ಕಾರ್ಡಿಯೋ ಪಲ್ಮನರಿ ರೆಸಸಿಟೇಶನ್ (CPR) ಎನ್ನುವುದು ವ್ಯಕ್ತಿಯ ಉಸಿರಾಟ ಅಥವಾ ಹೃದಯ ಬಡಿತ ನಿಂತಾಗ ಮಾಡುವ ತುರ್ತು ವಿಧಾನವಾಗಿದೆ. ಇದು ಸಾಮಾನ್ಯವಾಗಿ ಕೈಗಳನ್ನು ಒಟ್ಟಿಗೆ ಇರಿಸುವುದು ಮತ್ತು ಎದೆಯ ಮೇಲೆ ದೃಢವಾದ, ಕ್ಷಿಪ್ರ ಒತ್ತಡವನ್ನು ಅನ್ವಯಿಸುವುದನ್ನು ಒಳಗೊಂಡಿದೆ. ಈ ತಂತ್ರವನ್ನು ಪ್ರಮುಖ ಜೀವ ಉಳಿಸುವ ಕೌಶಲ್ಯವೆಂದು ಪರಿಗಣಿಸಲಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ