ಮಂಗಳವಾರ ಆಸ್ಟ್ರೇಲಿಯಾದ ಪೂರ್ವದಲ್ಲಿರುವ ವನವಾಟು ದ್ವೀಪದಲ್ಲಿ 7.3 ತೀವ್ರತೆಯ ಭೂಕಂಪ ಸಂಭವಿಸಿದ್ದು, ರಾಜಧಾನಿ ಪೋರ್ಟ್ ವಿಲಾದಲ್ಲಿ ವ್ಯಾಪಕ ವಿನಾಶ ಉಂಟು ಮಾಡಿದೆ.
ಅಮೆರಿಕ ಭೂವೈಜ್ಞಾನಿಕ ಸಮೀಕ್ಷೆಯ ಪ್ರಕಾರ, ಸ್ಥಳೀಯ ಕಾಲಮಾನ ಮಧ್ಯಾಹ್ನ 12:47 ಕ್ಕೆ, ಮುಖ್ಯ ದ್ವೀಪ ಎಫೇಟ್‌ನ ಕರಾವಳಿಯಿಂದ ಸರಿಸುಮಾರು 30 ಕಿಮೀ ದೂರದಲ್ಲಿ 57 ಕಿಮೀ ಆಳದಲ್ಲಿ ತೀವ್ರ ಕಂಪನ ಸಂಭವಿಸಿದೆ. ಭೂ ಕಂಪನ ಸಂಭವಿಸಿದ ಕ್ಷಣವನ್ನು ತೋರಿಸುವ ಹಲವಾರು ವೀಡಿಯೊಗಳು ಈಗ ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ವೈರಲ್ ಆಗುತ್ತಿವೆ.
ಒಂದು ವೈರಲ್ ಕ್ಲಿಪ್ ನಲ್ಲಿ ಭೂಕಂಪದಿಂದ ಗ್ಯಾರೇಜ್‌ ಒಂದರಲ್ಲಿ ವಾಹನಗಳು ಜೋರಾಗಿ ಅಲುಗಾಡಿವೆ. ಕೆಲವು ಸಾಮಾನುಗಳು ಬಿದ್ದಿವೆ. ಇದರ ನಡುವೆ ನಾಯಿಯೊಂದುಗಾಬರಿಯಿಂದ ಓಡಿಹೋಗುವುದು ಕಾಣಿಸಿದೆ.
ಮತ್ತೊಂದು ವೀಡಿಯೊ ಭೂಕಂಪದ ನಂತರದ ಪರಿಣಾಮಗಳನ್ನು ಬಹಿರಂಗಪಡಿಸಿತು, ಅಮೆರಿಕ, ಯುನೈಟೆಡ್‌ ಕಿಂಗ್ಡಂ ಮತ್ತು ಫ್ರೆಂಚ್ ರಾಯಭಾರಿ ಕಟ್ಟಡಗಳಿಗೆ ಗಮನಾರ್ಹ ಹಾನಿಯಾಗಿದೆ. ಮಧ್ಯಾಹ್ನದ ಭಾರೀ ಭೂಕಂಪದ ನಂತರ ಪೋರ್ಟ್ ವಿಲಾದಲ್ಲಿನ ಕೇರ್ ಇಂಟರ್‌ನ್ಯಾಷನಲ್‌ನ ಕಚೇರಿಗೆ ವ್ಯಾಪಕ ಹಾನಿಯಾಗಿದೆ.
ನಗರದಲ್ಲಿನ ಅನೇಕ ದೊಡ್ಡ ಕಟ್ಟಡಗಳು ಕುಸಿದಿವೆ ಎಂದು ವರದಿಯಾಗಿದೆ, ವ್ಯಾಪಕವಾದ ವಿದ್ಯುತ್ ಕಡಿತ ಮತ್ತು ನೀರು ಸರಬರಾಜು ಅಡೆತಡೆಗಳು ರಾಜಧಾನಿಯ ಬಹುಪಾಲು ಮೇಲೆ ಪರಿಣಾಮ ಬೀರಿವೆ.
ಭೂಕಂಪದ ನಂತರ, ವನವಾಟುಗೆ ಸುನಾಮಿ ಎಚ್ಚರಿಕೆಯನ್ನು ನೀಡಲಾಗಿತ್ತು. ಬಳಿಕ ಎಚ್ಚರಿಕೆಯನ್ನು ಹಿಂಪಡೆಯಲಾಯಿತು. ಪೆಸಿಫಿಕ್‌ನ ಭೂಕಂಪಗಳ ರಿಂಗ್ ಆಫ್ ಫೈರ್‌ನ ಉದ್ದಕ್ಕೂ ನೆಲೆಗೊಂಡಿರುವ ವನವಾಟು, ಪ್ರಪಂಚದ ಅತ್ಯಂತ ವಿಪತ್ತು-ಪೀಡಿತ ರಾಷ್ಟ್ರಗಳಲ್ಲಿ ಒಂದಾಗಿದೆ.. 2024 ರ ವಿಶ್ವ ಅಪಾಯದ ವರದಿಯು ವನವಾಟು ತನ್ನ ತಗ್ಗು ಪ್ರದೇಶದ ಭೌಗೋಳಿಕತೆ ಮತ್ತು ಸೀಮಿತ ಮೂಲಸೌಕರ್ಯದಿಂದಾಗಿ ಇಂತಹ ಘಟನೆಗಳಿಗೆ ಹೆಚ್ಚು ದುರ್ಬಲವಾಗಿದೆ ಎಂದು ಹೇಳಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ