ಬಾಂಗ್ಲಾದೇಶದಲ್ಲಿ ಮುಹಮ್ಮದ್ ಯೂನಸ್ ಅವರ ಮಧ್ಯಂತರ ಸರ್ಕಾರಕ್ಕೆ ಹಣಕಾಸು ನೆರವಿಗೆ ದೊಡ್ಡ ಹೊಡೆತಬಿದ್ದಿದೆ. ಬಾಂಗ್ಲಾದೇಶಕ್ಕೆ ತನ್ನ ಎಲ್ಲ ನೆರವು ಮತ್ತು ನೆರವಿನ ಯೋಜನೆಗಳನ್ನು ಸ್ಥಗಿತಗೊಳಿಸಲು ಅಮೆರಿಕದ ಅಂತಾರಾಷ್ಟ್ರೀಯ ಅಭಿವೃದ್ಧಿ ಸಂಸ್ಥೆ (USAID) ಆದೇಶಿಸಿದೆ. ಇದನ್ನು ಬಾಂಗ್ಲಾದೇಶದ ಯೂನಸ್ ಸರ್ಕಾರಕ್ಕೆ ದೊಡ್ಡ ಹೊಡೆತ ಎಂದು ಪರಿಗಣಿಸಲಾಗುತ್ತಿದೆ.
ಶನಿವಾರ ಯೋಜನೆಯ ಅನುಷ್ಠಾನ ಪಾಲುದಾರರಿಗೆ ಕಳುಹಿಸಲಾದ ಸಂದೇಶದಲ್ಲಿ, ಅಮೆರಿಕದ ಅಂತಾರಾಷ್ಟ್ರೀಯ ಅಭಿವೃದ್ಧಿ ಸಂಸ್ಥೆ (USAID) ಬಾಂಗ್ಲಾದೇಶದಲ್ಲಿರುವ ತನ್ನ ಪಾಲುದಾರರಿಗೆ ಆದೇಶವನ್ನು ರವಾನಿಸಿದೆ.
ಅಮೆರಿಕದ ಅಂತಾರಾಷ್ಟ್ರೀಯ ಅಭಿವೃದ್ಧಿ ಸಂಸ್ಥೆ (USAID) ತನ್ನ ಪತ್ರದಲ್ಲಿ, ಬಾಂಗ್ಲಾದೇಶ ಅನುಷ್ಠಾನ ಪಾಲುದಾರರಿಗೆ “ಅಮೆರಿಕದ ಅಂತಾರಾಷ್ಟ್ರೀಯ ಅಭಿವೃದ್ಧಿ ಸಂಸ್ಥೆ (USAID)/ಬಾಂಗ್ಲಾದೇಶ ಒಪ್ಪಂದ, ಕೆಲಸದ ಆದೇಶ, ಅನುದಾನ, ಸಹಕಾರ ಒಪ್ಪಂದ, ಅಥವಾ ಇತರ ನೆರವಿನ ಅಡಿಯಲ್ಲಿನ ಎಲ್ಲ ಕೆಲಸವನ್ನು ತಕ್ಷಣವೇ ನಿಲ್ಲಿಸಲು ಅಥವಾ ಅಮಾನತುಗೊಳಿಸುವಂತೆ ನಿರ್ದೇಶಿಸಲಾಗಿದೆ ಎಂದು ತಿಳಿಸಿದೆ.
ಟ್ರಂಪ್ ಅಧಿಕಾರಕ್ಕೆ ಬಂದ ನಂತರದ ಮೊದಲ ಪ್ರಮುಖ ಹೆಜ್ಜೆ ಇದಾಗಿದ್ದು, ವಿದೇಶಿ ನೆರವು ಅಮಾನತು ಆದೇಶವು ಇಸ್ರೇಲ್ ಮತ್ತು ಈಜಿಪ್ಟ್‌ಗೆ ಮಿಲಿಟರಿ ಹಣಕಾಸು ನೆರವು ಹೊರತುಪಡಿಸಿ ಅಸ್ತಿತ್ವದಲ್ಲಿರುವ ಎಲ್ಲಾ ವಿದೇಶಿ ಸಹಾಯವನ್ನೂ ಒಳಗೊಂಡಿದೆ. ಇದರಿಂದಾಗಿ ಅಭಿವೃದ್ಧಿ ಕಾರ್ಯಗಳಿಗಾಗಿ ಬಾಂಗ್ಲಾದೇಶಕ್ಕೆ ನೀಡಲಾಗುತ್ತಿದ್ದ ನೆರವು ನಿಲ್ಲುತ್ತದೆ.
ರೋಹಿಂಗ್ಯಾ ಬಿಕ್ಕಟ್ಟಿಗೆ ಸಂಬಂಧಿಸಿದಂತೆ ಅಮೆರಿಕವು ಮಾನವೀಯ ನೆರವು ನೀಡುವ ಪ್ರಮುಖ ದೇಶವಾಗಿದೆ. ಮತ್ತು 2017 ರಿಂದ ಸುಮಾರು $2.4 ಶತಕೋಟಿ ನೆರವು ನೀಡಿದೆ. ಬಾಂಗ್ಲಾದೇಶವು ಈಗಾಗಲೇ ದೊಡ್ಡ ಆರ್ಥಿಕ ಬಿಕ್ಕಟ್ಟನ್ನು ಎದುರಿಸುತ್ತಿರುವ ಕಾರಣ ಮುಹಮ್ಮದ್ ಯೂನಸ್ ನೇತೃತ್ವದ ಬಾಂಗ್ಲಾದೇಶ ಸರ್ಕಾರಕ್ಕೆ ಈ ಬೆಳವಣಿಗೆಯು ಪ್ರಮುಖ ಹಿನ್ನಡೆಯಾಗಿದೆ.
ಜನವರಿ 20 ರಂದು ಅಧಿಕಾರ ವಹಿಸಿಕೊಂಡ ಕೆಲವೇ ಗಂಟೆಗಳಲ್ಲಿ, ಅಧ್ಯಕ್ಷ ಟ್ರಂಪ್ ಅಮೆರಿಕದ ವಿದೇಶಿ ನೆರವಿನ ಮೇಲೆ 90 ದಿನಗಳ ನಿಷೇಧವನ್ನು ವಿಧಿಸುವ ಆದೇಶವನ್ನು ಜಾರಿಗೊಳಿಸಿದರು. ಆದಾಗ್ಯೂ, ಆದೇಶದ ವ್ಯಾಪ್ತಿ ತಕ್ಷಣವೇ ತಿಳಿದಿಲ್ಲ.
ಈ ಆದೇಶವು ಶತಕೋಟಿ ಡಾಲರ್ ಸಹಾಯವನ್ನು ಕಡಿತಗೊಳಿಸುವ ಸಾಧ್ಯತೆಯಿದೆ. ಅಮೆರಿಕ ಜಾಗತಿಕ ನೆರವಿನ ವಿಶ್ವದ ಏಕೈಕ ದೊಡ್ಡ ದಾನಿಯಾಗಿದೆ. ಇದು 2023 ರಲ್ಲಿಯೇ ಸುಮಾರು 72 ಶತಕೋಟಿ ನೆರವು ನೀಡಿದೆ. ಕಳೆದ ವರ್ಷ ಶೇಖ್ ಹಸೀನಾ ಸರ್ಕಾರವನ್ನು ಪದಚ್ಯುತಗೊಳಿಸಿದ ಹಿಂಸಾತ್ಮಕ ಕ್ರಾಂತಿಯ ನಂತರ ಬಾಂಗ್ಲಾದೇಶವು ಸಹಜತೆಯನ್ನು ಪುನಃಸ್ಥಾಪಿಸಲು ಹೆಣಗಾಡುತ್ತಿರುವಾಗ ಹಾಗೂ ಅಸ್ಥಿರತೆಯಿಂದ ಆರ್ಥಿಕ ಬೆಳವಣಿಗೆ ಕುಂಠಿತವಾಗಿರುವಾಗ ಬಾಂಗ್ಲಾದೇಶಕ್ಕೆ ಈ ಆದೇಶವು ದೊಡ್ಡ ಹಿನ್ನಡೆ ಎಂದು ಪರಿಗಣಿಸಲಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ