ಫರಿದಾಬಾದ್: ಮಂಗಳವಾರ ಹರಿಯಾಣದ ಫರಿದಾಬಾದ್ನಲ್ಲಿ 45 ವರ್ಷದ ವ್ಯಕ್ತಿ ಮತ್ತು ಆತನ ನಾಲ್ವರು ಪುತ್ರರು ರೈಲಿಗೆ ಸಿಲುಕಿ ನಜ್ಜುಗುಜ್ಜಾಗಿದ್ದಾರೆ.
ರೈಲು ಬರುವಾಗ ಹಳಿಗಳ ಮೇಲಿದ್ದ ಮೂರರಿಂದ ಒಂಬತ್ತು ವರ್ಷದೊಳಗಿನ ಮಕ್ಕಳು ಕಿರುಚುತ್ತಿದ್ದರೂ ಅವರ ತಂದೆ ಎಕ್ಸ್ಪ್ರೆಸ್ ರೈಲು ಸಮೀಪಿಸುತ್ತಿದ್ದಂತೆ ಅವರನ್ನು ಗಟ್ಟಿಯಾಗಿ ಹಿಡಿದುಕೊಂಡಿದ್ದರು. ರೈಲು ಡಿಕ್ಕಿ ಹೊಡೆದು ಅವರೆಲ್ಲರೂ ಸ್ಥಳದಲ್ಲೇ ಸಾವಿಗೀಡಾಗಿದ್ದಾರೆ.
ಬಿಹಾರ ಮೂಲದ ಮನೋಜ ಮಹತೋ ಎಂಬವರು, ಪತ್ನಿ ಪ್ರಿಯಾ ಜೊತೆ ಜಗಳವಾಡಿದ ನಂತರ ಮನೆಯಿಂದ ಹೊರಟುಹೋದರು ಎನ್ನಲಾಗಿದೆ. ಮಹತೋ ತನ್ನ ಪತ್ನಿಯ ಮೇಲೆ ದಾಂಪತ್ಯ ದ್ರೋಹದ ಆರೋಪ ಮಾಡಿದ್ದರಿಂದ ಅವರು ಆಗಾಗ್ಗೆ ಜಗಳವಾಡುತ್ತಿದ್ದರು.
ಮಂಗಳವಾರ ಬೆಳಿಗ್ಗೆ ಮತ್ತೆ ಜಗಳವಾಡಿದ ನಂತರ, ಈ ವ್ಯಕ್ತಿ ತಮ್ಮ ನಾಲ್ವರು ಪುತ್ರರಾದ ಪವನ (10), ಕರು (9), ಮುರಳಿ (5) ಮತ್ತು ಚೋಟು (3) ಅವರನ್ನು ಉದ್ಯಾನವನಕ್ಕೆ ಕರೆದೊಯ್ಯುವುದಾಗಿ ಹೇಳಿ ಮನೆಯಿಂದ ಕರೆದುಕೊಂಡು ಹೊರಟುಹೋದರು.
ಅವರು ಉದ್ಯಾನವನಕ್ಕೆ ಹೋಗುವ ಬದಲು, ದಾರಿಯಲ್ಲಿ ಚಿಪ್ಸ್ ಮತ್ತು ತಂಪು ಪಾನೀಯಗಳನ್ನು ಖರೀದಿಸುತ್ತಾ ರೈಲ್ವೆ ಹಳಿಗಳಿಗೆ ಮಕ್ಕಳನ್ನು ಕರೆದೊಯ್ದರು.
ಅವರು ಸುಮಾರು ಒಂದು ಗಂಟೆ ಕಾಲ ರೈಲು ಬರುವುದಕ್ಕಾಗಿ ಹಳಿಗಳ ಬಳಿಯ ಫ್ಲೈಓವರ್ ಅಡಿಯಲ್ಲಿ ಕಾಯುತ್ತಿದ್ದರು. ರೈಲು ಬಂದಾಗ, ಮಹತೋ ನಾಲ್ವರು ಪುತ್ರರನ್ನು ಗಟ್ಟಿಯಾಗಿ ಹಿಡಿದುಕೊಂಡು ಹಳಿಗಳ ಮೇಲೆ ನಿಂತಿದ್ದರು ಎಂದು ಆರೋಪಿಸಲಾಗಿದೆ. ಮಕ್ಕಳು ಕಿರುಚುತ್ತಿರುವುದನ್ನು ನೋಡಿದ ಪ್ರತ್ಯಕ್ಷದರ್ಶಿಗಳು ಭಯಭೀತರಾಗಿ ಕೂಗಿಕೊಂಡರು. ಆದರೆ ಅವರ ತಂದೆ ಅವರನ್ನು ಬಿಡಲು ನಿರಾಕರಿಸಿದರು. ಐವರ ಕಡೆಗೆ ವೇಗವಾಗಿ ಬಂದಗೋಲ್ಡನ್ ಟೆಂಪಲ್ ಎಕ್ಸ್ಪ್ರೆಸ್ ಅವರನ್ನು ಪುಡಿಪುಡಿ ಮಾಡಿ ಹೋಯಿತು.
ಈ ಘಟನೆ ಮಧ್ಯಾಹ್ನ 12:55 ರ ಸುಮಾರಿಗೆ ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಆ ವ್ಯಕ್ತಿ ತನ್ನ ಇಬ್ಬರು ಮಕ್ಕಳನ್ನು ಹೆಗಲ ಮೇಲೆ ಹೊತ್ತುಕೊಂಡು, ಉಳಿದ ಇಬ್ಬರ ಕೈಗಳನ್ನು ಹಿಡಿದುಕೊಂಡು ಮಹತೋ ರೈಲ್ವೆ ಹಳಿಯಲ್ಲಿ ನಡೆದುಕೊಂಡು ಹೋಗುತ್ತಿರುವುದನ್ನು ಪ್ರತ್ಯಕ್ಷದರ್ಶಿಗಳು ನೋಡಿದ್ದಾರೆ. ರೈಲು ಲೋಕೊ ಪೈಲಟ್ನ ಎಚ್ಚರಿಕೆಯ ಹೊರತಾಗಿಯೂ, ಆ ವ್ಯಕ್ತಿ ಅಲುಗಾಡದೆ ಮಕ್ಕಳನ್ನು ಗಟ್ಟಿಯಾಗಿ ಹಿಡಿದುಕೊಂಡ ರೈಲ್ವೆ ಹಳಿಯ ಮೇಲೆ ನಿಂತಿದ್ದ ಎನ್ನಲಾಗಿದೆ.
ಪೊಲೀಸ್ ತಂಡವು ಶವಗಳನ್ನು ಹಳಿಯಿಂದ ಹೊರತೆಗೆದಿದೆ.. ಮಹತೋ ಅವರ ಜೇಬಿನಲ್ಲಿ ಅವರ ಪತ್ನಿಯ ಫೋನ್ ಸಂಖ್ಯೆ ಜೊತೆ ಒಂದು ಟಿಪ್ಪಣಿಯೂ ಪೊಲೀಸರಿಗೆ ಸಿಕ್ಕಿದೆ. “ಮಹಾತೋ ತಮ್ಮ ಪತ್ನಿ ವಿಶ್ವಾಸದ್ರೋಹಿ ಎಂದು ಅನುಮಾನಿಸಿದ್ದರು. ಅದು ಅವರ ಈ ತೀವ್ರ ಹೆಜ್ಜೆಗೆ ಕಾರಣವಾಗಿರಬಹುದು” ಎಂದು ರೈಲ್ವೆ ಪೊಲೀಸ್ ಅಧಿಕಾರಿ ರಾಜಪಾಲ ಹೇಳಿದ್ದಾರೆ
ಮಹತೋ ಅವರ ಪತ್ನಿ ಪ್ರಿಯಾ ಅವರನ್ನು ಸ್ಥಳಕ್ಕೆ ಕರೆದೊಯ್ಯುವಾಗ, ಶವಗಳನ್ನು ನೋಡಿ ಅವರು ಮೂರ್ಛೆ ಹೋದರು ಎಂದು ವರದಿಯಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ