ಪಾಕಿಸ್ತಾನ ಮೂಲದ ಭಯೋತ್ಪಾದಕ ಸಂಘಟನೆ ಜೈಶ್-ಇ-ಮೊಹಮ್ಮದ್ (JeM) ನ ಮುಖ್ಯಸ್ಥ ಮಸೂದ್ ಅಜರ್ ಸಾಮಾಜಿಕ ಮಾಧ್ಯಮ ಪೋಸ್ಟ್ನಲ್ಲಿ ಆಘಾತಕಾರಿ ಸಂಗತಿಯನ್ನು ಬಹಿರಂಗಪಡಿಸಿದ್ದಾನೆ. ಈ ಸಂಘಟನೆಯ ಮಹಿಳಾ ವಿಭಾಗಕ್ಕೆ 5,000ಕ್ಕೂ ಹೆಚ್ಚು ಮಹಿಳೆಯರನ್ನು ನೇಮಕ ಮಾಡಲಾಗಿದೆ ಎಂದು ಆತ ಹೇಳಿಕೊಂಡಿದ್ದಾನೆ. ಈ ಮಹಿಳಾ ಸದಸ್ಯರಿಗೆ ಆತ್ಮಹತ್ಯಾ ದಾಳಿಗಳಿಗಾಗಿ ತರಬೇತಿ ನೀಡಲಾಗುತ್ತಿದ್ದು, ಉಗ್ರವಾದದ ಸಿದ್ಧಾಂತಕ್ಕೆ ಅವರನ್ನು ಒಳಪಡಿಸಲಾಗುತ್ತಿದೆ ಎಂದು ವರದಿಗಳು ತಿಳಿಸಿವೆ.
ಮಸೂದ್ ಅಜರ್ ತನ್ನ ಪೋಸ್ಟ್ನಲ್ಲಿ, “ಕೇವಲ ಕೆಲವೇ ವಾರಗಳಲ್ಲಿ 5,000 ಕ್ಕೂ ಹೆಚ್ಚು ಮಹಿಳೆಯರು ಸೇರಿರುವುದು ದೇವರ ಕೃಪೆ. ಅನೇಕ ಸಹೋದರಿಯರು ತಾವು ನೇಮಕಗೊಂಡ ತಕ್ಷಣವೇ ತಮ್ಮ ಮನಃಸ್ಥಿತಿ ಬದಲಾಗಿದ್ದು, ಜೀವನದ ಗುರಿಯ ಅರಿವಾಗಿದೆ ಎಂದು ಹೇಳಿದ್ದಾರೆ. ಜಿಲ್ಲಾ ಮಟ್ಟದ ಘಟಕಗಳನ್ನು ರಚಿಸಲಾಗುವುದು, ಪ್ರತಿ ಜಿಲ್ಲೆಗೂ ಮ್ಯಾನೇಜರ್ (ಮುಂತಜಿಮಾ) ಇರುತ್ತಾರೆ ಮತ್ತು ಕೆಲಸವನ್ನು ವಿತರಿಸಲಾಗುತ್ತದೆ. ಇಷ್ಟು ಕಡಿಮೆ ಅವಧಿಯಲ್ಲಿ 5,000 ಸದಸ್ಯರು!” ಎಂದು ಬರೆದುಕೊಂಡಿದ್ದಾನೆ.
ಮಸೂದ್ ಅಜರ್ ಸಹೋದರಿ ನೇತೃತ್ವದಲ್ಲಿ ‘ಜಮಾತ್-ಉಲ್-ಮೋಮಿನಾತ್’
ಜೈಶ್-ಇ-ಮೊಹಮ್ಮದ್ನ ಈ ಮಹಿಳಾ ವಿಭಾಗಕ್ಕೆ ‘ಜಮಾತ್-ಉಲ್-ಮೋಮಿನಾತ್’ ಎಂದು ಹೆಸರಿಸಲಾಗಿದ್ದು, ಇದನ್ನು ಮಸೂದ್ ಅಜರ್ ಸಹೋದರಿ ಸಾದಿಯಾ ಅಜರ್ ಮುನ್ನಡೆಸುತ್ತಿದ್ದಾಳೆ. ಸಾದಿಯಾ ಅಜರ್ ಪತಿ ಯೂಸುಫ್ ಅಜರ್ ಪಹಲ್ಗಾಮ್ ಭಯೋತ್ಪಾದಕ ದಾಳಿಗೆ ಪ್ರತಿಯಾಗಿ ಭಾರತ ನಡೆಸಿದ ‘ಆಪರೇಷನ್ ಸಿಂದೂರದಲ್ಲಿ ಹತ್ಯೆಯಾಗಿದ್ದ. ಭಯೋತ್ಪಾದನಾ ಜಾಲದಲ್ಲಿ ಮಹಿಳೆಯರನ್ನು ತೊಡಗಿಸಿಕೊಳ್ಳುವ ಮೂಲಕ ಜೈಶ್-ಇ-ಮೊಹಮ್ಮದ್ನ ಉಪಸ್ಥಿತಿಯನ್ನು ಬಲಪಡಿಸಲು ಮತ್ತು ಕಾರ್ಯಾಚರಣೆಯ ವ್ಯಾಪ್ತಿಯನ್ನು ವಿಸ್ತರಿಸಲು ಈ ವಿಭಾಗವನ್ನು ರಚಿಸಲಾಗಿದೆ.
ಉಗ್ರ ಅಜರ್ ಜಮಾತ್-ಉಲ್-ಮೋಮಿನಾತ್ನ ಕ್ಷಿಪ್ರ ಬೆಳವಣಿಗೆಯ ಬಗ್ಗೆ ಮಾತನಾಡಿದ್ದಾನೆ. ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (PoK) ದಾದ್ಯಂತ ನೇಮಕಾತಿ ಮತ್ತು ತರಬೇತಿಗೆ ಅನುಕೂಲವಾಗುವಂತೆ ಜಿಲ್ಲಾ ಮಟ್ಟದ ಸಂಸ್ಥೆಗಳನ್ನು ಸ್ಥಾಪಿಸುವ ಯೋಜನೆಯನ್ನು ಸಹ ಆತ ರೂಪಿಸಿದ್ದಾನೆ.
ಮುಖ್ಯ ನೇಮಕಾತಿ ಸ್ಥಳಗಳು
ಜಮಾತ್-ಉಲ್-ಮೋಮಿನಾತ್ನ ನೇಮಕಾತಿ ಅಭಿಯಾನವು ಅಕ್ಟೋಬರ್ 8 ರಂದು ಜೈಶ್ನ ಪ್ರಧಾನ ಕಚೇರಿ ‘ಮರ್ಕಜ್ ಉಸ್ಮಾನ್-ಓ-ಅಲಿ’ ಯಲ್ಲಿ ಆರಂಭಗೊಂಡಿತು. ಈ ಅಭಿಯಾನದ ಸಮಯದಲ್ಲಿ, ಬಹಾವಲ್ಪುರ, ಮುಲ್ತಾನ್, ಸಿಯಾಲ್ಕೋಟ್, ಕರಾಚಿ, ಮುಜಾಫರಾಬಾದ್ ಮತ್ತು ಕೋಟ್ಲಿಯ ಮಹಿಳೆಯರನ್ನು ಈ ಸಂಘಟನೆಗೆ ಸೇರಿಸಲಾಗಿದೆ.
ಈ ವಿಭಾಗದ ಮತ್ತೊಬ್ಬ ಪ್ರಮುಖ ವ್ಯಕ್ತಿ ಪುಲ್ವಾಮಾ ದಾಳಿಯ ಮಾಸ್ಟರ್ಮೈಂಡ್ ಉಮರ್ ಫಾರೂಕ್ನ ಪತ್ನಿ ಅಫೀರಾ. ಉಮರ್ ಫಾರೂಕ್ ಎನ್ಕೌಂಟರ್ನಲ್ಲಿ ಹತನಾಗಿದ್ದ.
ಆನ್ಲೈನ್ ತರಬೇತಿ ಮತ್ತು ₹ 500 ಶುಲ್ಕ
ಜಮಾತ್-ಉಲ್-ಮೋಮಿನಾತ್ಗೆ ನೇಮಕಗೊಂಡ ಮಹಿಳೆಯರಿಗೆ 40 ನಿಮಿಷಗಳ ತರಗತಿಗಳ ಮೂಲಕ ಆನ್ಲೈನ್ನಲ್ಲಿ ತರಬೇತಿ ನೀಡಲಾಗುತ್ತಿದೆ. ಭಾಗವಹಿಸುವವ ಪದರತಿಯೊಬ್ಬರು ₹ 500 ಶುಲ್ಕ ಪಾವತಿಸಬೇಕು. ವರದಿಗಳ ಪ್ರಕಾರ, ಐಸಿಸ್, ಹಮಾಸ್ ಮತ್ತು ಎಲ್ಟಿಟಿಇಯಿಂದ ಪ್ರೇರಿತರಾಗಿ ಫಿದಾಯೀನ್ (ಆತ್ಮಾಹುತಿ) ದಾಳಿಗಳನ್ನು ನಡೆಸಲು ಮಹಿಳೆಯರನ್ನು ಉಗ್ರಗಾಮಿಗಳಾಗಿ ಪರಿವರ್ತಿಸಿ, ಭಯೋತ್ಪಾದಕ ದಳಗಳನ್ನು ರಚಿಸುವುದು ಈ ತರಬೇತಿಯ ಗುರಿಯಾಗಿದೆ.
ಪುರುಷ ಸದಸ್ಯರಿಗೆ 15 ದಿನಗಳ “ದೌರಾ-ಎ-ತರ್ಬಿಯಾತ್” ಕೋರ್ಸ್ ಇದ್ದರೆ, ಮಹಿಳಾ ನೇಮಕಾತಿಗಳು “ದೌರಾ-ಎ-ತಸ್ಕಿಯಾ” ಎಂಬ ಪ್ರೇರಕ ಕೋರ್ಸ್ನಲ್ಲಿ ಭಾಗವಹಿಸುತ್ತವೆ. ಇದನ್ನು ಮರ್ಕಜ್ ಉಸ್ಮಾನ್-ಓ-ಅಲಿಯಲ್ಲಿ ನಡೆಸಲಾಗುತ್ತದೆ.
ಭದ್ರತಾ ಸಂಸ್ಥೆಗಳ ಆತಂಕ
ಜೈಶ್ನ ಜಾಲವನ್ನು ಗಮನಿಸುತ್ತಿರುವ ಅಧಿಕಾರಿಗಳು, ಈ ಸಂಘಟನೆಯು ನಿರ್ದಿಷ್ಟವಾಗಿ ಕಮಾಂಡರ್ಗಳ ಪತ್ನಿಯರು ಮತ್ತು ಬಹಾವಲ್ಪುರ, ಕರಾಚಿ, ಮುಜಾಫರಾಬಾದ್, ಕೋಟ್ಲಿ, ಹರಿಪುರ ಮತ್ತು ಮನ್ಸೆಹ್ರಾದಲ್ಲಿರುವ ಧಾರ್ಮಿಕ ಕೇಂದ್ರಗಳಲ್ಲಿ ಅಧ್ಯಯನ ಮಾಡುವ ಆರ್ಥಿಕವಾಗಿ ದುರ್ಬಲ ಮಹಿಳೆಯರನ್ನು ಗುರಿಯಾಗಿಸುತ್ತಿದೆ ಎಂದು ಹೇಳಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ