ಪಣಜಿ: ಗೋವಾದ ನೈಟ್ಕ್ಲಬ್ನಲ್ಲಿ ಸಂಭವಿಸಿದ ಭಾರಿ ಅಗ್ನಿ ದುರಂತದಲ್ಲಿ 25 ಜನರು ಸಾವಿಗೀಡಾಗಿ, ಆರು ಮಂದಿ ಗಾಯಗೊಂಡ ಕೆಲವೇ ಗಂಟೆಗಳ ನಂತರ, ನೈಟ್ಕ್ಲಬ್ ಮಾಲೀಕರಾದ ಸೌರಭ ಮತ್ತು ಗೌರವ್ ಲೂತ್ರಾ ಸಹೋದರರು ಥೈಲ್ಯಾಂಡಿನ ಫುಕೆಟ್ಗೆ (Phuket) ವಿಮಾನದಲ್ಲಿ ಪರಾರಿಯಾಗಿರುವುದನ್ನು ಗೋವಾ ಪೊಲೀಸರು ಖಚಿತಪಡಿಸಿದ್ದು, ಅವರಿಗಾಗಿ ಅಂತಾರಾಷ್ಟ್ರೀಯ ಶೋಧ ಕಾರ್ಯಾಚರಣೆಯನ್ನು ಪ್ರಾರಂಭಿಸಲಾಗಿದೆ ಎಂದು ಸೋಮವಾರ ತಿಳಿಸಿದ್ದಾರೆ.
ಬೆಂಕಿ ಅವಘಡ ಸಂಭವಿಸಿದ ಕೂಡಲೇ ಎಫ್ಐಆರ್ (FIR) ದಾಖಲಿಸಲಾಗಿದೆ. ಇದರ ಬೆನ್ನಲ್ಲೇ, ಆರೋಪಿಗಳ ದೆಹಲಿಯ ನಿವಾಸಗಳ ಮೇಲೆ ದಾಳಿ ನಡೆಸಲು ಒಂದು ತಂಡವನ್ನು ದೆಹಲಿಗೆ ರವಾನಿಸಲಾಗಿತ್ತು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
“ಸೌರಭ್ ಮತ್ತು ಗೌರವ್ ಲೂತ್ರಾ ಅವರನ್ನು ಆದಷ್ಟು ಬೇಗ ಬಂಧಿಸಲು ಸಿಬಿಐನ ಇಂಟರ್ಪೋಲ್ ವಿಭಾಗದೊಂದಿಗೆ ಸಮನ್ವಯ ಸಾಧಿಸಲು ಗೋವಾ ಪೊಲೀಸರು ಮುಂದಿನ ಕ್ರಮಗಳನ್ನು ಕೈಗೊಂಡಿದ್ದಾರೆ,” ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಪಣಜಿಯಿಂದ ಸುಮಾರು 25 ಕಿಲೋಮೀಟರ್ ದೂರದಲ್ಲಿರುವ ನೈಟ್ಕ್ಲಬ್ನಲ್ಲಿ ಶನಿವಾರ ತಡರಾತ್ರಿ ಸಂಭವಿಸಿದ ಭೀಕರ ಅಗ್ನಿ ದುರಂತದಲ್ಲಿ 25 ಜನರು ಸಾವಿಗೀಡಾದ ನಂತರ ಈ ಬೆಳವಣಿಗೆ ನಡೆದಿದೆ. ಮೃತರ ಪೈಕಿ 20 ಜನರು ನೈಟ್ಕ್ಲಬ್ನ ನೌಕರರಾಗಿದ್ದು, ಉಳಿದ ಐದು ಮಂದಿ ಪ್ರವಾಸಿಗರಾಗಿದ್ದಾರೆ. ಗಾಯಗೊಂಡ ಐವರು ಸರ್ಕಾರಿ ಸ್ವಾಮ್ಯದ ಗೋವಾ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆ (GMCH) ಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಲುಕ್ಔಟ್ ಸುತ್ತೋಲೆ ಜಾರಿ
ಆರೋಪಿಗಳ ವಿರುದ್ಧ ಎಫ್ಐಆರ್ ದಾಖಲಿಸಿದ ನಂತರ, ಗೋವಾ ಪೊಲೀಸರು ಅವರ ನಿವಾಸಕ್ಕೆ ನೋಟಿಸ್ ಅಂಟಿಸಿದ್ದಾರೆ. ಅವರು ದೇಶ ತೊರೆಯುವುದನ್ನು ತಡೆಯಲು ಗೋವಾ ಪೊಲೀಸರ ಕೋರಿಕೆಯ ಮೇರೆಗೆ ಡಿಸೆಂಬರ್ 7 ರಂದು ಇಬ್ಬರ ವಿರುದ್ಧವೂ ಲುಕ್ಔಟ್ ಸುತ್ತೋಲೆ (Look Out Circular – LOC) ಯನ್ನು ಹೊರಡಿಸಲಾಗಿತ್ತು. ಆದರೆ, ಅಷ್ಟರಾಗಲೇ ಅವರು ಪರಾರಿಯಾಗಿದ್ದರು.
“ಮುಂಬೈನಲ್ಲಿರುವ ಬ್ಯೂರೋ ಆಫ್ ಇಮಿಗ್ರೇಷನ್ (Bureau of Immigration) ಅನ್ನು ಸಂಪರ್ಕಿಸಿದಾಗ, ಮಧ್ಯರಾತ್ರಿಯ ಸುಮಾರಿಗೆ ಬೆಂಕಿ ಅವಘಡ ಸಂಭವಿಸಿದ ನಂತರ, ಆರೋಪಿಗಳಿಬ್ಬರೂ ಡಿಸೆಂಬರ್ 7 ರ ಬೆಳಿಗ್ಗೆ 5:30 ಕ್ಕೆ 6E 1073 ವಿಮಾನದಲ್ಲಿ ಫುಕೆಟ್ಗೆ ತೆರಳಿದ್ದಾರೆ ಎಂಬುದು ತಿಳಿದುಬಂದಿದೆ ಎಂದು ಅಧಿಕಾರಿ ಹೇಳಿದರು.
ಆರೋಪಿಗಳಾದ ಗೌರವ ಮತ್ತು ಸೌರಭ ಲೂತ್ರಾ ಅವರ ನಿವಾಸಗಳ ಮೇಲೆ ದಾಳಿ ನಡೆಸಲು ಗೋವಾ ಪೊಲೀಸರು ತಕ್ಷಣವೇ ತಂಡವನ್ನು ದೆಹಲಿಗೆ ಕಳುಹಿಸಿದ್ದಾರೆ. “ಅವರು ಲಭ್ಯವಿಲ್ಲದ ಕಾರಣ, ಕಾನೂನಿನ ಸೂಕ್ತ ಸೆಕ್ಷನ್ಗಳ ಅಡಿಯಲ್ಲಿ ಅವರ ಮನೆಯ ಗೇಟ್ಗೆ ನೋಟಿಸ್ ಅಂಟಿಸಲಾಗಿದೆ. ಇದು ಅವರು ಪೊಲೀಸ್ ತನಿಖೆಯಿಂದ ತಪ್ಪಿಸಿಕೊಳ್ಳುವ ಉದ್ದೇಶವನ್ನು ತೋರಿಸುತ್ತದೆ,” ಎಂದು ಅವರು ಹೇಳಿದರು.
ಸದ್ಯ ಗೋವಾ ಪೊಲೀಸರು ಕ್ಲಬ್ನ ಉದ್ಯೋಗಿ ಭರತ್ ಕೋಹ್ಲಿ ಅವರನ್ನು ಟ್ರಾನ್ಸಿಟ್ ರಿಮ್ಯಾಂಡ್ (Transit Remand) ನಲ್ಲಿ ಪಡೆದುಕೊಂಡಿದ್ದು, ಅವರನ್ನು ಗೋವಾಕ್ಕೆ ಕರೆತರಲಾಗುತ್ತಿದೆ. ಮೃತರಾದ ಎಲ್ಲ 25 ಜನರ ಶವಪರೀಕ್ಷೆ (Postmortem) ಪೂರ್ಣಗೊಂಡಿದ್ದು, ಮೃತದೇಹಗಳನ್ನು ಅವರ ಕುಟುಂಬಗಳಿಗೆ ಹಸ್ತಾಂತರಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ