ತಿರುಪತಿ ದೇವಸ್ಥಾನಕ್ಕೆ ರೇಷ್ಮೆ ಬದಲಿಗೆ ‘ಪಾಲಿಯೆಸ್ಟರ್‌’ ಶಾಲುಗಳ ಪೂರೈಕೆ ; ಬೃಹತ್‌ ಹಗರಣ ಬೆಳಕಿಗೆ

ಹೈದರಾಬಾದ್ : ಶುದ್ಧ ರೇಷ್ಮೆ ಎಂದು ಹೇಳಿ ತಿರುಮಲ ಶ್ರೀ ವೆಂಕಟೇಶ್ವರ ಸ್ವಾಮಿ ದೇವಸ್ಥಾನಕ್ಕೆ (Tirumala Venkateswara Temple)  ಸುಮಾರು ಹತ್ತು ವರ್ಷಗಳ ಕಾಲ ಕಳಪೆ ಗುಣಮಟ್ಟದ ಪಾಲಿಯೆಸ್ಟರ್ ಶಾಲುಗಳನ್ನು (Dupattas) ಪೂರೈಸಿದ ಬೃಹತ್ ವಂಚನೆಯು ಬೆಳಕಿಗೆ ಬಂದಿದ್ದು, ದೇವಸ್ಥಾನ ಆಡಳಿತ ಮತ್ತು ಭಕ್ತರಲ್ಲಿ ತೀವ್ರ ಆಘಾತ ಮೂಡಿಸಿದೆ. ತಿರುಮಲ ತಿರುಪತಿ ದೇವಸ್ಥಾನಂ (TTD) ನ ವಿಜಿಲೆನ್ಸ್ ವಿಭಾಗವು ಈ ಅಕ್ರಮವನ್ನು ಪತ್ತೆ ಹಚ್ಚಿದೆ.

ದೇವಸ್ಥಾನದ ವಿಐಪಿ ದರ್ಶನಗಳು ಮತ್ತು ರಂಗನಾಯಕುಲ ಮಂಟಪದಲ್ಲಿ ನಡೆಯುವ ಧಾರ್ಮಿಕ ಸಮಾರಂಭಗಳ ಸಮಯದಲ್ಲಿ ಗಣ್ಯ ವ್ಯಕ್ತಿಗಳು ಮತ್ತು ದಾನಿಗಳಿಗೆ ಪವಿತ್ರ ಚಿಹ್ನೆಗಳನ್ನು ಮುದ್ರಿಸಲಾಗುವ ಈ ಶಾಲುಗಳನ್ನು ಸಾಂಪ್ರದಾಯಿಕ ಉಡುಗೊರೆಗಳಾಗಿ ವಿತರಿಸಲಾಗುತ್ತದೆ.

ಆದರೆ, ತನಿಖೆಯಿಂದ ತಿಳಿದು ಬಂದಿರುವಂತೆ, 2015 ರಿಂದ 2025 ರ ಅವಧಿಯಲ್ಲಿ ತಿರುಪತಿ ಸಮೀಪದ ನಗರಿ ಮೂಲದ ‘VRS ಎಕ್ಸ್‌ಪೋರ್ಟ್ಸ್’ ಎಂಬ ಒಂದೇ ಸಂಸ್ಥೆಯು ಪೂರೈಕೆ ಮಾಡಿದ್ದ ಈ ಶಾಲುಗಳಲ್ಲಿ ರೇಷ್ಮೆ ಬದಲಿಗೆ ಪಾಲಿಯೆಸ್ಟರ್ ಕಂಡುಬಂದಿದೆ. ಈ ಹಣಕಾಸಿನ ಅಕ್ರಮದ ಒಟ್ಟು ಮೊತ್ತ ರೂ. 54.95 ಕೋಟಿ ಗಿಂತಲೂ ಅಧಿಕ ಎಂದು ಅಂದಾಜಿಸಲಾಗಿದೆ.

ಈ ಬಗ್ಗೆ ಅನುಮಾನಗಳು ಮೂಡಿದ ಹಿನ್ನೆಲೆಯಲ್ಲಿ, ಟಿಟಿಡಿ ಅಧ್ಯಕ್ಷ ಬಿ.ಆರ್. ನಾಯ್ಡು ಅವರ ಆದೇಶದ ಮೇರೆಗೆ ಶಾಲುಗಳ ಸಂಗ್ರಹದ ಕುರಿತು ಕೂಲಂಕಷ ಪರಿಶೀಲನೆ ಆರಂಭಿಸಲಾಯಿತು. ತಿರುಪತಿಯ ಗೋದಾಮುಗಳಿಂದ ಮತ್ತು ವೈಭವೋತ್ಸವ ಮಂಟಪದಿಂದ (Vaibhavotsavam Mandapam) ಶಾಲುಗಳ ಮಾದರಿಗಳನ್ನು ಸಂಗ್ರಹಿಸಿ, ಅವುಗಳನ್ನು ಬೆಂಗಳೂರು ಮತ್ತು ಧರ್ಮಾವರಂನಲ್ಲಿರುವ ಕೇಂದ್ರ ರೇಷ್ಮೆ ಮಂಡಳಿ (Central Silk Board) ಪ್ರಯೋಗಾಲಯಗಳಲ್ಲಿ ಕಟ್ಟುನಿಟ್ಟಿನ ಪರೀಕ್ಷೆಗೆ ಒಳಪಡಿಸಲಾಯಿತು.ಪ್ರಯೋಗಾಲಯದ ಪರೀಕ್ಷಾ ವರದಿಗಳು ಈ ಶಾಲುಗಳು ಸಂಪೂರ್ಣವಾಗಿ ಪಾಲಿಯೆಸ್ಟರ್ ಎಂದು ಖಚಿತಪಡಿಸಿವೆ.

ಅಷ್ಟೇ ಅಲ್ಲದೆ, ಈ ಶಾಲುಗಳು ಕಡ್ಡಾಯವಾಗಿರಬೇಕಾದ ರೇಷ್ಮೆ ಹಾಲೋಗ್ರಾಮ್ (Hologram) ಹೊಂದಿಲ್ಲ. ಅಲ್ಲದೆ, ಅವು ನಿಗದಿತ ಗಾತ್ರ, ತೂಕ, ಬಾರ್ಡರ್ ವಿನ್ಯಾಸ ಮತ್ತು ಒಂದು ಬದಿಯಲ್ಲಿ ಸಂಸ್ಕೃತದಲ್ಲಿ ‘ಓಂ ನಮೋ ವೆಂಕಟೇಶಾಯ’ ಮತ್ತು ಇನ್ನೊಂದು ಬದಿಯಲ್ಲಿ ಶಂಖ, ಚಕ್ರ ಮತ್ತು ನಾಮಂ ಚಿಹ್ನೆಗಳುಳ್ಳ ತೆಲುಗು ಶಾಸನಗಳ ನಿಯಮಗಳನ್ನು ಪೂರೈಸುವಲ್ಲಿ ವಿಫಲವಾಗಿವೆ ಎಂದು ಆರೋಪಿಸಲಾಗಿದೆ.

ಟಿಟಿಡಿ ಅಧ್ಯಕ್ಷ ಬಿ.ಆರ್. ನಾಯ್ಡು ಅವರು ಮಾತನಾಡಿ, “ವಂಚನೆಯಲ್ಲಿ ಭಾಗಿಯಾದ ಎಲ್ಲರ ವಿರುದ್ಧ ಸಮಗ್ರ ಕ್ರಿಮಿನಲ್ ತನಿಖೆ ನಡೆಸುವಂತೆ ದೇವಸ್ಥಾನ ಮಂಡಳಿಯು ಔಪಚಾರಿಕವಾಗಿ ಭ್ರಷ್ಟಾಚಾರ ನಿಗ್ರಹ ದಳಕ್ಕೆ (ACB) ಮನವಿ ಮಾಡಿದೆ. ದೇವಸ್ಥಾನದ ಆಡಳಿತವು ಪಾರದರ್ಶಕತೆಗೆ ಬದ್ಧವಾಗಿದ್ದು, ತಪ್ಪಿತಸ್ಥರಿಗೆ ಕಠಿಣ ಶಿಕ್ಷೆಯಾಗಲಿದೆ” ಎಂದು ಹೇಳಿದ್ದಾರೆ.

ತಮಗೆ ಬಂದ 100 ಶಾಲುಗಳ ಬೇಡಿಕೆಯ ಕುರಿತು ಖುದ್ದು ಪರಿಶೀಲಿಸಿದಾಗ, ದೇವಸ್ಥಾನಕ್ಕೆ  1,300 ರೂ.ಗಳಿಗಿಂತ ಹೆಚ್ಚು ಬೆಲೆಗೆ ಮಾರಾಟವಾಗುತ್ತಿದ್ದ ಶಾಲು, ಹೊರಗೆ ಕೇವಲ  400 ರೂ.ಗಳಿಗೆ ಮಾರಾಟವಾಗುತ್ತಿರುವುದು ಕಂಡುಬಂದಿತ್ತು. ಈ ವ್ಯತ್ಯಾಸವೇ ವಿವರವಾದ ತನಿಖೆಗೆ ಕಾರಣವಾಯಿತು ಎಂದು ನಾಯ್ಡು ವಿವರಿಸಿದರು.