ಪ್ರಾಚೀನ ಮಾನವರು ಈ ಹಿಂದೆ ನಂಬಿದ್ದಕ್ಕಿಂತ ಬಹಳ ಮುಂಚೆಯೇ ಅಂದರೆ ಸುಮಾರು 400,000 ವರ್ಷಗಳ ಹಿಂದೆ ಬೆಂಕಿಯನ್ನು ಉತ್ಪಾದಿಸಿ, ನಿಯಂತ್ರಿಸುತ್ತಿದ್ದರು ಎಂಬುದಕ್ಕೆ ವಿಜ್ಞಾನಿಗಳು ಬಲವಾದ ಪುರಾವೆಗಳನ್ನು ಕಂಡುಕೊಂಡಿದ್ದಾರೆ ಎಂದು ದಿ ಗಾರ್ಡಿಯನ್ನ ವರದಿ ಮಾಡಿದೆ. ಇಂಗ್ಲೆಂಡ್ನ ಸಫೊಲ್ಕ್ನಲ್ಲಿರುವ ಬಾರ್ನ್ಹ್ಯಾಮ್ ಎಂಬ ಹಳ್ಳಿಯಲ್ಲಿರುವ ಪುರಾತತ್ತ್ವ ಶಾಸ್ತ್ರದ ಸ್ಥಳದಲ್ಲಿ ಈ ಆವಿಷ್ಕಾರವನ್ನು ಮಾಡಲಾಗಿದೆ ಮತ್ತು ಬೆಂಕಿಯನ್ನು ತಾವೇ ಹೊತ್ತಿಸುವುದು ಯಾವಾಗ ಪ್ರಾರಂಭವಾಯಿತು ಎಂಬುದರ ಕುರಿತು ದೀರ್ಘಕಾಲದಿಂದ ಇದ್ದ ಊಹೆಗಳನ್ನು ಪ್ರಶ್ನಿಸುತ್ತದೆ.
ಇಲ್ಲಿಯವರೆಗೆ, ಮಾನವರು ಬೆಂಕಿಯನ್ನು ಉತ್ಪಾದಿಸುವುದನ್ನು ಕಂಡುಕೊಂಡ ಆರಂಭಿಕ ಸ್ಪಷ್ಟ ಪುರಾವೆಗಳು ಉತ್ತರ ಫ್ರಾನ್ಸ್ನಲ್ಲಿ ಸುಮಾರು 50,000 ವರ್ಷಗಳ ಹಿಂದಿನ ಕಾಲಕ್ಕೆ ಸಂಬಂಧಿಸಿದ್ದವು.
ಹಿಂದಿನ ಮಾನವರು ಒಂದು ಮಿಲಿಯನ್ ವರ್ಷಗಳ ಹಿಂದೆ ನೈಸರ್ಗಿಕ ಬೆಂಕಿಯನ್ನು ಬಳಸುತ್ತಿದ್ದರು ಎಂದು ತಿಳಿದಿದ್ದರೂ, ಅವರು ಸ್ವತಃ ಬೆಂಕಿಯನ್ನು ಉತ್ಪಾದಿಸಿ ಹೊತ್ತಿಸಲು ಆರಂಭಿಸಿದ್ದು ಯಾವಾಗ ಎಂಬುದಕ್ಕೆ ಕಡಿಮೆ ಪುರಾವೆಗಳಿದ್ದವು. ಹೊಸ ಸಂಶೋಧನೆಗಳು ಈ ಕೌಶಲ್ಯವು ಬಹಳ ಹಿಂದೆಯೇ ಅಭಿವೃದ್ಧಿಗೊಂಡಿದೆ ಎಂದು ಸೂಚಿಸುತ್ತವೆ.
ವರದಿಯ ಪ್ರಕಾರ, ಸಂಶೋಧಕರು ಸುಟ್ಟ ಭೂಮಿ, ಬೆಂಕಿಯಿಂದ ಬಿರುಕು ಬಿಟ್ಟ ಕಲ್ಲಿನ ಉಪಕರಣಗಳು ಮತ್ತು ಕಬ್ಬಿಣದ ಪೈರೈಟ್ನ ಅಪರೂಪದ ತುಣುಕುಗಳನ್ನು ಕಂಡುಹಿಡಿದರು, ಇದು ಫ್ಲಿಂಟ್ನಿಂದ ಹೊಡೆದಾಗ ಕಿಡಿಗಳನ್ನು ಉತ್ಪಾದಿಸುವ ಖನಿಜವಾಗಿದೆ. ಈ ಪೈರೈಟ್ ಸ್ಥಳೀಯವಾಗಿ ದೊರೆಯುವುದಿಲ್ಲ. ಇದನ್ನು ಕರಾವಳಿ ಪ್ರದೇಶಗಳಿಂದ ಉದ್ದೇಶಪೂರ್ವಕವಾಗಿ ಅನೇಕ ಕಿಲೋಮೀಟರ್ಗಳ ದೂರದಿಂದ ತರಲಾಗಿದೆ ಎಂದು ಸಂಶೋಧಕರು ಹೇಳಿದ್ದಾರೆ. ಇದನ್ನು ಬೆಂಕಿ ಹಚ್ಚುವ ಸಾಧನವಾಗಿ ಬಳಸಲಾಗಿದೆ ಎಂಬುದು ಇದರಿಂದ ಸ್ಪಷ್ಟವಾಗುತ್ತದೆ.
ಭೂರಾಸಾಯನಿಕ ಪರೀಕ್ಷೆಗಳು ಜೇಡಿಮಣ್ಣಿನ ಮಣ್ಣಿನ ಕೆಲವು ಭಾಗಗಳನ್ನು ಪದೇ ಪದೇ 700°C ಗಿಂತ ಹೆಚ್ಚಿನ ತಾಪಮಾನಕ್ಕೆ ಬಿಸಿ ಮಾಡಿರುವುದನ್ನು ತೋರಿಸಿವೆ, ಇದು ಆ ಸ್ಥಳದಲ್ಲಿ ಕ್ಯಾಂಪ್ಫೈರ್ ಅಥವಾ ಒಲೆಯ ನಿಯಮಿತ ಬಳಕೆಯನ್ನು ಇದು ಸೂಚಿಸುತ್ತದೆ.
ಈ ಬೆಂಕಿಯನ್ನು ನಿಯಂತ್ರಿಸಿದವರು ಆರಂಭಿಕ ನಿಯಾಂಡರ್ತಾಲ್ಗಳು (early Neanderthals), ಆಧುನಿಕ ಮಾನವರಲ್ಲ (Homo sapiens), ಎಂದು ವಿಜ್ಞಾನಿಗಳು ನಂಬಿದ್ದಾರೆ. ಹೋಮೋ ಸೆಪಿಯನ್ಸ್ಗಳು ಆಫ್ರಿಕಾದಿಂದ ಹೊರಬಂದಿದ್ದು ಸುಮಾರು 1,00,000 ವರ್ಷಗಳ ಹಿಂದೆ ಎಂದು ಅಂದಾಜಿಸಲಾಗಿದೆ. ಬ್ರಿಟನ್ ಮತ್ತು ಯುರೋಪ್ನ ಪಳೆಯುಳಿಕೆ ಪುರಾವೆಗಳು ಆ ಸಮಯದಲ್ಲಿ ನಿಯಾಂಡರ್ತಾಲ್ಗಳು ಈ ಪ್ರದೇಶದಲ್ಲಿ ವಾಸಿಸುತ್ತಿದ್ದರು ಎಂಬ ಕಲ್ಪನೆಯನ್ನು ಬೆಂಬಲಿಸುತ್ತವೆ.
ಮಾನವ ವಿಕಾಸದ ಮೇಲೆ ಪರಿಣಾಮ
ಈ ಆವಿಷ್ಕಾರವು ಮಾನವ ವಿಕಾಸವನ್ನು ಅರ್ಥಮಾಡಿಕೊಳ್ಳುವಲ್ಲಿ ಪ್ರಮುಖ ಪರಿಣಾಮಗಳನ್ನು ಬೀರಲಿದೆ ಎಂದು ತಜ್ಞರು ಹೇಳಿದ್ದಾರೆ. ಬೆಂಕಿಯ ನಿಯಂತ್ರಣದಿಂದಾಗಿ ಆದಿಮಾನವರಿಗೆ ಬೆಚ್ಚಗಿನ ವಾತಾವರಣ, ಬೆಳಕು, ಪರಭಕ್ಷಕಗಳಿಂದ ರಕ್ಷಣೆ ಮತ್ತು ಆಹಾರವನ್ನು ಬೇಯಿಸುವ ಸಾಮರ್ಥ್ಯ ದೊರೆಯಿತು.ಚಈ ಅನುಕೂಲಗಳು ಮಿದುಳಿನ ಬೆಳವಣಿಗೆ, ಸಾಮಾಜಿಕ ಬಾಂಧವ್ಯ ಮತ್ತು ಉತ್ತರ ಯುರೋಪಿನಂತಹ ತಣ್ಣನೆಯ ಹವಾಮಾನದಲ್ಲಿ ಬದುಕುಳಿಯಲು ಸಹಾಯ ಮಾಡಿರಬಹುದು.
ಈ ಸಂಶೋಧನೆಗಳ ವರದಿಯನ್ನು ಪ್ರತಿಷ್ಠಿತ ‘ನೇಚರ್’ ಜರ್ನಲ್ನಲ್ಲಿ ಪ್ರಕಟಿಸಲಾಗಿದ್ದು, ಆದಿಮಾನವನ ನಡವಳಿಕೆಯ ಅಧ್ಯಯನದಲ್ಲಿ ಇದೊಂದು ಪ್ರಮುಖ ಮೈಲಿಗಲ್ಲು ಎಂದು ಬಣ್ಣಿಸಲಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ