ನಾಂದೇಡ್: ಒಂದು ಕಡೆ ಹತ್ತು ದಿನದ ಹಸುಗೂಸು, ಮತ್ತೊಂದು ಕಡೆ ಭವಿಷ್ಯದ ಕನಸುಗಳನ್ನು ಹೊತ್ತ ಪರೀಕ್ಷೆ. ಈ ಎರಡರ ನಡುವೆ ಆಕೆ ಎದೆಗುಂದಲಿಲ್ಲ. ಹೆರಿಗೆಯಾಗಿ ಕೇವಲ ಹತ್ತೇ ದಿನಕ್ಕೆ ಕೈಯಲ್ಲಿ ಮಗುವನ್ನು ಹಿಡಿದು ಪರೀಕ್ಷಾ ಕೇಂದ್ರಕ್ಕೆ ಬಂದ ಈ ಯುವತಿಯ ದೃಢತೆ ಈಗ ಇಡೀ ದೇಶದ ಗಮನ ಸೆಳೆದಿದೆ.
ಮಹಾರಾಷ್ಟ್ರದ ನಾಂದೇಡ್ನ ಶೀತಲ್ ಚಂದ್ರಕಾಂತ ಚಿತ್ತೆ (21) ಎಂಬ ವಿದ್ಯಾರ್ಥಿನಿ ಫೆಬ್ರವರಿ 18ರ ಬುಧವಾರದಂದು ನಡೆದ ರಾಜ್ಯ ಪಠ್ಯಕ್ರಮದ ದ್ವಿತೀಯ ಪಿಯುಸಿ (HSC) ರಾಜ್ಯಶಾಸ್ತ್ರ ಪರೀಕ್ಷೆಗೆ ಹಾಜರಾಗಿದ್ದರು. ವಿಶೇಷವೆಂದರೆ, ಆಕೆಯ ಕೈಯಲ್ಲಿ ಹತ್ತು ದಿನದ ಹಸುಗೂಸಿತ್ತು! ಇದಕ್ಕೂ ಮೊದಲು, ಹೆರಿಗೆಯಾದ ಕೇವಲ ಎರಡೇ ದಿನಕ್ಕೆ ಆಕೆ ತನ್ನ ಸಹೋದರಿಯ ನೆರವಿನೊಂದಿಗೆ ಇಂಗ್ಲಿಷ್ ಪರೀಕ್ಷೆಯನ್ನೂ ಬರೆದಿದ್ದರು ಎಂಬುದು ಆಕೆಯ ಅದಮ್ಯ ಚೇತನಕ್ಕೆ ಸಾಕ್ಷಿ.
ಶ್ರೀ ಬಸವೇಶ್ವರ ಕಾಲೇಜಿನ ವಿದ್ಯಾರ್ಥಿನಿಯಾಗಿರುವ ಶೀತಲ್ ಅವರ ಪತಿ ಹಗಲು ಹೊತ್ತು ಕೆಲಸಕ್ಕೆ ತೆರಳುತ್ತಾರೆ. ಮನೆಯಲ್ಲಿ ಮಗುವನ್ನು ನೋಡಿಕೊಳ್ಳಲು ಬೇರೆ ಯಾರೂ ಇರಲಿಲ್ಲ. ಆದರೆ, ಭವಿಷ್ಯದ ದೃಷ್ಟಿಯಿಂದ ಅತ್ಯಂತ ಮುಖ್ಯವಾಗಿರುವ ಪರೀಕ್ಷೆಯನ್ನು ಕೈಬಿಡಲು ಶೀತಲ್ ಸಿದ್ಧರಿರಲಿಲ್ಲ. ವಿವಾಹದ ನಂತರವೂ ಶಿಕ್ಷಣ ಮುಂದುವರಿಸಲು ಆಕೆಯ ಕುಟುಂಬ ಬೆಂಬಲ ನೀಡಿದ್ದು, ಈ ಬಾರಿ ಹೇಗಾದರೂ ಮಾಡಿ ಪರೀಕ್ಷೆ ಮುಗಿಸಬೇಕೆಂದು ಆಕೆ ನಿರ್ಧರಿಸಿದ್ದರು. ಹೀಗಾಗಿ ಹತ್ತು ದಿನದ ಮಗುವಿನ ಸಮೇತ ಅವರು ಪರೀಕ್ಷೆ ಬರೆಯಲು ಬಂದಿದ್ದರು.
‘ಮಾತೃಸ್ನೇಹ ಕೊಠಡಿ’:
ತಾಯಿಯ ಈ ಹಂಬಲವನ್ನು ಕಂಡ ನಾಂದೇಡ್ ಎಜುಕೇಶನ್ ಸೊಸೈಟಿಯ ‘ಪೀಪಲ್ಸ್ ಕಾಲೇಜ್’ ಆಡಳಿತ ಮಂಡಳಿ ಮಾನವೀಯತೆ ಮೆರೆದಿದೆ. ಮಗುವಿನೊಂದಿಗೆ ಪರೀಕ್ಷೆ ಬರೆಯುವುದು ಕಷ್ಟವೆಂದು ಅರಿತ ಕಾಲೇಜು, ಶೀತಲ್ಗಾಗಿ ಪ್ರತ್ಯೇಕವಾಗಿ ‘ಮಾತೃಸ್ನೇಹ ಕಕ್ಷ’ (ತಾಯಿ-ಮಗುವಿನ ಸ್ನೇಹಿ ಕೊಠಡಿ) ವ್ಯವಸ್ಥೆ ಮಾಡಿತು. ಶೀತಲ್ ಪರೀಕ್ಷೆ ಬರೆಯುವಾಗ ಮಗು ಆರಾಮವಾಗಿ ಮಲಗಲು ಅಲ್ಲಿ ಅನುಕೂಲ ಮಾಡಿಕೊಡಲಾಗಿತ್ತು. ಇದರಿಂದಾಗಿ ಆಕೆ ಯಾವುದೇ ಆತಂಕವಿಲ್ಲದೆ ಪರೀಕ್ಷೆಯತ್ತ ಗಮನಹರಿಸಲು ಸಾಧ್ಯವಾಯಿತು.
ಅಧಿಕಾರಿಗಳ ಮೆಚ್ಚುಗೆ:
ನಾಂದೇಡ್ ಶಿಕ್ಷಣಾಧಿಕಾರಿ ಮಾಧವ ಸಾಲಗರ ಅವರು ಕಾಲೇಜಿನ ಈ ನಿರ್ಧಾರವನ್ನು ಶ್ಲಾಘಿಸಿದ್ದಾರೆ. “ಮುಂದಿನ ದಿನಗಳಲ್ಲಿ ಇಂತಹ ವಿದ್ಯಾರ್ಥಿನಿಯರನ್ನು ಪ್ರೋತ್ಸಾಹಿಸಲು ಪರೀಕ್ಷಾ ಕೇಂದ್ರಗಳಲ್ಲಿ ವಿಶೇಷ ವ್ಯವಸ್ಥೆ ಮಾಡಲಾಗುವುದು,” ಎಂದು ಅವರು ತಿಳಿಸಿದ್ದಾರೆ. ಮಹಾರಾಷ್ಟ್ರ ಮಂಡಳಿಯ ಲಾತೂರ್ ವಿಭಾಗೀಯ ಅಧ್ಯಕ್ಷ ಸುಧಾಕರ್ ತೆಲಾಂಗ್ ಅವರು, “ಇದು ರಾಜ್ಯದಲ್ಲೇ ಮೊದಲ ಇಂತಹ ಪ್ರಯತ್ನ,” ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಕಳೆದ ವರ್ಷ ನವೆಂಬರ್ನಲ್ಲಿ ಒಡಿಶಾದ ಮಲ್ಕನ್ಗಿರಿಯಲ್ಲಿ ಇಂತಹುದೇ ಘಟನೆ ನಡೆದಿತ್ತು. ಪರೀಕ್ಷೆ ಬರೆಯುತ್ತಿದ್ದ ತಾಯಿಯ ಮಗು ಅಳುತ್ತಿದ್ದಾಗ, ಅಲ್ಲಿ ಕರ್ತವ್ಯದಲ್ಲಿದ್ದ ಮಹಿಳಾ ಕಾನ್ಸ್ಟೇಬಲ್ ಮಗುವನ್ನು ಎತ್ತಿಕೊಂಡು ಸಮಾಧಾನಪಡಿಸುವ ಮೂಲಕ ಮಾನವೀಯತೆ ಮೆರೆದಿದ್ದರು.
ಕಷ್ಟಗಳ ನಡುವೆಯೂ ಶಿಕ್ಷಣ ಪಡೆಯಬೇಕೆಂಬ ಶೀತಲ್ ಅವರ ಈ ಹಂಬಲ ಇಂದಿನ ಯುವ ಪೀಳಿಗೆಗೆ ಮಾದರಿಯಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ