ವಾಷಿಂಗ್ಟನ್: ಬಾಹ್ಯಾಕಾಶ ಸಂಶೋಧನೆ, ಪರಮಾಣು ಭದ್ರತೆ ಮತ್ತು ಯುಎಫ್ಒ (UFO) ಗಳಂತಹ ಅತೀ ಸೂಕ್ಷ್ಮ ವಿಷಯಗಳ ಮೇಲೆ ಕೆಲಸ ಮಾಡುತ್ತಿದ್ದ ಅಮೆರಿಕದ ಕನಿಷ್ಠ 10 ವಿಜ್ಞಾನಿಗಳು 2023ರ ಮಧ್ಯಭಾಗದಿಂದ ಈಚೆಗೆ ನಿಗೂಢವಾಗಿ ಮೃತಪಟ್ಟಿದ್ದಾರೆ ಅಥವಾ ನಾಪತ್ತೆಯಾಗಿದ್ದಾರೆ. ಈ ಆತಂಕಕಾರಿ ಬೆಳವಣಿಗೆಯನ್ನು ಇದೀಗ ಅಮೆರಿಕದ ಶ್ವೇತಭವನವು ಗಂಭೀರವಾಗಿ ಪರಿಗಣಿಸಿದ್ದು, ಈ ಬಗ್ಗೆ ಸಮಗ್ರ ತನಿಖೆ ನಡೆಸುವುದಾಗಿ ಭರವಸೆ ನೀಡಿದೆ.
ಈ ಕುರಿತು ಮಾತನಾಡಿರುವ ಶ್ವೇತಭವನದ ಪತ್ರಿಕಾ ಕಾರ್ಯದರ್ಶಿ ಕರೋಲಿನ್ ಲೀವಿಟ್ ಅವರು, “ಈ ಪ್ರಕರಣಗಳ ಬಗ್ಗೆ ನಾನು ಇನ್ನೂ ಸಂಬಂಧಿತ ಏಜೆನ್ಸಿಗಳೊಂದಿಗೆ ಮಾತನಾಡಿಲ್ಲ. ಆದರೆ, ವರದಿಗಳು ನಿಜವಾಗಿದ್ದರೆ ಇದು ಖಂಡಿತವಾಗಿಯೂ ಸರ್ಕಾರವು ಗಮನಹರಿಸಲೇಬೇಕಾದ ಗಂಭೀರ ವಿಷಯವಾಗಿದೆ. ಈ ಬಗ್ಗೆ ಅಗತ್ಯ ಕ್ರಮ ಕೈಗೊಂಡು ಸತ್ಯಾಂಶವನ್ನು ಪತ್ತೆಹಚ್ಚಲಾಗುವುದು,” ಎಂದು ತಿಳಿಸಿದ್ದಾರೆ.
ಶೀತಲ ಸಮರ ನೆನಪಿಸುವ ಕಣ್ಮರೆಗಳು
ಈ ಪ್ರಕರಣಗಳು ಯಾವುದೋ ಹಳೆಯ ಕಾಲದ ‘ಕೋಲ್ಡ್ ವಾರ್’ ಥ್ರಿಲ್ಲರ್ ಸಿನಿಮಾದಂತೆ ಭಾಸವಾಗುತ್ತಿವೆ.
ಸ್ಟೀವನ್ ಗಾರ್ಸಿಯಾ: ಅಲ್ಬುಕರ್ಕಿಯ ಕಾನ್ಸಾಸ್ ಸಿಟಿ ನ್ಯಾಷನಲ್ ಸೆಕ್ಯೂರಿಟಿ ಕ್ಯಾಂಪಸ್ನಲ್ಲಿ ಸರ್ಕಾರಿ ಗುತ್ತಿಗೆದಾರರಾಗಿ ಕೆಲಸ ಮಾಡುತ್ತಿದ್ದ ಇವರು ಆಗಸ್ಟ್ 28, 2025 ರಂದು ಇದ್ದಕ್ಕಿದ್ದಂತೆ ನಾಪತ್ತೆಯಾಗಿದ್ದಾರೆ.
ಮೋನಿಕಾ ರೇಜಾ: ನಾಸಾದ ಜೆಟ್ ಪ್ರೊಪಲ್ಷನ್ ಲ್ಯಾಬೊರೇಟರಿ (JPL) ನಲ್ಲಿ ಮೆಟೀರಿಯಲ್ ಪ್ರೊಸೆಸಿಂಗ್ ವಿಭಾಗದ ನಿರ್ದೇಶಕಿಯಾಗಿದ್ದ ಇವರು ಜೂನ್ 2025 ರಿಂದ ನಾಪತ್ತೆಯಾಗಿದ್ದಾರೆ.
ಫ್ರಾಂಕ್ ಮೈವಾಲ್ಡ್: ಜೆಪಿಎಲ್ನಲ್ಲೇ ವಿಜ್ಞಾನಿಯಾಗಿದ್ದ ಇವರು ಮೃತಪಟ್ಟಿದ್ದು, ಅವರ ಸಾವಿನ ಅಧಿಕೃತ ಕಾರಣವನ್ನು ಈವರೆಗೂ ಸಾರ್ವಜನಿಕವಾಗಿ ಬಹಿರಂಗಪಡಿಸಿಲ್ಲ.
ಆಂಥೋನಿ ಚಾವೆಜ್: ಅಣುಬಾಂಬ್ ತಯಾರಿಕೆಗೆ ಹೆಸರಾದ ‘ಲಾಸ್ ಅಲಾಮೋಸ್ ನ್ಯಾಷನಲ್ ಲ್ಯಾಬೊರೇಟರಿ’ಯ ಸಿಬ್ಬಂದಿಯಾಗಿದ್ದ ಇವರು ಕೂಡ ನಿಗೂಢವಾಗಿ ಕಣ್ಮರೆಯಾಗಿದ್ದಾರೆ.
ನಾಸಾದ ಹಿರಿಯ ವಿಜ್ಞಾನಿ ಹಿಕ್ಸ್ ಸಾವು:
ಈ ಪಟ್ಟಿಯಲ್ಲಿ ಅತ್ಯಂತ ಪ್ರಮುಖ ಹೆಸರು ಮೈಕೆಲ್ ಡೇವಿಡ್ ಹಿಕ್ಸ್ ಅವರದ್ದು. ಜುಲೈ 30, 2023 ರಂದು ತಮ್ಮ 59ನೇ ವಯಸ್ಸಿನಲ್ಲಿ ಮೃತಪಟ್ಟ ಹಿಕ್ಸ್, ನಾಸಾದ ಅತ್ಯಂತ ಪ್ರತಿಭಾವಂತ ವಿಜ್ಞಾನಿಗಳಲ್ಲಿ ಒಬ್ಬರಾಗಿದ್ದರು. ಕ್ಷುದ್ರಗ್ರಹದ ಹಾದಿ ಬದಲಿಸಿದ ‘ಡಾರ್ಟ್’ (DART) ಯೋಜನೆ ಮತ್ತು ‘ಡೀಪ್ ಸ್ಪೇಸ್ 1’ ಮಿಷನ್ನಲ್ಲಿ ಇವರು ಪ್ರಮುಖ ಪಾತ್ರ ವಹಿಸಿದ್ದರು. 80ಕ್ಕೂ ಹೆಚ್ಚು ಸಂಶೋಧನಾ ಪ್ರಬಂಧಗಳನ್ನು ಮಂಡಿಸಿದ್ದ ಇವರ ಸಾವಿಗೂ ಸರಿಯಾದ ಕಾರಣ ಸಿಕ್ಕಿಲ್ಲ.
ತನಿಖೆಗೆ ಹೆಚ್ಚಿದ ಒತ್ತಾಯ:
ಈ ಸರಣಿ ಘಟನೆಗಳ ಬೆನ್ನಲ್ಲೇ ಮಿಸೌರಿಯ ರಿಪಬ್ಲಿಕನ್ ಸಂಸದ ಎರಿಕ್ ಬರ್ಲಿಸನ್ ಅವರು ಎಫ್ಬಿಐ (FBI) ತನಿಖೆಗೆ ಆಗ್ರಹಿಸಿದ್ದಾರೆ. ಈ ಕುರಿತು ‘X’ ನಲ್ಲಿ ಬರೆದುಕೊಂಡಿರುವ ಅವರು, “ಸುಧಾರಿತ ಸಂಶೋಧನೆ ಮತ್ತು ಮಿಲಿಟರಿ ಯೋಜನೆಗಳಲ್ಲಿ ತೊಡಗಿರುವ ವಿಜ್ಞಾನಿಗಳ ನಿರಂತರ ಕಣ್ಮರೆ ತೀವ್ರ ಕಳವಳಕಾರಿಯಾಗಿದೆ. ಈ ಬಗ್ಗೆ ನಾವು ಎಫ್ಬಿಐಗೆ ಪತ್ರ ಬರೆದಿದ್ದು, ಸತ್ಯ ಹೊರಬರುವವರೆಗೂ ಒತ್ತಡ ಮುಂದುವರಿಸುತ್ತೇವೆ,” ಎಂದು ಹೇಳಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ