ಚಂದ್ರಯಾನ-3ರ ವಿಕ್ರಮ್ ಲ್ಯಾಂಡರ್ ಮಾಡಿದ ಆ ಒಂದು ಸಣ್ಣ ‘ಹಾಪ್’ (ಜಿಗಿತ), ಚಂದ್ರನ ಭೂವಿಜ್ಞಾನದ ರಹಸ್ಯಗಳನ್ನು ಬಿಚ್ಚಿಡುವಲ್ಲಿ ಒಂದು ದೈತ್ಯ ಹೆಜ್ಜೆಯನ್ನೇ ಇಟ್ಟಿದೆ. ಭಾರತದ ಈ ಐತಿಹಾಸಿಕ ಮಿಷನ್ ತನ್ನ ನಿಗದಿತ ಅವಧಿಯನ್ನು ಪೂರ್ಣಗೊಳಿಸಿದ ನಂತರವೂ ಜಗತ್ತಿಗೆ ನಿರಂತರ ಅಚ್ಚರಿಗಳನ್ನು ನೀಡುತ್ತಲೇ ಇದೆ. ಈ ಹೊಸ ಸಂಶೋಧನೆಯು ನಾಸಾ (NASA) ತನ್ನ ‘ಆರ್ಟೆಮಿಸ್’ ಮಿಷನ್ ಮೂಲಕ ಚಂದ್ರನ ಮೇಲ್ಮೈಯಲ್ಲಿ ಶಾಶ್ವತ ನೆಲೆಯನ್ನು ಸ್ಥಾಪಿಸಲು ಹೊಸ ದಾರಿಯನ್ನೇ ತೆರೆಯುವಂತೆ ಮಾಡಿದೆ.
ಭಾರತದ ಅತ್ಯಂತ ಮಹತ್ವದ ಬಾಹ್ಯಾಕಾಶ ಯಾನದ ಕೊನೆಯ ಸಮಯದಲ್ಲಿ, ಚಂದ್ರಯಾನ-3ರ ವಿಕ್ರಮ್ ಲ್ಯಾಂಡರ್ ಯಾರೂ ಊಹಿಸದ ಸಾಹಸವೊಂದನ್ನು ಮಾಡಿತು. ಇದು ಚಂದ್ರನ ದಕ್ಷಿಣ ಧ್ರುವದ ಮೇಲ್ಮೈ ಬಗ್ಗೆ ವಿಜ್ಞಾನ ಲೋಕ ಹೊಂದಿದ್ದ ಇಡೀ ತಿಳಿವಳಿಕೆಯನ್ನೇ ಬದಲಾಯಿಸುತ್ತಿದೆ. ಕೊನೆಯ ಕ್ಷಣದಲ್ಲಿ ಲ್ಯಾಂಡರ್ನಲ್ಲಿ ಉಳಿದಿದ್ದ ಇಂಧನವನ್ನು ಬಳಸಿಕೊಳ್ಳಲು ಇಸ್ರೋ (ISRO) ವಿಜ್ಞಾನಿಗಳು ಕೈಗೊಂಡ ಒಂದು ತೀರ್ಮಾನ, ಈಗ ಒಂದು ಐತಿಹಾಸಿಕ ಪ್ರಯೋಗವಾಗಿ ಮಾರ್ಪಟ್ಟಿದೆ. ‘ಶಿವಶಕ್ತಿ ಪಾಯಿಂಟ್’ನಲ್ಲಿರುವ ಚಂದ್ರನ ಮಣ್ಣು ನಾವು ಈ ಹಿಂದೆ ಅಂದುಕೊಂಡಿದ್ದಕ್ಕಿಂತ ಅತ್ಯಂತ ವೈವಿಧ್ಯಮಯ ಮತ್ತು ಸಂಕೀರ್ಣವಾಗಿದೆ ಎಂಬುದನ್ನು ಇದು ಸಾಬೀತುಪಡಿಸಿದೆ.
ಐತಿಹಾಸಿಕ ಮೈಲಿಗಲ್ಲು ಮತ್ತು ಅನಿರೀಕ್ಷಿತ ಪ್ರಯೋಗ
ಜುಲೈ 14, 2023ರಂದು ಉಡಾವಣೆಯಾದ ಚಂದ್ರಯಾನ-3 ಮಿಷನ್ನ ಪ್ರಮುಖ ಉದ್ದೇಶ ಚಂದ್ರನ ಮೇಲ್ಮೈಯಲ್ಲಿ ಸುರಕ್ಷಿತವಾಗಿ ಮತ್ತು ಮೃದುವಾಗಿ ಲ್ಯಾಂಡಿಂಗ್ (Soft Landing) ಮಾಡುವುದಾಗಿತ್ತು. ಚಂದ್ರಯಾನ-2ರ ಕೊನೆಯ ಹಂತದ ಕೊನೆ ಕ್ಷಣದಲ್ಲಿ ಕೈತಪ್ಪಿದ್ದ ಈ ಗುರಿಯನ್ನು ಆಗಸ್ಟ್ 23, 2023 ರಂದು ವಿಕ್ರಮ್ ಲ್ಯಾಂಡರ್ ಯಶಸ್ವಿಯಾಗಿ ಸಾಧಿಸಿತು. ಇದರೊಂದಿಗೆ ಚಂದ್ರನ ದಕ್ಷಿಣ ಧ್ರುವ ಪ್ರದೇಶದಲ್ಲಿ ಕಾಲಿಟ್ಟ ವಿಶ್ವದ ಮೊದಲ ದೇಶ ಎಂಬ ಹೆಗ್ಗಳಿಕೆಗೆ ಭಾರತ ಪಾತ್ರವಾಯಿತು.
ಪ್ರಗ್ಯಾನ್ ರೋವರ್ ಮತ್ತು ಹಲವಾರು ಅತ್ಯಾಧುನಿಕ ವೈಜ್ಞಾನಿಕ ಉಪಕರಣಗಳನ್ನು ಹೊಂದಿದ್ದ ಈ ಮಿಷನ್, ಚಂದ್ರನ ಒಂದು ದಿನ (ಭೂಮಿಯ ಸುಮಾರು 14 ದಿನಗಳು) ಕಾರ್ಯನಿರ್ವಹಿಸಲು ವಿನ್ಯಾಸಗೊಳಿಸಲಾಗಿತ್ತು. ಈ ಅವಧಿಯಲ್ಲಿ, ಚಂದ್ರನ ಮೇಲ್ಮೈ ತಾಪಮಾನ ಮತ್ತು ಭೌತಿಕ ಗುಣಲಕ್ಷಣಗಳನ್ನು ಅಧ್ಯಯನ ಮಾಡುವ ChaSTE (Chandra’s Surface Thermophysical Experiment) ಉಪಕರಣವು ಚಂದ್ರನ ಮಣ್ಣಿನ (Regolith) ಮೊದಲ ಪ್ರತ್ಯಕ್ಷ ಮಾಪನಗಳನ್ನು ದಾಖಲಿಸಲು ಪ್ರಾರಂಭಿಸಿತು.
ಚಂದ್ರಯಾನ-3 ಮಿಷನ್ನ ಅಂತ್ಯ ಸಮೀಪಿಸುತ್ತಿದ್ದಂತೆ, ಭೀಕರ ಚಳಿಯ ಚಂದ್ರನಲ್ಲಿ ರಾತ್ರಿ ಆವರಿಸುವ ಮುನ್ನ ಇಸ್ರೋ ವಿಜ್ಞಾನಿಗಳಿಗೆ ವಿಕ್ರಮ ಲ್ಯಾಂಡರ್ನಲ್ಲಿ ಹೆಚ್ಚುವರಿ ಇಂಧನ ಇರುವುದು ಕಂಡುಬಂದಿತು. ಮೂಲ ಯೋಜನೆಯಲ್ಲಿ ಇಲ್ಲದಿದ್ದರೂ, ವಿಜ್ಞಾನಿಗಳು ಲ್ಯಾಂಡರ್ ಅನ್ನು ಚಂದ್ರನ ಮೇಲ್ಮೈಯಿಂದ ಮತ್ತೊಮ್ಮೆ ನಿಯಂತ್ರಿತವಾಗಿ ಮೇಲೆಬ್ಬಿಸಲು (Controlled Lift-off) ನಿರ್ಧರಿಸಿದರು. ಇದನ್ನೇ ‘ಹಾಪ್ ಎಕ್ಸ್ಪರಿಮೆಂಟ್’ (Hop Experiment) ಎನ್ನಲಾಗುತ್ತದೆ. ಇದರನ್ವಯ ವಿಕ್ರಮ್ ಲ್ಯಾಂಡರ್ ತನ್ನ ಇಂಜಿನ್ಗಳನ್ನು ಮರು-ಚಾಲನೆಗೊಳಿಸಿ, ಸುಮಾರು 40ರಿಂದ 50 ಸೆಂಟಿಮೀಟರ್ ಎತ್ತರಕ್ಕೆ ಜಿಗಿದು, ತನ್ನ ಮೂಲ ಸ್ಥಾನದಿಂದ ಸ್ವಲ್ಪ ದೂರದಲ್ಲಿ ಯಶಸ್ವಿಯಾಗಿ ಕೆಳಗಿಳಿಯಿತು.
ವಿಜ್ಞಾನ ಲೋಕಕ್ಕೆ ಲಭಿಸಿದ ಅಪರೂಪದ ಕೊಡುಗೆ
ಮೇಲ್ನೋಟಕ್ಕೆ ಈ ಪ್ರಯೋಗವು ಬಾಹ್ಯಾಕಾಶ ಹಾಗೂ ಚಂದ್ರನ ಮೇಲೆ ಭಾರತದ ತಾಂತ್ರಿಕ ಸಾಮರ್ಥ್ಯದ ಪ್ರದರ್ಶನವಾಗಿತ್ತು. ಭಾರತವು ಚಂದ್ರನ ಮೇಲೆ ಇಳಿಯುವುದು ಮಾತ್ರವಲ್ಲ, ಅಲ್ಲಿಂದ ಪುನಃ ಮೇಲೇಳಬಲ್ಲದು ಎಂಬುದನ್ನು ಇದು ಸಾಬೀತುಪಡಿಸಿತು. ಭವಿಷ್ಯದ ‘ಸ್ಯಾಂಪಲ್ ರಿಟರ್ನ್’ (ಚಂದ್ರನ ಮಣ್ಣನ್ನು ಭೂಮಿಗೆ ತರುವ) ಮಿಷನ್ಗಳಿಗೆ ಇದು ಅತ್ಯಂತ ನಿರ್ಣಾಯಕ ತಂತ್ರಜ್ಞಾನವಾಗಿದೆ. ಆದರೆ ವೈಜ್ಞಾನಿಕ ದೃಷ್ಟಿಯಿಂದ ಈ ಪ್ರಯೋಗದ ಪ್ರಭಾವ ಇನ್ನೂ ಆಳವಾಗಿತ್ತು.
ಎರಡನೇ ತಾಣದ ಅಧ್ಯಯನ:
ಈ ಜಿಗಿತದಿಂದಾಗಿ ವಿಕ್ರಮ್ ಲ್ಯಾಂಡರ್ ಚಂದ್ರನ ಮೇಲ್ಮೈಯ ಮತ್ತೊಂದು ಹೊಸ ಭಾಗದಲ್ಲಿ ಕುಳಿತುಕೊಂಡಿತು. ಇದರಿಂದಾಗಿ ChaSTE ಉಪಕರಣಕ್ಕೆ ಎರಡನೇ ಸ್ಥಳದ ಮಣ್ಣನ್ನು ಆಳವಾಗಿ ಅಧ್ಯಯನ ಮಾಡುವ ಅಪರೂಪದ ಅವಕಾಶ ಸಿಕ್ಕಿತು. ಏಕೆಂದರೆ ಚಂದ್ರನ ದಕ್ಷಿಣ ಧ್ರುವದ ಮಣ್ಣನ್ನು ಮಾನವರಾಗಲಿ ಅಥವಾ ರೋಬೋಟ್ಗಳಾಗಲಿ ಈ ಹಿಂದೆ ಎಂದೂ ಇಷ್ಟು ಹತ್ತಿರದಿಂದ ಪರೀಕ್ಷಿಸಿರಲಿಲ್ಲ.
ಲ್ಯಾಂಡರ್ ಜಿಗಿಯುವಾಗ ಇಂಜಿನ್ನಿಂದ ಹೊರಬಂದ ರಾಕೆಟ್ ಜ್ವಾಲೆಯು ಚಂದ್ರನ ಮೇಲ್ಮೈಯಲ್ಲಿದ್ದ ಸಡಿಲವಾದ ಮಣ್ಣನ್ನು ಹಾರಿಸಿತು. ಸುಮಾರು ಮೂರು ಸೆಂಟಿಮೀಟರ್ಗಳಷ್ಟು ದಪ್ಪಗಿದ್ದ, ಅತ್ಯಂತ ಮೃದುವಾದ ಹಾಗೂ ರಂಧ್ರಯುಕ್ತವಾಗಿದ್ದ (Fluffy and Porous) ಮೇಲ್ಪದರ ಇದರಿಂದಾಗಿ ಕೊಚ್ಚಿಹೋಯಿತು. ಇದರ ಪರಿಣಾಮವಾಗಿ, ಈ ಹಿಂದೆ ಎಂದೂ ಸೂರ್ಯನ ಬೆಳಕಿಗೆ ಅಥವಾ ಬಾಹ್ಯಾಕಾಶಕ್ಕೆ ತೆರೆದುಕೊಳ್ಳದೆ ಅಡಿಯಲ್ಲಿದ್ದ ತಾಜಾ ಮಣ್ಣಿನ ಪದರವನ್ನು ನೇರವಾಗಿ ಅಧ್ಯಯನ ಮಾಡಲು ChaSTE ಉಪಕರಣಕ್ಕೆ ಸಾಧ್ಯವಾಯಿತು.
ಕೇಕ್ನಂತಿದೆ ಚಂದ್ರನ ಮಣ್ಣಿನ ಪದರ!
ಈ ಪ್ರಯೋಗದಿಂದ ಬಂದ ದತ್ತಾಂಶಗಳು (Data) ‘ಶಿವಶಕ್ತಿ ಪಾಯಿಂಟ್’ನ ಮಣ್ಣಿನ ಬಗ್ಗೆ ಅತ್ಯಂತ ರೋಚಕ ಸತ್ಯವನ್ನು ಬಹಿರಂಗಪಡಿಸಿವೆ. ಚಂದ್ರನ ಮಣ್ಣು ಎಲ್ಲಾ ಕಡೆ ಒಂದೇ ಸಮನಾಗಿಲ್ಲ; ಬದಲಿಗೆ ಅದು ಕೇಕ್ನಂತೆ ಪದರ-ಪದರವಾಗಿದೆ ಎಂಬುದನ್ನು ಪ್ರಯೋಗವು ಸೂಚಿಸಿದೆ..!
ಚಂದ್ರನ ಶಿವಶಕ್ತಿ ಪಾಯಿಂಟ್ನ ಮೇಲ್ಭಾಗದ ಕೆಲವು ಸೆಂಟಿಮೀಟರ್ಗಳಷ್ಟು ಮಣ್ಣು ಅತ್ಯಂತ ಸಡಿಲವಾದ ಮತ್ತು ರಂಧ್ರಗಳಿಂದ ಕೂಡಿದ ಮೃದುವಾದ ವಸ್ತುವಾಗಿದೆ. ಇದರ ತಕ್ಷಣದ ಕೆಳಗಿರುವ ಮಣ್ಣು ಅತ್ಯಂತ ದಟ್ಟವಾಗಿದ್ದು (Dense), ಗಟ್ಟಿಯಾಗಿದೆ. ಇದು ಸಂಪೂರ್ಣವಾಗಿ ಭಿನ್ನವಾದ ತಾಪಮಾನ ಮತ್ತು ಯಾಂತ್ರಿಕ ಗುಣಲಕ್ಷಣಗಳನ್ನು ಹೊಂದಿದೆ ಎಂಬುದು ಕಂಡುಬಂದಿದೆ.
ಕೇವಲ ಕೆಲವು ಸೆಂಟಿಮೀಟರ್ಗಳ ಅಂತರದಲ್ಲಿ ಕಂಡುಬರುವ ಈ ತೀವ್ರ ಬದಲಾವಣೆಯು ಚಂದ್ರನ ದಕ್ಷಿಣ ಧ್ರುವದ ಮೇಲ್ಮೈ ಅತ್ಯಂತ ‘ವಿಷಮಜಾತೀಯ’ (Heterogeneous) ಗುಣಧರ್ಮವನ್ನು ಹೊಂದಿದೆ ಎಂಬುದನ್ನು ತೋರಿಸುತ್ತದೆ. ಅಂದರೆ, ಅತ್ಯಂತ ಕಡಿಮೆ ದೂರದಲ್ಲೂ ಅಲ್ಲಿನ ಮಣ್ಣಿನ ಗುಣಲಕ್ಷಣಗಳಲ್ಲಿ ಭಾರಿ ವ್ಯತ್ಯಾಸ ಕಂಡುಬಂದಿದೆ. ಭವಿಷ್ಯದಲ್ಲಿ ಚಂದ್ರನ ಮೇಲೆ ಕೊರೆಯುವ (Drilling), ಉತ್ಖನನ ಮಾಡುವ ಅಥವಾ ಕಟ್ಟಡಗಳನ್ನು ನಿರ್ಮಿಸುವ ಕಾರ್ಯಾಚರಣೆಗಳಿಗೆ ಈ ಮಾಹಿತಿ ಅತ್ಯಂತ ನಿರ್ಣಾಯಕವಾಗಿದೆ.
ಇದಲ್ಲದೆ, ಚಂದ್ರನ ಮೇಲೆ ಹಗಲಿನಿಂದ ರಾತ್ರಿಗೆ ಬದಲಾಗುವ ಸುದೀರ್ಘ ‘ಟ್ವಿಲೈಟ್’ (ಸಂಜೆ ಸಮಯ) ಅವಧಿಯಲ್ಲಿ ಈ ಮಣ್ಣು ಹೇಗೆ ತಣ್ಣಗಾಗುತ್ತದೆ ಮತ್ತು ಶಾಖವನ್ನು ಹೇಗೆ ಹೊರಸೂಸುತ್ತದೆ ಎಂಬುದನ್ನು ಸಹ ChaSTE ದಾಖಲಿಸಿದೆ. ಚಂದ್ರನು ಸೌರ ಶಕ್ತಿಯನ್ನು ಹೇಗೆ ನಿರ್ವಹಿಸುತ್ತಾನೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ಇದು ಹೊಸ ಒಳನೋಟವನ್ನು ನೀಡಿದೆ.
ನಾಸಾದ ‘ಆರ್ಟೆಮಿಸ್’ ಮಿಷನ್ಗೆ ದಿಕ್ಸೂಚಿ
ಜಾಗತಿಕ ಬಾಹ್ಯಾಕಾಶ ರಂಗದಲ್ಲಿ ಚಂದ್ರನ ದಕ್ಷಿಣ ಧ್ರುವವು ಈಗ ಪ್ರಮುಖ ಆಕರ್ಷಣೆಯಾಗಿದೆ. ವಿಶೇಷವಾಗಿ ನಾಸಾದ ‘ಆರ್ಟೆಮಿಸ್’ ಕಾರ್ಯಾಚರಣೆಯು ಮಾನವರನ್ನು ಮತ್ತೊಮ್ಮೆ ಚಂದ್ರನಿಗೆ ಕಳುಹಿಸಿ, ಅಲ್ಲಿ ಶಾಶ್ವತ ನೆಲೆಯನ್ನು ನಿರ್ಮಿಸುವ ಗುರಿ ಹೊಂದಿದೆ. ಈ ಪ್ರದೇಶದ ಶಾಶ್ವತ ಕತ್ತಲಿರುವ ಕುಳಿಗಳಲ್ಲಿ (Craters) ಭಾರಿ ಪ್ರಮಾಣದ ನೀರ್ಗಲ್ಲು (Water Ice) ಇರಬಹುದು ಎಂದು ನಂಬಲಾಗಿದೆ, ಇದು ಭವಿಷ್ಯದ ಬಾಹ್ಯಾಕಾಶ ನೆಲೆಗಳಿಗೆ ಇಂಧನ ಮತ್ತು ನೀರಿನ ಪ್ರಮುಖ ಮೂಲವಾಗಬಲ್ಲದು ಎಂದು ಭಾವಿಸಲಾಗಿದೆ.
ಆದರೆ ಅಲ್ಲಿ ನೆಲೆಸಬೇಕಾದರೆ ಮಣ್ಣಿನ ಭೌಗೋಳಿಕ ಮತ್ತು ತಾಪಮಾನದ ಗುಣಲಕ್ಷಣಗಳನ್ನು ತಿಳಿಯುವುದು ಅತ್ಯಗತ್ಯ. ಚಂದ್ರನ ಮಣ್ಣು ಜಾಗದಿಂದ ಜಾಗಕ್ಕೆ ತೀವ್ರವಾಗಿ ಬದಲಾಗುತ್ತದೆ ಎಂಬ ಇಸ್ರೋದ ಈ ಹೊಸ ಆವಿಷ್ಕಾರವು, ಭವಿಷ್ಯದ ಗಗನಯಾತ್ರಿಗಳ ಸುರಕ್ಷತೆ, ಲ್ಯಾಂಡಿಂಗ್ ಸ್ಥಿರತೆ, ವಾಹನಗಳ ಚಲನಶೀಲತೆ ಮತ್ತು ಅಲ್ಲಿನ ನಿರ್ಮಾಣ ಕಾರ್ಯಗಳಿಗೆ ಕೇವಲ ಅಂದಾಜನ್ನು ಆಧರಿಸದೆ, ನಿಖರವಾದ ಸ್ಥಳೀಯ ಮಾಪನಗಳನ್ನೇ ಅವಲಂಬಿಸಬೇಕಾಗುತ್ತದೆ ಎಂಬುದನ್ನು ಸ್ಪಷ್ಟಪಡಿಸಿದೆ.
ಚಂದ್ರಯಾನದ ಅಳಿಸಲಾಗದ ಪರಂಪರೆ
ಯಾವುದೇ ಪೂರ್ವ ಸಿದ್ಧತೆ ಇಲ್ಲದೆ, ಕೇವಲ ಸಮಯಪ್ರಜ್ಞೆಯಿಂದ ಕೈಗೊಂಡ ಈ ‘ಹಾಪ್ ಎಕ್ಸ್ಪರಿಮೆಂಟ್’, ಚಂದ್ರನ ದಕ್ಷಿಣ ಧ್ರುವದಿಂದ ಲಭ್ಯವಾದ ಅತ್ಯಂತ ಅಪರೂಪದ ಮತ್ತು ಮೌಲ್ಯಯುತವಾದ ದತ್ತಾಂಶವಾಗಿದೆ.
ಭಾರತದ ಚಂದ್ರಯಾನ ಮಿಷನ್ಗಳು ಜಾಗತಿಕವಾಗಿ ಚಂದ್ರನ ಇತಿಹಾಸವನ್ನು ಬದಲಿಸುತ್ತಿರುವುದು ಇದೇ ಮೊದಲಲ್ಲ. 2008ರಲ್ಲೇ ಚಂದ್ರಯಾನ-1 ಚಂದ್ರನ ಮೇಲ್ಮೈಯಲ್ಲಿ ನೀರಿನ ಕಣಗಳಿರುವುದನ್ನು ಪತ್ತೆಹಚ್ಚಿ ಜಗತ್ತನ್ನೇ ಬೆರಗುಗೊಳಿಸಿತ್ತು. ಈಗ ಚಂದ್ರಯಾನ-3 ಅತ್ಯಂತ ತೀವ್ರವಾದ ವಾತಾವರಣದಲ್ಲಿ ಚಂದ್ರನ ಮಣ್ಣು ಸೂಕ್ಷ್ಮ ಮಟ್ಟದಲ್ಲಿ ಹೇಗೆ ವರ್ತಿಸುತ್ತದೆ ಎಂಬುದನ್ನು ಜಗತ್ತಿಗೆ ತೋರಿಸಿಕೊಟ್ಟಿದೆ.
ಶಿವಶಕ್ತಿ ಪಾಯಿಂಟ್ನಲ್ಲಿ ನಡೆದ ಈ 50 ಸೆಂಟಿಮೀಟರ್ಗಳ ಸಣ್ಣ ಜಿಗಿತ, ಚಂದ್ರನು ತನ್ನ ಒಡಲಿನಲ್ಲಿ ಇಟ್ಟುಕೊಂಡಿರುವ ರಹಸ್ಯಗಳನ್ನು ಪದರ-ಪದರವಾಗಿ ಬಿಚ್ಚಿಡಲು ಇನ್ನೂ ಬಹಳಷ್ಟು ಬಾಕಿ ಇದೆ ಎಂಬುದನ್ನು ಸಾಬೀತುಪಡಿಸಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ