ಸಿಕ್ಕಿಂನ ಶಾಲೆಯೊಂದರಲ್ಲಿ ನಡೆದ ಹೃದಯಸ್ಪರ್ಶಿ ಘಟನೆಯೊಂದು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದೆ. ಶಾಲೆಯ ಬೆಳಗಿನ ಪ್ರಾರ್ಥನೆಯಲ್ಲಿ ಅನಿರೀಕ್ಷಿತವಾಗಿ ಭಾಗಿಯಾದ ಬೀದಿ ನಾಯಿಯೊಂದು, ವಿದ್ಯಾರ್ಥಿಗಳ ನಡುವೆ ಯಾವುದೇ ಭಯವಿಲ್ಲದೆ ಪ್ರಾರ್ಥನೆಗೆ ನಿಂತು ಎಲ್ಲರ ಗಮನ ಸೆಳೆದಿದೆ.
ಪ್ರಸನ್ನ ಪಖ್ರಿನ್ ಎಂಬುವವರು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿರುವ ಈ ವಿಡಿಯೋ ಈಗ ಇಂಟರ್ನೆಟ್ನಲ್ಲಿ ಸಖತ್ ವೈರಲ್ ಆಗಿದೆ.
ವಿಡಿಯೋದಲ್ಲಿ ಕಾಣಿಸುವಂತೆ, ಶಾಲೆಯ ಮೈದಾನದಲ್ಲಿ ಎಂದಿನಂತೆ ಬೆಳಗಿನ ಪ್ರಾರ್ಥನೆಗಾಗಿ ವಿದ್ಯಾರ್ಥಿಗಳೆಲ್ಲರೂ ಸಾಲಾಗಿ ಶಿಸ್ತಿನಿಂದ ನಿಂತಿದ್ದಾರೆ. ಈ ವೇಳೆ ಯಾರೂ ನಿರೀಕ್ಷಿಸದ ‘ವಿಶೇಷ ವಿದ್ಯಾರ್ಥಿ’ಯೊಬ್ಬ ಗುಂಪನ್ನು ಸೇರಿಕೊಳ್ಳುತ್ತಾನೆ.
ಕ್ಯಾಮೆರಾವನ್ನು ಪ್ರಾರ್ಥನಾ ಮೈದಾನದತ್ತ ತಿರುಗಿಸಿದಾಗ, ಅಲ್ಲಿ ನೆರೆದಿದ್ದವರಿಗೆ ಅಚ್ಚರಿಯೊಂದು ಕಾದಿತ್ತು. ಅಲ್ಲಿ ಬಿಳಿ ಬಣ್ಣದ ತುಪ್ಪಳವಿರುವ (Fluffy) ಬೀದಿ ನಾಯಿಯೊಂದು ತನ್ನ ಹಿಂದಿನ ಎರಡು ಕಾಲುಗಳ ಮೇಲೆ ನೆಟ್ಟಗೆ ನಿಂತಿತ್ತು! ಅಷ್ಟೇ ಅಲ್ಲದೆ, ತನ್ನ ಮುಂಭಾಗದ ಎರಡು ಕಾಲುಗಳನ್ನು ಗಾಳಿಯಲ್ಲಿ ಎತ್ತಿ ಹಿಡಿದು, ನೋಡಲು ಮುದ್ದಾಗಿ ಪ್ರಾರ್ಥನೆ ಮಾಡುತ್ತಿರುವ ಭಂಗಿಯಲ್ಲೇ ನಿಂತಿತ್ತು.
ವಿದ್ಯಾರ್ಥಿಗಳೆಲ್ಲರೂ ಒಟ್ಟಾಗಿ ಶಿಸ್ತಿನಿಂದ ಪ್ರಾರ್ಥನೆ ಹಾಡನ್ನು ಹಾಡುತ್ತಿದ್ದರೂ, ಈ ನಾಯಿ ಮಾತ್ರ ಯಾವುದೇ ಗಲಿಬಿಲಿ ಇಲ್ಲದೆ ಅತ್ಯಂತ ಶಾಂತವಾಗಿ ಮತ್ತು ಸಂಯಮದಿಂದ ನಿಂತಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ.
ಕೆಲವೇ ಕ್ಷಣಗಳ ನಂತರ, ಆ ವಾತಾವರಣ ತನಗೆ ತೀರಾ ಒಗ್ಗಿಕೊಂಡಿರುವಂತೆ ಅತ್ಯಂತ ನಿರಾಳವಾಗಿ ಆ ನಾಯಿ ಮಕ್ಕಳ ಪಕ್ಕದಲ್ಲೇ ಮೆಲ್ಲನೆ ಕುಳಿತುಕೊಳ್ಳುತ್ತದೆ.
ನಾಯಿಯ ಈ ಶಾಂತ ಸ್ವಭಾವ ಮತ್ತು ಮುದ್ದಾದ ವರ್ತನೆಯನ್ನು ಕಂಡು ನೆಟ್ಟಿಗರು ಫಿದಾ ಆಗಿದ್ದಾರೆ. “ಆ ನಾಯಿ ನಿಜಕ್ಕೂ ಆ ಶಾಲೆಯದ್ದೇ ಒಂದು ಭಾಗದಂತೆ ಕಾಣಿಸುತ್ತಿದೆ” ಎಂದು ಹಲವರು ಕಾಮೆಂಟ್ ಮಾಡಿದ್ದು, ಈ ಅಪರೂಪದ ದೃಶ್ಯ ಎಲ್ಲರ ಮನಸ್ಸನ್ನು ಹಗುರಗೊಳಿಸಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ