ಚೆನ್ನೈ : ಹೊಸತನ (ಇನ್ನೋವೇಷನ್) ಎಂದರೆ ಯಾವಾಗಲೂ ಅತ್ಯಾಧುನಿಕ ಪ್ರಯೋಗಾಲಯಗಳು ಅಥವಾ ದುಬಾರಿ ಯಂತ್ರೋಪಕರಣಗಳಿಂದಲೇ ಆಗಬೇಕೆಂದಿಲ್ಲ. ದೈನಂದಿನ ಬದುಕಿನ ಸಮಸ್ಯೆಗೆ ಸರಳ ಪರಿಹಾರ ಕಂಡುಕೊಳ್ಳುವ ಒಂದು ಆಲೋಚನೆಯೇ ಕೆಲವೊಮ್ಮೆ ದೊಡ್ಡ ಬದಲಾವಣೆಗೆ ಕಾರಣವಾಗುತ್ತದೆ. ಇದಕ್ಕೆ ತಮಿಳುನಾಡಿನ ರೈತರೊಬ್ಬರು ಉತ್ತಮ ಉದಾಹರಣೆಯಾಗಿದ್ದು, 55 ಅಡಿ ಎತ್ತರದ ತಾಳೆಮರದ ಸುತ್ತ ಕಬ್ಬಿಣದ ಸುರುಳಿ (ಸ್ಪೈರಲ್) ಮೆಟ್ಟಿಲು ನಿರ್ಮಿಸಿ, ಪನೆರಾ (ಪದನೀರು) ಕೊಯ್ಲನ್ನು ಸುಲಭ, ಸುರಕ್ಷಿತ ಹಾಗೂ ಹೆಚ್ಚು ಲಾಭದಾಯಕವಾಗಿಸಿದ್ದಾರೆ.
ತಮಿಳುನಾಡಿನ ತೂತುಕ್ಕುಡಿ ಜಿಲ್ಲೆಯ ಸಲೈಪುಥೂರ್ ಗ್ರಾಮದ ರೈತ ದಿನಕರ ಅವರ ಕುಟುಂಬವು ಹಲವು ತಲೆಮಾರುಗಳಿಂದ ತಾಳೆಮರ ಆಧಾರಿತ ಉದ್ಯಮದಲ್ಲಿ ತೊಡಗಿಸಿಕೊಂಡಿದೆ. ಆದರೆ ಸಾಂಪ್ರದಾಯಿಕ ವೃತ್ತಿಗಳಂತೆ ತಾಳೆಮರ ಏರಿ ತಾಳೆ ನೀರು ಸಂಗ್ರಹಿಸುವ ಕೆಲಸವೂ ಇತ್ತೀಚಿನ ವರ್ಷಗಳಲ್ಲಿ ಹೆಚ್ಚು ಸವಾಲಿನದಾಗಿದೆ. ವಿಶೇಷವಾಗಿ ಅನುಭವಿ ಮರ ಏರುವ ಕಾರ್ಮಿಕರಿಗೆ ವಯಸ್ಸಾಗುತ್ತಿರುವುದರಿಂದ ಈ ವೃತ್ತಿಯನ್ನು ಉಳಿದವರು ಮುಂದುವರಿಸುವುದು ಕಡಿಮೆಯಾಗಿದ್ದರಿಂದ ಮರ ಏರಿ ಪನೆರಾ (ತಾಳೆ ನೀರು) ಸಂಗ್ರಹಿಸುವುದು ಕಷ್ಟಕರವಾಗಿದೆ.
ದಿನಕರ ಅವರ 70 ವರ್ಷದ ತಂದೆ ಯೇಸುದಾಸನ್ ಅವರು ಒಂದು ಕಾಲದಲ್ಲಿ ತಾಳೆಮರ ಏರಿ ಪನೆರಾ ಸಂಗ್ರಹಿಸುವ ಕೆಲಸದಲ್ಲಿ ಸಕ್ರಿಯರಾಗಿದ್ದರು. ಆದರೆ ವಯೋಸಹಜ ಕಾರಣಗಳಿಂದ ಮರ ಏರುವುದನ್ನು ನಿಲ್ಲಿಸಬೇಕಾಯಿತು. ಕುಟುಂಬದ ಜೀವನೋಪಾಯದ ಜೊತೆಗೆ ತಲೆಮಾರುಗಳಿಂದ ಬಂದಿರುವ ಈ ಸಾಂಪ್ರದಾಯಿಕ ವೃತ್ತಿಯನ್ನು ಉಳಿಸಿಕೊಳ್ಳುವ ಉದ್ದೇಶದಿಂದ ದಿನಕರ ಹೊಸ ಆಲೋಚನೆಗೆ ಮುಂದಾದರು.
ಸಾಂಪ್ರದಾಯಿಕ ರೀತಿಯಲ್ಲಿ ಮರ ಏರುವ ಕಷ್ಟಕರ ವಿಧಾನವನ್ನು ಅವಲಂಬಿಸದೇ, ತಮ್ಮ ಮನೆಯ ಸಮೀಪದ 55 ಅಡಿ ಎತ್ತರದ ತಾಳೆಮರದ ಸುತ್ತ ಸುಮಾರು ₹60 ಸಾವಿರ ವೆಚ್ಚದಲ್ಲಿ ಕಬ್ಬಿಣದ ರಾಡ್ಗಳಿಂದ ಸುರುಳಿ ಆಕಾರದ ಮೆಟ್ಟಿಲು ನಿರ್ಮಿಸಿದರು. ಮರದ ಕಾಂಡವನ್ನು ಸುತ್ತುವರಿದಿರುವ ಈ ಬಲಿಷ್ಠ ಮೆಟ್ಟಿಲಿನ ಮೂಲಕ ಮರದ ಮೇಲ್ಭಾಗಕ್ಕೆ ಸುಲಭವಾಗಿ ನಡೆದುಕೊಂಡೇ ತಲುಪಬಹುದಾಗಿದೆ.
ಈ ಮೆಟ್ಟಿಲನ್ನು ಕೇವಲ ಅನುಭವಿ ಮರ ಏರುವವರಿಗಷ್ಟೇ ಅಲ್ಲದೆ, ವಯೋವೃದ್ಧರು, ಮಹಿಳೆಯರು ಹಾಗೂ ಕುಟುಂಬದ ಕೆಲಸದಲ್ಲಿ ತೊಡಗಿರುವ ದೊಡ್ಡ ಮಕ್ಕಳೂ ಸಹ ಸುರಕ್ಷಿತವಾಗಿ ಬಳಸುವಂತೆ ವಿನ್ಯಾಸಗೊಳಿಸಲಾಗಿದೆ.
ಪನೆರಾ ಸಂಗ್ರಹಿಸುವ ಕೆಲಸವು ಇದುವರೆಗೆ ಹೆಚ್ಚಿನ ದೈಹಿಕ ಶ್ರಮ ಹಾಗೂ ಅಪಾಯವನ್ನು ಒಳಗೊಂಡಿತ್ತು. ಆದರೆ ಮೆಟ್ಟಿಲು ನಿರ್ಮಾಣದಿಂದ ಮರ ಏರುವ ಅಗತ್ಯವೇ ಇಲ್ಲದಂತಾಗಿದ್ದು, ಜಾರಿ ಬೀಳುವ ಹಾಗೂ ಅಪಘಾತ ಸಂಭವಿಸುವ ಸಾಧ್ಯತೆಗಳು ಗಣನೀಯವಾಗಿ ಕಡಿಮೆಯಾಗಿವೆ. ಜೊತೆಗೆ, ನುರಿತ ಮರ ಏರುವವರ ಮೇಲಿನ ಅವಲಂಬನೆಯೂ ಇಳಿಕೆಯಾಗಿದ್ದು, ಕುಟುಂಬದ ಸಾಂಪ್ರದಾಯಿಕ ಉದ್ಯೋಗವನ್ನು ನಿರಂತರವಾಗಿ ಮುಂದುವರಿಸಲು ಸಹಕಾರಿಯಾಗಿದೆ.
₹60 ಸಾವಿರ ವೆಚ್ಚವು ಮೊದಲ ನೋಟಕ್ಕೆ ದೊಡ್ಡ ಹೂಡಿಕೆಯಂತೆ ಕಂಡರೂ, ದಿನಕರ ಅವರ ಪ್ರಕಾರ ಈ ಪದನೀರು ಮಾರಾಟದಿಂದ ಮೊದಲ ವರ್ಷದೊಳಗೆ ಈ ಹೂಡಿಕೆಯ ಸಂಪೂರ್ಣ ಹಣ ಮರಳಿ ಬರಲಿದೆ. ಆರೋಗ್ಯಕರ ತಾಳೆಮರವು ಹಲವು ವರ್ಷಗಳವರೆಗೆ ಉತ್ಪಾದಕವಾಗಿರುವುದರಿಂದ, ಈ ಮೆಟ್ಟಿಲಿನ ಮೂಲಕ ಕನಿಷ್ಠ ಮುಂದಿನ 15 ವರ್ಷಗಳ ಕಾಲ ನಿರಂತರ ಆದಾಯ ದೊರೆಯುವ ನಿರೀಕ್ಷೆಯಿದೆ ಎಂದು ಅವರು ಹೇಳಿದ್ದಾರೆ.
ದಿನಕರ ಅವರ ಈ ವಿನೂತನ ಪ್ರಯತ್ನವು ಸಾಂಪ್ರದಾಯಿಕ ಜೀವನೋಪಾಯವನ್ನು ಬದಲಿಸದೇ, ಅದನ್ನು ಆಧುನಿಕಗೊಳಿಸಿ ಹೆಚ್ಚು ಸುರಕ್ಷಿತ, ಸುಲಭ ಹಾಗೂ ಲಾಭದಾಯಕವಾಗಿಸಬಹುದೆಂಬುದನ್ನು ಸಾಬೀತುಪಡಿಸಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ