ನವದೆಹಲಿ : ಇ20 (E20) ಪೆಟ್ರೋಲ್ ಬಳಕೆಯಿಂದ ವಾಹನಗಳ ಎಂಜಿನ್ಗೆ ಹಾನಿಯಾಗುತ್ತದೆ ಅಥವಾ ಇಂಧನ ದಕ್ಷತೆ (ಮೈಲೇಜ್) ಕಡಿಮೆಯಾಗುತ್ತದೆ ಎಂಬ ಆತಂಕಗಳಿಗೆ ಈವರೆಗೆ ಯಾವುದೇ ವೈಜ್ಞಾನಿಕ ಅಧ್ಯಯನದಲ್ಲಿಯೂ ದೃಢೀಕರಣ ದೊರೆತಿಲ್ಲ ಎಂದು ಕೇಂದ್ರ ಸರ್ಕಾರ ಬುಧವಾರ ರಾಜ್ಯಸಭೆಗೆ ಸ್ಪಷ್ಟಪಡಿಸಿದೆ.
ರಾಜ್ಯಸಭೆಯಲ್ಲಿ ಲಿಖಿತ ಉತ್ತರ ನೀಡಿರುವ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ, ಇ20 ಪೆಟ್ರೋಲ್ ಅನ್ನು ದೇಶಾದ್ಯಂತ ಹಂತ ಹಂತವಾಗಿ ಜಾರಿಗೊಳಿಸುವ ಮುನ್ನ ವ್ಯಾಪಕ ವೈಜ್ಞಾನಿಕ ಅಧ್ಯಯನಗಳು, ಪ್ರಯೋಗಾಲಯ ಪರೀಕ್ಷೆಗಳು, ಕ್ಷೇತ್ರಮಟ್ಟದ (ಫೀಲ್ಡ್ ಟ್ರಯಲ್ಸ್) ಪರೀಕ್ಷೆಗಳು ಹಾಗೂ ತಜ್ಞ ಸಂಸ್ಥೆಗಳ ಜೊತೆ ಸಮಾಲೋಚನೆ ನಡೆಸಿ ವಾಹನಗಳ ಮೇಲಿನ ಪರಿಣಾಮವನ್ನು ಸಮಗ್ರವಾಗಿ ಮೌಲ್ಯಮಾಪನ ಮಾಡಲಾಗಿದೆ ಎಂದು ತಿಳಿಸಿದ್ದಾರೆ.
ಭಾರತೀಯ ತೈಲ ನಿಗಮ (IOCL), ಡೆಹ್ರಾಡೂನ್ನ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಪೆಟ್ರೋಲಿಯಂ (IIP), ಸೊಸೈಟಿ ಆಫ್ ಇಂಡಿಯನ್ ಆಟೋಮೊಬೈಲ್ ಮ್ಯಾನುಫ್ಯಾಕ್ಚರರ್ಸ್ (SIAM) ಹಾಗೂ ಆಟೋಮೋಟಿವ್ ರಿಸರ್ಚ್ ಅಸೋಸಿಯೇಷನ್ ಆಫ್ ಇಂಡಿಯಾ (ARAI) ಜಂಟಿಯಾಗಿ ದ್ವಿಚಕ್ರ ಹಾಗೂ ನಾಲ್ಕು ಚಕ್ರ ವಾಹನಗಳ ಮೇಲೆ ಇ20 ಇಂಧನದ ಪರಿಣಾಮವನ್ನು ಕುರಿತು ಸುದೀರ್ಘ ಅಧ್ಯಯನ ನಡೆಸಿವೆ ಎಂದು ಸಚಿವರು ಮಾಹಿತಿ ನೀಡಿದರು.
ಅಧ್ಯಯನದ ಪ್ರಕಾರ, ಕಾರುಗಳು ಮತ್ತು ದ್ವಿಚಕ್ರ ವಾಹನಗಳ ಎಂಜಿನ್ಗಳಲ್ಲಿ ಯಾವುದೇ ತಾಂತ್ರಿಕ ಮಾರ್ಪಾಡು ಮಾಡುವ ಅಗತ್ಯವಿಲ್ಲ ಎಂಬುದು ದೃಢಪಟ್ಟಿದೆ. ಈಗಾಗಲೇ ಬಳಕೆಯಲ್ಲಿರುವ ಹಳೆಯ ಮಾದರಿಯ (ಲೆಗಸಿ) ವಾಹನಗಳಲ್ಲಿಯೂ ಇ20 ಪೆಟ್ರೋಲ್ ಬಳಸಿದಾಗ ಕಾರ್ಯಕ್ಷಮತೆಯಲ್ಲಿ ಯಾವುದೇ ಗಮನಾರ್ಹ ಕುಸಿತ ಅಥವಾ ಎಂಜಿನ್ನಲ್ಲಿ ಅಸಹಜ ಸವೆತ-ಹಾನಿ ಕಂಡುಬಂದಿಲ್ಲ ಎಂದು ಗಡ್ಕರಿ ತಿಳಿಸಿದರು.
ಬಿಎಸ್-III ವಾಹನಗಳಿಗೆ ಮಾತ್ರ ಸಣ್ಣಪುಟ್ಟ ಬದಲಾವಣೆ ಅಗತ್ಯ
2005ರ ಏಪ್ರಿಲ್ 1ರಿಂದ ಪರಿಚಯಿಸಲಾದ ಹಾಗೂ 2016ಕ್ಕೂ ಮೊದಲು ತಯಾರಿಸಲಾದ ಬಿಎಸ್-III ವಾಹನಗಳ ಮೇಲೆ ನಡೆಸಿದ ಪರೀಕ್ಷೆಯಲ್ಲಿ ಕೆಲವು ರಬ್ಬರ್ ಭಾಗಗಳು, ಸೀಲ್ಗಳು ಹಾಗೂ ಗ್ಯಾಸ್ಕೆಟ್ಗಳನ್ನು ಬದಲಾಯಿಸುವ ಅಗತ್ಯ ಕಂಡುಬಂದಿದೆ. ಆದರೆ ಇಂತಹ ಬದಲಾವಣೆಗಳನ್ನು ವಾಹನಗಳ ನಿಯಮಿತ ಸರ್ವಿಸ್ ವೇಳೆ ಸುಲಭವಾಗಿ ಮಾಡಬಹುದಾಗಿದ್ದು, ಇದರಿಂದ ಯಾವುದೇ ದೊಡ್ಡ ತಾಂತ್ರಿಕ ಸಮಸ್ಯೆ ಉಂಟಾಗುವುದಿಲ್ಲ ಎಂದು ಸಚಿವರು ಸ್ಪಷ್ಟಪಡಿಸಿದ್ದಾರೆ.
ಇದಲ್ಲದೆ, ವಾಹನಗಳ ಚಾಲನಾ ಕಾರ್ಯಕ್ಷಮತೆ (Drivability), ಸುಲಭವಾಗಿ ಸ್ಟಾರ್ಟ್ ಆಗುವ ಸಾಮರ್ಥ್ಯ (Startability), ಲೋಹದ ಭಾಗಗಳ ಹೊಂದಾಣಿಕೆ (Metal Compatibility) ಹಾಗೂ ಪ್ಲಾಸ್ಟಿಕ್ ಭಾಗಗಳ ಹೊಂದಾಣಿಕೆ (Plastic Compatibility) ಸೇರಿದಂತೆ ಯಾವುದೇ ತಾಂತ್ರಿಕ ಅಂಶದಲ್ಲಿಯೂ ಸಮಸ್ಯೆ ಕಂಡುಬಂದಿಲ್ಲ ಎಂದು ಅವರು ಹೇಳಿದರು.
ಮೈಲೇಜ್ ಕೇವಲ ಇಂಧನದ ಮೇಲೆ ಅವಲಂಬಿತವಲ್ಲ
ಇಂಧನ ಕ್ಷಮತೆ ಕುರಿತ ಪ್ರಶ್ನೆಗೆ ಉತ್ತರಿಸಿದ ಗಡ್ಕರಿ, ವಾಹನದ ಮೈಲೇಜ್ ಕೇವಲ ಬಳಸುವ ಇಂಧನದ ಮೇಲೆ ಮಾತ್ರ ನಿರ್ಧಾರವಾಗುವುದಿಲ್ಲ ಎಂದು ತಿಳಿಸಿದರು. ವಾಹನದ ಎಂಜಿನ್ ವಿನ್ಯಾಸ, ಚಾಲಕರ ಚಾಲನಾ ವಿಧಾನ, ರಸ್ತೆ ಪರಿಸ್ಥಿತಿ, ವಾಹನದ ನಿರ್ವಹಣೆ, ಟೈರ್ಗಳ ಸ್ಥಿತಿ ಸೇರಿದಂತೆ ಹಲವು ಅಂಶಗಳು ಮೈಲೇಜ್ ಮೇಲೆ ಪರಿಣಾಮ ಬೀರುತ್ತವೆ ಎಂದು ವಾಹನ ತಯಾರಕರು ಹಾಗೂ ಪರೀಕ್ಷಾ ಸಂಸ್ಥೆಗಳು ಸ್ಪಷ್ಟಪಡಿಸಿವೆ ಎಂದರು.
ಇ20 ಪೆಟ್ರೋಲ್ ಜಾರಿಗೆ ಮುನ್ನ ನಡೆಸಿದ ವೈಜ್ಞಾನಿಕ ಅಧ್ಯಯನಗಳು, ವಿವಿಧ ಪರೀಕ್ಷೆಗಳು ಹಾಗೂ ತಜ್ಞರ ಸಮಾಲೋಚನೆಗಳು ಈ ನಿರ್ಣಯಗಳನ್ನು ಸಂಪೂರ್ಣವಾಗಿ ಬೆಂಬಲಿಸಿವೆ ಎಂದು ಅವರು ಹೇಳಿದರು.
ಪ್ರತಿಪಕ್ಷಗಳು, ಗ್ರಾಹಕ ಸಂಘಟನೆಗಳಿಂದ ಆತಂಕ
80 ಶೇಕಡಾ ಪೆಟ್ರೋಲ್ ಮತ್ತು 20 ಶೇಕಡಾ ಎಥೆನಾಲ್ ಮಿಶ್ರಣದಿಂದ ತಯಾರಾಗುವ ಇ20 ಪೆಟ್ರೋಲ್ ಪರಿಚಯವಾದ ನಂತರ, ವಿಶೇಷವಾಗಿ ಹೆಚ್ಚಿನ ಎಥೆನಾಲ್ ಮಿಶ್ರಣಕ್ಕೆ ವಿನ್ಯಾಸಗೊಳಿಸದ ಹಳೆಯ ವಾಹನಗಳ ಮೇಲೆ ಇದರ ಪರಿಣಾಮದ ಕುರಿತು ಪ್ರತಿಪಕ್ಷಗಳು ಹಾಗೂ ಗ್ರಾಹಕ ಸಂಘಟನೆಗಳು ಆತಂಕ ವ್ಯಕ್ತಪಡಿಸಿವೆ.
ಇಂಧನ ಕ್ಷಮತೆ ಕಡಿಮೆಯಾಗುವ ಸಾಧ್ಯತೆ, ವಾಹನಗಳ ನಿರ್ವಹಣಾ ವೆಚ್ಚ ಹೆಚ್ಚಾಗುವ ಆತಂಕ, ಎಂಜಿನ್ ಅಥವಾ ಇಂಧನ ವ್ಯವಸ್ಥೆಗೆ ಹಾನಿಯಾದರೆ ಅದರ ಹೊಣೆಗಾರಿಕೆ ಯಾರದು ಎಂಬ ಬಗ್ಗೆ ಸ್ಪಷ್ಟ ನೀತಿ ರೂಪಿಸುವಂತೆ ಅವರು ಆಗ್ರಹಿಸಿದ್ದಾರೆ. ಜೊತೆಗೆ, ಗ್ರಾಹಕರ ಹಿತಾಸಕ್ತಿ ಕಾಪಾಡಲು ಸರ್ಕಾರ ಕೈಗೊಂಡಿರುವ ಸುರಕ್ಷತಾ ಕ್ರಮಗಳ ಕುರಿತು ಹೆಚ್ಚಿನ ಪಾರದರ್ಶಕತೆ ಇರಬೇಕೆಂದು ಪ್ರತಿಪಕ್ಷಗಳು ಒತ್ತಾಯಿಸಿವೆ.
ನೀತಿ ಆಯೋಗ ಸಮಿತಿಯಿಂದ ಸಮಗ್ರ ಪರಿಶೀಲನೆ
2020ರ ಡಿಸೆಂಬರ್ನಲ್ಲಿ ನೀತಿ ಆಯೋಗ ರಚಿಸಿದ್ದ ಅಂತರ್ ಸಚಿವಾಲಯ ಸಮಿತಿಯು ವಾಹನಗಳ ಹೊಂದಾಣಿಕೆ (Vehicle Compatibility), ಇಂಧನ ದಕ್ಷತೆ, ತಾಂತ್ರಿಕ ಸುರಕ್ಷತೆ ಸೇರಿದಂತೆ ವಿವಿಧ ವಿಷಯಗಳನ್ನು ಸಮಗ್ರವಾಗಿ ಪರಿಶೀಲಿಸಿತ್ತು ಎಂದು ಗಡ್ಕರಿ ತಿಳಿಸಿದರು.
ಈ ಸಮಿತಿಯು 2021ರ ಜೂನ್ನಲ್ಲಿ ಬಿಡುಗಡೆ ಮಾಡಿದ ‘ರೋಡ್ಮ್ಯಾಪ್ ಫಾರ್ ಎಥೆನಾಲ್ ಬ್ಲೆಂಡಿಂಗ್ ಇನ್ ಇಂಡಿಯಾ 2020–25’ ವರದಿಯನ್ನು ವಾಹನ ತಯಾರಕರು, ತೈಲ ಮಾರಾಟ ಕಂಪನಿಗಳು ಹಾಗೂ ಕೃಷಿ ತಜ್ಞರೊಂದಿಗೆ ಸಮಾಲೋಚಿಸಿ ಸಿದ್ಧಪಡಿಸಲಾಗಿತ್ತು.
ಈ ವರದಿಯಲ್ಲಿ ಎಂಜಿನ್ ಕ್ಯಾಲಿಬ್ರೇಷನ್, ವಿವಿಧ ವಸ್ತುಗಳ ಹೊಂದಾಣಿಕೆ, ಇಂಧನ ವ್ಯವಸ್ಥೆ, ಚಾಲನಾ ಕಾರ್ಯಕ್ಷಮತೆ, ಎಂಜಿನ್ ಬಾಳಿಕೆ, ಮಾಲಿನ್ಯ ಉತ್ಸರ್ಗ ಹಾಗೂ ಇಂಧನ ದಕ್ಷತೆ ಸೇರಿದಂತೆ ಎಲ್ಲ ಪ್ರಮುಖ ತಾಂತ್ರಿಕ ಅಂಶಗಳನ್ನು ಸಮಗ್ರವಾಗಿ ಪರಿಶೀಲಿಸಿದ ಬಳಿಕವೇ ದೇಶದಲ್ಲಿ ಇ20 ಇಂಧನ ಜಾರಿಗೆ ಶಿಫಾರಸು ಮಾಡಲಾಗಿದೆ ಎಂದು ಸಚಿವರು ವಿವರಿಸಿದರು.
ವರ್ಷಗಳ ಸಂಶೋಧನೆ ಬಳಿಕ ಇ20 ಜಾರಿ
ಎಥೆನಾಲ್ ಮಿಶ್ರಿತ ಪೆಟ್ರೋಲ್ (EBP) ಕಾರ್ಯಕ್ರಮವನ್ನು ವೈಜ್ಞಾನಿಕ ದೃಢೀಕರಣ, ಹಂತ ಹಂತದ ಅನುಷ್ಠಾನ ಹಾಗೂ ವ್ಯಾಪಕ ಸಮಾಲೋಚನೆಗಳ ಆಧಾರದ ಮೇಲೆ ಜಾರಿಗೊಳಿಸಲಾಗಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
ಭಾರತದಲ್ಲಿ 2001ರಲ್ಲಿ ಪ್ರಾಯೋಗಿಕ ಯೋಜನೆಯಾಗಿ ಎಥೆನಾಲ್ ಮಿಶ್ರಣ ಆರಂಭಗೊಂಡಿತ್ತು. ನಂತರ 2006ರಲ್ಲಿ ಇ5 (E5) ಇಂಧನವನ್ನು ಪರಿಚಯಿಸಲಾಯಿತು. 2013–14ರವರೆಗೆ ಎಥೆನಾಲ್ ಮಿಶ್ರಣದ ಪ್ರಮಾಣ ಕಡಿಮೆ ಮಟ್ಟದಲ್ಲಿದ್ದರೂ, ನಂತರ ಎಥೆನಾಲ್ ಉತ್ಪಾದನಾ ಸಾಮರ್ಥ್ಯ, ಮೂಲಸೌಕರ್ಯ ಹಾಗೂ ನಿಯಂತ್ರಣ ವ್ಯವಸ್ಥೆಗಳನ್ನು ಬಲಪಡಿಸಿದ ಹಿನ್ನೆಲೆಯಲ್ಲಿ ಮಿಶ್ರಣದ ಪ್ರಮಾಣವನ್ನು ಹಂತ ಹಂತವಾಗಿ ಹೆಚ್ಚಿಸಲಾಯಿತು.
2026ರ ಏಪ್ರಿಲ್ನಲ್ಲಿ ಇ20 ಪೆಟ್ರೋಲ್ ದೇಶಾದ್ಯಂತ ಜಾರಿಗೊಳಿಸುವ ಮೊದಲು ಎಂಜಿನ್ನ ಬಾಳಿಕೆ, ತುಕ್ಕು ನಿರೋಧಕತೆ, ವಿವಿಧ ವಸ್ತುಗಳ ಹೊಂದಾಣಿಕೆ, ಮಾಲಿನ್ಯ ಉತ್ಸರ್ಗ, ಇಂಧನ ದಕ್ಷತೆ ಹಾಗೂ ವಾಹನಗಳ ಒಟ್ಟಾರೆ ಕಾರ್ಯಕ್ಷಮತೆ ಕುರಿತು ವ್ಯಾಪಕ ಪ್ರಯೋಗಾಲಯ ಅಧ್ಯಯನಗಳು, ಬಾಳಿಕೆ ಪರೀಕ್ಷೆಗಳು ಹಾಗೂ ಕ್ಷೇತ್ರಮಟ್ಟದ ಪರಿಶೀಲನೆಗಳನ್ನು ಯಶಸ್ವಿಯಾಗಿ ನಡೆಸಲಾಗಿದೆ ಎಂದು ಸರ್ಕಾರ ತಿಳಿಸಿದೆ.
ಭಾರತ್ ಸ್ಟೇಜ್ (BS) ಎನ್ನುವುದು ಭಾರತದಲ್ಲಿ ವಾಹನಗಳಿಂದ ಹೊರಸೂಸುವ ಕಾರ್ಬನ್ ಮಾನಾಕ್ಸೈಡ್, ನೈಟ್ರೋಜನ್ ಆಕ್ಸೈಡ್ಗಳು, ಹೈಡ್ರೋಕಾರ್ಬನ್ಗಳು ಹಾಗೂ ಸೂಕ್ಷ್ಮ ಕಣಗಳಂತಹ ಮಾಲಿನ್ಯಕಾರಕಗಳ ಪ್ರಮಾಣವನ್ನು ನಿಯಂತ್ರಿಸಲು ಜಾರಿಗೊಳಿಸಲಾಗಿರುವ ರಾಷ್ಟ್ರೀಯ ಮಾಲಿನ್ಯ ಉತ್ಸರ್ಗ ಮಾನದಂಡವಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ