ಕಠ್ಮಂಡು: ಹಠಾತ್ ಸಂಭವಿಸಿದ ಭೀಕರ ಪ್ರವಾಹದಿಂದ ತತ್ತರಿಸಿರುವ ನೇಪಾಳದಲ್ಲಿ ಮತ್ತೊಂದು ದೊಡ್ಡ ಅನಾಹುತದ ಆತಂಕ ಎದುರಾಗಿದೆ. ನೇಪಾಳ-ಟಿಬೆಟ್ ಗಡಿಭಾಗದ ಸಮೀಪ ಛೋಚೆನ್ ಖೋಲಾ (Chhochen Khola) ಮತ್ತು ಪ್ಯುರೆಪು ತ್ಸಾಂಗ್ಪೋ (Purepu Tsangpo) ನದಿಗಳ ಸಂಗಮ ಪ್ರದೇಶದಲ್ಲಿ ಹೊಸದಾಗಿ ನಿರ್ಮಾಣವಾಗಿರುವ ‘ಬ್ಯಾರಿಯರ್ ಲೇಕ್’ (ತಡೆ ಸರೋವರ) ಮುಂದಿನ ಮೂರು ದಿನಗಳಲ್ಲಿ ಒಡೆಯುವ ಅಪಾಯವಿದೆ ಎಂದು ಚೀನಾ ಅಧಿಕಾರಿಗಳು ಎಚ್ಚರಿಕೆ ನೀಡಿದ್ದಾರೆ.
ಚೀನಾದ ಸರ್ಕಾರಿ ಮಾಧ್ಯಮ ಗ್ಲೋಬಲ್ ಟೈಮ್ಸ್ ವರದಿ ಪ್ರಕಾರ, ಈ ಸರೋವರದಲ್ಲಿ ಗುರುವಾರ ಬೆಳಗ್ಗಿನ ವೇಳೆಗೆ ಸುಮಾರು 20 ಲಕ್ಷ ಘನ ಮೀಟರ್ ನೀರು ಸಂಗ್ರಹವಾಗಿದ್ದು, ಮುಂದಿನ ಮೂರು ದಿನಗಳಲ್ಲಿ ಇನ್ನೂ 30 ಲಕ್ಷ ಘನ ಮೀಟರ್ ನೀರು ಸೇರುವ ಸಾಧ್ಯತೆಯಿದೆ. ಇದರಿಂದ ಸರೋವರದ ಮೇಲೆ ಒತ್ತಡ ಹೆಚ್ಚಾಗಿ ಅದು ಒಡೆಯುವ ಅಪಾಯ ಮತ್ತಷ್ಟು ತೀವ್ರಗೊಂಡಿದೆ.
ಪ್ರವಾಹದ ಭೀಕರತೆಗೆ ಮತ್ತೊಂದು ಸವಾಲು
ಇತ್ತೀಚೆಗೆ ಚೀನಾ-ನೇಪಾಳ ಗಡಿಭಾಗದಲ್ಲಿ ಸಂಭವಿಸಿದ ವಿನಾಶಕಾರಿ ಹಠಾತ್ ಪ್ರವಾಹದಲ್ಲಿ ಈವರೆಗೆ ೩೫೦ಕ್ಕೂ ಹೆಚ್ಚು ಜನರು ಮೃತಪಟ್ಟಿದ್ದು, ಸಾವಿರಕ್ಕೂ ಹೆಚ್ಚು ಮಂದಿ ಇನ್ನೂ ನಾಪತ್ತೆಯಾಗಿದ್ದಾರೆ. ರಕ್ಷಣಾ ಕಾರ್ಯಾಚರಣೆಗಳು ಮುಂದುವರಿದಿರುವ ನಡುವೆಯೇ ಹೊಸದಾಗಿ ರೂಪುಗೊಂಡಿರುವ ಈ ತಡೆ ಸರೋವರ ಮತ್ತೊಂದು ದೊಡ್ಡ ಪ್ರವಾಹದ ಭೀತಿಯನ್ನು ಸೃಷ್ಟಿಸಿದೆ.
ಚೀನಾದ ಜಲಸಂಪನ್ಮೂಲ ಸಚಿವಾಲಯದ ಮಾಹಿತಿ ಪ್ರಕಾರ, ಸರೋವರ ಈಗಾಗಲೇ ನೀರಿನಿಂದ ತುಂಬಿ ಹರಿಯಲು ಆರಂಭಿಸಿದ್ದು, ಹೆಚ್ಚಿನ ನೀರಿನ ಹರಿವು ಮುಂದುವರಿದರೆ ತಡೆಗೋಡೆ ಕುಸಿದು ಕೆಳಭಾಗದ ಪ್ರದೇಶಗಳಿಗೆ ಭಾರಿ ಪ್ರಮಾಣದ ನೀರು ಹರಿಯುವ ಸಾಧ್ಯತೆ ಇದೆ.
ನೇಪಾಳಕ್ಕೆ ಮಾಹಿತಿ ರವಾನೆ
ಚೀನಾದ ಸರ್ಕಾರವು ಈ ಬೆಳವಣಿಗೆಯ ಕುರಿತು ನೇಪಾಳ ಸರ್ಕಾರಕ್ಕೆ ಅಧಿಕೃತ ಮಾಹಿತಿ ನೀಡಿದೆ. ನೇಪಾಳದ ಜಲವಿಜ್ಞಾನ ಮತ್ತು ಹವಾಮಾನ ಇಲಾಖೆ (DHM) ಚೀನಾದಿಂದ ಈ ಮಾಹಿತಿ ಸ್ವೀಕರಿಸಿದ್ದು, ವಿದೇಶಾಂಗ ಸಚಿವಾಲಯದ ಮೂಲಕ ಸಂಬಂಧಿತ ಅಧಿಕಾರಿಗಳಿಗೆ ಎಚ್ಚರಿಕೆ ನೀಡಲಾಗಿದೆ.
ಛೋಚೆನ್ ಖೋಲಾ ಮತ್ತು ಪ್ಯುರೆಪು ತ್ಸಾಂಗ್ಪೋ ನದಿಗಳು ಟಿಬೆಟ್ನಲ್ಲಿ ಜನಿಸಿ ನೇಪಾಳ ಪ್ರವೇಶಿಸಿದ ಬಳಿಕ ಭೋಟೆ ಕೋಶಿ (Bhote Koshi) ನದಿಯ ಭಾಗವಾಗುತ್ತವೆ. ಈ ಹಿನ್ನೆಲೆಯಲ್ಲಿ ಸರೋವರ ಒಡೆದರೆ ಭೋಟೆ ಕೋಶಿ ತೀರದ ಹಲವು ಪ್ರದೇಶಗಳು ಮತ್ತೆ ಪ್ರವಾಹದ ಹೊಡೆತಕ್ಕೆ ಸಿಲುಕುವ ಆತಂಕ ವ್ಯಕ್ತವಾಗಿದೆ.
ಜನರಿಗೆ ಎಚ್ಚರಿಕೆ
ಪ್ರವಾಸಿಗರು, ಭದ್ರತಾ ಸಿಬ್ಬಂದಿ ಹಾಗೂ ಶೋಧ-ರಕ್ಷಣಾ ಕಾರ್ಯಾಚರಣೆಯಲ್ಲಿ ತೊಡಗಿರುವ ತಂಡಗಳು ಅತ್ಯಂತ ಎಚ್ಚರಿಕೆಯಿಂದ ಇರಬೇಕು ಎಂದು ನೇಪಾಳ ಅಧಿಕಾರಿಗಳು ಸೂಚಿಸಿದ್ದಾರೆ. ಚೀನಾ ಸರ್ಕಾರವು ಸರೋವರದ ಸ್ಥಿತಿಯನ್ನು ನಿರಂತರವಾಗಿ ಮೇಲ್ವಿಚಾರಣೆ ಮಾಡುತ್ತಿದ್ದು, ಪ್ರವಾಹದ ಮಾದರಿಗಳ ಅಧ್ಯಯನ ಹಾಗೂ ಅಪಾಯ ಮೌಲ್ಯಮಾಪನ ಕಾರ್ಯಗಳನ್ನು ನಡೆಸುತ್ತಿದೆ.
ಚೀನಾದ ಜೊತೆ ಸಮಾಲೋಚನೆಗೆ ಒತ್ತಾಯ
ಈ ನಡುವೆ, ನೇಪಾಳದ ಆಡಳಿತಾರೂಢ ರಾಷ್ಟ್ರೀಯ ಸ್ವತಂತ್ರ ಪಕ್ಷದ (RSP) ಅಧ್ಯಕ್ಷ ರವಿ ಲಾಮಿಚಾನೆ ಕರೆದ ಸರ್ವಪಕ್ಷ ಸಭೆಯಲ್ಲಿ ರಾಜಕೀಯ ನಾಯಕರು ಗಡಿಭಾಗದ ಹಿಮನದಿ ಅಪಾಯಗಳನ್ನು ಎದುರಿಸಲು ಚೀನಾದ ಜೊತೆ ರಾಜತಾಂತ್ರಿಕ ಮಟ್ಟದಲ್ಲಿ ತುರ್ತು ಸಮಾಲೋಚನೆ ನಡೆಸಬೇಕು ಎಂದು ಆಗ್ರಹಿಸಿದ್ದಾರೆ. ಜೊತೆಗೆ, ಭವಿಷ್ಯದಲ್ಲಿ ಇಂತಹ ದುರಂತಗಳನ್ನು ತಡೆಗಟ್ಟಲು ಬಲಿಷ್ಠ ವಿಪತ್ತು ನಿರ್ವಹಣಾ ವ್ಯವಸ್ಥೆಯನ್ನು ರೂಪಿಸುವಂತೆ ಸರ್ಕಾರಕ್ಕೆ ಶಿಫಾರಸು ಮಾಡಿದ್ದಾರೆ.
ನೇಪಾಳದಲ್ಲಿ ಈಗಾಗಲೇ ಪ್ರವಾಹ ಮತ್ತು ಭೂಕುಸಿತಗಳಿಂದ ಉಂಟಾಗಿರುವ ಹಾನಿ ಅಪಾರವಾಗಿದ್ದು, ಹೊಸದಾಗಿ ರೂಪುಗೊಂಡಿರುವ ಈ ತಡೆ ಸರೋವರ ಮತ್ತೊಂದು ಮಹಾ ದುರಂತಕ್ಕೆ ಕಾರಣವಾಗಬಹುದೇ ಎಂಬ ಆತಂಕ ದೇಶದಾದ್ಯಂತ ಹೆಚ್ಚುತ್ತಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ