ನವದೆಹಲಿ: ಇಂಟರ್ನೆಟ್ ಸಂಪರ್ಕವಿಲ್ಲದಿದ್ದರೂ ಯುಪಿಐ (UPI) ಮೂಲಕ ಹಣ ಪಾವತಿ ಮಾಡುವ ವ್ಯವಸ್ಥೆಗೆ ಇದೀಗ ಹೊಸ ರೂಪ ನೀಡಲಾಗಿದೆ. ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಯುಪಿಐ ಟ್ಯಾಪ್ ಆಂಡ್ ಪೇ (‘UPI Tap and Pay) ಎಂಬ ಹೊಸ ಸೌಲಭ್ಯವನ್ನು ಪರಿಚಯಿಸಿದ್ದು, ಎನ್ಎಫ್ಸಿ (NFC) ತಂತ್ರಜ್ಞಾನ ಹೊಂದಿರುವ ಸ್ಮಾರ್ಟ್ಫೋನ್ ಬಳಸಿ ಎನ್ಎಫ್ಸಿ ಸೌಲಭ್ಯವಿರುವ ಪಾಯಿಂಟ್ ಆಫ್ ಸೇಲ್ (POS) ಯಂತ್ರದ ಮೇಲೆ ಫೋನ್ ಅನ್ನು ಟ್ಯಾಪ್ ಮಾಡುವ ಮೂಲಕ ಹಣ ಪಾವತಿಸಬಹುದಾಗಿದೆ. ಈ ವೇಳೆ ಬಳಕೆದಾರರ ಮೊಬೈಲ್ಗೆ ಮೊಬೈಲ್ ಡೇಟಾ ಅಥವಾ ಸಕ್ರಿಯ ಇಂಟರ್ನೆಟ್ ಸಂಪರ್ಕ ಅಗತ್ಯವಿರುವುದಿಲ್ಲ.
ಆರ್ಬಿಐ ಗವರ್ನರ್ ಸಂಜಯ ಮಲ್ಹೋತ್ರಾ ಸೆ.10ರಂದು ಡಿಜಿಟಲ್ ಪಾವತಿಯನ್ನು ಮತ್ತಷ್ಟು ಸರಳಗೊಳಿಸುವುದು, ಗ್ರಾಹಕರಿಗೆ ಉತ್ತಮ ನೆರವು ನೀಡುವುದು ಮತ್ತು ಪಾವತಿ ಸುರಕ್ಷತೆಯನ್ನು ಹೆಚ್ಚಿಸುವ ಉದ್ದೇಶದಿಂದ ಎರಡು ಹೊಸ ಸೌಲಭ್ಯಗಳನ್ನು ಘೋಷಿಸಿದರು. ಅದರಲ್ಲಿ ಯುಪಿಐ ಟ್ಯಾಪ್ ಆಂಡ್ ಪೇ (‘UPI Tap and Pay) ಪ್ರಮುಖವಾದದ್ದು.
ಫೋನ್ನಲ್ಲಿ ಇಂಟರ್ನೆಟ್ ಇಲ್ಲದಿದ್ದರೂ ಹಣ ಪಾವತಿಸುವುದು ಹೇಗೆ?
ಇಲ್ಲಿ ಒಂದು ವಿಷಯವನ್ನು ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳಬೇಕು. ಯುಪಿಐ ಎಲ್ಲೆಡೆ ಇಂಟರ್ನೆಟ್ ಇಲ್ಲದೆಯೇ ಕಾರ್ಯನಿರ್ವಹಿಸುತ್ತದೆ ಎಂಬ ಅರ್ಥ ಇದಲ್ಲ. ಬದಲಿಗೆ, ಹಣ ಪಾವತಿ ಮಾಡುವ ವ್ಯಕ್ತಿಯ ಮೊಬೈಲ್ನಲ್ಲಿ ಇಂಟರ್ನೆಟ್ ಇರಬೇಕಾಗಿಲ್ಲ. ಎನ್ಎಫ್ಸಿ (NFC) ಸೌಲಭ್ಯವಿರುವ ಪಾಯಿಂಟ್ ಆಫ್ ಸೇಲ್ (POS) ಯಂತ್ರವೇ ಇಂಟರ್ನೆಟ್ಗೆ ಸಂಪರ್ಕ ಹೊಂದಿದ್ದು, ಅದರ ಮೂಲಕ ಪಾವತಿ ಪ್ರಕ್ರಿಯೆ ಪೂರ್ಣಗೊಳ್ಳುತ್ತದೆ.
ಇದು ಸಂಪರ್ಕರಹಿತ (Contactless) ಕಾರ್ಡ್ ಪಾವತಿಯ ರೀತಿಯಲ್ಲೇ ಕಾರ್ಯನಿರ್ವಹಿಸುತ್ತದೆ. ಎನ್ಎಫ್ಸಿ ಹೊಂದಿರುವ ಸ್ಮಾರ್ಟ್ಫೋನ್ ಅನ್ನು ಮೊದಲು ಅನ್ಲಾಕ್ ಮಾಡಬೇಕು. ಬಳಿಕ ಅಂಗಡಿಯಲ್ಲಿರುವ ಎನ್ಎಫ್ಸಿ ಹೊಂದಿದ ಪಾಯಿಂಟ್ ಆಫ್ ಸೇಲ್ (POS) ಯಂತ್ರದ ಬಳಿ ಫೋನ್ ಅನ್ನು ಟ್ಯಾಪ್ ಮಾಡಿದರೆ ಸಾಕು. ಪಿಒಎಸ್ ಯಂತ್ರ ತನ್ನದೇ ಇಂಟರ್ನೆಟ್ ಸಂಪರ್ಕದ ಮೂಲಕ ವಹಿವಾಟನ್ನು ಪ್ರಕ್ರಿಯೆಗೊಳಿಸುತ್ತದೆ.
ಅಂದರೆ, ಸಾಮಾನ್ಯವಾಗಿ ಯುಪಿಐ ಪಾವತಿ ಮಾಡುವಾಗ ಮೊಬೈಲ್ ಇಂಟರ್ನೆಟ್ ಮೂಲಕ ಬ್ಯಾಂಕ್ ಅಥವಾ ಯುಪಿಐ ವ್ಯವಸ್ಥೆಗೆ ಸಂಪರ್ಕ ಕಲ್ಪಿಸುವ ಕೆಲಸವನ್ನು ಇಲ್ಲಿ ಪಿಒಎಸ್ ಯಂತ್ರ ನಿರ್ವಹಿಸುತ್ತದೆ. ಈ ಸೌಲಭ್ಯ ಯುಪಿಐಗೆ ಜೋಡಿಸಿರುವ ವಿವಿಧ ರೀತಿಯ ಖಾತೆಗಳಿಗೆ ಅನ್ವಯಿಸುತ್ತದೆ. ಯುಪಿಐಗೆ ಲಿಂಕ್ ಮಾಡಿರುವ ರುಪೇ (RuPay) ಕ್ರೆಡಿಟ್ ಕಾರ್ಡ್ಗಳನ್ನೂ ಇದರಲ್ಲಿ ಬಳಸಬಹುದಾಗಿದೆ.
₹5,000 ವರೆಗೆ ಪಿನ್ (PIN) ಅಗತ್ಯವಿಲ್ಲ
ಯುಪಿಐ ಟ್ಯಾಪ್ ಆಂಡ್ ಪೇ (‘UPI Tap and Pay)ದಲ್ಲಿ ಸಣ್ಣ ಮೊತ್ತದ ಪಾವತಿಯನ್ನು ಇನ್ನಷ್ಟು ವೇಗವಾಗಿ ಮಾಡಲು ಅವಕಾಶ ಕಲ್ಪಿಸಲಾಗಿದೆ. ₹5,000 ವರೆಗೆ ವಹಿವಾಟು ನಡೆಸುವಾಗ ಯುಪಿಐ ಪಿನ್ (UPI PIN) ನಮೂದಿಸುವ ಅಗತ್ಯವಿಲ್ಲ. ಆದರೆ ₹5,000ಕ್ಕಿಂತ ಹೆಚ್ಚಿನ ಮೊತ್ತದ ಪಾವತಿಗೆ ಪಿಒಎಸ್ ಯಂತ್ರದಲ್ಲೇ ಯುಪಿಐ ಪಿನ್ ನಮೂದಿಸಬೇಕಾಗುತ್ತದೆ.
ಹೀಗಾಗಿ ಅಂಗಡಿಗಳಲ್ಲಿ ಸಾಮಾನುಗಳನ್ನು ಖರೀದಿಸುವಾಗ, ವಿಶೇಷವಾಗಿ ಮೊಬೈಲ್ ಡೇಟಾ ಲಭ್ಯವಿಲ್ಲದ ಸಂದರ್ಭಗಳಲ್ಲಿ, ಯುಪಿಐ ಮೂಲಕ ಹಣ ಪಾವತಿಯನ್ನು ಸುಲಭವಾಗಿ ಮಾಡಲು ಈ ವ್ಯವಸ್ಥೆ ನೆರವಾಗಲಿದೆ.
ಮೈಯುಪಿಐ (MyUPI) ಎಂದರೇನು?
ಯುಪಿಐ ಟ್ಯಾಪ್ ಆಂಡ್ ಪೇ (‘UPI Tap and Pay)ಜತೆಗೆ ಆರ್ಬಿಐ ‘ಮೈಯುಪಿಐ (MyUPI) ಎಂಬ ಮತ್ತೊಂದು ಹೊಸ ಸೌಲಭ್ಯವನ್ನೂ ಪರಿಚಯಿಸಿದೆ. ಇದು ಕೃತಕ ಬುದ್ಧಿಮತ್ತೆ (AI) ಆಧಾರಿತ ಗ್ರಾಹಕ ಸಹಾಯ ವೇದಿಕೆಯಾಗಿದ್ದು, ಇದನ್ನು ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ಅಭಿವೃದ್ಧಿಪಡಿಸಿದೆ.
ಎನ್ಪಿಸಿಐ(NPCI)ನ FiMI Small Language Model ಎಂಬ ಸಣ್ಣ ಭಾಷಾ ಮಾದರಿಯನ್ನು ಆಧರಿಸಿ ಮೈಯುಪಿಐ ರೂಪಿಸಲಾಗಿದೆ. ಬಳಕೆದಾರರು ಬೇರೆ ಬೇರೆ ಬ್ಯಾಂಕ್ಗಳು ಅಥವಾ ಯುಪಿಐ ಆ್ಯಪ್ಗಳನ್ನು ಬಳಸುತ್ತಿದ್ದರೂ, ಅವರ ಯುಪಿಐ ವಹಿವಾಟುಗಳು ಮತ್ತು ಆಟೋಪೇ (AutoPay) ಅನುಮತಿಗಳಿಗೆ ಸಂಬಂಧಿಸಿದ ಮಾಹಿತಿಯನ್ನು ಒಂದೇ ಸ್ಥಳದಲ್ಲಿ ಪಡೆಯಲು ಇದು ನೆರವಾಗಲಿದೆ.
ಅಂದರೆ, ಬಳಕೆದಾರರ ವಿವಿಧ ಯುಪಿಐ ಚಟುವಟಿಕೆಗಳನ್ನು ಒಂದೇ ಕಡೆ ನೋಡಲು ಮತ್ತು ನಿರ್ವಹಿಸಲು ಮೈಯುಪಿಐ (MyUPI) ಒಂದು ರೀತಿಯ ಕೇಂದ್ರ ವ್ಯವಸ್ಥೆಯಾಗಿ ಕಾರ್ಯನಿರ್ವಹಿಸಲಿದೆ.
ಸೇಫ್ಟಿ ಸ್ವಿಚ್ (Safety Switch)
ಮೈಯುಪಿಐ (MyUPI)ನಲ್ಲಿ ಹಣ ಪಾವತಿ ಸುರಕ್ಷತೆಗೆ ಸಂಬಂಧಿಸಿದ ಹಲವು ಸೌಲಭ್ಯಗಳೂ ಇರಲಿವೆ. ಅದರಲ್ಲಿ ಸೇಫ್ಟಿ ಸ್ವಿಚ್ (Safety Switch) ಪ್ರಮುಖವಾದದ್ದು. ತಮ್ಮ ಬ್ಯಾಂಕ್ ಖಾತೆ ಅಥವಾ ಯುಪಿಐ ಖಾತೆಗೆ ಯಾರಾದರೂ ಅನಧಿಕೃತವಾಗಿ ಪ್ರವೇಶ ಪಡೆದಿರಬಹುದು ಎಂದು ಅನುಮಾನ ಬಂದರೆ, ಬಳಕೆದಾರರು ಯುಪಿಐ ಮೂಲಕ ನಡೆಯುವ ಡೆಬಿಟ್ ವಹಿವಾಟುಗಳನ್ನು ನಿರಾಕರಿಸುವಂತೆ ಮನವಿ ಮಾಡಬಹುದು. ಇದರ ಮೂಲಕ ಅನುಮಾನಾಸ್ಪದ ಪರಿಸ್ಥಿತಿಯಲ್ಲಿ ಖಾತೆಯಿಂದ ಹಣ ಹೊರಹೋಗುವುದನ್ನು ತಡೆಯಲು ಬಳಕೆದಾರರಿಗೆ ಹೆಚ್ಚಿನ ನಿಯಂತ್ರಣ ಸಿಗಲಿದೆ.
ಇದೇ ರೀತಿ ಯುಪಿಐ ನಂಬರ್ ಡಿಲಿಂಕ್ (UPI Number Delink) ಎಂಬ ಸೌಲಭ್ಯವೂ ಇರಲಿದೆ. ಇದರ ಮೂಲಕ ತಮ್ಮ ಮೊಬೈಲ್ ಸಂಖ್ಯೆಯ ಮೂಲಕ ಯುಪಿಐ ಪಾವತಿಗಳನ್ನು ಸ್ವೀಕರಿಸುವುದನ್ನು ನಿಲ್ಲಿಸಬಹುದು.
ಪಾವತಿ ಮಾಡುವ ಮುನ್ನ ಹಣ ಸ್ವೀಕರಿಸುವ ವ್ಯಕ್ತಿ ಅಥವಾ ಸಂಸ್ಥೆ (beneficiary) ಕುರಿತು ಹೆಚ್ಚುವರಿ ಮಾಹಿತಿಯನ್ನೂ ಮೈಯುಪಿಐ ನೀಡಲಿದೆ. ಅರ್ಹವಾಗಿರುವ ಕೆಲವು ವಹಿವಾಟುಗಳಲ್ಲಿ ಹಣ ತಪ್ಪಾಗಿ ಪಾವತಿಯಾದಾಗ ಅಥವಾ ಸಂಬಂಧಿತ ಸಮಸ್ಯೆ ಎದುರಾದಾಗ ಸ್ವಯಂಚಾಲಿತ ಚಾರ್ಜ್ಬ್ಯಾಕ್ (chargeback) ಪ್ರಕ್ರಿಯೆಗೂ ಬೆಂಬಲ ನೀಡಲಿದೆ.
ಹಳೆಯ ವಹಿವಾಟನ್ನು ಮತ್ತೆ ಮಾಡುವ ಟ್ರಾನ್ಸಾಕ್ಷನ್ ರೀಪೇ (Transaction Replay)
ಮೈಯುಪಿಐ ಮತ್ತೊಂದು ಗಮನಾರ್ಹ ಸೌಲಭ್ಯ ಟ್ರಾನ್ಸಾಕ್ಷನ್ ರೀಪೇ (Transaction Replay) ಎಂಬುದಾಗಿದೆ. ಹಿಂದೆ ನಡೆಸಿದ್ದ ವಹಿವಾಟನ್ನು ಮತ್ತೆ ನೆನಪಿಸಿಕೊಂಡು, ಯಾವುದೇ ಯುಪಿಐ ಆ್ಯಪ್ ಮೂಲಕ ಅದೇ ರೀತಿಯ ಪಾವತಿಯನ್ನು ಪುನರಾವರ್ತಿಸಲು ಈ ವ್ಯವಸ್ಥೆ ನೆರವಾಗಲಿದೆ.
ಅಂದರೆ, ಹಿಂದೆ ಮಾಡಿದ್ದ ಪಾವತಿಯ ವಿವರಗಳನ್ನು ಮತ್ತೆ ಹುಡುಕಿ ಎಲ್ಲವನ್ನೂ ಪ್ರತ್ಯೇಕವಾಗಿ ನಮೂದಿಸುವ ಅಗತ್ಯವನ್ನು ಕಡಿಮೆ ಮಾಡುವ ಉದ್ದೇಶ ಇದರದ್ದಾಗಿದೆ.
ಯುಪಿಐಯಲ್ಲಿ ಹೊಸ ಹಂತ
ಭಾರತದಲ್ಲಿ ಡಿಜಿಟಲ್ ಪಾವತಿಗಳ ಪ್ರಮುಖ ವೇದಿಕೆಯಾಗಿರುವ ಯುಪಿಐ, ದೇಶದ ಒಟ್ಟು ಡಿಜಿಟಲ್ ವಹಿವಾಟುಗಳಲ್ಲಿ 89 ಪ್ರತಿಶತದಷ್ಟು ಪಾಲು ಹೊಂದಿದೆ ಎಂದು ಎನ್ಸಿಪಿಐ (NPCI) ತಿಳಿಸಿದೆ.
ಹೀಗಾಗಿ ಇದೀಗ ಯುಪಿಐನ ಗಮನ ಕೇವಲ ಹಣ ಪಾವತಿಯನ್ನು ಸಾಧ್ಯವಾಗಿಸುವುದರಲ್ಲೇ ಸೀಮಿತವಾಗಿಲ್ಲ. ಅಂಗಡಿಗಳಲ್ಲಿನ ಭೌತಿಕ ಹಣ ಪಾವತಿಯನ್ನು ಇನ್ನಷ್ಟು ಸುಲಭಗೊಳಿಸುವುದು, ಗ್ರಾಹಕರಿಗೆ ತ್ವರಿತ ನೆರವು ನೀಡುವುದು, ಖಾತೆಗಳ ಮೇಲೆ ಬಳಕೆದಾರರಿಗೆ ಹೆಚ್ಚಿನ ನಿಯಂತ್ರಣ ಒದಗಿಸುವುದು ಹಾಗೂ ಸುರಕ್ಷತೆಯನ್ನು ಹೆಚ್ಚಿಸುವತ್ತವೂ ಗಮನ ಹರಿಸಲಾಗುತ್ತಿದೆ.
ಎನ್ಪಿಸಿಐ ಪ್ರಕಾರ, ಮೈಯುಪಿಐ ಕೇವಲ ಗ್ರಾಹಕರ ದೂರು ಪರಿಹಾರ ವ್ಯವಸ್ಥೆಯಾಗಿ ಕಾರ್ಯನಿರ್ವಹಿಸುವುದಿಲ್ಲ. ಬದಲಿಗೆ ಇದು ಬಳಕೆದಾರರಿಗೆ ‘ವಿಶ್ವಾಸ ಮತ್ತು ನಿಯಂತ್ರಣದ ಪದರ’ (trust and control layer) ಆಗಿ ಕೆಲಸ ಮಾಡುವ ಉದ್ದೇಶ ಹೊಂದಿದೆ. ದಿನದ 24 ಗಂಟೆಯೂ ಹಲವು ಭಾರತೀಯ ಭಾಷೆಗಳಲ್ಲಿ ನೆರವು ಹಾಗೂ ಸ್ವಯಂ ಸೇವಾ (self-service) ಆಯ್ಕೆಗಳನ್ನು ಇದು ಒದಗಿಸಲಿದೆ.
ಬಯೋಮೆಟ್ರಿಕ್ ಯುಪಿಐಗೂ ವೇಗ
ಯುಪಿಐನಲ್ಲಿ ಹಣ ಪಾವತಿ ದೃಢೀಕರಣವನ್ನು ಇನ್ನಷ್ಟು ಸರಳಗೊಳಿಸುವ ಪ್ರಯತ್ನವೂ ಮುಂದುವರಿದಿದೆ. ಜಿಎಫ್ಎಫ್ (GFF) 2025ರಲ್ಲಿ ಬಯೋಮೆಟ್ರಿಕ್ ದೃಢೀಕರಣದ ಮೂಲಕ ಯುಪಿಐ ಹಣ ಪಾವತಿ ಮಾಡುವ ವ್ಯವಸ್ಥೆಯನ್ನು ಪರಿಚಯಿಸಲಾಗಿತ್ತು. ಎನ್ಪಿಸಿಐ ಪ್ರಕಾರ, 2026ರ ಆಗಸ್ಟ್ 31ರ ವೇಳೆಗೆ ಬಯೋಮೆಟ್ರಿಕ್ ಮೂಲಕ ದೃಢೀಕರಿಸಲಾದ ಯುಪಿಐ ವಹಿವಾಟುಗಳ ಸಂಖ್ಯೆ 6.29 ಬಿಲಿಯನ್ (629 ಕೋಟಿ) ದಾಟಿದೆ.
ಒಟ್ಟಿನಲ್ಲಿ, ಯುಪಿಐ ಟ್ಯಾಪ್ ಆಂಡ್ ಪೇ (‘UPI Tap and Pay) ಮತ್ತು ಮೈಯುಪಿಐ ಮೂಲಕ ಯುಪಿಐ ಇದೀಗ ಕೇವಲ ಹಣ ಕಳುಹಿಸುವ ಅಥವಾ ಸ್ವೀಕರಿಸುವ ವ್ಯವಸ್ಥೆಯಿಂದ ಮತ್ತಷ್ಟು ಮುಂದಕ್ಕೆ ಸಾಗುತ್ತಿದೆ. ಮೊಬೈಲ್ನಲ್ಲಿ ಇಂಟರ್ನೆಟ್ ಇಲ್ಲದ ಸಂದರ್ಭದಲ್ಲೂ ಪಿಒಎಸ್ (POS) ಯಂತ್ರದ ಸಂಪರ್ಕ ಬಳಸಿಕೊಂಡು ಹಣ ಪಾವತಿ ಮಾಡುವ ಅವಕಾಶದಿಂದ ಹಿಡಿದು, ಖಾತೆಯ ಸುರಕ್ಷತೆ, ವಹಿವಾಟುಗಳ ನಿರ್ವಹಣೆ, ಗ್ರಾಹಕ ಸಹಾಯ ಮತ್ತು ಹಳೆಯ ಪಾವತಿಗಳನ್ನು ಪುನರಾವರ್ತಿಸುವ ಸೌಲಭ್ಯಗಳವರೆಗೆ ಯುಪಿಐ ಬಳಕೆಯನ್ನು ಇನ್ನಷ್ಟು ಸರಳ, ಸುರಕ್ಷಿತ ಮತ್ತು ಬಳಕೆದಾರ ಸ್ನೇಹಿಯಾಗಿಸುವ ಹೊಸ ಹಂತ ಇದಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ