ದುಬೈ: ದುಬೈನಿಂದ ಟೆಲ್ ಅವೀವ್ಗೆ ತೆರಳುತ್ತಿದ್ದ ಫ್ಲೈದುಬೈಯ FZ1073 ವಿಮಾನದಲ್ಲಿ ಬುಧವಾರ ನಡೆದ ಕಾಕ್ಪಿಟ್ ಘರ್ಷಣೆ ಭಾರೀ ಆತಂಕಕ್ಕೆ ಕಾರಣವಾಗಿದೆ. ವಿಮಾನವನ್ನು ಪತನಗೊಳಿಸಲು ಸಹ ಪೈಲಟ್ ಯತ್ನಿಸಿದ್ದಾನೆ ಎಂಬ ಆರೋಪ ಕೇಳಿಬಂದಿದ್ದು, ಭಾರತೀಯ ಮೂಲದ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರ ಸಮಯೋಚಿತ ಕ್ರಮದಿಂದ 180 ಪ್ರಯಾಣಿಕರ ಪ್ರಾಣ ಉಳಿದಿದೆ ಎಂದು ಇಸ್ರೇಲಿ ಮಾಧ್ಯಮಗಳು ವರದಿ ಮಾಡಿವೆ.
ವಿಮಾನದಲ್ಲಿ 180 ಪ್ರಯಾಣಿಕರಿದ್ದು, ಅವರಲ್ಲಿ 27 ಮಕ್ಕಳು ಸೇರಿದ್ದರು. ಕಾಕ್ಪಿಟ್ನಲ್ಲಿ ಹಿಂಸಾತ್ಮಕ ಘರ್ಷಣೆ ಆರಂಭವಾದ ಬಳಿಕ ವಿಮಾನದಿಂದ ತುರ್ತು ಸಂಕೇತಗಳನ್ನು ರವಾನಿಸಲಾಗಿದ್ದು, ಕೊನೆಗೆ ವಿಮಾನವನ್ನು ಸೌದಿ ಅರೇಬಿಯಾದ ತಬೂಕ್ ವಿಮಾನ ನಿಲ್ದಾಣದಲ್ಲಿ ಸುರಕ್ಷಿತವಾಗಿ ಇಳಿಸಲಾಯಿತು.
ಇಸ್ರೇಲಿ ಮಾಧ್ಯಮ Ynet News ವರದಿ ಪ್ರಕಾರ, ಒಮಾನಿ ಮೂಲದ ಸಹ ಪೈಲಟ್ ವಿಮಾನವನ್ನು ಪತನಗೊಳಿಸಲು ಯತ್ನಿಸಿದ್ದಾನೆ ಎಂಬ ಶಂಕೆ ವ್ಯಕ್ತವಾಗಿದೆ. ಈ ವೇಳೆ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಆತನ ಜೊತೆ ಹೋರಾಡಿದ್ದು, ಕೆಲವು ಪ್ರಯಾಣಿಕರು ಹಾಗೂ ವಿಮಾನದಲ್ಲೇ ಪ್ರಯಾಣಿಸುತ್ತಿದ್ದ ರಿಲೀಫ್ ಪೈಲಟ್ ಕೂಡ ನೆರವಿಗೆ ಧಾವಿಸಿದ್ದಾರೆ. ಬಳಿಕ ಆರೋಪಿಯನ್ನು ಹಿಡಿದು ಪರಿಸ್ಥಿತಿಯನ್ನು ನಿಯಂತ್ರಣಕ್ಕೆ ತರಲಾಯಿತು. ಘಟನೆಯನ್ನು ಭಯೋತ್ಪಾದಕ ದಾಳಿಯ ಯತ್ನ ಎಂಬ ದೃಷ್ಟಿಯಿಂದ ತನಿಖೆ ನಡೆಸಲಾಗುತ್ತಿದೆ.
ಇಸ್ರೇಲಿ ಅಧಿಕಾರಿಗಳು ಹಾಗೂ ಪ್ರಯಾಣಿಕರ ಹೇಳಿಕೆಗಳ ಪ್ರಕಾರ, ಕಾಕ್ಪಿಟ್ನಲ್ಲಿ ಇಬ್ಬರು ಪೈಲಟ್ಗಳ ನಡುವೆ ತೀವ್ರ ಘರ್ಷಣೆ ನಡೆದಿತ್ತು. ಸಹ ಪೈಲಟ್ ಕ್ಯಾಪ್ಟನ್ಗೆ ಚೂರಿಯಿಂದ ಇರಿದಿದ್ದಾನೆ ಎಂಬ ಆರೋಪವೂ ಕೇಳಿಬಂದಿದೆ. ಆದರೆ ಘಟನೆಗಳ ನಿಖರ ಕ್ರಮ ಹಾಗೂ ಇದರ ಹಿಂದಿನ ಉದ್ದೇಶ ಏನು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಈ ಬಗ್ಗೆ ತನಿಖೆ ಮುಂದುವರಿದಿದೆ.
ಘಟನೆ ವೇಳೆ ವಿಮಾನವು ಮೊದಲು ಸಾಮಾನ್ಯ ತುರ್ತು ಪರಿಸ್ಥಿತಿಯನ್ನು ಸೂಚಿಸುವ 7700 ಸ್ಕ್ವಾಕ್ ಕೋಡ್ ಹಾಗೂ ನಂತರ ಹೈಜಾಕ್ ಅಥವಾ ಅಕ್ರಮ ಹಸ್ತಕ್ಷೇಪದ ಸೂಚನೆಯಾದ 7500 ಕೋಡ್ ಅನ್ನು ರವಾನಿಸಿತ್ತು. ವಿಮಾನ ಟ್ರ್ಯಾಕಿಂಗ್ ಮಾಹಿತಿಯ ಪ್ರಕಾರ, ವಿಮಾನವು ಸುಮಾರು 34,000 ಅಡಿ ಎತ್ತರದಿಂದ 14,000 ಅಡಿಗೆ ವೇಗವಾಗಿ ಇಳಿದಿತ್ತು.
ಕಾಕ್ಪಿಟ್ನಿಂದ ಕಿರುಚಾಟ ಕೇಳಿದ ಬಳಿಕ ಆತಂಕಗೊಂಡ ಪ್ರಯಾಣಿಕರು ಒಳಗೆ ಧಾವಿಸಿದ್ದರು. ಕೆಲವರು ಕಾಕ್ಪಿಟ್ನಲ್ಲಿ ರಕ್ತ ಕಂಡಿರುವುದಾಗಿ ಹೇಳಿದ್ದು, ಚೂರಿ ಹಿಡಿದಿದ್ದ ವ್ಯಕ್ತಿಯೊಬ್ಬ ಪೈಲಟ್ಗೆ ಇರಿದಿರುವುದನ್ನೂ ಕಂಡಿದ್ದಾಗಿ ತಿಳಿಸಿದ್ದಾರೆ. Ynet ವರದಿ ಪ್ರಕಾರ, ಒಬ್ಬ ಪೈಲಟ್ ಗಂಭೀರವಾಗಿ ಗಾಯಗೊಂಡಿದ್ದರೆ, ಮತ್ತೊಬ್ಬ ಗಾಯಗೊಂಡಿದ್ದರೂ ವಿಮಾನವನ್ನು ಸುರಕ್ಷಿತವಾಗಿ ಇಳಿಸುವಲ್ಲಿ ಯಶಸ್ವಿಯಾದರು. ನಂತರ ಇಬ್ಬರನ್ನೂ ಸೌದಿ ಅರೇಬಿಯಾದ ಆಸ್ಪತ್ರೆಗೆ ದಾಖಲಿಸಲಾಯಿತು.
ಚಾನೆಲ್ 12ರ ಡಿಜಿಟಲ್ ವೇದಿಕೆ N12 ಜೊತೆ ಮಾತನಾಡಿದ ಇಸ್ರೇಲಿ ಅಧಿಕಾರಿಯೊಬ್ಬರು, ಇದು ಅತ್ಯಂತ ಗಂಭೀರ ಘಟನೆ ಆಗಿದ್ದು, ದೊಡ್ಡ ದಾಳಿಯೊಂದನ್ನು ತಪ್ಪಿಸಲಾಗಿದೆ ಎಂದು ಹೇಳಿದ್ದಾರೆ. ಒಬ್ಬ ಪೈಲಟ್ ಮತ್ತೊಬ್ಬನಿಗೆ ಚೂರಿಯಿಂದ ಇರಿದು ವಿಮಾನವನ್ನು ಪತನಗೊಳಿಸಲು ಯತ್ನಿಸಿದ್ದಾನೆ ಎಂಬ ಆರೋಪವಿದ್ದು, ಘಟನೆಯನ್ನು ಸೆಪ್ಟೆಂಬರ್ 11ರ ದಾಳಿಗಳೊಂದಿಗೆ ಹೋಲಿಸಲಾಗಿದೆ ಎಂದು ವರದಿ ತಿಳಿಸಿದೆ.
ಫ್ಲೈದುಬೈ ಸಂಸ್ಥೆ ವಿಮಾನದಲ್ಲಿ “ಇನ್ಫ್ಲೈಟ್ ಇನ್ಸಿಡೆಂಟ್” ನಡೆದಿರುವುದನ್ನು ದೃಢಪಡಿಸಿದ್ದು, ಎಲ್ಲ ಪ್ರಯಾಣಿಕರೂ ಸುರಕ್ಷಿತರಾಗಿದ್ದಾರೆ ಎಂದು ತಿಳಿಸಿದೆ. ಘಟನೆ ಕುರಿತು ತನಿಖೆ ಆರಂಭಿಸಲಾಗಿದ್ದು, ಸಂಬಂಧಿತ ಅಧಿಕಾರಿಗಳೊಂದಿಗೆ ಸಹಕರಿಸಲಾಗುತ್ತಿದೆ ಎಂದು ಸಂಸ್ಥೆ ಹೇಳಿದೆ.
ಘಟನೆಯ ಹಿನ್ನೆಲೆಯಲ್ಲಿ ಇಸ್ರೇಲ್ನಲ್ಲಿ ಭದ್ರತಾ ಎಚ್ಚರಿಕೆ ಜಾರಿಗೊಂಡಿದ್ದು, ಯುದ್ಧವಿಮಾನಗಳನ್ನೂ ಕಳುಹಿಸಲಾಗಿತ್ತು ಎಂದು ಹೇಳಲಾಗಿದೆ. ಆದರೆ ಕಾಕ್ಪಿಟ್ನಲ್ಲಿ ನಿಖರವಾಗಿ ಏನಾಯಿತು, ಘರ್ಷಣೆಗೆ ಕಾರಣವೇನು ಹಾಗೂ ಸಹ ಪೈಲಟ್ನ ಉದ್ದೇಶ ಏನಾಗಿತ್ತು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಈ ಎಲ್ಲ ಅಂಶಗಳ ಕುರಿತು ತನಿಖೆ ಮುಂದುವರಿದಿದೆ.
ಸ್ಮಿತ್ ಮಚ್ಚಾರ್ ಯಾರು?
ಫ್ಲೈದುಬೈ FZ1073 ವಿಮಾನದಲ್ಲಿ ಸಂಭವಿಸಿದ ಆತಂಕಕಾರಿ ಘಟನೆಯ ಬಳಿಕ ಭಾರತೀಯ ಮೂಲದ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರ ಬಗ್ಗೆ ಹೆಚ್ಚಿನ ಮಾಹಿತಿ ಹೊರಬಂದಿದೆ. ಸ್ಮಿತ್ ಮಚ್ಚಾರ್ ಅವರು ಈ ಹಿಂದೆ ಸ್ಪೈಸ್ಜೆಟ್ನಲ್ಲಿ ಪೈಲಟ್ ಆಗಿ ಸೇವೆ ಸಲ್ಲಿಸಿದ್ದು, 2022ರ ಜೂನ್ನಲ್ಲಿ ಫ್ಲೈದುಬೈಗೆ ಡೈರೆಕ್ಟ್ ಎಂಟ್ರಿ ಕ್ಯಾಪ್ಟನ್ ಆಗಿ ಸೇರ್ಪಡೆಯಾಗಿದ್ದರು.
ಅವರ ಲಿಂಕ್ಡ್ಇನ್ ಪ್ರೊಫೈಲ್ ಪ್ರಕಾರ, ವಾಣಿಜ್ಯ ವಿಮಾನಯಾನ ಕ್ಷೇತ್ರದಲ್ಲಿ 13 ವರ್ಷಗಳಿಗಿಂತ ಹೆಚ್ಚು ಅನುಭವ ಹೊಂದಿರುವ ಅವರು, ಬೋಯಿಂಗ್ 737-800 ಹಾಗೂ ಬೋಯಿಂಗ್ 737 ಮ್ಯಾಕ್ಸ್ 8/9 ವಿಮಾನಗಳಲ್ಲಿ ಸುಮಾರು 9,750 ಗಂಟೆಗಳ ಹಾರಾಟದ ಅನುಭವ ಹೊಂದಿದ್ದಾರೆ.
ಫ್ಲೈದುಬೈಗೆ ಸೇರುವ ಮೊದಲು ಅವರು 11 ವರ್ಷಗಳಿಗೂ ಹೆಚ್ಚು ಕಾಲ ಸ್ಪೈಸ್ಜೆಟ್ನಲ್ಲಿ ಸೇವೆ ಸಲ್ಲಿಸಿದ್ದರು. ಅಲ್ಲಿ ಹಿರಿಯ ಕಮಾಂಡರ್ ಹಾಗೂ ಬಳಿಕ ಲೈನ್ ಟ್ರೈನಿಂಗ್ ಕ್ಯಾಪ್ಟನ್ ಆಗಿ ಕಾರ್ಯನಿರ್ವಹಿಸಿದ್ದರು. ಸ್ಪೈಸ್ಜೆಟ್ನಲ್ಲಿರುವ ಅವಧಿಯಲ್ಲಿ 9,500 ಗಂಟೆಗಳಿಗೂ ಹೆಚ್ಚು ಹಾರಾಟದ ಅನುಭವ ಗಳಿಸಿದ್ದು, ಅದರಲ್ಲಿ 6,400 ಗಂಟೆಗಳಿಗಿಂತ ಹೆಚ್ಚು ಸಮಯವನ್ನು ಪೈಲಟ್-ಇನ್-ಕಮಾಂಡ್ ಆಗಿ ನಿರ್ವಹಿಸಿದ್ದಾರೆ.
ಅಲ್ಲದೆ, ಪೈಲಟ್ಗಳಿಗೆ ತರಬೇತಿ ನೀಡುವುದು, ಹಾರಾಟದ ಪರೀಕ್ಷೆಗಳನ್ನು ನಡೆಸುವುದು ಹಾಗೂ ಕಿರಿಯ ಪೈಲಟ್ಗಳಿಗೆ ಮಾರ್ಗದರ್ಶನ ನೀಡುವ ಜವಾಬ್ದಾರಿಯನ್ನೂ ಅವರು ನಿರ್ವಹಿಸಿದ್ದರು. ಸಿಬ್ಬಂದಿ ಸಂಪನ್ಮೂಲ ನಿರ್ವಹಣೆ (Crew Resource Management), ವಿಮಾನಯಾನ ಮಾನದಂಡಗಳು, ನಿಯಮ ಪಾಲನೆ ಹಾಗೂ ಬೋಯಿಂಗ್ 737 ಕಾರ್ಯಾಚರಣೆಗಳಲ್ಲಿ ಪರಿಣತಿ ಹೊಂದಿರುವುದಾಗಿ ಅವರ ವೃತ್ತಿಪರ ಪ್ರೊಫೈಲ್ನಲ್ಲಿ ಉಲ್ಲೇಖಿಸಲಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ