

ಮುಂಬೈ: ಬಾಲಿವುಡ್ ಸೂಪರ್ ಸ್ಟಾರ್ ಅಮಿತಾಭ ಬಚ್ಚನ್ ಮತ್ತು ಅವರ ಪುತ್ರ ಅಭಿಷೇಕ ಬಚ್ಚನ್ ಅವರಿಗೆ ಕುಖ್ಯಾತ ಗ್ಯಾಂಗ್ಸ್ಟರ್ ಗೋಲ್ಡಿ ಧಿಲ್ಲೋನ್ನಿಂದ ಕೊಲೆ ಬೆದರಿಕೆ ಬಂದಿದೆ. ದೆಹಲಿ ಪೊಲೀಸರು ತನ್ನ ಇಬ್ಬರು ಸಹಚರರನ್ನು ಬಂಧಿಸಿರುವುದರಿಂದ ಮುಂಬೈನಲ್ಲಿ ಅಮಿತಾಭ ಬಚ್ಚನ್ ಅವರನ್ನು ಟಾರ್ಗೆಟ್ ಮಾಡುವ ಸಂಚಿಗೆ ಯಾವುದೇ ಅಡ್ಡಿಯಾಗಿಲ್ಲ. ತಮ್ಮ ಸುಮಾರು 200 ಮಂದಿ ಸಹಚರರು ಮುಂಬೈನಲ್ಲಿ ಸಿದ್ಧರಾಗಿದ್ದಾರೆ ಎಂದು ಗೋಲ್ಡಿ ಧಿಲ್ಲೋನ್ ಸಾಮಾಜಿಕ ಜಾಲತಾಣದ ಪೋಸ್ಟ್ನಲ್ಲಿ ಬೆದರಿಕೆ ಹಾಕಿದ್ದಾನೆ.
ವಿಕಾಸ ಠಾಕೂರ್ ಮತ್ತು ದೀಪಕ ಸಿಂಗ್ ಬಂಧನದಿಂದ ತಮ್ಮ ಯೋಜನೆಗೆ ಯಾವುದೇ ವ್ಯತ್ಯಾಸವಾಗುವುದಿಲ್ಲ ಎಂದು ಆತ ಹೇಳಿಕೊಂಡಿದ್ದಾನೆ. ಸಿಖ್ ಸಮುದಾಯದ ವಿರುದ್ಧ ಮಾತನಾಡುವವರಿಗೂ ಎಚ್ಚರಿಕೆ ನೀಡಿರುವ ಆತ, ಅಮಿತಾಭ ಬಚ್ಚನ್ ಮತ್ತು ಅವರ ಪುತ್ರ ಅಭಿಷೇಕ ಬಚ್ಚನ್ ಅವರ ಹೆಸರನ್ನು ನಿರ್ದಿಷ್ಟವಾಗಿ ಉಲ್ಲೇಖಿಸಿದ್ದಾನೆ. ಎಷ್ಟೇ ಭದ್ರತಾ ವ್ಯವಸ್ಥೆ ಮಾಡಿಕೊಂಡರೂ, ಗುಂಡು ನಿರೋಧಕ ಗಾಜಿನ ರಕ್ಷಣೆ ಪಡೆದರೂ ಅವರಿಗೆ ಗುಂಡಿಕ್ಕಲಾಗುವುದು ಎಂದು ಬೆದರಿಕೆ ಹಾಕಿದ್ದಾನೆ. ಆದರೆ, ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟವಾಗಿರುವ ಈ ಪೋಸ್ಟ್ನ ನೈಜತೆ ಹಾಗೂ ಅದರಲ್ಲಿನ ಆರೋಪಗಳನ್ನು ಸ್ವತಂತ್ರವಾಗಿ ದೃಢಪಡಿಸಲು ಸಾಧ್ಯವಾಗಿಲ್ಲ.
ಇತ್ತೀಚೆಗೆ ಮುಂಬೈನಲ್ಲಿರುವ ಅಮಿತಾಭ ಬಚ್ಚನ್ ಅವರ ನಿವಾಸ ‘ಜಲ್ಸಾ’ದ ಹೊರಗೆ ಗುಂಡಿನ ದಾಳಿ ನಡೆಸಲು ಸಂಚು ರೂಪಿಸಿದ್ದರೆನ್ನಲಾದ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್ಗೆ ಸಂಬಂಧಿಸಿದ ಇಬ್ಬರು ಶಂಕಿತ ಶೂಟರ್ಗಳನ್ನು ದೆಹಲಿ ಪೊಲೀಸ್ ವಿಶೇಷ ಘಟಕ (ಸ್ಪೆಷಲ್ ಸೆಲ್) ಬಂಧಿಸಿತ್ತು. ಈ ಬಂಧನದ ಬೆನ್ನಲ್ಲೇ ಗೋಲ್ಡಿ ಧಿಲ್ಲೋನ್ನಿಂದ ಬೆದರಿಕೆ ಬಂದಿದೆ.
ಬಂಧಿತ ಆರೋಪಿಗಳು ದೆಹಲಿಯ ಉದ್ಯಮಿಯೊಬ್ಬರ ಮೇಲೆ ಗುಂಡಿನ ದಾಳಿ ನಡೆಸಿ ಸುಲಿಗೆ ಮಾಡುವ ಪ್ರತ್ಯೇಕ ಸಂಚಿನಲ್ಲಿಯೂ ಭಾಗಿಯಾಗಿದ್ದರು ಎಂಬ ಶಂಕೆ ಪೊಲೀಸರಿಗಿದೆ. ಈ ಎರಡೂ ಸಂಚುಗಳ ನಡುವೆ ಸಂಬಂಧವಿರುವ ಸಾಧ್ಯತೆಯ ಬಗ್ಗೆಯೂ ತನಿಖೆ ನಡೆಯುತ್ತಿದೆ.
ಸಾಮಾಜಿಕ ಜಾಲತಾಣದ ಪೋಸ್ಟ್ನಲ್ಲಿ 1984ರ ಸಿಖ್ ವಿರೋಧಿ ಗಲಭೆಯ ವಿಷಯವನ್ನೂ ಗೋಲ್ಡಿ ಧಿಲ್ಲೋನ್ ಪ್ರಸ್ತಾಪಿಸಿದ್ದಾನೆ. ಆ ಹಿಂಸಾಚಾರಕ್ಕೆ ಕಾರಣರಾದವರನ್ನು ಎಂದಿಗೂ ಕ್ಷಮಿಸುವುದಿಲ್ಲ ಎಂದು ಹೇಳಿಕೊಂಡಿದ್ದಾನೆ. ಜಗತ್ತಿನ ಯಾವುದೇ ಭಾಗದಲ್ಲಿದ್ದರೂ ಸಿಖ್ ಸಮುದಾಯದ ವಿರುದ್ಧ ಹೇಳಿಕೆ ನೀಡುವವರನ್ನು ಹೊಣೆಗಾರರನ್ನಾಗಿ ಮಾಡಲಾಗುವುದು ಎಂದು ಎಚ್ಚರಿಸಿದ್ದಾನೆ. ಇದೇ ಸಂದರ್ಭದಲ್ಲಿ ಅಮಿತಾಭ ಬಚ್ಚನ್ ಮತ್ತು ಅಭಿಷೇಕ ಬಚ್ಚನ್ ಅವರನ್ನು ಹೆಸರಿಸಿ, ಅವರಿಗಿರುವ ಭದ್ರತಾ ವ್ಯವಸ್ಥೆ ಯಾವುದೇ ಇರಲಿ, ಗುಂಡಿಕ್ಕಲಾಗುವುದು ಎಂದು ಬೆದರಿಕೆ ಹಾಕಿದ್ದಾನೆ.
‘ಎಷ್ಟೇ ಗುಂಡು ನಿರೋಧಕ ಕೊಠಡಿಗಳನ್ನು ನಿರ್ಮಿಸಿಕೊಂಡರೂ ಅವರನ್ನು ಗುಂಡಿಕ್ಕಲಾಗುವುದು’ ಎಂದು ಪೋಸ್ಟ್ನಲ್ಲಿ ಹೇಳಲಾಗಿದೆ.
ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್ನ ಇಬ್ಬರು ಶೂಟರ್ಗಳ ಬಂಧನ
ದೆಹಲಿ ಪೊಲೀಸ್ ವಿಶೇಷ ಘಟಕವು ಶನಿವಾರ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್ಗೆ ಸಂಬಂಧಿಸಿದ ಇಬ್ಬರು ಶಂಕಿತ ಶೂಟರ್ಗಳನ್ನು ಬಂಧಿಸಿತ್ತು. ಪಂಜಾಬ್ನ ಜಲಂಧರ್ ನಿವಾಸಿ ವಿಕಾಸ ಠಾಕೂರ್ ಅಲಿಯಾಸ್ ವಿಕ್ಕಿ ಮತ್ತು ತರಣ್ ತಾರಣ್ ನಿವಾಸಿ ದೀಪಕ ಸಿಂಗ್ ಅಲಿಯಾಸ್ ದೀಪ್ ಬಂಧಿತರು.
ಪೊಲೀಸರ ಪ್ರಕಾರ, ಈ ಇಬ್ಬರು ಪ್ರತ್ಯೇಕವಾಗಿದ್ದರೂ ಪರಸ್ಪರ ಸಂಬಂಧ ಹೊಂದಿರಬಹುದಾದ ಎರಡು ಸಂಚುಗಳಲ್ಲಿ ಭಾಗಿಯಾಗಿದ್ದರು. ಒಂದು ದೆಹಲಿ ಮೂಲದ ಉದ್ಯಮಿಯ ಮೇಲೆ ದಾಳಿ ನಡೆಸುವ ಸಂಚಾಗಿದ್ದರೆ, ಮತ್ತೊಂದು ಅಮಿತಾಭ ಬಚ್ಚನ್ ಅವರನ್ನು ಗುರಿಯಾಗಿಸುವ ಯೋಜನೆಯಾಗಿತ್ತು ಎನ್ನಲಾಗಿದೆ.
ದೆಹಲಿಯ ಉದ್ಯಮಿಯ ಮೇಲೆ ಗುಂಡಿನ ದಾಳಿ ನಡೆಸುವ ಜವಾಬ್ದಾರಿಯನ್ನು ವಿಕಾಸ ಠಾಕೂರ್ಗೆ ವಹಿಸಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. ಈ ಕಾರ್ಯಾಚರಣೆಗಾಗಿ ಆತ ಮುಂಬೈನಿಂದ ದೆಹಲಿಗೆ ಪ್ರಯಾಣಿಸಿದ್ದ. ದೀಪಕ ಸಿಂಗ್ ನಂತರ ಆತನನ್ನು ಸೇರಿಕೊಳ್ಳಬೇಕಿತ್ತು ಎಂದು ತನಿಖೆಯಿಂದ ತಿಳಿದುಬಂದಿದೆ.
ಜಲ್ಸಾ ನಿವಾಸಕ್ಕೆ ಒಂದು ತಿಂಗಳಲ್ಲಿ ಮೂರು ಬಾರಿ ಬಾಂಬ್ ಬೆದರಿಕೆ
ಕಳೆದ ಒಂದು ತಿಂಗಳ ಅವಧಿಯಲ್ಲಿ ಅಮಿತಾಭ ಬಚ್ಚನ್ ಅವರ ಮುಂಬೈನ ನಿವಾಸ ‘ಜಲ್ಸಾ’ವನ್ನು ಗುರಿಯಾಗಿಸಿಕೊಂಡು ಮೂರು ಪ್ರತ್ಯೇಕ ಬಾಂಬ್ ಬೆದರಿಕೆ ಇ-ಮೇಲ್ಗಳು ಬಂದಿದ್ದವು. ಈ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ಅವರ ನಿವಾಸದ ಸುತ್ತಮುತ್ತ ಭದ್ರತೆಯನ್ನು ಹೆಚ್ಚಿಸಲಾಗಿತ್ತು.
ಭದ್ರತಾ ವ್ಯವಸ್ಥೆಯಲ್ಲಿನ ಬದಲಾವಣೆಗಳು ಅಭಿಮಾನಿಗಳ ಜೊತೆಗಿನ ಅಮಿತಾಭ ಬಚ್ಚನ್ ಅವರ ವಾರದ ಭೇಟಿಯ ಸಂದರ್ಭದಲ್ಲಿಯೂ ಗೋಚರಿಸಿದ್ದವು. ಸಾಮಾನ್ಯವಾಗಿ ಪ್ರತಿ ಭಾನುವಾರ ತಮ್ಮ ನಿವಾಸದ ಹೊರಗೆ ನೆರೆದಿರುವ ಅಭಿಮಾನಿಗಳಿಗೆ ಅಮಿತಾಭ ಬಚ್ಚನ್ ಕೈಬೀಸಿ ಶುಭಾಶಯ ಕೋರುತ್ತಾರೆ. ಈ ಸಂಪ್ರದಾಯದಂತೆ ನವೆಂಬರ್ 1ರಂದು ಅಭಿಮಾನಿಗಳನ್ನು ಭೇಟಿಯಾದ ಸಂದರ್ಭದಲ್ಲಿ ಅವರು ಗುಂಡು ನಿರೋಧಕ ಗಾಜಿನ ರಕ್ಷಣೆಯ ಒಳಗಿನಿಂದ ಕೈಬೀಸಿ ಶುಭಾಶಯ ಕೋರಿದ್ದರು.
ಸಾಮಾನ್ಯವಾಗಿ ಅಮಿತಾಭ ಬಚ್ಚನ್ ಅವರು ಚಕ್ರಗಳನ್ನು ಅಳವಡಿಸಿರುವ ಎತ್ತರದ ವೇದಿಕೆಯ ಮೇಲೆ ನಿಂತು ಅಭಿಮಾನಿಗಳಿಗೆ ಕಾಣಿಸಿಕೊಳ್ಳುತ್ತಾರೆ. ಇದರಿಂದ ನಿವಾಸದ ಹೊರಗೆ ನೆರೆದಿರುವ ಜನರಿಗೆ ಅವರನ್ನು ಸ್ಪಷ್ಟವಾಗಿ ನೋಡಲು ಸಾಧ್ಯವಾಗುತ್ತದೆ. ಆದರೆ, ನವೆಂಬರ್ 1ರಂದು ಈ ವೇದಿಕೆಯ ಸುತ್ತಲೂ ಮೂರು ಬದಿಗಳಲ್ಲಿ ಗಾಜಿನ ರಕ್ಷಣಾ ಕವಚವನ್ನು ಅಳವಡಿಸಲಾಗಿತ್ತು. ಅದರ ಒಳಗೆ ನಿಂತುಕೊಂಡೇ ಅವರು ಅಭಿಮಾನಿಗಳಿಗೆ ಕೈಬೀಸಿ ಶುಭಾಶಯ ತಿಳಿಸಿದ್ದರು.
ಇದೀಗ ಅಮಿತಾಭ ಬಚ್ಚನ್ ಮತ್ತು ಅಭಿಷೇಕ್ ಬಚ್ಚನ್ ಅವರಿಗೆ ಗ್ಯಾಂಗ್ಸ್ಟರ್ ಗೋಲ್ಡಿ ಧಿಲ್ಲೋನ್ ಕೊಲೆ ಬೆದರಿಕೆ ಹಾಕಿದ್ದಾನೆ.





ನಿಮ್ಮ ಕಾಮೆಂಟ್ ಬರೆಯಿರಿ