ಪಾಕಿಸ್ತಾನ ಸೇನಾ ಮುಖ್ಯಸ್ಥ ಅಸಿಮ್ ಮುನೀರಗೆ ಪಾಕಿಸ್ತಾನಿ ತಾಲಿಬಾನ್‌ ನಿಂದ ಬಹಿರಂಗ ಬೆದರಿಕೆ…

 ನವದೆಹಲಿ: ತೆಹ್ರೀಕ್-ಎ-ತಾಲಿಬಾನ್ ಪಾಕಿಸ್ತಾನ (TTP) ಬಿಡುಗಡೆ ಮಾಡಿದ ಹಲವಾರು ವೀಡಿಯೊಗಳು ಪಾಕಿಸ್ತಾನದ ಸೇನಾ ಮುಖ್ಯಸ್ಥ, ಫೀಲ್ಡ್ ಮಾರ್ಷಲ್ ಅಸಿಮ್ ಮುನೀರ್ ಅವರನ್ನು ಮುಜುಗರದ ಸ್ಥಿತಿಗೆ ದೂಡಿವೆ. ಈ ವೀಡಿಯೊಗಳಲ್ಲಿ ತೆಹ್ರೀಕ್-ಎ-ತಾಲಿಬಾನ್ ಪಾಕಿಸ್ತಾನ(TTP)ದ ಉನ್ನತ ಕಮಾಂಡರ್ ಒಬ್ಬರು ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಮುನೀರ್‌ಗೆ ನೇರವಾಗಿ ಬೆದರಿಕೆ ಹಾಕಿದ್ದಾರೆ.
ಪಾಕಿಸ್ತಾನದ ಸೈನ್ಯವು ತಮ್ಮ ಸೈನಿಕರನ್ನು ಸಾಯಲು ಕಳುಹಿಸುವುದನ್ನು ತಪ್ಪಿಸಬೇಕು ಮತ್ತು ಬದಲಾಗಿ, ಪಾಕಿಸ್ತಾನ ಸೇನೆಯ ಉನ್ನತ ಅಧಿಕಾರಿಗಳೇ ಯುದ್ಧಭೂಮಿಗೆ ನುಗ್ಗಬೇಕು ಎಂದು ಆ ಕಮಾಂಡರ್ ಸವಾಲು ಹಾಕಿದ್ದಾನೆ.
\ಈ ವೀಡಿಯೊಗಳಲ್ಲಿ ಖೈಬರ್ ಪಖ್ತುಂಖ್ವಾದ ಕುರ್ರಮ್‌ನಲ್ಲಿ ಅಕ್ಟೋಬರ್ 8 ರಂದು ನಡೆದ ಹೊಂಚುದಾಳಿಯ ಯುದ್ಧಭೂಮಿಯ ದೃಶ್ಯಗಳು ಸೇರಿವೆ. ಈ ದಾಳಿಯಲ್ಲಿ 22 ಪಾಕಿಸ್ತಾನಿ ಸೈನಿಕರು ಸಾವಿಗೀಡಾಗಿದ್ದಾರೆ ಎಂದು ಟಿಟಿಪಿ ಹೇಳಿಕೊಂಡಿದೆ ಮತ್ತು ವಶಪಡಿಸಿಕೊಂಡಿರುವ ಮದ್ದುಗುಂಡುಗಳು ಹಾಗೂ ವಾಹನಗಳನ್ನು ಸಹ ವೀಡಿಯೊದಲ್ಲಿ ತೋರಿಸಿದೆ.
ಆದರೆ, ಪಾಕಿಸ್ತಾನದ ಅಧಿಕೃತ ವರದಿಗಳು ಕಡಿಮೆ ಸಾವುನೋವುಗಳನ್ನು ದಾಖಲಿಸಿವೆ. ಈ ದಾಳಿಯಲ್ಲಿ 11 ಸೈನಿಕರು ಕೊಲ್ಲಲ್ಪಟ್ಟಿದ್ದಾರೆ ಎಂದು ಪಾಕ್‌ ಸೈನ್ಯವು ಒಪ್ಪಿಕೊಂಡಿದೆ.

‘ಧೈರ್ಯವಿದ್ದರೆ ಎದುರಿಸಿ’: ಕಮಾಂಡರ್ ಕಾಜಿಮ್ ಸವಾಲು
ಒಂದು ಕ್ಲಿಪ್‌ನಲ್ಲಿ, ಕಮಾಂಡರ್ ಕಾಜಿಮ್ ಎಂದು ಗುರುತಿಸಿದ ಹಿರಿಯ ಟಿಟಿಪಿ ವ್ಯಕ್ತಿಯೊಬ್ಬ ಕ್ಯಾಮೆರಾ ಮುಂದೆ ಬಂದು, “ನೀವು ಮಾನವರಾಗಿದ್ದರೆ ನಮ್ಮನ್ನು ಎದುರಿಸಿ” ಎಂದು ಪಾಕಿಸ್ತಾನಿ ಅಧಿಕಾರಿಗಳಿಗೆ ಹೇಳುತ್ತಾನೆ. “ನಿಮಗೆ ನಿಮ್ಮ ತಾಯಿಯ ಹಾಲು ಕುಡಿದಿದ್ದರೆ, ನಮ್ಮೊಂದಿಗೆ ಹೋರಾಡಿ” ಎಂದು ಸವಾಲು ಹಾಕಿದ್ದಾನೆ.
ಅಕ್ಟೋಬರ್ 21 ರಂದು, ಪಾಕಿಸ್ತಾನಿ ಅಧಿಕಾರಿಗಳು ಕಾಜಿಮ್‌ನ ಸೆರೆಗೆ ಕಾರಣವಾಗುವ ಮಾಹಿತಿ ನೀಡಿದವರಿಗೆ 10 ಕೋಟಿ ಪಾಕಿಸ್ತಾನಿ ರೂಪಾಯಿಗಳ (PKR) ಬಹುಮಾನ ಘೋಷಿಸಿದ್ದಾರೆ.

ಕದನ ವಿರಾಮ ಒಪ್ಪಂದ ಮತ್ತು ಟಿಟಿಪಿ ಕುರಿತು ಪಾಕಿಸ್ತಾನದ ಕಳವಳ
ದಿನಗಳ ಕಾಲ ನಡೆದ ಗಡಿ ದಾಳಿ, ವಾಯುದಾಳಿ ಮತ್ತು ಪರಸ್ಪರ ಪ್ರತೀಕಾರದ ದಾಳಿಗಳಲ್ಲಿ ಎರಡೂ ಕಡೆಗಳಲ್ಲಿ ಸಾವು-ನೋವುಗಳು ಸಂಭವಿಸಿದ ನಂತರ , ಪಾಕಿಸ್ತಾನ ಮತ್ತು ಅಪ್ಘಾನಿಸ್ತಾನದ ತಾಲಿಬಾನ್ ನೇತೃತ್ವದ ಅಧಿಕಾರಿಗಳು ಕತಾರ್ ಮತ್ತು ಟರ್ಕಿಯ ಮಧ್ಯಸ್ಥಿಕೆಯಲ್ಲಿ ಅಕ್ಟೋಬರ್ ಮಧ್ಯದಲ್ಲಿ ತಕ್ಷಣದ ಕದನ ವಿರಾಮಕ್ಕೆ ಒಪ್ಪಿಕೊಂಡರು. ಈ ಕದನ ವಿರಾಮವನ್ನು ದೋಹಾದಲ್ಲಿ ಸಾರ್ವಜನಿಕವಾಗಿ ಘೋಷಿಸಲಾಯಿತು. ಆದರೆ, ಅಫ್ಘಾನಿಸ್ತಾನವು ತನ್ನ ನೆಲದಿಂದ ಕಾರ್ಯನಿರ್ವಹಿಸುವ ಸಶಸ್ತ್ರ ಗುಂಪುಗಳ ಮೇಲೆ (ಟಿಟಿಪಿಗೆ ಸ್ಪಷ್ಟ ಉಲ್ಲೇಖ) ಕ್ರಮ ತೆಗೆದುಕೊಳ್ಳದ ಹೊರತು ಈ ಕದನ ವಿರಾಮ ಕೇವಲ ಔಪಚಾರಿಕವಾಗಿರುತ್ತದೆ ಎಂದು ಪಾಕಿಸ್ತಾನವು ಸ್ಪಷ್ಟಪಡಿಸಿದೆ.

ಹಿಂಸಾತ್ಮಕ ಸಂಘಟನೆಗಳಿಗೆ ಉತ್ತೇಜನ
ಟಿಟಿಪಿಯ ಯುದ್ಧಭೂಮಿಯ ಯಶಸ್ಸು ಇತರ ಹಿಂಸಾತ್ಮಕ ಸಂಘಟನೆಗಳಿಗೆ ಇನ್ನಷ್ಟು ಧೈರ್ಯ ನೀಡಿದೆ ಎಂದು ಪಾಕಿಸ್ತಾನಿ ಮಾಧ್ಯಮ ವರದಿಗಳು ಎಚ್ಚರಿಸಿವೆ. ಲಷ್ಕರ್-ಎ-ಝಾಂಗ್ವಿ (LeJ), ಇಸ್ಲಾಮಿಕ್ ಸ್ಟೇಟ್ ಖೊರಾಸನ್ ಪ್ರಾಂತ್ಯ (ISKP) ಮತ್ತು ಜೈಶ್-ಎ-ಮೊಹಮ್ಮದ್‌ನಂತಹ ಭಯೋತ್ಪಾದಕ ಗುಂಪುಗಳು ಸಹ ಈ ಬೆಳವಣಿಗೆಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಿವೆ.
ಲಷ್ಕರ್-ಎ-ಝಾಂಗ್ವಿ (LeJ) ಪಾಕಿಸ್ತಾನದೊಳಗೆ ಅಲ್ಪಸಂಖ್ಯಾತ ಸಮುದಾಯಗಳನ್ನು ಟಾರ್ಗೆಟ್‌ ಮಾಡುವ ಪಂಥೀಯ ಭಯೋತ್ಪಾದನೆಯ ಇತಿಹಾಸವನ್ನು ಹೊಂದಿದೆ, ಆದರೆ ಇಸ್ಲಾಮಿಕ್ ಸ್ಟೇಟ್ ಖೊರಾಸನ್ ಪ್ರಾಂತ್ಯ (ISKP) ಈ ಹಿಂದೆ ತೆಹ್ರೀಕ್-ಎ-ತಾಲಿಬಾನ್ ಪಾಕಿಸ್ತಾನ (TTP)ದ ಬಗ್ಗೆ ಭ್ರಮನಿರಸನಗೊಂಡ ಹೋರಾಟಗಾರರನ್ನು ಆಕರ್ಷಿಸಿತ್ತು. ಇತ್ತೀಚಿನ ವಾರಗಳಲ್ಲಿ ಟಿಟಿಪಿ ದಾಳಿಗಳು ಹೆಚ್ಚಾದಂತೆ, ಈ ಹಿಂಸಾಚಾರವು ಬಂಡಾಯವನ್ನು ನಿಯಂತ್ರಣದಲ್ಲಿಡಲು ಪಾಕಿಸ್ತಾನದ ಸೇನೆ ವಿಫಲವಾಗಿದೆ ಎಂಬುದನ್ನು ಬಹಿರಂಗಪಡಿಸಿದೆ.