ನವದೆಹಲಿ: ಈ ವರ್ಷದ ನೈಋತ್ಯ ಮುಂಗಾರು ಮಾರುತಗಳು ವಾಡಿಕೆಗಿಂತ ತುಸು ಮುಂಚಿತವಾಗಿ ಕೇರಳಕ್ಕೆ ಆಗಮಿಸಲಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಅಂದರೆ ನೈಋತ್ಯ ಮುಂಗಾರು ಮೇ 26 ರಂದು ಕೇರಳ ಕರಾವಳಿಯನ್ನು ಪ್ರವೇಶಿಸುವ ಸಾಧ್ಯತೆಯಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (IMD) ಇಲಾಖೆ ತಿಳಿಸಿದೆ. ಈ ಮುನ್ಸೂಚನೆಯಂತೆ ನಾಲ್ಕು ದಿನಗಳ ಮುಂಚಿತವಾಗಿ ಅಥವಾ ತಡವಾಗಿ (ಪ್ಲಸ್ ಅಥವಾ ಮೈನಸ್ 4 ದಿನಗಳ ವ್ಯತ್ಯಾಸ) ಮುಂಗಾರು ಆರಂಭವಾಗುವ ಸಂಭವವಿದೆ.
ಕಳೆದ ವರ್ಷ, ಮೇ 24 ರಂದು ಕೇರಳಕ್ಕೆ ಮುಂಗಾರು ಮಳೆ ಬಂದಿತ್ತು. ಮುಂದಿನ 24 ಗಂಟೆಗಳಲ್ಲಿ ದಕ್ಷಿಣ ಬಂಗಾಳ ಕೊಲ್ಲಿಯ ಕೆಲವು ಭಾಗಗಳು, ಅಂಡಮಾನ್ ಸಮುದ್ರ ಮತ್ತು ಅಂಡಮಾನ್-ನಿಕೋಬಾರ್ ದ್ವೀಪಗಳಿಗೆ ಮುಂಗಾರು ಮಾರುತಗಳು ಪ್ರವೇಶಿಸಲು ಪೂರಕ ವಾತಾವರಣ ನಿರ್ಮಾಣವಾಗಿದೆ. ಇನ್ನೊಂದೆಡೆ, ಮುಂಗಾರು ಆರಂಭದ ಮುನ್ನ ಮುನ್ನೆಚ್ಚರಿಕೆಯಾಗಿ ವಾಯುವ್ಯ ಮತ್ತು ಮಧ್ಯ ಭಾರತದ ಹಲವು ಪ್ರದೇಶಗಳಲ್ಲಿ ಮುಂದಿನ ಕೆಲವು ದಿನಗಳ ಕಾಲ ತೀವ್ರ ಉಷ್ಣಗಾಳಿ (Severe Heatwave) ಮುಂದುವರಿಯಲಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.
ಸಾಮಾನ್ಯವಾಗಿ ಭಾರತೀಯ ಮುಖ್ಯ ಭೂಭಾಗಕ್ಕೆ ಮುಂಗಾರು ಪ್ರವೇಶಿಸುವ ಅಧಿಕೃತ ದಿನಾಂಕ ಜೂನ್ 1 ಆಗಿರುತ್ತದೆ. ಆದರೆ ಈ ಬಾರಿ ಹವಾಮಾನದ ಏರುಪೇರಿನಿಂದಾಗಿ ಮೇ ಕೊನೆಯ ವಾರದಲ್ಲೇ ಮಳೆಗಾಲ ಆರಂಭವಾಗುವ ಲಕ್ಷಣಗಳಿವೆ. ಮುಂಗಾರು ಮಾರುತಗಳು ಉತ್ತರ ಭಾರತದ ಕಡೆಗೆ ಮುನ್ನಡೆದಂತೆ, ದೇಶದಾದ್ಯಂತ ತಾಪಮಾನ ಇಳಿಕೆಯಾಗಿ ಜನರಿಗೆ ತಂಪಿನ ಅನುಭವ ನೀಡಲಿದೆ.
ಹವಾಮಾನ ಇಲಾಖೆಯು 2005 ರಿಂದ ಮುಂಗಾರು ಪ್ರವೇಶದ ಮುನ್ಸೂಚನೆಯನ್ನು ನೀಡುತ್ತಾ ಬಂದಿದ್ದು, ಇದಕ್ಕಾಗಿ ಭಾರತದಲ್ಲೇ ಅಭಿವೃದ್ಧಿಪಡಿಸಲಾದ ಅತ್ಯಾಧುನಿಕ ‘ಅಂಕಿ-ಅಂಶಗಳ ಮಾದರಿ’ಯನ್ನು (Statistical Model) ಬಳಸಿಕೊಳ್ಳಲಾಗುತ್ತಿದೆ. ಈ ಮಾದರಿಯು ಪ್ರಮುಖ ಆರು ಹವಾಮಾನ ಮಾನದಂಡಗಳಾದ ವಾಯುವ್ಯ ಭಾರತದ ಕನಿಷ್ಠ ತಾಪಮಾನ, ದಕ್ಷಿಣ ಪರ್ಯಾಯ ದ್ವೀಪದ ಮುಂಗಾರು ಪೂರ್ವ ಮಳೆ, ದಕ್ಷಿಣ ಚೀನಾ ಸಮುದ್ರದ ವಿಕಿರಣದ ತೀವ್ರತೆ ಹಾಗೂ ಹಿಂದೂ ಮಹಾಸಾಗರದ ಮಾರುತಗಳ ಗತಿಯನ್ನು ಆಧರಿಸಿ ಈ ವರದಿಯನ್ನು ಸಿದ್ಧಪಡಿಸಿದೆ.
21 ವರ್ಷಗಳ ಇತಿಹಾಸದಲ್ಲಿ ಮುನ್ಸೂಚನೆ ಬಹುಪಾಲು ನಿಜ:
ಕಳೆದ 21 ವರ್ಷಗಳ (2005 ರಿಂದ 2025 ರವರೆಗೆ) ಇತಿಹಾಸವನ್ನು ಗಮನಿಸಿದರೆ, 2015 ರ ಒಂದೇ ಒಂದು ವರ್ಷವನ್ನು ಹೊರತುಪಡಿಸಿ, ಹವಾಮಾನ ಇಲಾಖೆ ನೀಡಿದ ಮುನ್ಸೂಚನೆಗಳು ಬಹುಪಾಲು ನಿಖರವಾಗಿವೆ. ವಿಶೇಷವಾಗಿ ಕಳೆದ ಆರು ವರ್ಷಗಳಲ್ಲಿ (2020 ರಿಂದ 2025) ಇಲಾಖೆ ಅಂದಾಜಿಸಿದ ದಿನಾಂಕಗಳು ಮತ್ತು ಮುಂಗಾರು ಪ್ರವೇಶಿಸಿದ ನಿಜವಾದ ದಿನಾಂಕಗಳ ನಡುವೆ ಅತ್ಯಂತ ಕನಿಷ್ಠ ವ್ಯತ್ಯಾಸವಿದ್ದು, ಇಲಾಖೆಯ ವರದಿಗಳು ಸಂಪೂರ್ಣ ಯಶಸ್ವಿಯಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ