ನವದೆಹಲಿ: ಇಂಡಿಗೋ (IndiGo) ವಿಮಾನಯಾನ ಸಂಸ್ಥೆಯ ಬಿಕ್ಕಟ್ಟು ಶಮನಗೊಳ್ಳುವ ಲಕ್ಷಣಗಳು ಕಾಣಿಸುತ್ತಿದ್ದಂತೆ ವಿಮಾನಗಳ ವ್ಯಾಪಕ ರದ್ದತಿ ಮತ್ತು ವಿಳಂಬದಿಂದ ತೊಂದರೆಗೊಳಗಾದ ಪ್ರಯಾಣಿಕರಿಗೆ ವಿಮಾನಯಾನ ಸಂಸ್ಥೆಯು ಈವರೆಗೆ ₹ 610 ಕೋಟಿ ಮರುಪಾವತಿ ಮಾಡಿದೆ ಎಂದು ನಾಗರಿಕ ವಿಮಾನಯಾನ ಸಚಿವಾಲಯವು ಭಾನುವಾರ ತಿಳಿಸಿದೆ. ಶನಿವಾರದ ಹೊತ್ತಿಗೆ, ದೇಶಾದ್ಯಂತ ಸುಮಾರು 3,000 ಸಾಮಾನು ಸರಂಜಾಮುಗಳನ್ನು ಸಹ ಪ್ರಯಾಣಿಕರಿಗೆ ತಲುಪಿಸಲಾಗಿದೆ.
ಕಳೆದ ಕೆಲವು ದಿನಗಳಿಂದ ನೂರಾರು ವಿಮಾನಗಳು ರದ್ದುಗೊಂಡು ವಿಳಂಬವಾಗಿದ್ದು, ಸಾವಿರಾರು ಪ್ರಯಾಣಿಕರಿಗೆ ತೀವ್ರ ತೊಂದರೆಯಾಗಿತ್ತು. ಸಾಮಾನ್ಯವಾಗಿ ಪ್ರತಿದಿನ ಸುಮಾರು 2,300 ವಿಮಾನಗಳನ್ನು ನಿರ್ವಹಿಸುವ ದೇಶದ ಅತಿ ದೊಡ್ಡ ವಿಮಾನಯಾನ ಸಂಸ್ಥೆಯಾದ ಇಂಡಿಗೋ, ಶುಕ್ರವಾರದಂದು 700 ಕ್ಕಿಂತ ಸ್ವಲ್ಪ ಹೆಚ್ಚು ವಿಮಾನಗಳ ನಿರ್ವಹಣೆಗೆ ಹೋಲಿಸಿದರೆ, ಶನಿವಾರ ಸುಮಾರು 1,500 ವಿಮಾನಗಳನ್ನು ನಿರ್ವಹಿಸಿದೆ. ಇಂಡಿಗೋ ಪ್ರಕಾರ, ಡಿಸೆಂಬರ್ 7 ರಂದು 138 ಗಮ್ಯಸ್ಥಾನಗಳಲ್ಲಿ 137 ಕಾರ್ಯನಿರ್ವಹಿಸಲಿವೆ.
ವಿಮಾನಯಾನ ಜಾಲವು ಶೀಘ್ರವಾಗಿ ಸಂಪೂರ್ಣ ಸಾಮಾನ್ಯ ಸ್ಥಿತಿಯತ್ತ ಸಾಗುತ್ತಿದೆ ಮತ್ತು ಕಾರ್ಯಾಚರಣೆಗಳು ಸಂಪೂರ್ಣವಾಗಿ ಸ್ಥಿರಗೊಳ್ಳುವವರೆಗೆ ಎಲ್ಲ ತಿದ್ದುಪಡಿ ಕ್ರಮಗಳು ಜಾರಿಯಲ್ಲಿರುತ್ತವೆ ಎಂದು ಕೂಡ ತಿಳಿಸಿದೆ.
“ಇಂಡಿಗೋ ಇದುವರೆಗೆ ಒಟ್ಟು ₹ 610 ಕೋಟಿ ಮರುಪಾವತಿಯನ್ನು ಪ್ರಕ್ರಿಯೆಗೊಳಿಸಿದೆ. ರದ್ದತಿಯಿಂದಾಗಿ ಪ್ರಯಾಣದ ಮರುನಿಗದಿಗಾಗಿ ಯಾವುದೇ ಹೆಚ್ಚುವರಿ ಶುಲ್ಕವನ್ನು ವಿಧಿಸಲು ಅವಕಾಶವಿಲ್ಲ. ಮರುಪಾವತಿ ಮತ್ತು ಮರುಬುಕಿಂಗ್ ಸಮಸ್ಯೆಗಳು ವಿಳಂಬ ಅಥವಾ ಅನಾನುಕೂಲತೆ ಇಲ್ಲದೆ ಪರಿಹರಿಸಲ್ಪಡಲು, ಪ್ರಯಾಣಿಕರಿಗೆ ಪೂರ್ವಭಾವಿಯಾಗಿ ಸಹಾಯ ಮಾಡಲು ಮೀಸಲಾದ ಬೆಂಬಲ ಕೋಶಗಳನ್ನು (Support Cells) ರಚಿಸಲಾಗಿದೆ” ಎಂದು ವಿಮಾನಯಾನ ಸಚಿವಾಲಯವು ಪ್ರಕಟಣೆಯಲ್ಲಿ ತಿಳಿಸಿದೆ.
ಇತ್ತೀಚಿನ ಇಂಡಿಗೋ ಕಾರ್ಯಾಚರಣೆಯ ಬಿಕ್ಕಟ್ಟಿನಿಂದ ಉಂಟಾದ ಅಡಚಣೆಯನ್ನು ಪರಿಹರಿಸಲು ಮತ್ತು ಪ್ರಯಾಣಿಕರಿಗೆ ನಿರಂತರ ಅನಾನುಕೂಲವಾಗದಂತೆ ನೋಡಿಕೊಳ್ಳಲು ಸಚಿವಾಲಯವು ಶೀಘ್ರ ಮತ್ತು ನಿರ್ಣಾಯಕ ಕ್ರಮಗಳನ್ನು ತೆಗೆದುಕೊಂಡಿದೆ ಎಂದು ಹೇಳಿರುವ ಅದು, ದೇಶದಾದ್ಯಂತ ವಿಮಾನಯಾನ ಕಾರ್ಯಾಚರಣೆಗಳು ವೇಗವಾಗಿ ಸ್ಥಿರಗೊಳ್ಳುತ್ತಿವೆ ಎಂದು ತಿಳಿಸಿದೆ.
ಇತರ ಎಲ್ಲ ದೇಶೀಯ ವಿಮಾನಯಾನ ಸಂಸ್ಥೆಗಳು ಸುಗಮವಾಗಿ ಮತ್ತು ಪೂರ್ಣ ಸಾಮರ್ಥ್ಯದಲ್ಲಿ ಕಾರ್ಯನಿರ್ವಹಿಸುತ್ತಿದ್ದು, ಭಾನುವಾರದಂದು ಇಂಡಿಗೋದ ಕಾರ್ಯಕ್ಷಮತೆ ಸ್ಥಿರವಾದ ಸುಧಾರಣೆಯನ್ನು ತೋರಿಸಿದೆ. ವಿಮಾನಗಳ ವೇಳಾಪಟ್ಟಿಗಳು ಸಾಮಾನ್ಯ ಮಟ್ಟಕ್ಕೆ ಮರಳುತ್ತಿವೆ ಎಂದು ಸರ್ಕಾರ ಹೇಳಿದೆ.
ಇದಲ್ಲದೆ, ಇಂಡಿಗೋದ ವಿಮಾನ ಕಾರ್ಯಾಚರಣೆಗಳು ಶುಕ್ರವಾರ 706 ಇದ್ದಿದ್ದು ಶನಿವಾರ 1,565 ಕ್ಕೆ ಹೆಚ್ಚಾಗಿದೆ ಮತ್ತು ಭಾನುವಾರದ ಅಂತ್ಯದ ವೇಳೆಗೆ 1,650 ಕ್ಕೆ ತಲುಪುವ ಸಾಧ್ಯತೆಯಿದೆ ಎಂದು ಅದು ಹೇಳಿದೆ. “ಈ ಪ್ರಕ್ರಿಯೆಯ ಉದ್ದಕ್ಕೂ ನಿರಂತರ ಸಂವಹನವನ್ನು ಕಡ್ಡಾಯಗೊಳಿಸಲಾಗಿದೆ. ಈ ಪ್ರಯತ್ನದಿಂದಾಗಿ, ಇಂಡಿಗೋ ಶನಿವಾರದ ಹೊತ್ತಿಗೆ ದೇಶಾದ್ಯಂತ 3,000 ಸಾಮಾನು ಸರಂಜಾಮುಗಳನ್ನು ಯಶಸ್ವಿಯಾಗಿ ಪ್ರಯಾಣಿಕರಿಗೆ ತಲುಪಿಸಿದೆ,” ಎಂದು ಅದು ಹೇಳಿದೆ.
ಡಿಜಿಸಿಎ ನೋಟಿಸ್ಗಳಿಗೆ ಉತ್ತರಿಸಲು ಇಂಡಿಗೋಗೆ ಹೆಚ್ಚಿನ ಸಮಯ
ವಿಮಾನಯಾನ ನಿಯಂತ್ರಣ ಪ್ರಾಧಿಕಾರವಾದ ಡೈರೆಕ್ಟರೇಟ್ ಜನರಲ್ ಆಫ್ ಸಿವಿಲ್ ಏವಿಯೇಷನ್ (DGCA) ಇತ್ತೀಚಿನ ದೊಡ್ಡ ಪ್ರಮಾಣದ ಕಾರ್ಯಾಚರಣೆಯ ಅಡಚಣೆಗಳು ಮತ್ತು ಗಮನಿಸಿದ ನಿಯಮ ಉಲ್ಲಂಘನೆಗಳ ಬಗ್ಗೆ ಡಿಸೆಂಬರ್ 6 ರಂದು ನೀಡಿದ ‘ಕಾರಣ ಕೇಳಿ ನೋಟಿಸ್’ಗೆ (Show-Cause Notice)ಉತ್ತರ ನೀಡಲು ಇಂಡಿಗೋ ಸಿಇಒ ಪೀಟರ್ ಎಲ್ಬರ್ಸ್ ಮತ್ತು ಅಕೌಂಟೆಬಲ್ ಮ್ಯಾನೇಜರ್ ಇಸಿಡ್ರೋ ಪೋರ್ಕ್ವೆರಾಸ್ ಅವರಿಗೆ 24 ಗಂಟೆಗಳ ಒಂದು-ಬಾರಿ ವಿಸ್ತರಣೆಯನ್ನು ನೀಡಿದೆ.
ಡಿಸೆಂಬರ್ 7 ರ ತಮ್ಮ ಮನವಿಯಲ್ಲಿ, ದೇಶಾದ್ಯಂತದ ಕಾರ್ಯಾಚರಣೆಗಳ ಪ್ರಮಾಣದಿಂದಾಗಿ ಕಾರ್ಯಾಚರಣೆಯ ನಿರ್ಬಂಧಗಳನ್ನು ಮತ್ತು ಹಲವಾರು ವಿಮಾನ ನಿಲ್ದಾಣಗಳಲ್ಲಿ ಅಡಚಣೆಗಳಿಗೆ ಕಾರಣವಾದ ಬಹು ಅನಿವಾರ್ಯ ಅಂಶಗಳನ್ನು ಉಲ್ಲೇಖಿಸಿ ಈ ಇಬ್ಬರು ಉತ್ತರಿಸಲು ಹೆಚ್ಚುವರಿ ಸಮಯವನ್ನು ಕೋರಿದ್ದರು.
ಈ ಇಬ್ಬರಿಗೂ 24 ಗಂಟೆಗಳ ಹೆಚ್ಚಿನ ಸಮಯ ಅಥವಾ ಸೋಮವಾರ ಸಂಜೆ 6 ಗಂಟೆಯವರೆಗೆ ತಮ್ಮ ಉತ್ತರಗಳನ್ನು ಸಲ್ಲಿಸಲು ಸಮಯಾವಕಾಶ ನೀಡಲಾಗಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ಭಾನುವಾರ ತಿಳಿಸಿದ್ದಾರೆ.
ಸತತ ಆರು ದಿನಗಳ ಕಾಲ, ಇಂಡಿಗೋ ವಿಮಾನ ಕಾರ್ಯಾಚರಣೆಗಳು ವಿಪರೀತ ಅಸ್ತವ್ಯಸ್ತಗೊಂಡು, ದೊಡ್ಡ ಪ್ರಮಾಣದಲ್ಲಿ ವಿಮಾನಗಳ ರದ್ದತಿ ಮತ್ತು ವಿಳಂಬಕ್ಕೆ ಕಾರಣವಾಗಿತ್ತು. ಈ ಹಿನ್ನೆಲೆಯಲ್ಲಿ ನಿಯಂತ್ರಕರು ಕಾರಣ ಕೇಳಿ ನೋಟಿಸ್ಗಳನ್ನು ನೀಡಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ