ಸ್ಪೇಸ್ ಎಕ್ಸ್ ಷೇರುಗಳ ದಾಖಲೆ ಜಿಗಿತ: ವಿಶ್ವದ ಮೊದಲ ‘ಟ್ರಿಲಿಯನೇರ್’ (ಲಕ್ಷ ಕೋಟಿ ಡಾಲರ್ ಒಡೆಯ)ಆದ ಎಲೋನ್ ಮಸ್ಕ್ !

ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿಯಾಗಿರುವ ಎಲೋನ್ ಮಸ್ಕ್, ಶುಕ್ರವಾರ ಜಾಗತಿಕ ಇತಿಹಾಸದಲ್ಲೇ ಅತ್ಯಂತ ಅಪರೂಪದ ಮೈಲಿಗಲ್ಲೊಂದನ್ನು ಸಾಧಿಸಿದ್ದಾರೆ. ಅವರ ಪ್ರಮುಖ ರಾಕೆಟ್ ಸಂಸ್ಥೆಯಾದ ‘ಸ್ಪೇಸ್ ಎಕ್ಸ್’ (SpaceX) ಷೇರು ಮಾರುಕಟ್ಟೆಗೆ ಪದಾರ್ಪಣೆ ಮಾಡಿದ ಮೊದಲ ದಿನವೇ ಭಾರಿ ಯಶಸ್ಸು ಕಂಡಿದ್ದು, ಮಸ್ಕ್ ವಿಶ್ವದ ಮೊದಲ ‘ಟ್ರಿಲಿಯನೇರ್’ (ಲಕ್ಷ ಕೋಟಿ ಡಾಲರ್ ಒಡೆಯ) ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಷೇರು ಮಾರುಕಟ್ಟೆಯಲ್ಲಿ ವಹಿವಾಟು ಆರಂಭಿಸಿದ ಮೊದಲ ದಿನವೇ ಸ್ಪೇಸ್ ಎಕ್ಸ್ ಸಂಸ್ಥೆಯ ಷೇರುಗಳು ಶೇಕಡಾ 11 ರಷ್ಟು ಭಾರಿ ಜಿಗಿತ ಕಂಡು 150 ಡಾಲರ್‌ಗೆ ತಲುಪಿದವು. ಆ ನಂತರ ಮತ್ತಷ್ಟು ಏರಿಕೆ ಕಂಡು ಸುಮಾರು 172 ಡಾಲರ್ ಆಸುಪಾಸಿನಲ್ಲಿ ವಹಿವಾಟು ಮುಗಿಸಿದವು. ಇದರೊಂದಿಗೆ ಸ್ಪೇಸ್ ಎಕ್ಸ್ ಕಂಪನಿಯ ಒಟ್ಟಾರೆ ಮಾರುಕಟ್ಟೆ ಮೌಲ್ಯವು ಬರೋಬ್ಬರಿ 2.18 ಟ್ರಿಲಿಯನ್ ಡಾಲರ್ ತಲುಪಿದೆ.

ಮಸ್ಕ್ ಟ್ರಿಲಿಯನೇರ್ ಆಗಿದ್ದು ಹೇಗೆ?
ಸ್ಪೇಸ್ ಎಕ್ಸ್ ಸಂಸ್ಥೆಯ ಐಪಿಒ (Initial Public Offering) ಆರಂಭಿಕ ದರ 135 ಡಾಲರ್ ಆಗಿತ್ತು. ಆದರೆ ಮಾರುಕಟ್ಟೆ ಆರಂಭವಾಗುತ್ತಿದ್ದಂತೆ ಇದು ನೇರವಾಗಿ 150 ಡಾಲರ್‌ಗೆ ಜಿಗಿದಿದ್ದರಿಂದ ಎಲೋನ್ ಮಸ್ಕ್ ಅವರ ಸಂಪತ್ತು ಟ್ರಿಲಿಯನ್ ಡಾಲರ್ ಗಡಿ ದಾಟಿತು. ಪ್ರಸ್ತುತ ಅವರ ಒಟ್ಟು ಸಂಪತ್ತು ಸ್ಪೇಸ್ ಎಕ್ಸ್ ಮತ್ತು ಅವರ ಪ್ರಮುಖ ಕಾರು ಸಂಸ್ಥೆಯಾದ ‘ಟೆಸ್ಲಾ’ (Tesla) ಕಂಪನಿಗಳ ಷೇರುಗಳನ್ನು ಒಳಗೊಂಡಿದೆ. ಇದರೊಂದಿಗೆ ನ್ಯೂರೋ-ಟೆಕ್ನಾಲಜಿ ಕಂಪನಿಯಾದ ‘ನ್ಯೂರಲಿಂಕ್’ (Neuralink) ಮತ್ತು ಸುರಂಗ ನಿರ್ಮಾಣ ಸಂಸ್ಥೆಯಾದ ‘ದಿ ಬೋರಿಂಗ್ ಕಂಪನಿ’ (The Boring Company) ಗಳಲ್ಲೂ ಮಸ್ಕ್ ಒಡೆತನದ ಪಾಲನ್ನು ಹೊಂದಿದ್ದಾರೆ.
ಇದಕ್ಕೂ ಮುನ್ನ, ಜನವರಿ 2021 ರಲ್ಲಿ ಅಮೆಜಾನ್ ಸಂಸ್ಥಾಪಕ ಜೆಫ್ ಬೆಜೋಸ್ ಅವರನ್ನು ಹಿಂದಿಕ್ಕಿ ಮಸ್ಕ್ ವಿಶ್ವದ ನಂ.1 ಶ್ರೀಮಂತ ಎನಿಸಿಕೊಂಡಿದ್ದರು. ಟೆಸ್ಲಾ ಷೇರುಗಳ ಭಾರಿ ಜಿಗಿತದಿಂದಾಗಿ ಆಗ ಅವರ ಸಂಪತ್ತು 185 ಬಿಲಿಯನ್ ಡಾಲರ್ ದಾಟಿತ್ತು.

ಸ್ಪೇಸ್ ಎಕ್ಸ್ ಸಂಸ್ಥೆಯನ್ನು ಸಾರ್ವಜನಿಕ ಮಾರುಕಟ್ಟೆಗೆ ತಂದಿದ್ದೇಕೆ?
ಬಾಹ್ಯಾಕಾಶದಲ್ಲಿ ಉಪಗ್ರಹಗಳು ಹಾಗೂ ಬೃಹತ್ ಡೇಟಾ ಸೆಂಟರ್‌ಗಳನ್ನು ಸ್ಥಾಪಿಸಲು ಮತ್ತು ಮಂಗಳ ಗ್ರಹದಲ್ಲಿ ಮಾನವ ವಸಾಹತು ನಿರ್ಮಿಸುವ ತಮ್ಮ ಮಹತ್ವಾಕಾಂಕ್ಷೆಯ ಯೋಜನೆಗಳಿಗೆ ಭಾರಿ ಪ್ರಮಾಣದ ಹಣದ ಅಗತ್ಯವಿರುವ ಕಾರಣ ಸ್ಪೇಸ್ ಎಕ್ಸ್ ಅನ್ನು ಸಾರ್ವಜನಿಕ ಷೇರು ಮಾರುಕಟ್ಟೆಗೆ (IPO) ತರಲಾಗಿದೆ ಎಂದು ಟೆಸ್ಲಾ ಮುಖ್ಯಸ್ಥ ಮಸ್ಕ್ ಸ್ಪಷ್ಟಪಡಿಸಿದ್ದಾರೆ. “ಜೀವ ಜಗತ್ತನ್ನು ಬಹು-ಗ್ರಹಗಳ ವ್ಯಾಪ್ತಿಗೆ ಕೊಂಡೊಯ್ಯುವುದು” ತಮ್ಮ ಪ್ರಮುಖ ಗುರಿ ಎಂದು ಅವರು ಪುನರುಚ್ಚರಿಸಿದ್ದಾರೆ.
“ಇದು ಕೇವಲ ಕೆಲವೇ ಕೆಲವು ಗಗನಯಾತ್ರಿಗಳಿಗಾಗಿ ಅಲ್ಲ, ಇದು ನೇರವಾಗಿ ನಿಮಗಾಗಿ. ಈ ಕಾರ್ಯಕ್ರಮವನ್ನು ವೀಕ್ಷಿಸುತ್ತಿರುವ ನೀವು ಯಾರೇ ಆಗಿರಲಿ, ನಿಮ್ಮನ್ನು ಚಂದ್ರನಿಗೆ, ಮಂಗಳ ಗ್ರಹಕ್ಕೆ ಮತ್ತು ಅದರಾಚೆಗೂ ಕರೆದೊಯ್ಯಲು ಸ್ಪೇಸ್ ಎಕ್ಸ್ ಬಯಸುತ್ತದೆ,” ಎಂದು ಮಸ್ಕ್ ಹೇಳಿದ್ದಾರೆ.

ಮಂಗಳ ಗ್ರಹದಲ್ಲಿ ಸುಮಾರು 10 ಲಕ್ಷ ಜನರ ವಸಾಹತು ನಿರ್ಮಿಸುವ ಗುರಿಯ ಜೊತೆಗೆ, ಬಾಹ್ಯಾಕಾಶದಲ್ಲಿ ಇತರ ಸುರಕ್ಷಿತ ನೆಲೆಗಳನ್ನು ಸ್ಥಾಪಿಸುವ ಮೂಲಕ ಮಾನವಕುಲವನ್ನು ರಕ್ಷಿಸುವ ಭರವಸೆಯನ್ನು ಕಂಪನಿ ನೀಡಿದೆ. ಅಲ್ಲದೆ, ಕಕ್ಷೆಯಲ್ಲಿ ಫುಟ್‌ಬಾಲ್ ಮೈದಾನದ ಗಾತ್ರದ ಬೃಹತ್ ಡೇಟಾ ಸೆಂಟರ್‌ಗಳನ್ನು ಉಡಾವಣೆ ಮಾಡಲು ಮತ್ತು ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಮಾರುಕಟ್ಟೆಯಲ್ಲಿ ತೀವ್ರ ಪೈಪೋಟಿ ನೀಡುತ್ತಿರುವ ಆಂಥ್ರೋಪಿಕಲ್ (Anthropic) ಹಾಗೂ ಓಪನ್ ಎಐ (OpenAI) ಸಂಸ್ಥೆಗಳನ್ನು ಮೀರಿಸಿ ಆದಾಯ ಗಳಿಸುವ ಯೋಜನೆಯನ್ನೂ ಸ್ಪೇಸ್ ಎಕ್ಸ್ ಹೊಂದಿದೆ.
ಆದರೆ, ಈ ಬೃಹತ್ ಯೋಜನೆಗಳನ್ನು ಸಾಕಾರಗೊಳಿಸಲು ಸ್ಪೇಸ್ ಎಕ್ಸ್‌ಗೆ ಸದ್ಯ ತನ್ನ ರಾಕೆಟ್ ಮತ್ತು ಸ್ಯಾಟಲೈಟ್ ವ್ಯವಹಾರದಿಂದ ಬರುತ್ತಿರುವ ಆದಾಯಕ್ಕಿಂತಲೂ ಬಿಲಿಯನ್‌ಗಟ್ಟಲೆ ಹೆಚ್ಚಿನ ಹಣದ ಅಗತ್ಯವಿದೆ. 2025 ರ ಆರಂಭದಿಂದ ಮಾರ್ಚ್ 31, 2026 ರ ನಡುವಿನ ಅವಧಿಯಲ್ಲಿ ಕಂಪನಿಯು ಈಗಾಗಲೇ 8.7 ಬಿಲಿಯನ್ ಡಾಲರ್ ನಷ್ಟ ಅನುಭವಿಸಿದೆ ಎಂಬುದು ಗಮನಾರ್ಹ.

ಹಣ “ಅಪ್ರಸ್ತುತ” ಎಂದಿದ್ದ ಮಸ್ಕ್:
ಕಳೆದ ವರ್ಷವಷ್ಟೇ ನೀಡಿದ್ದ ಹೇಳಿಕೆಯೊಂದರಲ್ಲಿ ಮಸ್ಕ್, ಭವಿಷ್ಯದಲ್ಲಿ ಕರೆನ್ಸಿ ಅಥವಾ ಹಣದ ಅಗತ್ಯವೇ ಇರುವುದಿಲ್ಲ ಮತ್ತು ಉದ್ಯೋಗಗಳು ಕೇವಲ ಐಚ್ಛಿಕವಾಗಲಿವೆ ಎಂದು ಭವಿಷ್ಯ ನುಡಿದಿದ್ದರು. ಕೃತಕ ಬುದ್ಧಿಮತ್ತೆ (AI) ಮತ್ತು ಹ್ಯೂಮನಾಯ್ಡ್ ರೋಬೋಟ್‌ಗಳು ಭವಿಷ್ಯದಲ್ಲಿ ಅತ್ಯಂತ ಹೆಚ್ಚಿನ ಉತ್ಪಾದಕತೆಯನ್ನು ಹೊಂದಿರಲಿವೆ. ಹೀಗಾಗಿ ಹಣ ಎಂಬುದು ಅಪ್ರಸ್ತುತವಾಗಲಿದ್ದು, ಬಹುತೇಕ ಉದ್ಯೋಗಗಳು ಕೇವಲ ಹವ್ಯಾಸಗಳಾಗಿ ಬದಲಾಗಲಿವೆ ಮತ್ತು ಜಗತ್ತಿನಿಂದ ಬಡತನವೇ ನಿರ್ಮೂಲನೆಯಾಗಲಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದರು.