ವಿಶ್ವದ ಮೊದಲ ಮಾನವರೂಪಿ (humanoid) ರೋಬೋಟ್ ಬಾಡಿಗೆ ತಾಯಿಯು ಶೀಘ್ರವೇ ಜೀವಂತ ಮಗುವಿಗೆ ಜನ್ಮ ನೀಡಲು ಸಾಧ್ಯವಾಗುತ್ತದೆ ಎಂದು ಚೀನಾದ ವಿಜ್ಞಾನಿಗಳು ಹೇಳಿದ್ದಾರೆ. ಗುವಾಂಗ್ಝೌದಲ್ಲಿನ ಕೈವಾ ಟೆಕ್ನಾಲಜಿಯ ಡಾ. ಜಾಂಗ್ ಕಿಫೆಂಗ್ ನೇತೃತ್ವದ ಈ ಯೋಜನೆಯು ಕೃತಕ ಗರ್ಭದೊಳಗೆ ಗರ್ಭಧಾರಣೆಯನ್ನು ಮಾಡಲು ಪ್ರಯತ್ನಿಸುತ್ತದೆ.
ಮಗುವು ರೋಬೋಟ್ನ ದೇಹದೊಳಗೆ ಕೃತಕ ಆಮ್ನಿಯೋಟಿಕ್ ದ್ರವದಿಂದ ತುಂಬಿದ ಗರ್ಭದಂತಹ ಜಾಗದಲ್ಲಿ ಬೆಳೆಯುತ್ತದೆ. ಈ ತಂತ್ರಜ್ಞಾನಕ್ಕಾಗಿ ಕಾನೂನುಗಳು ಮತ್ತು ನಿಯಮಗಳನ್ನು ರೂಪಿಸಲು ಡಾ. ಜಾಂಗ್ ಈಗಾಗಲೇ ಗುವಾಂಗ್ಡಾಂಗ್ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸುತ್ತಿದ್ದಾರೆ. ಮಗು ಒಂಬತ್ತು ತಿಂಗಳ ಕಾಲ ಅಲ್ಲಿ ಬೆಳವಣಿಗೆ ಹೊಂದುತ್ತದೆ, ಹೆರಿಗೆಗೆ ಮೊದಲು ಟ್ಯೂಬ್ ಮೂಲಕ ಮಗು ಪೋಷಕಾಂಶಗಳನ್ನು ಪಡೆಯುತ್ತದೆ. ಸಿಂಗಾಪುರದ ನಾನ್ಯಾಂಗ್ ತಾಂತ್ರಿಕ ವಿಶ್ವವಿದ್ಯಾಲಯದ ಪಿಎಚ್ಡಿ ಪದವೀಧರರಾದ ಡಾ. ಜಾಂಗ್ ಅವರು ತಂತ್ರಜ್ಞಾನವು ಈಗ “ಪ್ರಬುದ್ಧ ಹಂತ” ತಲುಪಿದೆ ಎಂದು ಹೇಳಿದ್ದಾರೆ.
“ಇದನ್ನು ಈಗ ಮಾನವರೂಪಿ ರೋಬೋಟ್ನ ಹೊಟ್ಟೆಯಲ್ಲಿ ಅಳವಡಿಸಬೇಕಾಗಿದೆ, ಇದು ಗರ್ಭಧಾರಣೆ ನಂತರ ಭ್ರೂಣವು ಒಳಗೆ ಬೆಳೆಯಲು ಅನುವು ಮಾಡಿಕೊಡುತ್ತದೆ” ಎಂದು ದಿ ಟೆಲಿಗ್ರಾಫ್ ಡಾ. ಜಾಂಗ್ ಅವರನ್ನು ಉಲ್ಲೇಖಿಸಿ ವರದಿ ಮಾಡಿದೆ.
ಮುಂದಿನ ವರ್ಷ ಸುಮಾರು 100,000 ಯುವಾನ್ (12 ಲಕ್ಷ ರೂ.ಗಳಿಗಿಂತ ಹೆಚ್ಚು)ಗೆ ಒಂದು ಮೂಲಮಾದರಿ ಮಾರಾಟವಾಗುವ ನಿರೀಕ್ಷೆಯಿದೆ. ಮಾನರೂಪಿ ರೋಬೋಟ್ ನ ಗರ್ಭಧಾರಣೆಯಿಂದ ಹೆರಿಗೆ ವರೆಗಿನ ಸಂಪೂರ್ಣ ಗರ್ಭಧಾರಣೆಯ ಪ್ರಕ್ರಿಯೆಯನ್ನು ಪುನರಾವರ್ತಿಸಬಹುದು ಎಂದು ವರದಿಗಳು ಹೇಳುತ್ತವೆ ಎಂದು ಲೈವ್ ಮಿಂಟ್ ವರದಿ ಮಾಡಿದೆ.
ಭ್ರೂಣವನ್ನು ಹೇಗೆ ಅಳವಡಿಸಲಾಗುತ್ತದೆ ಎಂಬುದನ್ನು ತಜ್ಞರು ಸ್ಪಷ್ಟಪಡಿಸಿಲ್ಲ. ಹೀಗಾಗಿ ಫಲೀಕರಣದ ನಿಖರ ಪ್ರಕ್ರಿಯೆಯು ಹೇಗೆ ಎಂಬುದು ಅನಿಶ್ಚಿತವಾಗಿಯೇ ಉಳಿದಿದೆ. ಆದಾಗ್ಯೂ, ಈ ಪರಿಕಲ್ಪನೆಯು “ಬಯೋಬ್ಯಾಗ್ಗಳ” ಒಳಗೆ ವಾರಗಳವರೆಗೆ ಕುರಿಮರಿಗಳನ್ನು ಜೀವಂತವಾಗಿರಿಸಿದ್ದ ಹಿಂದಿನ ಪ್ರಯೋಗಗಳ ಆಧಾರದ ಮೇಲೆ ನಿರ್ಮಿಸಲಾಗಿದೆ ಎಂದು ಕೆಲ ತಜ್ಞರು ಪ್ರತಿಪಾದಿಸುತ್ತಾರೆ.
ಇದು ಈಗ ಪ್ರಮುಖವಾಗಿ ಕಾನೂನು ಚರ್ಚೆಗಳಿಗೆ ಕಾರಣವಾಗಿದೆ. ಯಶಸ್ವಿಯಾದರೆ, ಇದು ಔಷಧ ವ್ಯವಸ್ಥೆ ಮತ್ತು ಕುಟುಂಬ ಜೀವನವನ್ನು ಶಾಶ್ವತವಾಗಿ ಬದಲಾಯಿಸಬಹುದು ಎಂದು ಹಲವರು ಆತಂಕ ವ್ಯಕ್ತಪಡಿಸಿದ್ದಾರೆ. ಕೆಲವರು ಇದನ್ನು ಒಂದು ಕ್ರಾಂತಿಕಾರಿ ಪ್ರಗತಿ ಎಂದು ಶ್ಲಾಘಿಸಿದರೂ, ವಿಶ್ಲೇಷಣಾಕಾರರು ಅದರ ನೈತಿಕ ಪರಿಣಾಮಗಳ ಬಗ್ಗೆ ಆತಂಕ ವ್ಯಕ್ತಪಡಿಸುತ್ತಾರೆ. ಕೃತಕ ಗರ್ಭಕೋಶಗಳು ಗರ್ಭಧಾರಣೆಗೆ ಸಂಬಂಧಿಸಿದ ಆರೋಗ್ಯದ ಅಪಾಯಗಳಿಂದ ಮಹಿಳೆಯರನ್ನು ರಕ್ಷಿಸಬಹುದು ಮತ್ತು ಮಗುವನ್ನು ಹೊತ್ತೊಯ್ಯುವ ದೈಹಿಕ ಒತ್ತಡದಿಂದ ಅವರನ್ನು ಮುಕ್ತಗೊಳಿಸಬಹುದು ಎಂದು ಅನೇಕರು ನಂಬುತ್ತಾರೆ.
ಆದಾಗ್ಯೂ, ಈ ತಂತ್ರಜ್ಞಾನವು ತಾಯಿ ಮತ್ತು ಮಗುವಿನ ನಡುವಿನ ನೈಸರ್ಗಿಕ ಬಾಂಧವ್ಯವನ್ನು ಇಲ್ಲವಾಗಿಸುವುದರಿಂದ ಅದು “ಸಮಸ್ಯಾತ್ಮಕ” ಮತ್ತು ಅನೈತಿಕ ಎಂದು ಹಲವರು ವಾದಿಸುತ್ತಾರೆ. ವಿಜ್ಞಾನವು ತಾಯಿಯ ಹಾರ್ಮೋನ್ ನಿಯಂತ್ರಣದಂತಹ ಸಂಕೀರ್ಣ ಪ್ರಕ್ರಿಯೆಗಳನ್ನು ಪುನರಾವರ್ತಿಸಬಹುದೇ ಎಂಬ ಬಗ್ಗೆ ವೈದ್ಯಕೀಯ ತಜ್ಞರು ಇನ್ನೂ ಸಂಶಯ ವ್ಯಕ್ತಪಡಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ