ಉತ್ತರ ಪ್ರದೇಶದ ಮೊರಾದಾಬಾದ್ನಲ್ಲಿ ನಡೆದ ಈ ಘಟನೆಯು ಅತ್ಯಂತ ಆಘಾತಕಾರಿಯಾಗಿದ್ದು, ಕೇವಲ ವೃತ್ತಿಜೀವನ ಮತ್ತು ವೈಯಕ್ತಿಕ ಸಂಬಂಧದ ಕುರಿತಾದ ಭಿನ್ನಾಭಿಪ್ರಾಯವು ಎಷ್ಟು ಕ್ರೂರ ಹಂತಕ್ಕೆ ತಲುಪಬಹುದು ಎಂಬುದಕ್ಕೆ ಸಾಕ್ಷಿಯಾಗಿದೆ.
ವಿಮಾ ಕಂಪನಿಯೊಂದರಲ್ಲಿ ಅಸಿಸ್ಟೆಂಟ್ ಮ್ಯಾನೇಜರ್ ಆಗಿ ಕೆಲಸ ಮಾಡುತ್ತಿದ್ದ ನೀಲಿಮಾ ಅವರ ಭೇಟಿ ಮಾಡಲು ಮಗ ಹಾರ್ದಿಕ್ ಕಳೆದ ವಾರ ಅವರ ಕಚೇರಿಗೆ ಹೋಗಿದ್ದ. “ಅಮ್ಮಾ ಮನೆಗೆ ನಡೆ, ನಿನಗೊಂದು ಸರ್ಪ್ರೈಸ್ ಇದೆ” ಎಂದು ಹೇಳಿ ಆಕೆಯನ್ನು ಮನೆಗೆ ಕರೆತಂದಿದ್ದಾನೆ. ಆದರೆ ಮನೆಗೆ ಹೋದ ನೀಲಿಮಾ ಅವರಿಗೆ ಕಾಯುತ್ತಿದ್ದದ್ದು ಭೀಕರ ದೃಶ್ಯವಾಗಿತ್ತು. ಮಗಳು ಹಿಮಶಿಖಾ ರಕ್ತದ ಮಡುವಿನಲ್ಲಿ ಬಿದ್ದಿರುವುದನ್ನು ಕಂಡು ಅವರು ಕಿರುಚಿದ್ದಾರೆ. ಈ ವೇಳೆ ಹಾರ್ದಿಕ್ ತನ್ನ ತಾಯಿಯ ಮೇಲೂ ಮಾರಣಾಂತಿಕ ದಾಳಿ ನಡೆಸಿದ್ದಾನೆ.
ಅವಳಿ ಮಕ್ಕಳಲ್ಲಿ ಬಿರುಕು ಮೂಡಿದ್ದು ಯಾಕೆ ?
ಹಾರ್ದಿಕ್ ಮತ್ತು ಹಿಮಶಿಖಾ (25) ಅವಳಿ ಮಕ್ಕಳು. ಇಬ್ಬರೂ ಇಂಜಿನಿಯರ್ಗಳಾಗಿದ್ದು, ಗುರುಗ್ರಾಮದಲ್ಲಿ ಕೆಲಸ ಮಾಡುತ್ತಿದ್ದರು. ಹಿಮಶಿಖಾ ಕೆಲಸದ ಜೊತೆಗೆ ಎಂಬಿಎ (MBA) ಕೂಡ ಮಾಡುತ್ತಿದ್ದರು.
ಆದರೆ ಹಾರ್ದಿಕ್ ಒಂದೂವರೆ ವರ್ಷದ ಹಿಂದೆ ಕೆಲಸ ಬಿಟ್ಟು ಮನೆಯಲ್ಲೇ ಇರುತ್ತಿದ್ದ. ಆತ ಸದಾ ಸಾಮಾಜಿಕ ಜಾಲತಾಣಗಳಲ್ಲಿ ಮುಳುಗಿರುತ್ತಿದ್ದ ಮತ್ತು ತಡರಾತ್ರಿಯವರೆಗೆ ಮೊಬೈಲ್ನಲ್ಲಿ ಚಾಟಿಂಗ್ ಮಾಡುತ್ತಿದ್ದ ಎಂದು ಕುಟುಂಬದವರು ತಿಳಿಸಿದ್ದಾರೆ.
ಪೊಲೀಸ್ ತನಿಖೆಯ ಪ್ರಕಾರ, ಹಾರ್ದಿಕ್ ಸೋಶಿಯಲ್ ಮೀಡಿಯಾ ಮೂಲಕ ಪುಣೆಯ ಮುಸ್ಲಿಂ ಯುವತಿಯೊಬ್ಬಳ ಪರಿಚಯ ಮಾಡಿಕೊಂಡಿದ್ದ ಮತ್ತು ಆಕೆಯನ್ನು ಮದುವೆಯಾಗಲು ಬಯಸಿದ್ದ. ಇಬ್ಬರೂ ಆನ್ಲೈನ್ನಲ್ಲಿ ಗಂಟೆಗಟ್ಟಲೆ ಮಾತನಾಡುತ್ತಿದ್ದರು ಮತ್ತು ನಿಜ ಜೀವನದಲ್ಲಿ ಎಂದಿಗೂ ಭೇಟಿಯಾಗದಿದ್ದರೂ ಪರಸ್ಪರ ಮದುವೆಯಾಗಲು ನಿರ್ಧರಿಸಿದ್ದರು ಎಂದು ವರದಿಯಾಗಿದೆ.
ಹತ್ಯೆಗೆ ಕಾರಣ..?
ಪ್ರೇಮ ಸಂಬಂಧವನ್ನು ಬಿಟ್ಟು, ವೃತ್ತಿಜೀವನದ ಕಡೆಗೆ ಗಮನ ಹರಿಸುವಂತೆ ತಾಯಿ ನೀಲಿಮಾ ಮತ್ತು ಸಹೋದರಿ ಹಿಮಶಿಖಾ ಹಾರ್ದಿಕ್ಗೆ ಪದೇ ಪದೇ ಬುದ್ಧಿವಾದ ಹೇಳುತ್ತಿದ್ದರು. ಮಾರ್ಚ್ 6ರ ಸಂಜೆ ಇದೇ ವಿಷಯವಾಗಿ ಹಾರ್ದಿಕ್ ಮತ್ತು ಹಿಮಶಿಖಾ ನಡುವೆ ಜೋರಾಗಿ ಜಗಳ ನಡೆದಿದೆ. ಈ ವೇಳೆ ಸಿಟ್ಟಿಗೆದ್ದ ಹಾರ್ದಿಕ್, ತರಕಾರಿ ಕತ್ತರಿಸುವ ಚಾಕುವಿನಿಂದ ಸಹೋದರಿಯ ಮೇಲೆ ಅಮಾನುಷವಾಗಿ ದಾಳಿ ಮಾಡಿದ್ದಾನೆ. ಹಾರ್ದಿಕ್ ತನ್ನ ಸಹೋದರಿಯ ದೇಹಕ್ಕೆ ಬರೋಬ್ಬರಿ 84 ಬಾರಿ ಚಾಕುವಿನಿಂದ ಇರಿದಿದ್ದ ಎಂಬುದು ಪೋಸ್ಟ್ ಮಾರ್ಟಂ ವರದಿಯಿಂದ ತಿಳಿದುಬಂದಿದೆ.
ತಾಯಿಯ ಮೇಲೆಯೂ ದಾಳಿ
ಸಹೋದರಿಯನ್ನು ಕೊಂದ ನಂತರ ತಾಯಿಯನ್ನು ಮನೆಗೆ ಕರೆತಂದ ಹಾರ್ದಿಕ್, ಅವರಿಗೂ ಚಾಕುವಿನಿಂದ ಇರಿದು ಗಾಯಗೊಳಿಸಿದ್ದಾನೆ. ಶುಕ್ರವಾರ ಮಧ್ಯಾಹ್ನ ಮನೆಯೊಳಗೆ ತನ್ನ ಸಹೋದರಿಯನ್ನು ಕೊಂದ ನಂತರ, ಹಾರ್ದಿಕ್ ದೆಹಲಿ ರಸ್ತೆಯಲ್ಲಿರುವ ಖಾಸಗಿ ವಿಮಾ ಕಂಪನಿಯಲ್ಲಿ ಸಹಾಯಕ ವ್ಯವಸ್ಥಾಪಕಿಯಾಗಿರುವ ತನ್ನ ತಾಯಿ ನೀಲಿಮಾ ಅವರ ಕಚೇರಿಗೆ ಹೋಗಿ ನಿಮಗೆ ಒಂದು ಅಚ್ಚರಿಯನ್ನು ನೀಡಲು ಬಯಸುತ್ತೇನೆ ಎಂದು ತಿಳಿಸಿ ಮನೆಗೆ ಬರುವಂತೆ ಕರೆದಿದ್ದಾನೆ. ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ.
ಏನಾಗಿದೆ ಎಂದು ತಿಳಿಯದ, ನೀಲಿಮಾ ಕಾರಿನಲ್ಲಿ ಅವನೊಂದಿಗೆ ಮನೆಗೆ ಹೋದಳು. ಬಾಗಿಲು ತೆರೆದಾಗ, ಹಾಸಿಗೆಯ ಮೇಲೆ ಬಿದ್ದಿದ್ದ ತನ್ನ ಮಗಳ ರಕ್ತಸಿಕ್ತ ದೇಹವು ಕಂಡಿತು. ಅವಳು ಪ್ರತಿಕ್ರಿಯಿಸುವ ಮೊದಲೇ, ಹಾರ್ದಿಕ್ ತಾಯಿಯ ಮೇಲೆಯೂ ಚಾಕುವಿನಿಂದ ಹಲ್ಲೆ ಮಾಡಿದ್ದಾನೆ. ನೀಲಿಮಾ ಅವರ ಭುಜ, ಎದೆ ಮತ್ತು ಬೆರಳುಗಳ ಮೇಲೆ ಆರು ಇರಿತದ ಗಾಯಗಳಾಗಿವೆ. ಆದರೆ ಅವರು ತಪ್ಪಿಸಿಕೊಳ್ಳುವಲ್ಲಿ ಮತ್ತು ಸಹಾಯಕ್ಕಾಗಿ ಕೂಗಿಕೊಳ್ಳುವುದರಲ್ಲಿ ಯಶಸ್ವಿಯಾದರು.
ತೀವ್ರವಾಗಿ ಗಾಯಗೊಂಡಿದ್ದ ನೀಲಿಮಾ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಸದ್ಯ ಅವರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
ಘಟನೆ ನಡೆದ 24 ಗಂಟೆಯೊಳಗೆ ಪೊಲೀಸರು ಹಾರ್ದಿಕ್ನನ್ನು ಬಂಧಿಸಿದ್ದಾರೆ. ವಿಚಾರಣೆಯ ವೇಳೆ ಆತ, “ಸದಾ ವೃತ್ತಿಜೀವನದ ಬಗ್ಗೆ ಸಲಹೆ ನೀಡುತ್ತಿದ್ದುದು ಮತ್ತು ನನ್ನ ಪ್ರೇಮ ಸಂಬಂಧಕ್ಕೆ ಅಡ್ಡಿಪಡಿಸುತ್ತಿದ್ದುದು ನನ್ನಲ್ಲಿ ತೀವ್ರ ದ್ವೇಷ ಮೂಡಿಸಿತ್ತು” ಎಂದು ಒಪ್ಪಿಕೊಂಡಿದ್ದಾನೆ.
ನಿಮ್ಮ ಕಾಮೆಂಟ್ ಬರೆಯಿರಿ