ಇರಾನ್ ವಿರುದ್ಧ ಅಮೆರಿಕದ ಸೇನಾ ಕಾರ್ಯಾಚರಣೆಗೆ ಟ್ರಂಪ್ ಆಡಳಿತದಿಂದ ಭಾರಿ ಸಿದ್ಧತೆ

ವಾಷಿಂಗ್ಟನ್: ಒಂದೆಡೆ ಶಾಂತಿ ಸ್ಥಾಪನೆಗಾಗಿ ‘ಬೋರ್ಡ್ ಆಫ್ ಪೀಸ್’ (Board of Peace) ಎಂಬ ಅಂತಾರಾಷ್ಟ್ರೀಯ ಸಂಸ್ಥೆಯನ್ನು ಆರಂಭಿಸಿದ 24 ಗಂಟೆಗಳ ಒಳಗಾಗಿಯೇ, ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇರಾನ್ ವಿರುದ್ಧ ಮಿಲಿಟರಿ ಶಕ್ತಿ ಬಳಸುವ ಎಚ್ಚರಿಕೆ ನೀಡಿದ್ದಾರೆ. ಇರಾನ್‌ನಲ್ಲಿ ನಡೆಯುತ್ತಿರುವ ಆಂತರಿಕ ಪ್ರತಿಭಟನೆಗಳು ಮತ್ತು ನಾಪತ್ತೆಯಾಗಿರುವ ಯುರೇನಿಯಂ ವಿಚಾರವಾಗಿ ಪಶ್ಚಿಮ ಏಷ್ಯಾದಲ್ಲಿ ಯುದ್ಧದ ಕಾರ್ಮೋಡ ಕವಿದಿದೆ.

 ಅಮೆರಿಕವು ಇರಾನ್ ಸುತ್ತಮುತ್ತ ತನ್ನ ಸೇನಾ ಬಲವನ್ನು ತೀವ್ರಗೊಳಿಸುತ್ತಿದೆ. ಅಮೆರಿಕದ ‘ಯುಎಸ್ಎಸ್ ಅಬ್ರಹಾಂ ಲಿಂಕನ್’ ಯುದ್ಧನೌಕೆ ಮತ್ತು ಕ್ಷಿಪಣಿ ಧ್ವಂಸಕ ನೌಕೆಗಳು ಅರಬ್ಬಿ ಸಮುದ್ರ ಅಥವಾ ಪರ್ಷಿಯನ್ ಗಲ್ಫ್ ಪ್ರದೇಶದತ್ತ ಧಾವಿಸಿವೆ. ಪ್ರಸ್ತುತ ಈ ನೌಕೆಗಳ ನಿಖರ ಸ್ಥಾನವನ್ನು ಸಾರ್ವಜನಿಕವಾಗಿ ಪತ್ತೆಹಚ್ಚದಂತೆ ವ್ಯವಸ್ಥೆ ಮಾಡಲಾಗಿದೆ.

ಎಫ್-15ಇ ಸ್ಟ್ರೈಕ್ ಈಗಲ್ ಯುದ್ಧ ವಿಮಾನಗಳನ್ನು ಈಗಾಗಲೇ ಪಶ್ಚಿಮ ಏಷ್ಯಾದ ಅನಾಮಧೇಯ ನೆಲೆಗಳಲ್ಲಿ ನಿಯೋಜಿಸಲಾಗಿದೆ. ಇವುಗಳಿಗೆ ಮಧ್ಯ ಆಕಾಶದಲ್ಲೇ ಇಂಧನ ತುಂಬಿಸಲು ಕೆಸಿ-135 ಏರಿಯಲ್ ರಿಫ್ಯುಯೆಲರ್‌ಗಳನ್ನು ಕೂಡ ಸನ್ನದ್ಧವಾಗಿ ಇಡಲಾಗಿದೆ. ಇಸ್ರೇಲ್ ಮತ್ತು ಕತಾರ್‌ನಂತಹ ಮಿತ್ರ ರಾಷ್ಟ್ರಗಳಲ್ಲಿ ‘ಥಾಡ್’ (THAAD) ಮತ್ತು ‘ಪೇಟ್ರಿಯಾಟ್’ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಗಳನ್ನು ನಿಯೋಜಿಸಲಾಗಿದೆ.

ಇರಾನ್‌ನಲ್ಲಿ ಆರ್ಥಿಕ ಬಿಕ್ಕಟ್ಟಿನ ವಿರುದ್ಧ ನಡೆಯುತ್ತಿರುವ ಪ್ರತಿಭಟನೆಯಲ್ಲಿ ಸಾವಿರಾರು ನಾಗರಿಕರು ಹತರಾಗಿದ್ದಾರೆ. ಟ್ರಂಪ್ ಅವರು ಪ್ರತಿಭಟನಾಕಾರರ ಹತ್ಯೆಯನ್ನು ಖಂಡಿಸಿದ್ದು, ಸೇನಾ ಕ್ರಮದ ಎಚ್ಚರಿಕೆ ನೀಡಿದ್ದಾರೆ.

 2025ರ ಜೂನ್‌ನಲ್ಲಿ ಅಮೆರಿಕ ನಡೆಸಿದ ದಾಳಿಯ ನಂತರ ಇರಾನ್‌ನ ಫೋರ್ಡೋ ಪರಮಾಣು ಘಟಕದಿಂದ ಸುಮಾರು 400 ಕೆಜಿ ಪುಷ್ಟೀಕರಿಸಿದ ಯುರೇನಿಯಂ ನಾಪತ್ತೆಯಾಗಿದೆ. ಇದು 10 ಪರಮಾಣು ಬಾಂಬ್‌ಗಳನ್ನು ತಯಾರಿಸಲು ಸಾಕಾಗುತ್ತದೆ ಎಂಬುದು ಅಮೆರಿಕದ ಆತಂಕ.

ಇರಾನ್ ಪ್ರತಿಕ್ರಿಯೆ

ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ಅವರು ಅಮೆರಿಕ ಮತ್ತು ಇಸ್ರೇಲ್ ವಿರುದ್ಧ ಕಿಡಿಕಾರಿದ್ದಾರೆ. “ನಮ್ಮ ಬೆರಳು ಟ್ರಿಗ್ಗರ್ ಮೇಲಿದೆ” ಎಂದು ಎಚ್ಚರಿಸಿರುವ ಇರಾನ್, ಅಮೆರಿಕವು ಇರಾನ್‌ನಲ್ಲಿ ಅಶಾಂತಿ ಮೂಡಿಸಲು ಸಂಚು ರೂಪಿಸುತ್ತಿದೆ ಎಂದು ಆರೋಪಿಸಿದೆ.

ಸೇನಾ ವಿಶ್ಲೇಷಕರ ಪ್ರಕಾರ, ಅಮೆರಿಕ ನೇರ ಯುದ್ಧಕ್ಕಿಂತ ಹೆಚ್ಚಾಗಿ ಹಂತಹಂತವಾಗಿ ಒತ್ತಡ ಹೇರಬಹುದು. ಮೊದಲ ಹಂತದಲ್ಲಿ ಎಚ್ಚರಿಕೆ ನೀಡುವ ಉದ್ದೇಶದಿಂದ ಸೀಮಿತ ದಾಳಿಗಳು ನಡೆಯಬಹುದು. ಎರಡನೇ ಹಂತದಲ್ಲಿ ಇರಾನ್‌ನ ಕ್ಷಿಪಣಿ ಮತ್ತು ಡ್ರೋನ್ ನೆಲೆಗಳ ಧ್ವಂಸಕ್ಕೆ ಅಮೆರಿಕ ಮುಂದಾಗಬಹುದು.

ನಂತರದ ಹಂತದಲ್ಲಿ ಪರಮಾಣು ಘಟಕಗಳ ಮೇಲೆ ನೇರ ದಾಳಿ (ಆದರೆ ಇದು ಇರಾನ್‌ನ ತೀವ್ರ ಪ್ರತಿಕ್ರಿಯೆಗೆ ಕಾರಣವಾಗಬಹುದು) ಮಾಡಬಹುದು ಎಂದು ವಿಶ್ಲೇಷಕರು ಊಹಿಸಿದ್ದಾರೆ.

ಇರಾನ್ ಬಳಿ ಇರುವ ಆಯ್ಕೆಗಳೇನು?

ನೇರ ಯುದ್ಧಕ್ಕೆ ಇಳಿಯುವ ಬದಲು ಇರಾನ್ ತನ್ನ ‘ಪ್ರಾಕ್ಸಿ’ ಗುಂಪುಗಳಾದ (ಹಿಜ್ಬುಲ್ಲಾ, ಹೌತಿಗಳು) ಮೂಲಕ ಅಮೆರಿಕದ ನೆಲೆಗಳ ಮೇಲೆ ದಾಳಿ ಮಾಡಬಹುದು. ಅಲ್ಲದೆ, ಜಾಗತಿಕ ತೈಲ ಮಾರುಕಟ್ಟೆಯ ಪ್ರಮುಖ ಮಾರ್ಗವಾದ ಹಾರ್ಮುಜ್ ಜಲಸಂಧಿಯನ್ನು (Strait of Hormuz) ಅಸ್ತವ್ಯಸ್ತಗೊಳಿಸುವ ಮೂಲಕ ಜಾಗತಿಕ ಆರ್ಥಿಕತೆಗೆ ಪೆಟ್ಟು ನೀಡುವ ಸಾಮರ್ಥ್ಯವನ್ನು ಇರಾನ್ ಹೊಂದಿದೆ.