ವಾಷಿಂಗ್ಟನ್: ಅಮೆರಿಕದ ರಕ್ಷಣಾ ಇಲಾಖೆ (ಪೆಂಟಗನ್) ಗುರುತಿಸಲಾಗದ ಹಾರುವ ವಸ್ತುಗಳು (UFO) ಅಥವಾ ಅಧಿಕೃತವಾಗಿ ʼಗುರುತಿಸಲಾಗದʼ ಅಸಾಮಾನ್ಯ ವೈಮಾನಿಕ ವಿದ್ಯಮಾನಗಳಿಗೆ(Unidentified Anomalous Phenomena – UAP) ಸಂಬಂಧಿಸಿದ 40 ಹೊಸ ದಾಖಲೆಗಳನ್ನು ಸಾರ್ವಜನಿಕರಿಗೆ ಶುಕ್ರವಾರ ಬಿಡುಗಡೆ ಮಾಡಿದೆ.
ಈ ದಾಖಲೆಗಳಲ್ಲಿ, 28 ವರ್ಷಗಳ ಕಾಲ ವಾಯುಪಡೆ ಹಾಗೂ ನೌಕಾಪಡೆಯಲ್ಲಿ ಸೇವೆ ಸಲ್ಲಿಸಿರುವ ಮಿಲಿಟರಿ ಪೈಲಟ್ ಒಬ್ಬರು, ತನ್ನ ಸೇವಾ ಜೀವನದಲ್ಲಿ ಇಂತಹ ಹಾರುವ ವಸ್ತುವನ್ನು ಎಂದಿಗೂ ನೋಡಿರಲಿಲ್ಲ ಎಂದು ಹೇಳಿರುವ ವರದಿಯೂ ಸೇರಿದೆ ಎಂದು ಸಿಬಿಎಸ್ ನ್ಯೂಸ್ ವರದಿ ಮಾಡಿದೆ.
ಬಿಡುಗಡೆಯಾದ 40 ಕಡತಗಳಲ್ಲಿ 14 ಲಿಖಿತ ದಾಖಲೆಗಳು, 19 ವಿಡಿಯೊಗಳು, ನಾಲ್ಕು ಆಡಿಯೊ ಕಡತಗಳು ಹಾಗೂ ಮೂರು ಚಿತ್ರಗಳಿವೆ. ಪೆಂಟಗನ್, ನಾಸಾ, ಸಿಐಎ, ಎಫ್ಬಿಐ ಮತ್ತು ಅಮೆರಿಕದ ಇಂಧನ ಇಲಾಖೆ ಸೇರಿದಂತೆ ಹಲವು ಸರ್ಕಾರಿ ಸಂಸ್ಥೆಗಳು ಈ ಮಾಹಿತಿಯನ್ನು ಒದಗಿಸಿವೆ. ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈ ವರ್ಷದ ಆರಂಭದಲ್ಲಿ ಸಹಿ ಹಾಕಿದ ಕಾರ್ಯಕಾರಿ ಆದೇಶದ ಅನ್ವಯ ಈ ದಾಖಲೆಗಳನ್ನು ಪೆಂಟಗನ್ ತನ್ನ ಯುಎಫ್ಒ ವೆಬ್ಸೈಟ್ನಲ್ಲಿ ಪ್ರಕಟಿಸಿದೆ.
ಬಿಡುಗಡೆಯಾದ ದಾಖಲೆಗಳಲ್ಲಿ ಸುಮಾರು ಅರ್ಧದಷ್ಟು 2010ರ ನಂತರದ ಅವಧಿಗೆ ಸೇರಿವೆ. ಪಶ್ಚಿಮ ಪೆಸಿಫಿಕ್ ಮಹಾಸಾಗರ, ಅಟ್ಲಾಂಟಿಕ್ ಮಹಾಸಾಗರ ಹಾಗೂ ಮಧ್ಯಪ್ರಾಚ್ಯ ಸೇರಿದಂತೆ ವಿವಿಧ ಪ್ರದೇಶಗಳಲ್ಲಿ ಮಿಲಿಟರಿ ಕ್ಯಾಮೆರಾಗಳು ಸೆರೆಹಿಡಿದ ಇನ್ಫ್ರಾರೆಡ್ ದೃಶ್ಯಾವಳಿಗಳೂ ಇದರಲ್ಲಿ ಸೇರಿವೆ.
28 ವರ್ಷಗಳ ಸೇವೆಯಲ್ಲೂ ಕಂಡಿರದ ವಿಚಿತ್ರ ವಸ್ತು
ಈ ಬಿಡುಗಡೆಯ ಪ್ರಮುಖ ದಾಖಲೆಗಳಲ್ಲಿ 2019ರಲ್ಲಿ ಅಮೆರಿಕದ ಪೂರ್ವ ಭಾಗದ ಆಕಾಶದಲ್ಲಿ ನಡೆದ ಘಟನೆಯೊಂದರ ಡೀಬ್ರಿಫಿಂಗ್ ವರದಿಯೂ ಸೇರಿದೆ. ನಾಲ್ವರು ಸಿಬ್ಬಂದಿಯೊಂದಿಗೆ ಹಾರಾಟ ನಡೆಸುತ್ತಿದ್ದ ವೇಳೆ, ತಮ್ಮ 28 ವರ್ಷಗಳ ವಾಯುಪಡೆ ಹಾಗೂ ನೌಕಾಪಡೆಯ ಸೇವೆಯಲ್ಲಿ ಎಂದಿಗೂ ಕಂಡಿರದ ರೀತಿಯ ಹಾರಾಟದ ಲಕ್ಷಣಗಳನ್ನು ಹೊಂದಿದ್ದ ಒಂದು ನಿಗೂಢ ವಸ್ತುವನ್ನು ಗಮನಿಸಿದ್ದಾಗಿ ಮಿಲಿಟರಿ ಪೈಲಟ್ ತಿಳಿಸಿದ್ದಾರೆ.
ವರದಿಯ ಪ್ರಕಾರ, ವಿಮಾನದ ಕೆಳಭಾಗದಲ್ಲಿ ಅತಿ ವೇಗದಲ್ಲಿ ನೇರವಾಗಿ ಚಲಿಸುತ್ತಿದ್ದ ಸಣ್ಣ ಗಾತ್ರದ ವಸ್ತುವನ್ನು ಸುಮಾರು 10ರಿಂದ 15 ಸೆಕೆಂಡುಗಳ ಕಾಲ ಅವರು ಗಮನಿಸಿ ಅದರ ವಿಡಿಯೊವನ್ನು ದಾಖಲಿಸಿದರು. ಹೆಚ್ಚಿನ ಸ್ಪಷ್ಟತೆಗಾಗಿ ಕ್ಯಾಮೆರಾದ ಜೂಮ್ ಹೆಚ್ಚಿಸಿದಾಗ, ವಸ್ತುವಿನ ವೇಗ ಎಷ್ಟೇ ಹೆಚ್ಚಿತ್ತೆಂದರೆ ಅದು ಕ್ಷಣಾರ್ಧದಲ್ಲೇ ಕ್ಯಾಮೆರಾದ ದೃಶ್ಯ ವ್ಯಾಪ್ತಿಯಿಂದ ಹೊರಹೋಯಿತು. ಬಳಿಕ ಜೂಮ್ ಕಡಿಮೆ ಮಾಡಿದರೂ ಅದನ್ನು ಮತ್ತೆ ಪತ್ತೆಹಚ್ಚಲು ಸಾಧ್ಯವಾಗಲಿಲ್ಲ. ನಂತರ ವಿಡಿಯೊವನ್ನು ಪರಿಶೀಲಿಸಿದಾಗ, ಆ ವಸ್ತು ಆಯತಾಕಾರದ (Rectangular) ಆಕಾರದಲ್ಲಿರುವಂತೆ ಕಂಡುಬಂದಿತು. ವಿಮಾನದಲ್ಲಿದ್ದ ಇತರ ಅನುಭವಿ ಸಿಬ್ಬಂದಿಗೂ ಅದು ಏನಾಗಿರಬಹುದು ಎಂಬುದನ್ನು ಗುರುತಿಸಲು ಸಾಧ್ಯವಾಗಲಿಲ್ಲ ಎಂದು ಅವರು ಹೇಳಿದ್ದಾರೆ. ಬಿಡುಗಡೆಯಾದ ವಿಡಿಯೊದಲ್ಲೂ ಅತಿ ವೇಗದಲ್ಲಿ ಚಲಿಸುತ್ತಿರುವ ನಿಗೂಢ ವಸ್ತು ಕಾಣಿಸುತ್ತದೆ.
ಅಣ್ವಸ್ತ್ರ ಕೇಂದ್ರದ ವಾಯುಪ್ರದೇಶಕ್ಕೆ ನಿಗೂಢ ವಸ್ತುವಿನ ಪ್ರವೇಶ
ಅಮೆರಿಕದ ಇಂಧನ ಇಲಾಖೆ ಬಿಡುಗಡೆ ಮಾಡಿದ ಮತ್ತೊಂದು ಮಹತ್ವದ ದಾಖಲೆಯಲ್ಲಿ, 2015ರ ಸೆಪ್ಟೆಂಬರ್ನಲ್ಲಿ ಟೆಕ್ಸಾಸ್ನ ಅಮರಿಲ್ಲೊ ಸಮೀಪದ ಪ್ಯಾಂಟೆಕ್ಸ್ ಅಣ್ವಸ್ತ್ರ ಉತ್ಪಾದನಾ ಕೇಂದ್ರದ ವಾಯುಪ್ರದೇಶಕ್ಕೆ ಗುರುತಿಸಲಾಗದ ವಸ್ತುವೊಂದು ಪ್ರವೇಶಿಸಿದ ಘಟನೆ ಉಲ್ಲೇಖಿಸಲಾಗಿದೆ.
ವರದಿಯ ಪ್ರಕಾರ, ಘಟನೆ ನಡೆದ ತಕ್ಷಣ ಭದ್ರತಾ ಸಿಬ್ಬಂದಿ ಕೇಂದ್ರವನ್ನು ಲಾಕ್ಡೌನ್ಗೆ ಒಳಪಡಿಸಿದರು. ನಂತರ ದೂರದರ್ಶಕಗಳ (ಬೈನಾಕ್ಯುಲರ್) ಮೂಲಕ ಯಾವುದೇ ಶಬ್ದವಿಲ್ಲದೆ ಹಾಗೂ ಗೋಚರಿಸುವ ಚಾಲನಾ ವ್ಯವಸ್ಥೆಯಿಲ್ಲದೆ ಚಲಿಸುತ್ತಿದ್ದ ನಿಗೂಢ ವಸ್ತುವನ್ನು ಹಿಂಬಾಲಿಸಲು ಪ್ರಯತ್ನಿಸಿದರು ಎಂದು ಗ್ರೌಂಡ್ ನ್ಯೂಸ್ ವರದಿ ತಿಳಿಸಿದೆ.
ಚೀನಾ ಸಮೀಪದ ಇತ್ತೀಚಿನ ಘಟನೆಗಳು
ಈ ಬಾರಿ ಬಿಡುಗಡೆಯಾದ ದಾಖಲೆಗಳಲ್ಲಿ ಅತ್ಯಂತ ಇತ್ತೀಚಿನ ಘಟನೆಗಳು 2025ರಲ್ಲಿ ಚೀನಾ ಸಮೀಪದ ಪ್ರದೇಶಗಳಲ್ಲಿ ಅಮೆರಿಕದ ಇಂಡೋ-ಪೆಸಿಫಿಕ್ ಕಮಾಂಡ್ ವ್ಯಾಪ್ತಿಯಲ್ಲಿ ದಾಖಲಾಗಿವೆ.
ಒಂದು ವಿಡಿಯೊದಲ್ಲಿ ಹಳದಿ ಸಮುದ್ರದ ಮೇಲೆ ಆರು ತುದಿಗಳ ನಕ್ಷತ್ರದಂತೆ ಕಾಣುವ ವಿಚಿತ್ರ ಆಕಾರವನ್ನು ಮಿಲಿಟರಿ ಸಂವೇದಕ (ಸೆನ್ಸರ್) ಹಿಂಬಾಲಿಸುತ್ತಿರುವುದು ಗೋಚರಿಸುತ್ತದೆ. ಮತ್ತೊಂದು ವಿಡಿಯೊದಲ್ಲಿ ಪೂರ್ವ ಚೀನಾ ಸಮುದ್ರದ ಮೇಲೆ ಹಲವು ನಿಮಿಷಗಳ ಕಾಲ ಚಲಿಸುತ್ತಿದ್ದ ಗುರುತಿಸಲಾಗದ ವಸ್ತುವನ್ನು ಟ್ರ್ಯಾಕ್ ಮಾಡಿರುವ ದೃಶ್ಯಗಳಿವೆ.
ಇದರ ಜೊತೆಗೆ, 2023ರಲ್ಲಿ ಹಳದಿ ಸಮುದ್ರದ ಮೇಲೆ ಸೆರೆಹಿಡಿದ ಮತ್ತೊಂದು ವಿಡಿಯೊದಲ್ಲಿ, ಗುರುತಿಸಲಾಗದ ವಸ್ತುವೊಂದು ಎಲೆಕ್ಟ್ರೋ-ಆಪ್ಟಿಕಲ್ ಹಾಗೂ ಇನ್ಫ್ರಾರೆಡ್ ಸಂವೇದಕಗಳ ಕಾರ್ಯಾಚರಣೆಗೆ ಅಡ್ಡಿಪಡಿಸುತ್ತಿರುವಂತೆ ಕಾಣುತ್ತದೆ ಎಂದು ಇಂಟರೆಸ್ಟಿಂಗ್ ಎಂಜಿನಿಯರಿಂಗ್ ವರದಿ ಮಾಡಿದೆ.
ಈ ಹೊಸ ದಾಖಲೆಗಳ ಬಿಡುಗಡೆಯೊಂದಿಗೆ ಯುಎಫ್ಒ ಅಥವಾ ಯುಎಪಿ ಘಟನೆಗಳ ಕುರಿತು ಅಮೆರಿಕ ಸರ್ಕಾರ ನಡೆಸುತ್ತಿರುವ ತನಿಖೆ, ಮಾಹಿತಿ ಬಹಿರಂಗಪಡಿಸುವಿಕೆ ಹಾಗೂ ಪಾರದರ್ಶಕತೆ ಕುರಿತ ಚರ್ಚೆಗಳು ಮತ್ತೊಮ್ಮೆ ತೀವ್ರಗೊಂಡಿವೆ.
ನಿಮ್ಮ ಕಾಮೆಂಟ್ ಬರೆಯಿರಿ