ಜಂಟಿ ಸಮರಾಭ್ಯಾಸ: ಅಮೆರಿಕ ವಾಯುಪಡೆ ಭಾರತಕ್ಕೆ ಆಗಮನ

ಜೈಪುರ: ಪಾಕಿಸ್ತಾನ ಗಡಿಯಲ್ಲಿ ಹದಿನೈದು ದಿನಗಳ ಕಾಲ ನಡೆಯುವ ಇಂಡೋ-ಯುಎಸ್ ಜಂಟಿ ವಾಯುಪಡೆ ಕವಾಯತಿನಲ್ಲಿಪಾಲ್ಗೊಳ್ಳಲು ಅಮೆರಿಕದ ಸೈನಿಕರು ರಾಜಸ್ಥಾನವನ್ನು ತಲುಪಿದ್ದಾರೆ ಎಂದು ರಕ್ಷಣಾ ಅಧಿಕಾರಿಯೊಬ್ಬರು ಶನಿವಾರ ತಿಳಿಸಿದ್ದಾರೆ.
270 ಯುಎಸ್ ಸೈನಿಕರ ತಂಡವು ವಿಶೇಷ ವಿಮಾನದಲ್ಲಿ ಸೂರತ್‌ಗೆ ತಲುಪಿ ಮಹಾಜನ್ ಫೀಲ್ಡ್ ಫೈರಿಂಗ್ ಶ್ರೇಣಿಗೆ ತೆರಳಿದ್ದು, ಫೆಬ್ರವರಿಯಲ್ಲಿ ಜಂಟಿ ವಾಯುಪಡೆ ಕವಾಯತು ನಡೆಯಲಿದೆ ಎಂದು ರಕ್ಷಣಾ ವಕ್ತಾರ ಲೆಫ್ಟಿನೆಂಟ್ ಕರ್ನಲ್ ಅಮಿತಾಬ್ ಶರ್ಮಾ ಶನಿವಾರ ತಿಳಿಸಿದ್ದಾರೆ.
ಮಹಾಜನ್ ಫೀಲ್ಡ್ ಫೈರಿಂಗ್ ರೇಂಜ್‌ನಲ್ಲಿ ಮಿಲಿಟರಿ ವಿನಿಮಯ ಕಾರ್ಯಕ್ರಮದಡಿಯಲ್ಲಿ ಕವಾಯತು ಜರುಗುವುದು, ಇದು ಫೆಬ್ರವರಿ 21 ರವರೆಗೆ ಮುಂದುವರಿಯಲಿದೆ. ಈ ಕವಾಯತಿನಲ್ಲಿ ಭಾಗವಹಿಸುವ ಭಾರತೀಯ ಸೈನಿಕರು ಜಮ್ಮು ಮತ್ತು ಕಾಶ್ಮೀರ ರೈಫಲ್ಸ್‌ನ ಸಪ್ತ್ ಶಕ್ತಿ ಕಮಾಂಡ್‌ನ 11 ನೇ ಬೆಟಾಲಿಯನ್‌ಗೆ ಸೇರಿದವರು ಎಂದು ಲೆಫ್ಟಿನೆಂಟ್ ಕರ್ನಲ್ ಶರ್ಮಾ ಹೇಳಿದ್ದಾರೆ.
ಜಂಟಿ ಕವಾಯತು ಉಭಯ ದೇಶಗಳ ನಡುವೆ ಹೆಚ್ಚುತ್ತಿರುವ ಮಿಲಿಟರಿ ಸಹಕಾರದ ಮತ್ತೊಂದು ಹೆಜ್ಜೆಯಾಗಿದ್ದು, ಇದು ಇಂಡೋ-ಯುಎಸ್ ಸಂಬಂಧದಲ್ಲಿ ನಿರಂತರ ಬಲವರ್ಧನೆಯನ್ನು ತೋರಿಸುತ್ತದೆ ಎಂದು ಅವರು ತಿಳಿಸಿದ್ದಾರೆ.