ಪಣಜಿ: ಗೋವಾ ರಾಜ್ಯದಲ್ಲಿ ಮೂರನೇ ಅಲೆಯಲ್ಲಿ ಕೋವಿಡ್ ಸೋಂಕಿನಿಂದ ಮೃತಪಟ್ಟವರಲ್ಲಿ ಶೇ. 53 ಜನರು ಲಸಿಕೆ ಪಡೆದಿರಲಿಲ್ಲ ಎಂದು ಗೋವಾ ಆರೋಗ್ಯ ಇಲಾಖೆ ಹೇಳಿದೆ.
ಮೂರನೇ ಅಲೆಯಲ್ಲಿ ಈ ವರೆಗೆ 91 ಜನರು ಮೃತಪಟ್ಟಿದ್ದು, 49 ಜನರು ಲಸಿಕೆ ಪಡೆಯದವರಾಗಿದ್ದಾರೆ ಎಂದು ಹೇಳಿದೆ. ಎರಡನೇ ಅಲೆಯಲ್ಲಿ ಈ ಪ್ರಮಾಣ ಇನ್ನೂ ಹೆಚ್ಚಿತ್ತು. ಶೇ. 75 ಜನರು ಲಸಿಕೆ ಪಡೆಯದವರೇ ಮೃತಪಟ್ಟಿದ್ದಾರೆ. ಎರಡನೇ ಅಲೆಯಲ್ಲಿ ಗೋವಾ ರಾಜ್ಯದಲ್ಲಿ 2724 ಜನರು ಮರಣ ಹೊಂದಿದ್ದಾರೆ. ಅವರಲ್ಲಿ 2050 ಜನರು ಲಸಿಕೆಯನ್ನೇ ಪಡೆದಿರಲಿಲ್ಲ. ಮುಜುಗರ, ಹಿಂಜರಿಕೆ, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ ತಪ್ಪು ಮಾಹಿತಿಯೇ ಜನರು ಲಸಿಕೆ ಪಡೆಯದಿರಲು ಕಾರಣ ಎಂದು ಅಲ್ಲಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ಗೋವಾದಲ್ಲಿ ಜ. 27ರಂದು ಕೋವಿಡ್ ಸೋಂಕಿನಿಂದ 15 ಜನರು ಮೃತಪಟ್ಟಿದ್ದಾರೆ. ಇದು ಮೂರನೇ ಅಲೆಯಲ್ಲಿ ಕಂಡುಬಂದ ಅತಿಗರಿಷ್ಠ ಸಾವು. ಗೋವಾ ರಾಜ್ಯದಲ್ಲಿ ಎರಡನೇ ಅಲೆಯಲ್ಲಿ ಅಂದರೆ 2021 ಮಾರ್ಚ್ 1ರಿಂದ ಡಿಸೆಂಬರ್ 2021ರ ವರೆಗೆ 2724 ಜನರು ಸೋಂಕಿನಿಂದ ಮರಣ ಹೊಂದಿದ್ದಾರೆ. ಅವರಲ್ಲಿ 147 ಜನರು ಮೊದಲ ಡೋಸ್ ಪಡೆದಿದ್ದರು. 67 ಜನರು ಎರಡೂ ಡೋಸ್ ಪಡೆದಿದ್ದರು.
ಗೋವಾದಲ್ಲಿ ಈ ವರೆಗೆ ಶೇ. 98.67 ಜನರಿಗೆ ಕೋವಿಡ್ ಲಸಿಕೆ ಎರಡೂ ಡೋಸ್ ನೀಡಲಾಗಿದೆ. 15-18 ವಯಸ್ಸಿನವರಲ್ಲಿ ಶೇ. 80.32 ಯುವಕರಿಗೆ ಲಸಿಕೆ ನೀಡಲಾಗಿದೆ ಎಂದು ಆರೋಗ್ಯ ಇಲಾಖೆ ಹೇಳಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ