ಇತ್ತೀಚಿನ ಪ್ರಕರಣವೊಂದರಲ್ಲಿ ಪೂರ್ವ ಚೀನಾದಲ್ಲಿ ನಡೆದ ಘಟನೆಯೊಂದು ಹಲ್ಲು ತೆಗೆಯುವಾಗಿನ ಕಾರ್ಯವಿಧಾನದ ಸುರಕ್ಷತೆಯ ಬಗ್ಗೆ ಆತಂಕ ಮೂಡುವಂತೆ ಮಾಡಿದೆ.
ಸೌತ್ ಚೀನಾ ಮಾರ್ನಿಂಗ್ ಪೋಸ್ಟ್ ಪ್ರಕಾರ, ಹುವಾಂಗ್ ಎಂಬ ಅಡ್ಡಹೆಸರಿನ ವ್ಯಕ್ತಿ, ಆಗಸ್ಟ್ 14 ರಂದು ಝೆಜಿಯಾಂಗ್ ಪ್ರಾಂತ್ಯದ ಜಿನ್ಹುವಾದಲ್ಲಿರುವ ಯೋಂಗ್ಕಾಂಗ್ ಡೆವೇ ಡೆಂಟಲ್ ಆಸ್ಪತ್ರೆಯಲ್ಲಿ ವ್ಯಾಪಕವಾದ ಹಲ್ಲಿನ ಶಸ್ತ್ರಚಿಕಿತ್ಸೆಗೆ ಒಳಗಾಗದರು. “ಹಲ್ಲಿನ ತಕ್ಷಣ ಅಳವಡಿಕೆ” ವಿಧಾನವನ್ನು ಬಳಸಿಕೊಂಡು ಒಂದೇ ದಿನದಲ್ಲಿ 23 ಹಲ್ಲುಗಳನ್ನು ಕಿತ್ತು ಹಾಕುವುದು ಮತ್ತು 12 ಹಲ್ಲುಗಳನ್ನು ಹೊಸದಾಗಿ ಅಳವಡಿಸುವುದು ಈ ಕಾರ್ಯವಿಧಾನದಲ್ಲಿ ಒಳಗೊಂಡಿತ್ತು. ಎರಡು ವಾರಗಳ ನಂತರ, ವ್ಯಕ್ತಿ ಹಠಾತ್ ಹೃದಯಾಘಾತಕ್ಕೆ ಒಳಗಾದರು ಮತ್ತು ಆಗಸ್ಟ್ 28 ರಂದು ಅವರು ನಿಧನರಾದರು. ಸೆಪ್ಟೆಂಬರ್ 2 ರಂದು ಅವರ ಮಗಳು ಶು ಎಂಬವರು ಆನ್‌ಲೈನ್ ಪೋಸ್ಟ್ ಮೂಲಕ ಈ ಪ್ರಕರಣವನ್ನು ಬೆಳಕಿಗೆ ತಂದರು.
ನನ್ನ ತಂದೆ (ಅವರ ವಯಸ್ಸನ್ನು ಬಹಿರಂಗಪಡಿಸಲಾಗಿಲ್ಲ) ತೀವ್ರ ರಕ್ತಸ್ರಾವ ಹಾಗೂ ನೋವಿನಿಂದಾಗಿ ಮೃತಪಟ್ಟಿದ್ದಾರೆ ಎಂದು ಮೃತನ ಮಗಳು ಆರೋಪಿಸಿದ್ದಾಳೆ. ಮಗಳು ಶು, ”ನನ್ನ ತಂದೆ ಇಷ್ಟು ಬೇಗ ಮೃತಪಡುತ್ತಾರೆ ಎಂದು ನಾನು ಅಂದುಕೊಂಡಿರಲಿಲ್ಲ. ನಾವು ಖರೀದಿಸಿದ ಹೊಸ ಕಾರನ್ನು ಓಡಿಸುವ ಅವಕಾಶವೂ ಅವರಿಗೆ ಸಿಗಲಿಲ್ಲ,” ಎಂದು ಮಗಳು ಹೇಳಿದ್ದಾರೆ.
ಘಟನೆಗೆ ಪ್ರತಿಕ್ರಿಯೆಯಾಗಿ, ಯೋಂಗ್ಕಾಂಗ್ ಮುನ್ಸಿಪಲ್ ಹೆಲ್ತ್ ಬ್ಯೂರೋದ ಅಧಿಕಾರಿಯೊಬ್ಬರು ಸೆಪ್ಟೆಂಬರ್ 3 ರಂದು ಹಲ್ಲಿನ ಕಾರ್ಯವಿಧಾನ ಮತ್ತು ವ್ಯಕ್ತಿಯ ಸಾವಿನ ನಡುವಿನ 13 ದಿನಗಳ ಅಂತರವನ್ನು ಉಲ್ಲೇಖಿಸಿ ಈ ಸಾವಿನ ಕಾರಣದ ಬಗ್ಗೆ ಇನ್ನೂ ತನಿಖೆ ಮಾಡಲಾಗುತ್ತಿದೆ ಎಂದು ಹೇಳಿದ್ದಾರೆ.
ಮೂರು ದಿನಗಳ ನಂತರ, ಕ್ಲಿನಿಕ್ ಸಿಬ್ಬಂದಿಯೊಬ್ಬರು ”ಈ ವಿಷಯವನ್ನು ನಮ್ಮ ವಕೀಲರಿಗೆ ಹಸ್ತಾಂತರಿಸಿರುವುದರಿಂದ ನಾವು ಈಗ ಈ ಬಗ್ಗೆ ಪ್ರತಿಕ್ರಿಯಿಸುವುದಿಲ್ಲ. ಈ ವಿಷಯದಲ್ಲಿ ಯಾವುದೇ ನವೀಕರಣಗಳಿದ್ದರೆ, ನಾವು ಹೇಳಿಕೆಯನ್ನು ನೀಡುತ್ತೇವೆ; ಆದಾಗ್ಯೂ, ತನಿಖೆ ಮುಂದುವರಿದಿದೆ ಎಂದು ಸೌತ್ ಚೀನಾ ಮಾರ್ನಿಂಗ್ ಪೋಸ್ಟ್ ಗೆ ತಿಳಿಸಿದ್ದಾರೆ.
ವುಹಾನ್‌ನಲ್ಲಿರುವ ಹಾಸ್ಪಿಟಲ್ ಆಫ್ ಯೂನಿವರ್ಸಲ್ ಲವ್‌ನಲ್ಲಿರುವ ಡೆಂಟಲ್ ಮೆಡಿಸಿನ್ ಸೆಂಟರ್‌ನ ನಿರ್ದೇಶಕ ಕ್ಸಿಯಾಂಗ್ ಗುವೊಲಿನ್ ಪ್ರಕಾರ, ಒಂದೇ ಸಲಕ್ಕೆ ತೆಗೆಯಬಹುದಾದ ಗರಿಷ್ಠ ಸಂಖ್ಯೆಯ ಹಲ್ಲುಗಳಿಗೆ ಯಾವುದೇ ಸ್ಥಾಪಿತ ಅಧಿಕೃತ ಮಾರ್ಗಸೂಚಿಗಳಿಲ್ಲ. ಆದಾಗ್ಯೂ, ಸಾಮಾನ್ಯ ಅಭ್ಯಾಸದಲ್ಲಿ, ಹಲ್ಲುಗಳನ್ನು ತೆಗೆಯುವ ಮಿತಿಯನ್ನು ಸಾಮಾನ್ಯವಾಗಿ ಸುಮಾರು 10 ಹಲ್ಲುಗಳೆಂದು ಪರಿಗಣಿಸಲಾಗುತ್ತದೆ ಎಂದು ಹೇಳಿದ್ದಾರೆ.
”23 ಹಲ್ಲುಗಳನ್ನು ತೆಗೆಯುವುದು ತುಂಬಾ ಹೆಚ್ಚು. ಇದಕ್ಕೆ ಸಾಕಷ್ಟು ಅರ್ಹತೆಗಳು ಮತ್ತು ಅನುಭವದೊಂದಿಗೆ ಕ್ಲಿನಿಕ್ ಮತ್ತು ದಂತವೈದ್ಯರ ಅಗತ್ಯವಿದೆ. ಅಂತಹ ವ್ಯಾಪಕವಾದ ಕಾರ್ಯವಿಧಾನವನ್ನು ನಿಭಾಯಿಸಲು ರೋಗಿಯ ದೈಹಿಕ ಸಾಮರ್ಥ್ಯವನ್ನು ಪರಿಗಣಿಸುವುದು ಅತ್ಯಗತ್ಯ ಎಂದು ಅವರು ಹೇಳಿದ್ದಾರೆ.
ಅನೇಕ ಸಾಮಾಜಿಕ ಮಾಧ್ಯಮ ಬಳಕೆದಾರರು ಪ್ರಕರಣದ ಬಗ್ಗೆ ತಿಳಿದ ನಂತರ ಆಘಾತ ಮತ್ತು ಅಪನಂಬಿಕೆ ವ್ಯಕ್ತಪಡಿಸಿದ್ದಾರೆ. ಒಬ್ಬ ವ್ಯಕ್ತಿ ಒಂದೇ ದಿನದಲ್ಲಿ 23 ಹಲ್ಲುಗಳನ್ನು ತೆಗೆದುಹಾಕುವ ವೈದ್ಯರ ನಿರ್ಧಾರವನ್ನು ಪ್ರಶ್ನಿಸಿದರು, ಏಕಕಾಲದಲ್ಲಿ ಎರಡು ಹಲ್ಲುಗಳನ್ನು ತೆಗೆದುಹಾಕಲು ವಿನಂತಿಸಿದಾಗ ದಂತವೈದ್ಯರು ನಿರಾಕರಿಸಿದ ತಮ್ಮ ಸ್ವಂತ ಅನುಭವವನ್ನು ಹಂಚಿಕೊಂಡಿದ್ದಾರೆ.
”ನಾನು ದಂತವೈದ್ಯ, ಮತ್ತು ಅವುಗಳು ತುಂಬ ಸಡಿಲವಾಗಿರದ ಹೊರತು ನಾನು ಒಂದೇ ಬಾರಿಗೆ ಮೂರಕ್ಕಿಂತ ಹೆಚ್ಚು ಹಲ್ಲುಗಳನ್ನು ತೆಗೆಯುವುದಿಲ್ಲ ವೈದ್ಯನಿಗೆ ಬುದ್ಧಿ ತಪ್ಪಿರಬೇಕು. ಇದು ಹಲ್ಲಿನ ಪ್ರಕ್ರಿಯೆಗಿಂತ ಮಾನವ ಪ್ರಯೋಗದಂತೆ ತೋರುತ್ತದೆ ಎಂದು ಇನ್ನೊಬ್ಬ ಬಳಕೆದಾರರು ಬರೆದಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ