ನವದೆಹಲಿ: ಮೈಕ್ರೋಸಾಫ್ಟ್ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (CEO) ಸತ್ಯ ನಾದೆಲ್ಲಾ ಅವರು ಬುಧವಾರ ಸಂಜೆ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರನ್ನು ಭೇಟಿ ಮಾಡಿದ್ದು, ಕೃತಕ ಬುದ್ಧಿಮತ್ತೆ (Artificial Intelligence – AI) ಸಾಮರ್ಥ್ಯಗಳನ್ನು ಅಭಿವೃದ್ಧಿಪಡಿಸಲು $17.5 ಬಿಲಿಯನ್ (ಸುಮಾರು ₹1.5 ಲಕ್ಷ ಕೋಟಿ) ಮೊತ್ತವನ್ನು ಹೂಡಿಕೆ ಮಾಡುವುದಾಗಿ ಬದ್ಧತೆ ನೀಡಿದ್ದಾರೆ. ಇದು ಅಮೆರಿಕ ಮೂಲದ ಈ ಸಾಫ್ಟ್ವೇರ್ ದೈತ್ಯ ಕಂಪನಿಯು ಏಷ್ಯಾ ಖಂಡದಲ್ಲಿ ಮಾಡುತ್ತಿರುವ ಅತಿದೊಡ್ಡ ಹೂಡಿಕೆಯಾಗಿದೆ.
ಭಾರತದ ಎಐ ಅವಕಾಶಗಳ ಕುರಿತು ಪ್ರಧಾನಿ ಮೋದಿ ಅವರೊಂದಿಗಿನ ಮಾತುಕತೆ ಸ್ಪೂರ್ತಿದಾಯಕವಾಗಿತ್ತು ಎಂದು ಸತ್ಯ ನಾದೆಲ್ಲಾ ಅವರು ಭೇಟಿಯ ನಂತರ ತಿಳಿಸಿದ್ದಾರೆ.
ಸತ್ಯ ನಾದೆಲ್ಲಾ ಹೇಳಿದ್ದೇನು?:
“ಭಾರತದ ಆಶಯಗಳನ್ನು ಬೆಂಬಲಿಸಲು, ಮೈಕ್ರೋಸಾಫ್ಟ್ ಕಂಪನಿಯು $17.5 ಬಿಲಿಯನ್ ಹೂಡಿಕೆ ಮಾಡಲು ಬದ್ಧವಾಗಿದೆ. ಎಐ-ಭವಿಷ್ಯಕ್ಕಾಗಿ ಭಾರತಕ್ಕೆ ಅಗತ್ಯವಿರುವ ಮೂಲಸೌಕರ್ಯ, ಕೌಶಲ್ಯ ಮತ್ತು ಸಾಮರ್ಥ್ಯಗಳನ್ನು ಹೆಚ್ಚಿಸಲು ನೆರವಾಗಲು ಏಷ್ಯಾದಲ್ಲಿ ನಮ್ಮ ಅತ್ಯಂತ ದೊಡ್ಡ ಹೂಡಿಕೆ ಇದಾಗಿದೆ” ಎಂದು ಸತ್ಯ ನಾದೆಲ್ಲಾ ಅವರು ಹೇಳಿದ್ದಾರೆ.
“ಎಐ ವಿಚಾರಕ್ಕೆ ಬಂದಾಗ, ಇಡೀ ವಿಶ್ವವೇ ಭಾರತದ ಬಗ್ಗೆ ಆಶಾವಾದಿಯಾಗಿದೆ!” ಎಂದು ಪ್ರಧಾನಿ ನರೇಂದ್ರ ಮೋದಿ ಪ್ರತಿಕ್ರಿಯಿಸಿದ್ದಾರೆ. “ಸತ್ಯ ನಾದೆಲ್ಲಾ ಅವರ ಜೊತೆ ಅತ್ಯಂತ ಫಲಪ್ರದ ಚರ್ಚೆ ನಡೆಸಲಾಯಿತು. ಏಷ್ಯಾದಲ್ಲೇ ಮೈಕ್ರೋಸಾಫ್ಟ್ ತನ್ನ ಅತಿದೊಡ್ಡ ಹೂಡಿಕೆಯನ್ನು ಭಾರತದಲ್ಲಿ ಮಾಡುತ್ತಿರುವುದನ್ನು ನೋಡಲು ಸಂತೋಷವಾಗಿದೆ. ಭಾರತದ ಯುವಕರು ಈ ಅವಕಾಶವನ್ನು ಸದ್ಬಳಕೆ ಮಾಡಿಕೊಂಡು ಉತ್ತಮ ಜಗತ್ತಿಗಾಗಿ ಎಐ ಶಕ್ತಿಯನ್ನು ಅನ್ವೇಷಿಸಿ, ಹೊಸತನವನ್ನು ತರಲಿದ್ದಾರೆ” ಎಂದು ಅವರು ತಿಳಿಸಿದ್ದಾರೆ.
ಹೂಡಿಕೆಯ ವಿವರಗಳು
ಎರಡೂ ನಾಯಕರ ಭೇಟಿಯ ನಂತರ ಬಿಡುಗಡೆ ಮಾಡಿದ ಪತ್ರಿಕಾ ಹೇಳಿಕೆಯಲ್ಲಿ, ಮೈಕ್ರೋಸಾಫ್ಟ್ ಕಂಪನಿಯು ಈ ಹಿಂದೆ ಘೋಷಿಸಿದ್ದ $3 ಬಿಲಿಯನ್ ಹೂಡಿಕೆ (ಮುಂದಿನ ಎರಡು ವರ್ಷಗಳಲ್ಲಿ ಬೆಂಗಳೂರಿನಲ್ಲಿ ಕ್ಲೌಡ್ ಮತ್ತು ಎಐ ಮೂಲಸೌಕರ್ಯ ಸ್ಥಾಪನೆ, ಕೌಶಲ್ಯಾಭಿವೃದ್ಧಿ ಮತ್ತು ಹೊಸ ದತ್ತಾಂಶ ಕೇಂದ್ರಗಳು)ಗೆ ಹೆಚ್ಚುವರಿಯಾಗಿ ಈ $17.5 ಬಿಲಿಯನ್ ಹೂಡಿಕೆ ಮಾಡುವುದಾಗಿ ತಿಳಿಸಿದೆ. ಈ ಮೂಲಕ ಭಾರತದಲ್ಲಿ ಕಂಪನಿಯು “ಅತಿದೊಡ್ಡ ಹೂಡಿಕೆ ಮಾಡಲಿದೆ.
ಕಂಪನಿಯ ಹೇಳಿಕೆಯ ಪ್ರಕಾರ: “ಭಾರತವು ತನ್ನ ಎಐ ಪಯಣದಲ್ಲಿ ನಿರ್ಣಾಯಕ ಹಂತದಲ್ಲಿದೆ. ಇದು ಪರಿಣಾಮವನ್ನು ದೊಡ್ಡ ಪ್ರಮಾಣದಲ್ಲಿ ಉಂಟುಮಾಡುವ ಮತ್ತು ಮುನ್ನಡೆಸಲು ದೃಢಸಂಕಲ್ಪ ಹೊಂದಿರುವ ದೇಶ. ದೇಶವು ಮುಂಚೂಣಿ ಎಐ ರಾಷ್ಟ್ರವಾಗಿ ಹೊರಹೊಮ್ಮುತ್ತಿದೆ. ಈ ಹಿನ್ನೆಲೆಯಲ್ಲಿ, ನಾವು ಇಂದು ಏಷ್ಯಾದಲ್ಲಿ ನಮ್ಮ ಅತಿದೊಡ್ಡ ಹೂಡಿಕೆಯಾಗಿ ನಾಲ್ಕು ವರ್ಷಗಳ ಅವಧಿಯಲ್ಲಿ $17.5 ಬಿಲಿಯನ್ – ಅನ್ನು ಘೋಷಿಸುತ್ತಿದ್ದೇವೆ…” ಎಂದು ತಿಳಿಸಿದೆ.
ನಾಲ್ಕು ವರ್ಷಗಳ ಅವಧಿಯಲ್ಲಿ ಮೈಕ್ರೋಸಾಫ್ಟ್ನ ಸುಮಾರು $20 ಬಿಲಿಯನ್ ಹೂಡಿಕೆಯು ಡಿಜಿಟಲ್ ಮೂಲಸೌಕರ್ಯ ನಿರ್ಮಿಸಲು ಪೈಪೋಟಿ ನಡೆಸುತ್ತಿರುವ ಜಾಗತಿಕ ಸಾಫ್ಟ್ವೇರ್ ದೈತ್ಯ ಸಂಸ್ಥೆಗಳಿಗೆ ಭಾರತವು ಒಂದು ಪ್ರಮುಖ ಮಾರುಕಟ್ಟೆಯಾಗಿದೆ ಎಂಬುದನ್ನು ಒತ್ತಿಹೇಳುತ್ತದೆ.
ಇತರ ಟೆಕ್ ದಿಗ್ಗಜರ ಹೂಡಿಕೆ
ಕಳೆದ ಅಕ್ಟೋಬರ್ನಲ್ಲಿ ಗೂಗಲ್ನ ಮುಖ್ಯಸ್ಥ ಸುಂದರ ಪಿಚೈ ಅವರು ಸಹ ಪ್ರಧಾನಿ ಮೋದಿ ಅವರ ಜೊತೆ ಮಾತನಾಡಿದ್ದರು. ಆಂಧ್ರಪ್ರದೇಶದ ವಿಶಾಖಪಟ್ಟಣಂನಲ್ಲಿ ಕೃತಕ ಬುದ್ಧಿಮತ್ತೆ ಕೇಂದ್ರ (AI Hub) ಸ್ಥಾಪಿಸುವ ಯೋಜನೆಯನ್ನು ಅವರು ಹಂಚಿಕೊಂಡಿದ್ದರು. ಇದು ದೇಶದಲ್ಲಿ ಗೂಗಲ್ ಮಾಡುತ್ತಿರುವ ಅತಿ ದೊಡ್ಡ ಹೂಡಿಕೆಯಾಗಿದೆ. ಗೂಗಲ್ ಸಂಸ್ಥೆಯು ಅದಾನಿ ಸಮೂಹದೊಂದಿಗೆ ಪಾಲುದಾರಿಕೆ ಮಾಡಿಕೊಂಡು ವಿಶಾಖಪಟ್ಟಣಂನಲ್ಲಿ ದತ್ತಾಂಶ ಕೇಂದ್ರ ಮತ್ತು ಎಐ ನೆಲೆಯನ್ನು ಸ್ಥಾಪಿಸುತ್ತಿದ್ದು, ಇದು ಅಮೆರಿಕದ ಹೊರಗಿನ ಅದರ ಅತಿದೊಡ್ಡ ಕೇಂದ್ರವಾಗಿದೆ. ಗೂಗಲ್ ಮುಂದಿನ ಐದು ವರ್ಷಗಳಲ್ಲಿ $15 ಬಿಲಿಯನ್ ಹೂಡಿಕೆ ಮಾಡುವ ಯೋಜನೆಯನ್ನು ಹೊಂದಿದೆ.
ಅಮೆಜಾನ್ ಸಹ ಭಾರತದಲ್ಲಿ ದತ್ತಾಂಶ ಕೇಂದ್ರಗಳನ್ನು ನಿರ್ಮಿಸಲು ಶತಕೋಟಿ ಡಾಲರ್ಗಳನ್ನು ಹೂಡಿಕೆ ಮಾಡಿದೆ. ಇದೇ ಅಕ್ಟೋಬರ್ನಲ್ಲಿ ಪ್ರಧಾನಿ ಮೋದಿ ಚಿಪ್ ತಯಾರಿಕಾ ಕಂಪನಿ ಕ್ವಾಲ್ಕಾಮ್ನ ಸಿಇಒ ಕ್ರಿಸ್ಟಿಯಾನೊ ಆರ್. ಅಮೋನ್ ಅವರನ್ನು ಭೇಟಿ ಮಾಡಿ, ಎಐ, ಹೊಸ ಆವಿಷ್ಕಾರ ಮತ್ತು ಕೌಶಲ್ಯಾಭಿವೃದ್ಧಿಯಲ್ಲಿ ಭಾರತದ ಪ್ರಗತಿಯ ಬಗ್ಗೆ ಚರ್ಚಿಸಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ