ರಿಯಾದ್: ಸೌದಿ ಅರೇಬಿಯಾದ ಉತ್ತರ ಭಾಗದ ತಬೂಕ್ ಪ್ರಾಂತ್ಯದ ಪರ್ವತ ಶ್ರೇಣಿಗಳಲ್ಲಿ ಅನಿರೀಕ್ಷಿತ ಹಿಮಪಾತವಾಗಿದ್ದು, ಮರಳುಗಾಡಿನ ಭೂಪ್ರದೇಶವು ಸಂಪೂರ್ಣವಾಗಿ ಬಿಳಿ ಬಣ್ಣಕ್ಕೆ ತಿರುಗಿದೆ. ಈ ಅಪರೂಪದ ಹವಾಮಾನ ಬದಲಾವಣೆಯು ಜಗತ್ತಿನ ಗಮನ ಸೆಳೆದಿದೆ.
ಸಮುದ್ರ ಮಟ್ಟದಿಂದ ಸುಮಾರು 2,600 ಮೀಟರ್ ಎತ್ತರದಲ್ಲಿರುವ ‘ಜೆಬೆಲ್ ಅಲ್-ಲಾವ್ಜ್’ (Jebel Al-Lawz) ಪರ್ವತ ಶ್ರೇಣಿಯ ಟ್ರೋಜೇನಾ ಎಂಬ ತಾಣವು ಸಂಪೂರ್ಣವಾಗಿ ಹಿಮದಿಂದ ಆವೃತವಾಗಿದೆ. ಇದರೊಂದಿಗೆ ಹಗುರವಾದ ಮಳೆಯೂ ದಾಖಲಾಗಿದೆ. ಬಿರ್ ಬಿನ್ ಹರ್ಮಾಸ್, ಅಲ್-ಅಯಿನಾ, ಅಮ್ಮಾರ್, ಅಲ್-ಉಲಾ ಗವರ್ನರೇಟ್, ಶಕ್ರಾ ಮತ್ತು ಅದರ ಉಪನಗರಗಳಲ್ಲಿ ಹಗುರದಿಂದ ಮಧ್ಯಮ ಮಳೆ ದಾಖಲಾಗಿದೆ, ಆದರೆ ರಿಯಾದ್, ಖಾಸಿಮ್ ಮತ್ತು ಪೂರ್ವ ಪ್ರದೇಶದ ಕೆಲವು ಭಾಗಗಳಲ್ಲಿ ಮಧ್ಯಮದಿಂದ ಭಾರೀ ಮಳೆಯಾಗಿದೆ
ಹೈಲ್ ಪ್ರಾಂತ್ಯದಲ್ಲೂ ಹಿಮಪಾತವಾಗಿದೆ. ಹೈಲ್ ನಗರದ ಸುತ್ತಮುತ್ತಲ ಪ್ರದೇಶಗಳಲ್ಲೂ ಹಿಮಪಾತವಾಗಿದ್ದು, ಮಧ್ಯಪ್ರಾಚ್ಯದಂತಹ ಬಿಸಿಲು ಹಾಗೂ ಮರಳುಗಾಡಿನ ರಾಷ್ಟ್ರದಲ್ಲಿ ಇದು ಅತ್ಯಂತ ಅಪರೂಪದ ವಿದ್ಯಮಾನವಾಗಿದೆ.
ಮೈನಸ್ ಡಿಗ್ರಿ ತಾಪಮಾನ ಮುಂಜಾನೆಯ ಅವಧಿಯಲ್ಲಿ ತಾಪಮಾನವು 0°C ಗಿಂತ ಕೆಳಕ್ಕೆ ಇಳಿದಿದ್ದು, ಎತ್ತರದ ಪ್ರದೇಶಗಳಲ್ಲಿ ಹಿಮ ಶೇಖರಣೆಯಾಗಲು ಪೂರಕ ವಾತಾವರಣ ನಿರ್ಮಾಣವಾಗಿತ್ತು.
ಸೌದಿಯ ಹಿಮದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ, ಇದನ್ನು ನೋಡಲು ಅಲ್-ಮಜ್ಮಾ ಮತ್ತು ಅಲ್-ಘಾಟ್ ಪ್ರದೇಶಗಳಲ್ಲಿ ಜನಸಾಗರವೇ ಹರಿದುಬಂದಿದೆ. ಪ್ರತಿಕೂಲ ಹವಾಮಾನದ ಮುನ್ನೆಚ್ಚರಿಕೆಯಾಗಿ, ಕಳೆದ ವಾರ ರಾಜಧಾನಿ ರಿಯಾದ್ನಲ್ಲಿ ಶಾಲೆಗಳಿಗೆ ರಜೆ ಘೋಷಿಸಿ ಆನ್ಲೈನ್ ತರಗತಿಗಳಿಗೆ ಸೂಚಿಸಲಾಗಿತ್ತು.ವಿಶೇಷವಾಗಿ ಹಿಮದ ಮೇಲೆ ಒಂಟೆಗಳು ನಡೆಯುತ್ತಿರುವ ಫೋಟೋಗಳು ಜಾಗತಿಕವಾಗಿ ವೈರಲ್ ಆಗಿವೆ.
ಹವಾಮಾನ ವೈಪರೀತ್ಯಕ್ಕೆ ಕಾರಣವೇನು?
ಸೌದಿ ಅರೇಬಿಯಾದ ರಾಷ್ಟ್ರೀಯ ಹವಾಮಾನ ಕೇಂದ್ರದ (NCM) ಪ್ರಕಾರ, ಉತ್ತರ ಮತ್ತು ಕೇಂದ್ರ ಭಾಗಗಳಿಂದ ಬೀಸುತ್ತಿರುವ ತೀವ್ರ ಶೀತ ಗಾಳಿಯು ಮಳೆ ಹೊತ್ತ ಮೋಡಗಳೊಂದಿಗೆ ಬೆರೆತಿದ್ದರಿಂದ ಈ ಹಿಮಪಾತ ಸಂಭವಿಸಿದೆ. ಹವಾಮಾನ ತಜ್ಞರ ಪ್ರಕಾರ, ಬಿಸಿಲು ಮತ್ತು ಬರಗಾಲಕ್ಕೆ ಹೆಸರಾದ ಈ ಪ್ರದೇಶದಲ್ಲಿ ಇಂತಹ ಬದಲಾವಣೆಗಳು ಕಂಡುಬರುತ್ತಿರುವುದು ಹವಾಮಾನ ಬದಲಾವಣೆಯ (Climate Change) ಗಂಭೀರ ಪರಿಣಾಮವಾಗಿದೆ.
“ತೀವ್ರ ಶೀತ ಗಾಳಿಯು ಮಳೆ ಮೋಡಗಳೊಂದಿಗೆ ಸಂಯೋಜನೆಗೊಂಡಿದ್ದರಿಂದ ಈ ಪರಿಸ್ಥಿತಿ ನಿರ್ಮಾಣವಾಗಿದೆ. ಮುಂದಿನ ದಿನಗಳಲ್ಲೂ ತಾಪಮಾನ ಇಳಿಕೆಯಾಗುವ ಸಾಧ್ಯತೆಯಿದೆ,” ಎಂದು ಹವಾಮಾನ ಕೇಂದ್ರದ ವಕ್ತಾರ ಹುಸೇನ್ ಅಲ್-ಕಹ್ತಾನಿ ತಿಳಿಸಿದ್ದಾರೆ.
ಜಾಗತಿಕ ಹವಾಮಾನ ಬದಲಾವಣೆಯ ಮುನ್ಸೂಚನೆ
ಕೇವಲ ಸೌದಿ ಅರೇಬಿಯಾ ಮಾತ್ರವಲ್ಲದೆ, ಇತ್ತೀಚಿನ ದಿನಗಳಲ್ಲಿ ಯುಎಇನಲ್ಲಿ ಅನಿರೀಕ್ಷಿತ ಮಳೆ, ದಕ್ಷಿಣ ಏಷ್ಯಾದಲ್ಲಿ ದಾಖಲೆ ಮಟ್ಟದ ಶಾಖದ ಅಲೆ, ಮತ್ತು ಯುರೋಪ್-ಆಫ್ರಿಕಾದ ಭಾಗಗಳಲ್ಲಿ ಕಂಡುಬರುತ್ತಿರುವ ವಿಲಕ್ಷಣ ಹಿಮಪಾತವು ಜಾಗತಿಕ ಹವಾಮಾನವು ಗುರುತಿಸಲಾಗದಷ್ಟು ಬದಲಾಗುತ್ತಿರುವುದಕ್ಕೆ ಸಾಕ್ಷಿಯಾಗಿದೆ.
ಮಳೆ ಮತ್ತು ಹಿಮಪಾತದ ಹಿನ್ನೆಲೆಯಲ್ಲಿ ವಾಹನ ಸವಾರರು ಜಾಗರೂಕತೆಯಿಂದ ಚಾಲನೆ ಮಾಡಲು ಮತ್ತು ಪ್ರವಾಹ ಪೀಡಿತ ಕಣಿವೆ ಪ್ರದೇಶಗಳಿಂದ ದೂರವಿರಲು ಅಧಿಕಾರಿಗಳು ಜನರಲ್ಲಿ ವಿನಂತಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ