ಸುರಕ್ಷಿತ ಮತ್ತು ವಿವೇಚನಾಯುಕ್ತ ಪರಿವರ್ತನೆ ನಡೆಯುವವರೆಗೆ ಅಮೆರಿಕವು ವೆನೆಜುವೆಲಾವನ್ನು ಮುನ್ನಡೆಸಲಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶನಿವಾರ ಹೇಳಿದ್ದಾರೆ.
ಮಿಲಿಟರಿ ಕಾರ್ಯಾಚರಣೆಯಲ್ಲಿ ಅಮೆರಿಕದ ಪಡೆಗಳು ವೆನೆಜುವೆಲಾದ ಅಧ್ಯಕ್ಷ ನಿಕೋಲಸ್ ಮಡುರೊ ಅವರನ್ನು ಸೆರೆಹಿಡಿದ ನಂತರ ಅವರ ಚಿತ್ರವನ್ನು ಅಮೆರಿಕ ಅಧ್ಯಕ್ಷರು ಹಂಚಿಕೊಂಡ ಬಳಿಕ ಈ ಹೇಳಿಕೆ ಬಂದಿದೆ. ಚಿತ್ರದಲ್ಲಿ ವೆನೆಜುವೆಲಾದ ಅಧ್ಯಕ್ಷರಿಗೆ ಕೈಕೋಳ ಹಾಕಿರುವುದು ಹಾಗೂ ಅವರು ಕಣ್ಣುಮುಚ್ಚಿಕೊಂಡಿರುವುದು, ಹೆಡ್ಫೋನ್ಗಳನ್ನು ಧರಿಸಿರುವುದನ್ನು ತೋರಿಸಲಾಗಿದೆ.
ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಟ್ರಂಪ್, “ನಾವು ಸುರಕ್ಷಿತ, ಸರಿಯಾದ ಮತ್ತು ವಿವೇಚನಾಯುಕ್ತ ಪರಿವರ್ತನೆಯನ್ನು ಕೈಗೊಳ್ಳುವವರೆಗೆ ನಾವು ವೆನೆಜುವೆಲಾವನ್ನು ನಡೆಸುತ್ತೇವೆ” ಎಂದು ಹೇಳಿದರು.
ಟ್ರಂಪ್ ಇದಕ್ಕೆ ಯಾವುದೇ ಟೈಮ್ಲೈನ್, ಯಾವುದೇ ವಿವರವಾದ ಕಾನೂನು ಚೌಕಟ್ಟು ಮತ್ತು ಅಂತಹ ಅಭೂತಪೂರ್ವ ವ್ಯವಸ್ಥೆಯನ್ನು ಅಮೆರಿಕ ಅಥವಾ ಅಂತಾರಾಷ್ಟ್ರೀಯ ಕಾನೂನಿನ ಅಡಿಯಲ್ಲಿ ಹೇಗೆ ನಿಯಂತ್ರಿಸಲಾಗುತ್ತದೆ ಎಂಬುದರ ಕುರಿತು ಯಾವುದೇ ವಿವರಣೆಯನ್ನು ಹಂಚಿಕೊಂಡಿಲ್ಲ.
ಇದಕ್ಕೂ ಮೊದಲು ಅಧ್ಯಕ್ಷ ಟ್ರಂಪ್ ಅವರು ಮಡುರೊ ಮತ್ತು ಅವರ ಪತ್ನಿ ಸಿಲಿಯಾ ಫ್ಲೋರ್ಸ್ ಅವರ ಸೆರೆಹಿಡಿಯುವಿಕೆಯ ನೇರಪ್ರಸಾರ ವೀಕ್ಷಿಸಿದ್ದಾಗಿ ಹೇಳಿದ್ದರು. ವೆನೆಜುವೆಲಾದ ಮೇಲೆ “ದೊಡ್ಡ ಪ್ರಮಾಣದ” ದಾಳಿ ನಡೆದ ನಂತರ, ಟ್ರಂಪ್ ಆ ಕ್ಷಣವನ್ನು “ದೂರದರ್ಶನ ಕಾರ್ಯಕ್ರಮದಂತೆ” ಬಣ್ಣಿಸಿದರು.
ಟ್ರಂಪ್ ವಾರಗಳ ಕಾಲ ವೆನೆಜುವೆಲಾದಲ್ಲಿ ಡ್ರಗ್ ಕಾರ್ಟೆಲ್ಗಳ ಮೇಲೆ ದಾಳಿ ನಡೆಸುವ ಬಗ್ಗೆ ಎಚ್ಚರಿಕೆ ನೀಡಿದ್ದರು. ಅಮೆರಿಕದ ಅತ್ಯಂತ ಮುಂದುವರಿದ ವಿಮಾನವಾಹಕ ನೌಕೆ ಯುಎಸ್ಎಸ್ ಜೆರಾಲ್ಡ್ ಆರ್. ಫೋರ್ಡ್ ಮತ್ತು ಇತರ ಯುದ್ಧನೌಕೆಗಳನ್ನು ಒಳಗೊಂಡಂತೆ ಕೆರಿಬಿಯನ್ನಲ್ಲಿ ಅವರು ಸೈನ್ಯವನ್ನು ನಿಯೋಜಿಸಿದ್ದರು. ವೆನೆಜುವೆಲಾದ ಅಧ್ಯಕ್ಷ ನಿಕೋಲಸ್ ಮಡುರೊ ಡ್ರಗ್ ಕಾರ್ಟೆಲ್ನ ಮುಖ್ಯಸ್ಥರಾಗಿದ್ದಾರೆ ಎಂದು ಟ್ರಂಪ್ ಆರೋಪಿಸಿದ್ದಾರೆ. ಮಡುರೊ ರಾಜೀನಾಮೆ ನೀಡುವುದು “ಜಾಣತನ” ಎಂದು ಅವರು ಇತ್ತೀಚೆಗೆ ಹೇಳಿದ್ದರು ಮತ್ತು ವೆನೆಜುವೆಲಾದ ನಾಯಕನಿಗೆ ಅವರ “ದಿನಗಳು ಎಣಿಕೆಯಾಗುತ್ತಿವೆ” ಎಂದು ಎಚ್ಚರಿಸಿದರು.
ಆದರೆ, ಮಾದಕವಸ್ತು ವ್ಯಾಪಾರದಲ್ಲಿ ಯಾವುದೇ ಪಾಲ್ಗೊಳ್ಳುವಿಕೆಯನ್ನು ಮಡುರೊ ನಿರಾಕರಿಸಿದ್ದಾರೆ, ವೆನೆಜುವೆಲಾವು ಭೂಮಿಯ ಮೇಲೆ ತಿಳಿದಿರುವ ಅತಿದೊಡ್ಡ ತೈಲ ನಿಕ್ಷೇಪಗಳನ್ನು ಹೊಂದಿರುವುದರಿಂದ ಅಮೆರಿಕವು ತಮ್ಮನ್ನು ಪದಚ್ಯುತಗೊಳಿಸಲು ಪ್ರಯತ್ನಿಸುತ್ತಿದೆ ಎಂದು ಹೇಳಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ