ಇಂದೋರ್ : ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವನ್ನು ಬಳಸಿಕೊಂಡು ಧ್ವನಿಯನ್ನು ಅನುಕರಿಸಿ (Voice Cloning) ಹಣ ದೋಚುವ ಹೊಸ ಮಾದರಿಯ ಸೈಬರ್ ವಂಚನೆಗೆ ಇಂದೋರ್ನ ಶಾಲಾ ಶಿಕ್ಷಕಿಯೊಬ್ಬರು ಬಲಿಯಾಗಿದ್ದಾರೆ. ಇದು ಮಧ್ಯಪ್ರದೇಶದ ಮೊದಲ ಎಐ ಆಧಾರಿತ ಧ್ವನಿ ಬದಲಾವಣೆ (Voice-modulation) ವಂಚನೆ ಎಂದು ಪೊಲೀಸರು ಶಂಕಿಸಿದ್ದಾರೆ.
ಇಂದೋರ್ ನಿವಾಸಿ ಸ್ಮಿತಾ ಎಂಬ ಶಾಲಾ ಶಿಕ್ಷಕಿಗೆ ಜನವರಿ 6ರ ರಾತ್ರಿ ಅಪರಿಚಿತ ಸಂಖ್ಯೆಯಿಂದ ಕರೆ ಬಂದಿತ್ತು. ಆ ಧ್ವನಿ ಅವರ ಸೋದರ ಸಂಬಂಧಿಯ ಧ್ವನಿಯನ್ನೇ ಹೋಲುತ್ತಿತ್ತು. ಉತ್ತರ ಪ್ರದೇಶದ ತುರ್ತು ಪೊಲೀಸ್ ಸೇವೆಯಲ್ಲಿ ಕೆಲಸ ಮಾಡುವ ತನ್ನ ಸೋದರ ಸಂಬಂಧಿಯೇ ಮಾತನಾಡುತ್ತಿದ್ದಾನೆ ಎಂದು ಸ್ಮಿತಾ ನಂಬಿದ್ದಾರೆ. ಆಗ ಅವರಿಗೆ ಕರೆ ಮಾಡಿದಾತ, “ಗೆಳೆಯನಿಗೆ ಹೃದಯಾಘಾತವಾಗಿದ್ದು, ತುರ್ತು ಶಸ್ತ್ರಚಿಕಿತ್ಸೆಗೆ ಹಣದ ಅವಶ್ಯಕತೆಯಿದೆ” ಎಂದು ಗಾಬರಿಯಿಂದ ಹೇಳಿದ್ದಾನೆ.
ಸಂಬಂಧಿಕನ ಧ್ವನಿ, ಮಾತನಾಡುವ ಶೈಲಿ ಮತ್ತು ತುರ್ತು ಪರಿಸ್ಥಿತಿಯನ್ನು ವಿವರಿಸಿದ ರೀತಿಯನ್ನು ನಂಬಿದ ಸ್ಮಿತಾ, ಆತ ಕಳುಹಿಸಿದ ಕ್ಯೂಆರ್ (QR) ಕೋಡ್ ಬಳಸಿ ನಾಲ್ಕು ಕಂತುಗಳಲ್ಲಿ ಒಟ್ಟು 97,500 ರೂಪಾಯಿಗಳನ್ನು ವರ್ಗಾಯಿಸಿದ್ದಾರೆ. ಹಣ ಕಳುಹಿಸಿದ ನಂತರ ಆ ಸಂಖ್ಯೆಗೆ ಮರಳಿ ಕರೆ ಮಾಡಿದಾಗ ಅದು ಬ್ಲಾಕ್ ಆಗಿತ್ತು. ಮರುದಿನ ತನ್ನ ಸೋದರಸಂಬಂಧಿಗೆ ಕರೆ ಮಾಡಿ ವಿಚಾರಿಸಿದಾಗ ತಾನು ಕರೆ ಮಾಡಿಲ್ಲ ಎಂದು ಆತ ತಿಳಿಸಿದ್ದಾನೆ. ಇದರಿಂದ ತಾನು ವಂಚನೆಗೆ ಒಳಗಾಗಿರುವುದು ಶಿಕ್ಷಕಿಗೆ ಅರಿವಾಗಿದೆ.
ಎಐ ತಂತ್ರಜ್ಞಾನದ ಕೈಚಳಕ
ಈ ಬಗ್ಗೆ ಲಾಸುಡಿಯಾ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಹೆಚ್ಚುವರಿ ಪೊಲೀಸ್ ಉಪ ಆಯುಕ್ತ (ಅಪರಾಧ) ರಾಜೇಶ ದಂಡೋಟಿಯಾ ಮಾತನಾಡಿ, “ಸಂತ್ರಸ್ತೆಗೆ ಬಂದ ಕರೆ ಅವರ ಸಂಬಂಧಿಯ ಧ್ವನಿಯನ್ನೇ ಹೋಲುತ್ತಿತ್ತು. ಇದು ಎಐ ಆಧಾರಿತ ‘ವಾಯ್ಸ್ ಮಾಡ್ಯುಲೇಷನ್’ ತಂತ್ರಜ್ಞಾನವನ್ನು ಬಳಸಿ ನಡೆಸಿದ ವಂಚನೆ ಎಂಬುದನ್ನು ಸ್ಪಷ್ಟವಾಗಿ ಸೂಚಿಸುತ್ತದೆ” ಎಂದು ತಿಳಿಸಿದ್ದಾರೆ.
ಮಧ್ಯಪ್ರದೇಶದಲ್ಲಿ ಸೈಬರ್ ಅಪರಾಧಗಳು ಹೆಚ್ಚಾಗುತ್ತಿದ್ದರೂ, ಕಳೆದುಹೋದ ಹಣದ ಮರುಪಡೆಯುವಿಕೆ ದರವು ಅತ್ಯಂತ ಕಡಿಮೆಯಿದೆ.
2021 ರಿಂದ 2025ರ ಅವಧಿಯಲ್ಲಿ ಸಾರ್ವಜನಿಕರು ಒಟ್ಟು 1,054 ಕೋಟಿ ರೂ.ಗಳನ್ನು ಸೈಬರ್ ವಂಚಕರಿಂದ ಕಳೆದುಕೊಂಡಿದ್ದಾರೆ. ಕಳೆದುಹೋದ ಹಣದಲ್ಲಿ ಕೇವಲ 1.94 ಕೋಟಿ ರೂಪಾಯಿಗಳು ಮಾತ್ರ ಸಂತ್ರಸ್ತರಿಗೆ ಮರಳಿದೆ.
ಒಟ್ಟು ಸೈಬರ್ ಅಪರಾಧಗಳಲ್ಲಿ ಫೇಸ್ಬುಕ್, ಇನ್ಸ್ಟಾಗ್ರಾಮ್ ಮತ್ತು ವ್ಯಾಟ್ಸಾಪ್ ಮೂಲಕ ನಡೆಯುವ ವಂಚನೆಗಳೇ ಶೇ. 37 ರಿಂದ 53 ರಷ್ಟಿವೆ.
ನಿಮ್ಮ ಆಪ್ತರು ಅಥವಾ ಸಂಬಂಧಿಕರ ಧ್ವನಿಯಲ್ಲಿ ಕರೆ ಮಾಡಿ ತುರ್ತಾಗಿ ಹಣ ಕೇಳಿದರೆ, ತಕ್ಷಣ ಹಣ ಕಳುಹಿಸಬೇಡಿ. ಮೊದಲು ಅವರ ಅಧಿಕೃತ ಸಂಖ್ಯೆಗೆ ಕರೆ ಮಾಡಿ ಮಾಹಿತಿ ಖಚಿತಪಡಿಸಿಕೊಳ್ಳಿ ಎಂದು ಸಾರ್ವಜನಿಕರಿಗೆ ಎಚ್ಚರಿಕೆ ನೀಡಲಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ