ವೀಡಿಯೊ | ಹಿಮಪಾತದಲ್ಲಿ ಮಾಲೀಕ ಸಾವು ; ಮಾರಣಾಂತಿಕ ಹಿಮದ ಮಧ್ಯೆ 4 ದಿನ ಕಾವಲು ಕಾಯ್ದ ಪಿಟ್‌ಬುಲ್ ನಾಯಿ..!

ಚಂಬಾ : ಹಿಮಾಚಲ ಪ್ರದೇಶದ ಚಂಬಾ ಜಿಲ್ಲೆಯ ಭರ್ಮೋರ್‌ನಲ್ಲಿ ನಡೆದ ಘಟನೆಯೊಂದು ಪ್ರಾಣಿಗಳ ನಿಷ್ಠೆ ಸಾವನ್ನೂ ಮೀರಿ ನಿಲ್ಲಬಲ್ಲದು ಎಂಬುದಕ್ಕೆ ಸಾಕ್ಷಿಯಾಗಿದೆ. ತನ್ನ ಯಜಮಾನ ಹಿಮದ ಅಡಿಯಲ್ಲಿ ಹೆಪ್ಪುಗಟ್ಟಿ ಹೋಗಿದ್ದರೂ, ನಾಲ್ಕು ದಿನಗಳ ಕಾಲ ಮೈಕೊರೆಯುವ ಚಳಿಯಲ್ಲಿ ಆ ದೇಹಕ್ಕೆ ಕಾವಲು ನಿಂತಿದ್ದ ಶ್ವಾನವೊಂದರ ಕಥೆ ಈಗ ಇಡೀ ದೇಶದ ಜನರ ಮನ ಕಲಕುತ್ತಿದೆ.
ಯುವಕರಾದ ವಿಕ್ಷಿತ್ ರಾಣಾ ಮತ್ತು ಪಿಯೂಷ್, ಹಿಮದ ಸೌಂದರ್ಯವನ್ನು ಸೆರೆಹಿಡಿಯಲು ಭರಮಣಿ ದೇವಾಲಯದ ಸಮೀಪ ಹೋಗಿದ್ದರು. ಆದರೆ ಪ್ರಕೃತಿಯ ವಿಕೋಪಕ್ಕೆ ಸಿಲುಕಿ ಇಬ್ಬರೂ ನಾಪತ್ತೆಯಾಗಿದ್ದರು. ಭಾರೀ ಹಿಮಪಾತ ಮತ್ತು ಪ್ರಾಣಾಂತಿಕ ಚಳಿಯ ನಡುವೆ ಸಿಲುಕಿದ ಇವರು ಕೊನೆಯುಸಿರೆಳೆದಿದ್ದರು. ಇಡೀ ಜಗತ್ತಿಗೆ ಅವರು ಕೇವಲ ‘ನಾಪತ್ತೆಯಾದವರು’ ಆಗಿದ್ದರೆ ಅವರ ಜೊತೆ ಹೋದ ಆ ಶ್ವಾನಕ್ಕೆ ಮಾತ್ರ ಅವರು ಜಗತ್ತೇ ಆಗಿದ್ದರು.

ಹಸಿವು ಮರೆತ ನಿಷ್ಠೆ, ಒಡೆಯನ ಕಾವಲು…
ನಾಲ್ಕು ದಿನಗಳ ನಂತರ ರಕ್ಷಣಾ ತಂಡಗಳು ಮತ್ತು ಸ್ಥಳೀಯ ಗ್ರಾಮಸ್ಥರು ಅಂತಿಮವಾಗಿ ಸ್ಥಳಕ್ಕೆ ತಲುಪಿದಾಗ, ಅವರು ಕಂಡ ದೃಶ್ಯವು ಎಲ್ಲರನ್ನೂ ಭಾವುಕರನ್ನಾಗಿ ಮಾಡಿತು. ಪಿಯೂಷ್ ದೇಹವು ಹಿಮದ ಪದರಗಳ ಅಡಿಯಲ್ಲಿ ಹೂತುಹೋಗಿತ್ತು, ಆದರೆ ಅವರ ಪಕ್ಕದಲ್ಲಿಯೇ ಅವರ ಸಾಕು ನಾಯಿ ಕುಳಿತಿತ್ತು. ಅದು ಅಬ್ಬರಿಸುತ್ತಿದ್ದ ಮಾರಣಾಂತಿಕ ಹಿಮಮಾರುತಕ್ಕೆ ಎದೆಯೊಡ್ಡಿ ಕುಳಿತಿತ್ತು. ನಾಲ್ಕು ದಿನಗಳಲ್ಲಿ ಆ ಶ್ವಾನ ಒಂದು ತುತ್ತು ಅನ್ನವನ್ನೂ ತಿಂದಿರಲಿಲ್ಲ, ಹನಿ ನೀರನ್ನೂ ಕುಡಿದಿರಲಿಲ್ಲ. ಭಾರೀ ಹಿಮಪಾತ ಮತ್ತು ಕೊರೆಯುವ ಚಳಿಯ ಹೊರತಾಗಿಯೂ ಆ ದಟ್ಟ ಕಾಡಿನಂತಿರುವ ಪ್ರದೇಶದಲ್ಲಿ ಕಾಡುಪ್ರಾಣಿಗಳ ಭಯವಿತ್ತು. ಆದರೆ ತನ್ನ ಯಜಮಾನನ ದೇಹಕ್ಕೆ ಕಿಂಚಿತ್ತೂ ಹಾನಿಯಾಗದಂತೆ ಅದು ಕಣ್ಣಲ್ಲಿ ಎಣ್ಣೆ ಬಿಟ್ಟುಕೊಂಡು ಕಾವಲು ಕಾಯುತ್ತಿತ್ತು.

‘ನನ್ನ ಯಜಮಾನನನ್ನು ಕರೆದೊಯ್ಯಬೇಡಿ’
ರಕ್ಷಣಾ ತಂಡದವರು ಪಿಯೂಷ್ ಅವರ ಮೃತದೇಹವನ್ನು ಎತ್ತಲು ಬಂದಾಗ, ಶ್ವಾನವು ಮೊದಲು ಅವರನ್ನು ಮೃತದೇಹದ ಹತ್ತಿರ ಹೋಗಲು ಬಿಡಲಿಲ್ಲ. ಆಕ್ರೋಶದಿಂದ ಗುರುಗುಟ್ಟುತ್ತಾ ಅವರನ್ನು ತಡೆಯಲು ಪ್ರಯತ್ನಿಸಿತು. ಬಹುಶಃ “ನನ್ನ ಯಜಮಾನ ಮಲಗಿದ್ದಾನೆ, ಅವನಿಗೆ ತೊಂದರೆ ಕೊಡಬೇಡಿ” ಅಥವಾ “ಇವರು ಯಜಮಾನನನ್ನು ಎಲ್ಲಿಗೆ ಒಯ್ಯುತ್ತಿದ್ದಾರೆ?” ಎಂಬ ಆತಂಕ ಅದರದ್ದಾಗಿತ್ತು. ಕೊನೆಗೆ ರಕ್ಷಣಾ ಸಿಬ್ಬಂದಿ ಪ್ರೀತಿಯಿಂದ ಅದನ್ನು ಸಮಾಧಾನಪಡಿಸಿ, ಅವರೆಲ್ಲ ಸಹಾಯಕ್ಕಾಗಿ ಬಂದವರು ಎಂದು ಮನವರಿಕೆ ಮಾಡಿಕೊಟ್ಟ ನಂತರವಷ್ಟೇ ಆ ಮೂಕಜೀವ ಅವರಿಗೆ ದಾರಿ ಬಿಟ್ಟಿತು.
ಮನುಷ್ಯರ ಸಂಬಂಧಗಳಲ್ಲಿ ಸ್ವಾರ್ಥವಿರಬಹುದು, ಆದರೆ ಪ್ರಾಣಿಗಳ ಪ್ರೀತಿಯಲ್ಲಿ ಸಾವನ್ನೂ ಮೀರಿದ ಭಾವವಿದೆ. ತನ್ನ ಯಜಮಾನ ಇನ್ನು ಬರುವುದಿಲ್ಲ ಎಂದು ಗೊತ್ತಿದ್ದರೂ, ಆತನ ದೇಹದ ಪ್ರೀತಿಯ ವಾಸನೆಯೇ ಸಾಕೆಂಬಂತೆ ಕುಳಿತಿದ್ದ ಆ ಶ್ವಾನವು ಪ್ರೀತಿ ಎಂದರೆ ಏನು ಎಂಬುದನ್ನು ಇಡೀ ಜಗತ್ತಿಗೆ ಮೌನವಾಗಿಯೇ ಕಲಿಸಿಕೊಟ್ಟಿದೆ. ಈ ಹೃದಯಸ್ಪರ್ಶಿ ಕಥೆಯು ಅನೇಕರ ಕಣ್ಣಲ್ಲಿ ನೀರು ತರಿಸಿದೆ, ಪ್ರಾಣಿಗಳು ಸಾವನ್ನು ಸಹ ಮೀರಿದ ನಿಷ್ಠೆ ಮತ್ತು ಪ್ರೀತಿಯನ್ನು ತೋರಿಸಬಲ್ಲವು ಎಂಬ ಪ್ರಬಲ ಜ್ಞಾಪನೆಯಾಗಿ ಕಾರ್ಯನಿರ್ವಹಿಸುತ್ತದೆ.