ಪಾಕಿಸ್ತಾನದ ಆರ್ಥಿಕ ಪರಿಸ್ಥಿತಿ ಎಷ್ಟು ಹದಗೆಟ್ಟಿದೆ ಎಂದರೆ, ವಿದೇಶಗಳಲ್ಲಿ ಹಣಕ್ಕಾಗಿ ಕೈಚಾಚಲು ನಮಗೆ ನಾಚಿಕೆಯಾಗುತ್ತಿದೆ ಎಂದು ಪಾಕ್ ಪ್ರಧಾನಿ ಶೆಹಬಾಜ್ ಷರೀಫ್ ಬಹಿರಂಗವಾಗಿ ಒಪ್ಪಿಕೊಂಡಿದ್ದಾರೆ.
ಶುಕ್ರವಾರ ರಾತ್ರಿ ಇಸ್ಲಾಮಾಬಾದ್ನಲ್ಲಿ ನಡೆದ ಪ್ರಮುಖ ರಫ್ತುದಾರರ ಸಭೆಯಲ್ಲಿ ಮಾತನಾಡಿದ ಅವರು, ದೇಶದ ಹದಗೆಟ್ಟ ಆರ್ಥಿಕತೆಯನ್ನು ನಿಭಾಯಿಸಲು ತಾನು ಮತ್ತು ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಅಸಿಮ್ ಮುನೀರ್ ಅವರು ವಿದೇಶಗಳಿಗೆ ಅಲೆದಾಡಬೇಕಾದ ಅನಿವಾರ್ಯತೆ ಬಗ್ಗೆ ವಿವರಿಸಿದ್ದಾರೆ.
ಸಾಲದ ಸುಳಿಯಲ್ಲಿ ಪಾಕಿಸ್ತಾನ
ಪಾಕಿಸ್ತಾನದ ವಿದೇಶಿ ವಿನಿಮಯ ಮೀಸಲು ನಿಧಿ ದುಪ್ಪಟ್ಟಾಗಿದೆಯಾದರೂ, ಅದು ಸ್ವಂತ ದುಡಿಮೆಯಲ್ಲ ಬದಲಾಗಿ ಮಿತ್ರ ರಾಷ್ಟ್ರಗಳಿಂದ ಪಡೆದ ಸಾಲವಾಗಿದೆ ಎಂದು ಷರೀಫ್ ಹೇಳಿದರು. “ಸಾಲ ಪಡೆಯಲು ಹೋದವನ ತಲೆ ಯಾವಾಗಲೂ ಬಾಗಿರುತ್ತದೆ” ಎಂದು ಅವರು ಬೇಸರ ವ್ಯಕ್ತಪಡಿಸಿದರು.
ಆತ್ಮಗೌರವಕ್ಕೆ ಧಕ್ಕೆ
“ಹಣಕ್ಕಾಗಿ ವಿಶ್ವದಾದ್ಯಂತ ಭಿಕ್ಷೆ ಬೇಡಲು ಹೋದಾಗ ನನಗೂ ಮತ್ತು ಸೇನಾ ಮುಖ್ಯಸ್ಥರಿಗೂ ಮುಜುಗರವಾಗುತ್ತದೆ. ಸಾಲ ಪಡೆಯುವುದು ನಮ್ಮ ಆತ್ಮಗೌರವದ ಮೇಲೆ ದೊಡ್ಡ ಹೊರೆಯಾಗಿದೆ. ನಮಗೆ ಇಷ್ಟವಿಲ್ಲದಿದ್ದರೂ ಸಾಲ ನೀಡುವವರ ಅನೇಕ ಷರತ್ತುಗಳಿಗೆ ನಾವು ಒಪ್ಪಲೇಬೇಕಾಗುತ್ತದೆ,” ಎಂದು ಅವರು ಅಸಹಾಯಕತೆ ವ್ಯಕ್ತಪಡಿಸಿದರು.
ಚೀನಾ, ಸೌದಿ ಅರೇಬಿಯಾ, ಯುಎಇ ಮತ್ತು ಕತಾರ್ ಪಾಕಿಸ್ತಾನಕ್ಕೆ ಆರ್ಥಿಕ ನೆರವು ನೀಡಿವೆ. ಚೀನಾ ಬಿಲಿಯನ್ ಗಟ್ಟಲೆ ಹಣವನ್ನು ಹೂಡಿಕೆ ಮಾಡಿದ್ದರೆ, ಸೌದಿ ಅರೇಬಿಯಾ ಮತ್ತು ಯುಎಇ ಕೂಡ ಸಾಲದ ರೂಪದಲ್ಲಿ ಹಣ ನೀಡಿ ದೇಶದ ಆರ್ಥಿಕತೆ ಕುಸಿಯದಂತೆ ನೋಡಿಕೊಂಡಿವೆ.
ದೇಶದೊಳಗಿನ ಭೀಕರ ಪರಿಸ್ಥಿತಿ
ಹೊರಗಿನಿಂದ ಹಣ ಬರುತ್ತಿದ್ದರೂ ಪಾಕಿಸ್ತಾನದ ಒಳಗಿನ ಸ್ಥಿತಿ ಸುಧಾರಿಸಿಲ್ಲ. ಶೇ. 45ರಷ್ಟು ಜನಸಂಖ್ಯೆ ಬಡತನದಲ್ಲಿದ್ದು, ಶೇ. 16.5ರಷ್ಟು ಜನರು ಅತ್ಯಂತ ಕಡುಬಡತನದಲ್ಲಿದ್ದಾರೆ. ಸರಿಸುಮಾರು 80 ಲಕ್ಷಕ್ಕೂ ಹೆಚ್ಚು ಜನರಿಗೆ ಉದ್ಯೋಗವಿಲ್ಲ. ದೇಶದ ಒಟ್ಟು ಸಾಲ 76,000 ಶತಕೋಟಿ ರೂಪಾಯಿಗಳನ್ನು ಮೀರಿದೆ.
ಹೊಸ ಆವಿಷ್ಕಾರಗಳ ಕೊರತೆ ಮತ್ತು ಆರ್ಥಿಕ ಸ್ಥಗಿತವು ಪಾಕಿಸ್ತಾನವನ್ನು ಅಂತಾರಾಷ್ಟ್ರೀಯ ಹಣಕಾಸು ನಿಧಿ (IMF) ಮೇಲೆ ಅವಲಂಬಿತವಾಗುವಂತೆ ಮಾಡಿದೆ ಎಂದು ಷರೀಫ್ ಅಸಮಾಧಾನ ವ್ಯಕ್ತಪಡಿಸಿದರು.
ನಿಮ್ಮ ಕಾಮೆಂಟ್ ಬರೆಯಿರಿ