ನವದೆಹಲಿ : ಪೂರ್ವ ಲಡಾಖ್ನ ಗಲ್ವಾನ್ನಲ್ಲಿ ಭಾರತ ಮತ್ತು ಚೀನಾ ಸೈನಿಕರ ನಡುವೆ ನಡೆದ ಭೀಕರ ಸಂಘರ್ಷದ ಕೇವಲ ಒಂದು ವಾರದ ನಂತರ, ಅಂದರೆ ಜೂನ್ 22, 2020 ರಂದು ಚೀನಾ ರಹಸ್ಯವಾಗಿ ಪರಮಾಣು ಸ್ಫೋಟಕ ಪರೀಕ್ಷೆಯನ್ನು ನಡೆಸಿದೆ ಎಂದು ಅಮೆರಿಕದ ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ಅಮೆರಿಕದ ಸ್ಟೇಟ್ ಅಂಡರ್ ಸೆಕ್ರೆಟರಿ ಥಾಮಸ್ ಜಿ. ಡಿನಾನೊ ಅವರು ಈ ಬಗ್ಗೆ ಎಕ್ಸ್ (X) ನಲ್ಲಿ ಮಾಹಿತಿ ಹಂಚಿಕೊಂಡಿದ್ದು, “ನೂರಾರು ಟನ್ ಇಳುವರಿಯನ್ನು (yield) ಗುರಿಯಾಗಿಸಿಕೊಂಡು ಚೀನಾ ಪರಮಾಣು ಸ್ಫೋಟಕ ಪರೀಕ್ಷೆಗಳನ್ನು ನಡೆಸಿದೆ ಎಂದು ತಿಳಿಸಿದ್ದಾರೆ.
ವಿಶ್ವದ ಕಣ್ಣಿಗೆ ಮಣ್ಣೆರಚಲು ಚೀನಾ ಅನುಸರಿಸಿದ ತಂತ್ರಗಳ ಬಗ್ಗೆ ಡಿನಾನೊ ವಿವರಿಸಿದ್ದಾರೆ.
ಭೂಕಂಪನ ಮಾನಿಟರಿಂಗ್ ವ್ಯವಸ್ಥೆಯ (seismic monitoring) ಪರಿಣಾಮಕಾರಿತ್ವವನ್ನು ಕಡಿಮೆ ಮಾಡಲು ಮತ್ತು ತನ್ನ ಚಟುವಟಿಕೆಗಳನ್ನು ಮರೆಮಾಡಲು ಚೀನಾ ಡಿಕಪ್ಲಿಂಗ್ (Decoupling) ತಂತ್ರವನ್ನು ಬಳಸಿದೆ. ಜೂನ್ 22, 2020 ರಂದು ಚೀನಾ ಇಂತಹ ಒಂದು ಪರಮಾಣು ಪರೀಕ್ಷೆಯನ್ನು ನಡೆಸಿದೆ ಎಂದು ಅವರು ಬರೆದಿದ್ದಾರೆ.
ಗಮನಾರ್ಹ ವಿಷಯವೆಂದರೆ, ಜೂನ್ 15, 2020 ರಂದು ಗಲ್ವಾನ್ನಲ್ಲಿ ನಡೆದ ಸಂಘರ್ಷದಲ್ಲಿ 20 ಭಾರತೀಯ ಸೈನಿಕರು ವೀರಮರಣ ಅಪ್ಪಿದ್ದರು. ಗುಪ್ತಚರ ವರದಿಗಳ ಪ್ರಕಾರ, ಸುಮಾರು 30 ಚೀನೀ ಸೈನಿಕರು ಕೂಡ ಈ ಘಟನೆಯಲ್ಲಿ ಹತರಾಗಿದ್ದರು.
ಅಮೆರಿಕದ ಅಧಿಕಾರಿ ‘ಸ್ಟ್ರಾಟೆಜಿಕ್ ಆರ್ಮ್ಸ್ ರಿಡಕ್ಷನ್ ಟ್ರೀಟಿ’ (New START) ಒಪ್ಪಂದದ ನ್ಯೂನತೆಗಳನ್ನು ಎತ್ತಿ ತೋರಿಸಿದ್ದಾರೆ. ಅವರ ಪ್ರಕಾರ ಈ ಒಪ್ಪಂದದಲ್ಲಿ ಯುದ್ಧವಿಮಾನಗಳು ಮತ್ತು ಲಾಂಚರ್ಗಳ ಮೇಲೆ ಹೇರಿರುವ ಮಿತಿಗಳು 2026ರ ವೇಳೆಗೆ ಸಂಪೂರ್ಣವಾಗಿ ಅಪ್ರಸ್ತುತವಾಗುತ್ತಿವೆ.
ಚೀನಾ ಮತ್ತು ರಷ್ಯಾ ನಡೆ:
ಒಂದು ಪರಮಾಣು ಶಕ್ತಿಯು (ಚೀನಾ) ಅಭೂತಪೂರ್ವ ಪ್ರಮಾಣದಲ್ಲಿ ತನ್ನ ಶಸ್ತ್ರಾಗಾರವನ್ನು ವಿಸ್ತರಿಸುತ್ತಿದ್ದರೆ, ಮತ್ತೊಂದು ರಾಷ್ಟ್ರವು (ರಷ್ಯಾ) ‘ಸ್ಟ್ರಾಟೆಜಿಕ್ ಆರ್ಮ್ಸ್ ರಿಡಕ್ಷನ್ ಟ್ರೀಟಿ’ (New START) ಒಪ್ಪಂದದ ಯಾವುದೇ ನಿರ್ಬಂಧಗಳಿಲ್ಲದೆ ಬೃಹತ್ ಶ್ರೇಣಿಯ ಪರಮಾಣು ವ್ಯವಸ್ಥೆಗಳನ್ನು ಅಭಿವೃದ್ಧಿಪಡಿಸುತ್ತಿದೆ.
“ಅಮೆರಿಕ ನಿಯೋಜಿಸಿರುವ ಬಹುತೇಕ ಎಲ್ಲಾ ಪರಮಾಣು ಪಡೆಗಳು ‘ಸ್ಟ್ರಾಟೆಜಿಕ್ ಆರ್ಮ್ಸ್ ರಿಡಕ್ಷನ್ ಟ್ರೀಟಿ’ (New START) ಒಪ್ಪಂದಕ್ಕೆ ಒಳಪಟ್ಟಿವೆ. ಆದರೆ ರಷ್ಯಾದ ಬೃಹತ್ ದಾಸ್ತಾನಿನ ಕೇವಲ ಒಂದು ಸಣ್ಣ ಭಾಗ ಮಾತ್ರ ಇದಕ್ಕೆ ಒಳಪಟ್ಟಿದೆ. ಇನ್ನು ಚೀನಾದ ಶೂನ್ಯ (zero) ಪರಮಾಣು ಶಸ್ತ್ರಾಸ್ತ್ರಗಳು ಈ ಒಪ್ಪಂದದ ವ್ಯಾಪ್ತಿಗೆ ಬರುತ್ತವೆ ಎಂದು ಡಿನಾನೊ ಹೇಳಿದ್ದಾರೆ.
ಹೊಸ ಚೌಕಟ್ಟಿನ ಅಗತ್ಯತೆ
ರಷ್ಯಾದ ಸರಣಿ ನಿಯಮ ಉಲ್ಲಂಘನೆಗಳು, ಜಾಗತಿಕ ಪರಮಾಣು ದಾಸ್ತಾನುಗಳ ಹೆಚ್ಚಳ ಮತ್ತು ‘ಸ್ಟ್ರಾಟೆಜಿಕ್ ಆರ್ಮ್ಸ್ ರಿಡಕ್ಷನ್ ಟ್ರೀಟಿ’ (New START)ಒಪ್ಪಂದದ ವಿನ್ಯಾಸದಲ್ಲಿನ ದೋಷಗಳನ್ನು ಗಮನಿಸಿದರೆ, ಹಳೆಯ ಕಾಲದ ನಿಯಮಗಳ ಬದಲಿಗೆ ಇಂದಿನ ಸಮಕಾಲೀನ ಬೆದರಿಕೆಗಳನ್ನು ಎದುರಿಸಬಲ್ಲ ಹೊಸ ಪರಮಾಣು ಚೌಕಟ್ಟಿನ (Nuclear Framework) ತುರ್ತು ಅಗತ್ಯವಿದೆ ಎಂದು ಅವರು ವಾದಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ