ಪಾಕಿಸ್ತಾನಕ್ಕೆ ಹಾಕಿ ತಂಡಕ್ಕೆ ಮುಜುಗರ : ಹೋಟೆಲ್ ಬಿಲ್ ಪಾವತಿಸದ ಕಾರಣ ರಸ್ತೆಯಲ್ಲೇ ಕಾಲ ಕಳೆದ ಆಟಗಾರರು…!

ಕ್ಯಾನ್ಬೆರಾ: ಎಫ್‌ಐಎಚ್ (FIH) ಪ್ರೊ ಲೀಗ್‌ನ ಎರಡನೇ ಚರಣದಲ್ಲಿ ಭಾಗವಹಿಸಲು ಆಸ್ಟ್ರೇಲಿಯಾಕ್ಕೆ ತಲುಪಿರುವ ಪಾಕಿಸ್ತಾನದ ರಾಷ್ಟ್ರೀಯ ಹಾಕಿ ತಂಡಕ್ಕೆ ತೀವ್ರ ಅವಮಾನ ಎದುರಾಗಿದೆ. ಹೋಟೆಲ್ ಬುಕಿಂಗ್ ಹಣ ಪಾವತಿಸದ ಕಾರಣ, ಆಟಗಾರರು ಗಂಟೆಗಟ್ಟಲೆ ರಸ್ತೆಯಲ್ಲೇ ಕಾಯಬೇಕಾದ ದುಸ್ಥಿತಿ ಎದುರಾಗಿತ್ತು.
ಪಾಕಿಸ್ತಾನ ಕ್ರೀಡಾ ಮಂಡಳಿ (PSB) ಮತ್ತು ಪಾಕಿಸ್ತಾನ ಹಾಕಿ ಫೆಡರೇಶನ್ (PHF) ಆಟಗಾರರಿಗೆ ಕ್ಯಾನ್ಬೆರಾದ ಪಂಚತಾರಾ ಹೋಟೆಲ್‌ನಲ್ಲಿ ವಸತಿ ವ್ಯವಸ್ಥೆ ಮಾಡಿರುವುದಾಗಿ ಭರವಸೆ ನೀಡಿದ್ದವು. ಆದರೆ, ಲಾಹೋರ್‌ನಿಂದ ಸುದೀರ್ಘ ಪ್ರಯಾಣದ ನಂತರ ತಂಡವು ಹೋಟೆಲ್‌ಗೆ ತಲುಪಿದಾಗ, ಅಲ್ಲಿ ಪಾಕಿಸ್ತಾನ ಹಾಕಿ ಫೆಡರೇಶನ್ ನಿಂದ ಹಣ ಪಾವತಿಯಾಗದ ಕಾರಣ ಯಾವುದೇ ಬುಕಿಂಗ್‌ಗಳನ್ನು ಮಾಡಲಾಗಿಲ್ಲ ಎಂಬ ಆಘಾತಕಾರಿ ವಿಷಯ ಬೆಳಕಿಗೆ ಬಂದಿದೆ.

ಇದರಿಂದಾಗಿ ಆಟಗಾರರು ಗಂಟೆಗಟ್ಟಲೆ ರಸ್ತೆಯಲ್ಲೇ ಕಾಯಬೇಕಾಯಿತು ಎಂದು ವರದಿಗಳು ತಿಳಿಸಿವೆ. ಕೆಲವು ವರದಿಗಳ ಪ್ರಕಾರ, ಆಟಗಾರರು ಮತ್ತು ತಂಡದ ಅಧಿಕಾರಿಗಳು ಹೊಟೇಲ್‌ನಲ್ಲಿ ರೂಮುಗಳು ಸಿಗುವ ಮೊದಲು “ರಸ್ತೆಗಳಲ್ಲಿ ಅಲೆದಾಡಿ ಕಾಲ ಕಳೆಯಬೇಕಾಯಿತು.
ಸಮಯದ ವ್ಯತ್ಯಾಸದಿಂದಾಗಿ (Time Zone Difference) ತಂಡದ ಮುಖ್ಯ ತರಬೇತುದಾರ ತಾಹಿರ್ ಜಮಾನ್ ಅವರಿಗೆ ಪಾಕಿಸ್ತಾನದ ಅಧಿಕಾರಿಗಳನ್ನು ಸಂಪರ್ಕಿಸಲು ಸಾಧ್ಯವಾಗದೆ ಆಟಗಾರರು ತೀವ್ರ ಸಂಕಷ್ಟಕ್ಕೆ ಸಿಲುಕಿದರು. ಕೊನೆಗೆ, ಸ್ಥಳೀಯ ಪಾಕಿಸ್ತಾನಿ ಸಮುದಾಯದ ನೆರವಿನಿಂದ ಸಮಸ್ಯೆ ಸದ್ಯಕ್ಕೆ ಬಗೆಹರಿದಿದೆ ಎನ್ನಲಾಗಿದೆ.

ಆಟದ ಮೇಲೆ ಬೀರಿದ ಪರಿಣಾಮ:
ಹೋಟೆಲ್‌ನಲ್ಲಿ ಪರ್ಯಾಯ ವ್ಯವಸ್ಥೆ ಮಾಡಿದಾಗಲೂ ಪ್ರತ್ಯೇಕ ಕೊಠಡಿಗಳು ಲಭ್ಯವಿರಲಿಲ್ಲ. ಇದರಿಂದಾಗಿ ತಲಾ ಇಬ್ಬರು ಅಥವಾ ಮೂವರು ಆಟಗಾರರು ಒಂದೇ ಕೊಠಡಿಯನ್ನು ಹಂಚಿಕೊಳ್ಳಬೇಕಾಯಿತು.
ಸರಿಯಾದ ವಿಶ್ರಾಂತಿ ಇಲ್ಲದೆಯೇ ಮರುದಿನವೇ ಆಸ್ಟ್ರೇಲಿಯಾ ವಿರುದ್ಧ ಕಣಕ್ಕಿಳಿದ ಪಾಕಿಸ್ತಾನ ತಂಡವು 3-2 ಗೋಲುಗಳ ಅಂತರದಿಂದ ಪಂದ್ಯವನ್ನು ಸೋತಿತು. ಪ್ರಸಕ್ತ ಟೂರ್ನಿಯಲ್ಲಿ ಆಡಿದ ಎಲ್ಲಾ ಆರು ಪಂದ್ಯಗಳಲ್ಲೂ ಪಾಕಿಸ್ತಾನ ಸೋಲನ್ನು ಅನುಭವಿಸಿದೆ.

ಆಡಳಿತಾತ್ಮಕ ವೈಫಲ್ಯಗಳ ಸರಮಾಲೆ:
ಈ ಅವಮಾನಕಾರಿ ಘಟನೆಯ ಜೊತೆಗೆ ಪಾಕಿಸ್ತಾನ ಹಾಕಿ ಮಂಡಳಿಯ ಹಲವು ಲೋಪಗಳು ಹೊರಬಂದಿವೆ. ಈ ಹಿಂದೆ ಅರ್ಜೆಂಟೀನಾದಲ್ಲಿ ನಡೆದಿದ್ದ ಪಂದ್ಯಗಳ ವೇಳೆಯೂ ಆಟಗಾರರಿಗೆ ದಿನಭತ್ಯೆಯನ್ನು ನೀಡಲಾಗಿರಲಿಲ್ಲ ಎಂಬ ದೂರು ಕೇಳಿಬಂದಿದೆ.
ವಿಮಾನದಲ್ಲಿ ಧೂಮಪಾನ ಮಾಡಿದ ಆರೋಪದ ಮೇಲೆ ಮಾಜಿ ಒಲಿಂಪಿಯನ್ ಅಂಜುಮ್ ಸಯೀದ್ ಅವರನ್ನು ಮ್ಯಾನೇಜರ್ ಸ್ಥಾನದಿಂದ ಕಿತ್ತೆಸೆಯಲಾಗಿದೆ. ಹೀಗಾಗಿ ತಂಡವು ಪ್ರಸ್ತುತ ಯಾವುದೇ ಮ್ಯಾನೇಜರ್ ಇಲ್ಲದೆಯೇ ವಿದೇಶಿ ಪ್ರವಾಸ ಕೈಗೊಂಡಿದೆ.
ರಾಷ್ಟ್ರೀಯ ಕ್ರೀಡೆಯಾದ ಹಾಕಿಯ ಬಗ್ಗೆ ಪಾಕಿಸ್ತಾನದ ಕ್ರೀಡಾ ಸಂಸ್ಥೆಗಳು ತೋರುತ್ತಿರುವ ಇಂತಹ ನಿರ್ಲಕ್ಷ್ಯವು ಭಾರೀ ಟೀಕೆಗೆ ಗುರಿಯಾಗಿದೆ.