ಅಮೆರಿಕ ಇರಾನ್ ಜೊತೆ ಯುದ್ಧದಲ್ಲಿ ತೊಡಗಿದೆ ಜೀವಹಾನಿ ಸೇರಿದಂತೆ ಸಂಭವಿಸುತ್ತಿರುವ ಮಾನವೀಯ ನಷ್ಟಗಳ ಹೊರತಾಗಿ, ಈ ಯುದ್ಧವು ಅಮೆರಿಕಕ್ಕೆ ಭಾರಿ ಆರ್ಥಿಕ ಹೊರೆಯಾಗಿಯೂ ಪರಿಣಮಿಸುತ್ತಿದೆ.
ವರದಿಗಳ ಪ್ರಕಾರ, ಇರಾನ್ ಮೇಲಿನ ದಾಳಿಯ ಮೊದಲ 24 ಗಂಟೆಗಳಲ್ಲೇ ಅಮೆರಿಕಕ್ಕೆ 779 ಮಿಲಿಯನ್ ಡಾಲರ್ (ಸುಮಾರು 6,900 ಕೋಟಿ ರೂಪಾಯಿ) ಖರ್ಚಾಗಿದೆ. ಇದು 2026ರ ಇಡೀ ಅಮೆರಿಕದ ರಕ್ಷಣಾ ಬಜೆಟ್ನ ಶೇಕಡಾ 0.1 ರಷ್ಟು. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಈ ಯುದ್ಧವು ಕನಿಷ್ಠ ಒಂದು ತಿಂಗಳು ಅಥವಾ ಅದಕ್ಕಿಂತ ಹೆಚ್ಚು ಕಾಲ ಮುಂದುವರಿಯಬಹುದು ಎಂದು ಹೇಳಿದ್ದಾರೆ.
ಯುದ್ಧದ ವೆಚ್ಚದ ವಿವರಗಳು:
‘ಸೆಂಟರ್ ಫಾರ್ ನ್ಯೂ ಅಮೆರಿಕನ್ ಸೆಕ್ಯೂರಿಟಿ’ ನೀಡಿದ ಮಾಹಿತಿಯ ಪ್ರಕಾರ, ವಿಶ್ವದ ಅತಿದೊಡ್ಡ ವಿಮಾನ ವಾಹಕ ಯುದ್ಧನೌಕೆಯಾದ ‘ಯುಎಸ್ಎಸ್ ಜೆರಾಲ್ಡ್ ಆರ್ ಫೋರ್ಡ್’ ನಂತಹ ಕ್ಯಾರಿಯರ್ ಸ್ಟ್ರೈಕ್ ಗ್ರೂಪ್ಗಳ ಕಾರ್ಯಾಚರಣೆಗೆ ದಿನಕ್ಕೆ ಸುಮಾರು 6.5 ಮಿಲಿಯನ್ ಡಾಲರ್ (58 ಕೋಟಿ ರೂಪಾಯಿ) ವೆಚ್ಚವಾಗುತ್ತದೆ. ಇರಾನ್ನ ಸುಪ್ರೀಂ ಲೀಡರ್ ಆಯತೊಲ್ಲಾ ಅಲಿ ಖಮೇನಿ ಮತ್ತು ಇತರ ಪ್ರಮುಖ ನಾಯಕರ ಹತ್ಯೆಗೆ ಕಾರಣವಾದ ಈ ದಾಳಿಗೂ ಮುನ್ನ, ಅಮೆರಿಕವು ಮಧ್ಯಪ್ರಾಚ್ಯದಲ್ಲಿ ಜೆರಾಲ್ಡ್ ಆರ್ ಫೋರ್ಡ್ ಸೇರಿದಂತೆ ಎರಡು ವಿಮಾನ ವಾಹಕ ನೌಕೆಗಳನ್ನು ನಿಯೋಜಿಸಿತ್ತು. ಯುದ್ಧಪೂರ್ವ ಸಿದ್ಧತೆಗಳ ಅಂದಾಜು ವೆಚ್ಚವೇ ಸುಮಾರು 630 ಮಿಲಿಯನ್ ಡಾಲರ್ (5,556 ಕೋಟಿ ರೂಪಾಯಿ) ಆಗಿದೆ ಎಂದು ಅಂದಾಜಿಸಲಾಗಿದೆ. ಒಂದು ವೇಳೆ ಟ್ರಂಪ್ ಸೂಚಿಸಿದಂತೆ ಯುದ್ಧವು ದೀರ್ಘಕಾಲ ಎಳೆದರೆ, ಅಮೆರಿಕ ಒಟ್ಟು 210 ಬಿಲಿಯನ್ ಡಾಲರ್ (18.87 ಲಕ್ಷ ಕೋಟಿ ರೂಪಾಯಿ) ಹಣವನ್ನು ಖರ್ಚು ಮಾಡಬೇಕಾಗುತ್ತದೆ ಎಂದು ಪೆನ್ ವಾರ್ಟನ್ ಬಜೆಟ್ ಮಾಡೆಲ್ನ ನಿರ್ದೇಶಕ ಮತ್ತು ಆರ್ಥಿಕ ವಿಶ್ಲೇಷಕ ಕೆಂಟ್ ಸ್ಮೆಟರ್ಸ್ ತಿಳಿಸಿದ್ದಾರೆ. ಯುದ್ಧ ಎಳೆದಂತೆ ವೆಚ್ಚವೂ ಹೆಚ್ಚುತ್ತ ಹೋಗಲಿದೆ.
ವ್ಯಾಪಕ ಆರ್ಥಿಕ ಪರಿಣಾಮಗಳು
ಯುದ್ಧಭೂಮಿಯ ವೆಚ್ಚಗಳ ಹೊರತಾಗಿ, ಇದರ ವ್ಯಾಪಕ ಆರ್ಥಿಕ ಕುಸಿತವು ಭೀಕರವಾಗುವ ಸಾಧ್ಯತೆಯಿದೆ. ಇರಾನ್ ಮಧ್ಯಪ್ರಾಚ್ಯ ವಲಯದಲ್ಲಿನ ಅಮೆರಿಕದ ಮಿಲಿಟರಿ ನೆಲೆಗಳ ಮೇಲೆ ಸತತ ದಾಳಿ ನಡೆಸುತ್ತಿರುವುದರಿಂದ, ಇತರ ಗಲ್ಫ್ ದೇಶಗಳೂ ಈ ಸಂಘರ್ಷಕ್ಕೆ ಎಳೆಯಲ್ಪಡುತ್ತಿವೆ ಮತ್ತು ಪ್ರತಿ ಗಂಟೆಗೂ ಯುದ್ಧವು ವಿಸ್ತರಿಸುತ್ತಿದೆ.
ವ್ಯಾಪಾರ ಮತ್ತು ಇಂಧನ ಮಾರುಕಟ್ಟೆಗಳಲ್ಲಿನ ತೊಂದರೆಗಳು ಅಮೆರಿಕದ ಅರ್ಥವ್ಯವಸ್ಥೆಗೆ ಹೆಚ್ಚುವರಿಯಾಗಿ 115 ಬಿಲಿಯನ್ ಡಾಲರ್ (ಸುಮಾರು ₹9.6 ಲಕ್ಷ ಕೋಟಿ) ನಷ್ಟ ಉಂಟುಮಾಡಲಿವೆ ಎಂದು ಪೆನ್ ವಾರ್ಟನ್ ಬಜೆಟ್ ಮಾಡೆಲ್ (PWBM) ನಿರ್ದೇಶಕ ಸ್ಮೆಟರ್ಸ್ ಭವಿಷ್ಯ ನುಡಿದಿದ್ದಾರೆ.
ಜಾಗತಿಕ ತೈಲ ಪೂರೈಕೆಯ ಐದನೇ ಒಂದು ಭಾಗದಷ್ಟು ಹಾದುಹೋಗುವ ಪ್ರಮುಖ ‘ಸ್ಟ್ರೈಟ್ ಆಫ್ ಹಾರ್ಮುಜ್’ನಲ್ಲಿ ಹಡಗು ಸಂಚಾರಕ್ಕೆ ಅಡಚಣೆಯಾಗಿರುವುದು ಮತ್ತು ಇರಾನ್ನ ಪ್ರತೀಕಾರದ ದಾಳಿಯಿಂದಾಗಿ ಈ ಭಾಗದ ತೈಲ ಮತ್ತು ಅನಿಲ ಘಟಕಗಳು ಸ್ಥಗಿತಗೊಂಡಿರುವುದರಿಂದ, ಈಗಾಗಲೇ ತೈಲ ಮತ್ತು ಅನಿಲ ಬೆಲೆಗಳು ಗಗನಕ್ಕೇರಿವೆ.
ಈ ವೆಚ್ಚ ಹೆಚ್ಚಾಗಲು ಬಿ-2 ಸ್ಟೆಲ್ತ್ ಬಾಂಬರ್ಗಳು, ಎಫ್-22, ಎಫ್-35 ಮತ್ತು ಎಫ್-16 ಫೈಟರ್ ಜೆಟ್ಗಳು ಹಾಗೂ ಇಎ-18ಜಿ ಎಲೆಕ್ಟ್ರಾನಿಕ್ ವಾರ್ಫೇರ್ ವಿಮಾನಗಳ ಬೃಹತ್ ನಿಯೋಜನೆಯೇ ಕಾರಣ. ಬಂಕರ್ ಬಸ್ಟರ್ಗಳೆಂದು ಕರೆಯಲ್ಪಡುವ ಬಿ-2 ಬಾಂಬರ್ಗಳ ಹಾರಾಟದ ಸಮಯ ಮತ್ತು ನಿರ್ವಹಣಾ ವೆಚ್ಚವೊಂದೇ ಅಂದಾಜು 30.2 ಮಿಲಿಯನ್ ಡಾಲರ್ ಆಗಿದೆ.
ಜೊತೆಗೆ ಎಂಕ್ಯೂ-9 ರೀಪರ್ ಡ್ರೋನ್ಗಳು, ಪರಮಾಣು ಚಾಲಿತ ವಿಮಾನವಾಹಕ ನೌಕೆಗಳು, ಗೈಡೆಡ್-ಮಿಸೈಲ್ ಡಿಸ್ಟ್ರಾಯರ್ಗಳು ಮತ್ತು ಪೇಟ್ರಿಯಾಟ್ ಹಾಗೂ ಥಾಡ್ (THAAD) ಕ್ಷಿಪಣಿ ರಕ್ಷಣಾ ವ್ಯವಸ್ಥೆಗಳನ್ನೂ ನಿಯೋಜಿಸಲಾಗಿದೆ.
ಹೆಚ್ಚುತ್ತಿರುವ ಈ ಯುದ್ಧದ ವೆಚ್ಚವು ಅಮೆರಿಕದ ಒಳಗೂ ಟ್ರಂಪ್ ಮೇಲೆ ಒತ್ತಡವನ್ನುಂಟು ಮಾಡಿದೆ, ಏಕೆಂದರೆ ದೇಶವು ಈಗಾಗಲೇ ಹಣದುಬ್ಬರವನ್ನು ಎದುರಿಸುತ್ತಿದೆ.
ಅಮೆರಿಕದ ಹಿಂದಿನ ವೆಚ್ಚಗಳು
ಅಕ್ಟೋಬರ್ 7, 2023 ರಂದು ಹಮಾಸ್ ಇಸ್ರೇಲ್ ಮೇಲೆ ದಾಳಿ ಮಾಡಿ 1,200 ಜನರನ್ನು ಕೊಂದು 251 ಜನರನ್ನು ಒತ್ತೆ ಸೆರೆಯಾಗಿ ಹಿಡಿದ ನಂತರ, ಅಮೆರಿಕ ಇಸ್ರೇಲ್ಗೆ 21.7 ಬಿಲಿಯನ್ ಡಾಲರ್ ಮಿಲಿಟರಿ ನೆರವು ನೀಡಿದೆ. ಅಲ್ಲದೆ ಯೆಮನ್, ಇರಾನ್ ಮತ್ತು ಮಧ್ಯಪ್ರಾಚ್ಯದ ಇತರ ಕಾರ್ಯಾಚರಣೆಗಳಿಗೆ ಅಮೆರಿಕ 9.65 ಬಿಲಿಯನ್ನಿಂದ 12.07 ಬಿಲಿಯನ್ ಡಾಲರ್ ಖರ್ಚು ಮಾಡಿದೆ. ಬ್ರೌನ್ ವಿಶ್ವವಿದ್ಯಾಲಯದ ‘2025 ಕಾಸ್ಟ್ಸ್ ಆಫ್ ವಾರ್’ ವರದಿ ಪ್ರಕಾರ ಈ ಒಟ್ಟು ವೆಚ್ಚವು 31.35 ಬಿಲಿಯನ್ ಡಾಲರ್ (2.82 ಲಕ್ಷ ಕೋಟಿ ರೂ.) ನಿಂದ 33.77 ಬಿಲಿಯನ್ ಡಾಲರ್ (3.04 ಲಕ್ಷ ಕೋಟಿ ರೂ.) ಆಗುತ್ತದೆ.
ಹಿಂದೆ ಸರಿಯದ ನಾಯಕರು:
ತಮ್ಮನ್ನು “ಶಾಂತಿಯ ಅಧ್ಯಕ್ಷ” ಎಂದು ಬಿಂಬಿಸಿಕೊಳ್ಳುವ ಮತ್ತು ನೋಬೆಲ್ ಶಾಂತಿ ಪ್ರಶಸ್ತಿಯ ಮೇಲೆ ಕಣ್ಣಿಟ್ಟಿರುವ ಟ್ರಂಪ್, ಯುದ್ಧ ಎಷ್ಟು ದಿನ ನಡೆಯಲಿದೆ ಎಂಬ ಪ್ರಶ್ನೆಗೆ, “ನಾವು 4 ರಿಂದ 5 ವಾರಗಳ ಅಂದಾಜು ಮಾಡಿದ್ದೇವೆ, ಆದರೆ ನಮಗೆ ಅದಕ್ಕಿಂತ ಹೆಚ್ಚು ಕಾಲ ಮುಂದುವರಿಯುವ ಸಾಮರ್ಥ್ಯವಿದೆ. ಎಷ್ಟು ಸಮಯ ಬೇಕಾದರೂ ಸರಿ, ನಾವು ಅದನ್ನು ಮಾಡುತ್ತೇವೆ,” ಎಂದು ಉತ್ತರಿಸಿದ್ದಾರೆ.
ಅಲ್ಲದೆ ಮಂಗಳವಾರ ಇರಾನ್ ಜೊತೆಗಿನ ಮಾತುಕತೆ ನಡೆಸುವುದನ್ನು ಅವರು ತಳ್ಳಿಹಾಕಿದ್ದಾರೆ. “ಇರಾನಿನ ವಾಯು ರಕ್ಷಣೆ, ವಾಯುಪಡೆ, ನೌಕಾಪಡೆ ಮತ್ತು ನಾಯಕತ್ವ ಎಲ್ಲವೂ ನಾಶವಾಗಿದೆ. ಅವರು ಈಗ ಮಾತುಕತೆಗೆ ಬಯಸುತ್ತಿದ್ದಾರೆ, ಆದರೆ ನಾನು ‘ಬಹಳ ತಡವಾಯಿತು!’ ಎಂದು ಹೇಳಿದ್ದೇನೆ,” ಎಂದು ಟ್ರಂಪ್ ತಮ್ಮ ಟ್ರೂತ್ ಸೋಶಿಯಲ್ನಲ್ಲಿ ಬರೆದುಕೊಂಡಿದ್ದಾರೆ.
ಇನ್ನೊಂದೆಡೆ ಇರಾನ್ ಕೂಡ ಶರಣಾಗುವ ಲಕ್ಷಣ ತೋರಿಸಿಲ್ಲ. ವಿಶ್ವಸಂಸ್ಥೆಯ ಇರಾನ್ ರಾಯಭಾರಿ ಅಲಿ ಬಹ್ರೇನಿ ಮಾತನಾಡಿ, “ಇರಾನ್ ಮೇಲೆ ಯುದ್ಧವನ್ನು ಹೇರಲಾಗಿದೆ. ಇದರ ಜವಾಬ್ದಾರಿಯನ್ನು ಅಮೆರಿಕ ಮತ್ತು ಇಸ್ರೇಲ್ ಹೊರಬೇಕು. ಆಕ್ರಮಣ ನಿಲ್ಲುವವರೆಗೂ ನಮ್ಮ ಹೋರಾಟ ಮುಂದುವರಿಯಲಿದೆ,” ಎಂದು ತಿಳಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ