ಹಾರ್ಮುಜ್ ಜಲಸಂಧಿ ದಾಟಿ ಬರಲು ಸಿದ್ಧವಾಗಿ ನಿಂತಿವೆ ಭಾರತದ ಮತ್ತೆರಡು ಎಲ್‌ಪಿಜಿ ಹಡಗುಗಳು

ನವದೆಹಲಿ: ಕಳೆದ 24 ಗಂಟೆಗಳಲ್ಲಿ ಹಾರ್ಮುಜ್ ಜಲಸಂಧಿಯ ಮೂಲಕ ಕಚ್ಚಾ ತೈಲ ಸಾಗಣೆಯು ಸ್ಥಗಿತಗೊಂಡಿದ್ದರೂ ಸಹ, ಭಾರತೀಯ ಧ್ವಜ ಹೊಂದಿರುವ ಎರಡು ದ್ರವೀಕೃತ ಪೆಟ್ರೋಲಿಯಂ ಅನಿಲ (LPG)ಹಡಗುಗಳು ಅಲ್ಲಿಂದ ಪ್ರಯಾಣಿಸಲು ಸಿದ್ಧತೆ ನಡೆಸುತ್ತಿವೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.

ಪ್ರಾದೇಶಿಕ ಉದ್ವಿಗ್ನತೆಯಿಂದಾಗಿ ನೂರಾರು ಹಡಗುಗಳು ಲಂಗರು ಹಾಕುವಂತಾಗಿದ್ದರೂ, ಶಿಪ್ಪಿಂಗ್ ಡೇಟಾ ಮತ್ತು ವ್ಯಾಪಾರ ಮೂಲಗಳ ಪ್ರಕಾರ, ಈ ಹಡಗುಗಳು ಸ್ವಲ್ಪ ವಿರಾಮದ ನಂತರ ಶೀಘ್ರದಲ್ಲೇ ಸಂಚಾರವನ್ನು ಪುನರಾರಂಭಿಸಬಹುದು ಎಂದು ತಿಳಿದುಬಂದಿದೆ.

ಜಾಗತಿಕ ಇಂಧನ ಪೂರೈಕೆಯ ಪ್ರಮುಖ ಮಾರ್ಗವಾಗಿರುವ ಹೊರ್ಮುಜ್ ಜಲಸಂಧಿಯಲ್ಲಿ, ಪರ್ಷಿಯನ್ ಗಲ್ಫ್ ಬಿಟ್ಟು ಹೋಗಲು ಪ್ರಯತ್ನಿಸುವ ಹಡಗುಗಳ ಮೇಲೆ ದಾಳಿ ಮಾಡುವುದಾಗಿ ಇರಾನ್ ಎಚ್ಚರಿಕೆ ನೀಡಿದ ನಂತರ ವ್ಯತ್ಯಯ ಉಂಟಾಗಿದೆ. ಜಾಗತಿಕ ತೈಲ ಮತ್ತು ದ್ರವೀಕೃತ ನೈಸರ್ಗಿಕ ಅನಿಲ ಪೂರೈಕೆಯ ಸುಮಾರು 20 ಪ್ರತಿಶತದಷ್ಟು ಪಾಲು ಈ  ಜಲಮಾರ್ಗದ ಮೂಲಕವೇ ಹಾದುಹೋಗುತ್ತದೆ.

ಶುಕ್ರವಾರದ ಮಾರುಕಟ್ಟೆ ಮೌಲ್ಯಮಾಪನಗಳ ಪ್ರಕಾರ, ಕಳೆದ 24 ಗಂಟೆಗಳಲ್ಲಿ ಯಾವುದೇ ಕಚ್ಚಾ ತೈಲ ಟ್ಯಾಂಕರ್‌ಗಳು ಈ ಜಲಸಂಧಿಯನ್ನು ದಾಟಿಲ್ಲ. ಅಮೆರಿಕದ ನಿರ್ಬಂಧಕ್ಕೆ ಒಳಗಾಗಿರುವ ಖಾಲಿ ಕಚ್ಚಾ ತೈಲ ಟ್ಯಾಂಕರ್ ಒಂದು ಮಾರ್ಚ್ 18 ರಂದು ಇರಾನ್ ಸಮುದ್ರದತ್ತ ಹಿಂತಿರುಗಿದೆ ಎಂದು ‘ಕೆಪ್ಲರ್’ (Kpler) ಅಂಕಿಅಂಶಗಳು ತೋರಿಸಿವೆ.

ಈ ಹಿನ್ನೆಲೆಯಲ್ಲಿ, ಭಾರತದ ಎರಡು ಎಲ್‌ಪಿಜಿ ವಾಹಕಗಳಾದ ‘ಪೈನ್ ಗ್ಯಾಸ್’ (Pine Gas) ಮತ್ತು ‘ಜಗ್ ವಸಂತ್’ (Jag Vasant) ಸಂಯುಕ್ತ ಅರಬ್ ಎಮಿರೇಟ್ಸ್‌ನ ಶಾರ್ಜಾ ಸಮೀಪ ಬೀಡುಬಿಟ್ಟಿವೆ. ಮರಿನ್ ಟ್ರಾಫಿಕ್ (MarineTraffic) ಹಡಗು-ಟ್ರ್ಯಾಕಿಂಗ್ ಡೇಟಾ ಪ್ರಕಾರ, ಎರಡೂ ಹಡಗುಗಳು ತಾವು ಪ್ರಯಾಣಕ್ಕೆ ಸಿದ್ಧವಾಗುತ್ತಿರುವುದಾಗಿ ಸಂಕೇತಗಳನ್ನು (Signals) ನೀಡುತ್ತಿವೆ.

ಈ ಬಗ್ಗೆ ಮಾಹಿತಿ ಇರುವ ಮೂಲವೊಂದು, ಶನಿವಾರದ ನಂತರ ಟ್ಯಾಂಕರ್‌ಗಳು ಪ್ರಯಾಣ ಆರಂಭಿಸುವ ಸಾಧ್ಯತೆಯಿದೆ ಎಂದು ತಿಳಿಸಿದೆ, ಆದರೆ ಈವರೆಗೆ ಯಾವುದೇ ಅಧಿಕೃತ ದೃಢೀಕರಣ ಸಿಕ್ಕಿಲ್ಲ.

ಭಾರತದ ವಿದೇಶಾಂಗ ಸಚಿವಾಲಯವು ಎಚ್ಚರಿಕೆಯ ನಿಲುವನ್ನು ತಳೆದಿದ್ದು, ಈ ಪ್ರದೇಶದಲ್ಲಿ ತನ್ನ ಹಡಗುಗಳ ಸುರಕ್ಷಿತ ಸಂಚಾರಕ್ಕೆ ಕರೆ ನೀಡಿದೆ.

“ಗಲ್ಫ್ ಪ್ರದೇಶದಲ್ಲಿರುವ ಭಾರತದ 22 ಹಡಗುಗಳ ಸುರಕ್ಷಿತ ಮತ್ತು ಅಡೆತಡೆಯಿಲ್ಲದ ಸಂಚಾರದ ಪರವಾಗಿ ನಾವಿದ್ದೇವೆ” ಎಂದು ವಕ್ತಾರ ರಣಧೀರ ಜೈಸ್ವಾಲ್ ಶುಕ್ರವಾರ ತಿಳಿಸಿದ್ದಾರೆ. ಅಲ್ಲದೆ, ಪ್ರಧಾನಿ ನರೇಂದ್ರ ಮೋದಿ ಅವರು ಹಡಗುಗಳ ಸುರಕ್ಷಿತ ಪ್ರಯಾಣದ ಬಗ್ಗೆ ಜಾಗತಿಕ ನಾಯಕರೊಂದಿಗೆ ಸಂಪರ್ಕದಲ್ಲಿದ್ದಾರೆ ಎಂದು ಅವರು ತಿಳಿಸಿದರು.

‘ಜಗ್ ವಸಂತ್’ ಹಡಗನ್ನು BPCL ಗುತ್ತಿಗೆಗೆ ಪಡೆದಿದ್ದರೆ, ‘ಪೈನ್ ಗ್ಯಾಸ್’ ಅನ್ನು IOC ನಿರ್ವಹಿಸುತ್ತಿದೆ. ಎರಡೂ ಕಂಪನಿಗಳು ಈ ಕುರಿತು ಪ್ರತಿಕ್ರಿಯಿಸಿಲ್ಲ.

ಕಳೆದ ವಾರ, ಇರಾನ್ ಭಾರತದ ಎರಡು ಎಲ್‌ಪಿಜಿ ಹಡಗುಗಳಿಗೆ ಜಲಸಂಧಿಯ ಮೂಲಕ ಹಾದುಹೋಗಲು ಅನುಮತಿ ನೀಡಿದೆ ಎಂದು ಮೂಲಗಳು ತಿಳಿಸಿವೆ. ಇದು ಕೆಲವು ಸಾಗಣೆಗಳನ್ನು ಪ್ರಕರಣದ ಆಧಾರದ ಮೇಲೆ ಮಾತುಕತೆಯ ಮೂಲಕ ನಡೆಸಬಹುದು ಎಂಬ ಮುನ್ಸೂಚನೆ ನೀಡಿದೆ.