ವೀಡಿಯೊ | ಇರಾನಿನ ಇಸ್ಫಾಹಾನ್‌ ಬೃಹತ್ ಶಸ್ತ್ರಾಸ್ತ್ರ ಸಂಗ್ರಹಾಗಾರದ ಮೇಲೆ ಅಮೆರಿಕ ದಾಳಿ: ಶಕ್ತಿಶಾಲಿ ಬಂಕರ್ ಬಸ್ಟರ್ ಬಾಂಬ್ ಬಳಕೆ

ತೆಹ್ರಾನ್: ಮಧ್ಯಪ್ರಾಚ್ಯದಲ್ಲಿ ಸಂಘರ್ಷ ತೀವ್ರಗೊಂಡಿದ್ದು, ಅಮೆರಿಕವು ಇರಾನ್‌ನ ಇಸ್ಫಾಹಾನ್ ನಗರದಲ್ಲಿರುವ ಬೃಹತ್ ಶಸ್ತ್ರಾಸ್ತ್ರ ಸಂಗ್ರಹಾಗಾರದ ಮೇಲೆ 2,000 ಪೌಂಡ್ (ಸುಮಾರು 907 ಕೆಜಿ) ತೂಕದ ‘ಬಂಕರ್-ಬಸ್ಟರ್’ ಬಾಂಬ್‌ಗಳ ಮೂಲಕ ದಾಳಿ ನಡೆಸಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತಮ್ಮ ‘ಟ್ರೂತ್ ಸೋಶಿಯಲ್’ ನಲ್ಲಿ ಈ ಸ್ಫೋಟದ ಭೀಕರ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ.

ವಿಡಿಯೋಗಳಲ್ಲಿ ಕಂಡುಬಂದಂತೆ, ಮೊದಲು ದೊಡ್ಡ ಅಗ್ನಿಗೋಳಗಳು ಕಾಣಿಸಿಕೊಂಡು, ನಂತರ ಸರಣಿ ಸ್ಫೋಟಗಳು ಸಂಭವಿಸಿವೆ. ಇದು ಮದ್ದುಗುಂಡುಗಳಿಗೆ ಬೆಂಕಿ ಬಿದ್ದಾಗ ಕಂಡುಬರುವ ಸಾಮಾನ್ಯ ಲಕ್ಷಣವಾಗಿದೆ. ನಾಸಾದ (NASA) ಫೈರ್-ಟ್ರ್ಯಾಕಿಂಗ್ ಉಪಗ್ರಹಗಳ ಪ್ರಕಾರ, ಇಸ್ಫಾಹಾನ್‌ನ ಸೇನಾ ನೆಲೆಗಳು ಇರುವ ‘ಮೌಂಟ್ ಸೋಫೆ’ (Mount Soffeh) ಪ್ರದೇಶದ ಬಳಿ ಈ ದಾಳಿ ನಡೆದಿದೆ.

ವಾಲ್ ಸ್ಟ್ರೀಟ್ ಜರ್ನಲ್ ವರದಿಯ ಪ್ರಕಾರ, ಕ್ಷಿಪಣಿಗಳು ಮತ್ತು ಸ್ಫೋಟಕಗಳನ್ನು ನಾಶಪಡಿಸಲು ಅತಿ ಹೆಚ್ಚು ಸಂಖ್ಯೆಯ ಬಂಕರ್-ಬಸ್ಟರ್ ಬಾಂಬ್‌ಗಳನ್ನು ಬಳಸಲಾಗಿದೆ.

ಇಸ್ಫಾಹಾನ್ ನಗರವು ಇರಾನ್‌ನ ರಕ್ಷಣಾ ಉದ್ಯಮ ಮತ್ತು ಮಿಲಿಟರಿ ನೆಲೆಗಳ ಪ್ರಮುಖ ಕೇಂದ್ರವಾಗಿದೆ. ಅಷ್ಟೇ ಅಲ್ಲದೆ,  ಇದು ಇರಾನ್‌ನ ಪ್ರಮುಖ ಯುರೇನಿಯಂ ಸಮೃದ್ಧಿ ತಾಣಗಳಲ್ಲಿ ಒಂದಾಗಿದೆ. ಜೂನ್ 2025 ರ ಯುದ್ಧದಲ್ಲಿಯೂ ಅಮೆರಿಕ ಇದನ್ನು ಗುರಿಯಾಗಿಸಿ ದಾಳಿ ನಡೆಸಿತ್ತು.

ಜೂನ್ 9, 2025 ರ ಉಪಗ್ರಹ ಚಿತ್ರಗಳ ಪ್ರಕಾರ, ಇರಾನ್ ತನ್ನ ಶೇ. 60 ರಷ್ಟು ಶುದ್ಧೀಕರಿಸಿದ ಯುರೇನಿಯಂ ದಾಸ್ತಾನನ್ನು (ಸುಮಾರು 534 ಕೆಜಿ) ಟ್ರಕ್‌ಗಳ ಮೂಲಕ ಇಸ್ಫಾಹಾನ್‌ನ ಸುರಂಗಗಳಿಗೆ ವರ್ಗಾಯಿಸಿತ್ತು. ಇದು ಅಣುಬಾಂಬ್ ತಯಾರಿಕೆಗೆ ಬೇಕಾದ ಶೇ. 90 ರಷ್ಟು ಶುದ್ಧ ಯುರೇನಿಯಂಗೆ ತೀರಾ ಹತ್ತಿರದಲ್ಲಿದೆ.

ಈ ಬಾಂಬ್‌ಗಳು ಅತ್ಯಂತ ಕಠಿಣವಾದ ಟಾರ್ಗೆಟ್‌ಗಳನ್ನು ಭೇದಿಸಲು ವಿನ್ಯಾಸಗೊಳಿಸಲಾಗಿದೆ. ಇವು ಉಕ್ಕಿನ ಕವಚವನ್ನು ಹೊಂದಿದ್ದು, ಮಣ್ಣು ಮತ್ತು ಕಾಂಕ್ರೀಟ್‌ನ ಪದರಗಳನ್ನು ಕೊರೆದು ಭೂಗತ ನೆಲೆಗಳನ್ನು ತಲುಪಿದ ನಂತರವೇ ಸ್ಫೋಟಗೊಳ್ಳುತ್ತವೆ.

ಭೂಗತ ಪರಮಾಣು ಕೇಂದ್ರಗಳು ಮತ್ತು ಬಲವರ್ಧಿತ ಸೇನಾ ಬಂಕರ್‌ಗಳನ್ನು ಧ್ವಂಸ ಮಾಡಲು ಇವುಗಳನ್ನು ಬಳಸಲಾಗುತ್ತದೆ. ಸದ್ಯದ ದಾಳಿಯಿಂದ ವಿಕಿರಣ ಸೋರಿಕೆಯಾದ ಬಗ್ಗೆ ಯಾವುದೇ ವರದಿಯಾಗಿಲ್ಲ.

ಯುದ್ಧ ನಿಲ್ಲಿಸಲು ಒಪ್ಪಂದಕ್ಕೆ ಬರದಿದ್ದರೆ ಇರಾನ್‌ನ ಇಂಧನ ಸಂಪನ್ಮೂಲಗಳು, ಪರಮಾಣು ಕೇಂದ್ರಗಳು ಮತ್ತು ಜಲ ಸ್ಥಾವರಗಳನ್ನು ನಾಶಪಡಿಸುವುದಾಗಿ ಟ್ರಂಪ್ ಎಚ್ಚರಿಕೆ ನೀಡಿದ ಬೆನ್ನಲ್ಲೇ ಈ ದಾಳಿ ನಡೆದಿದೆ.

ಇರಾನ್ ಈಗಾಗಲೇ ವಿಶ್ವದ ಶೇ. 20 ರಷ್ಟು ತೈಲ ಸಾಗಣೆಯಾಗುವ ಹಾರ್ಮುಜ್ ಜಲಸಂಧಿಯನ್ನು (Strait of Hormuz) ಬಂದ್ ಮಾಡಿದೆ. ಇರಾನ್ ಸಂಸದೀಯ ಸಮಿತಿಯು ಅಮೆರಿಕ ಮತ್ತು ಇಸ್ರೇಲ್ ಹಡಗುಗಳನ್ನು ನಿಷೇಧಿಸಲು ಮತ್ತು ಹಡಗುಗಳ ಮೇಲೆ ಸುಂಕ ವಿಧಿಸಲು ಮುಂದಾಗಿದೆ. ಒಂದು ವೇಳೆ ಅಮೆರಿಕ ಭೂಸೇನೆಯನ್ನು ಬಳಸಿದರೆ ಅಥವಾ ಇರಾನ್ ತೀವ್ರ ಪ್ರತ್ಯುತ್ತರ ನೀಡಿದರೆ, ತೈಲ ಬೆಲೆಗಳು 2008 ರ ಸಾರ್ವಕಾಲಿಕ ದಾಖಲೆಯನ್ನು ಮೀರುವ ಸಾಧ್ಯತೆಯಿದೆ ಎಂದು ಮಾರುಕಟ್ಟೆ ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.