ವಾಷಿಂಗ್ಟನ್/ತೆಹ್ರಾನ್: ಅಮೆರಿಕ ಮತ್ತು ಇರಾನ್ ನಡುವಿನ ಯುದ್ಧ ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿರುವ ಬೆನ್ನಲ್ಲೇ, ಇರಾನ್ ವಾಯುಸೀಮೆಯಲ್ಲಿ ಅಮೆರಿಕದ ಶಕ್ತಿಶಾಲಿ ಯುದ್ಧವಿಮಾನವೊಂದು ಪತನಗೊಂಡಿದೆ. ವಿಮಾನದಲ್ಲಿದ್ದ ಇಬ್ಬರು ಸಿಬ್ಬಂದಿ ಪೈಕಿ ಓರ್ವನನ್ನು ಅಮೆರಿಕದ ವಿಶೇಷ ಪಡೆಗಳು ರಕ್ಷಿಸಿವೆ ಎಂದು ವರದಿಯಾಗಿದೆ.
ಅಮೆರಿಕದ ಪ್ರಮುಖ ಮಾಧ್ಯಮಗಳಾದ ಆಕ್ಸಿಯೋಸ್ (Axios) ಮತ್ತು ಸಿಬಿಎಸ್ ನ್ಯೂಸ್ (CBS News) ವರದಿ ಮಾಡಿರುವಂತೆ, ಇರಾನ್ನಲ್ಲಿ ಪತನಗೊಂಡ ವಿಮಾನವು ಅಮೆರಿಕದ F-15E ಫೈಟರ್ ಜೆಟ್ ಆಗಿದೆ. ಇರಾನ್ ಮಾಧ್ಯಮಗಳು ಪತನಗೊಂಡ ವಿಮಾನದ ಅವಶೇಷಗಳ ದೃಶ್ಯಗಳನ್ನು ಪ್ರಸಾರ ಮಾಡಿದ ಬೆನ್ನಲ್ಲೇ ಈ ವಿಷಯ ಹೊರಬಿದ್ದಿದೆ. ಈ ವಿಮಾನದಲ್ಲಿ ಪೈಲಟ್ ಮತ್ತು ಶಸ್ತ್ರಾಸ್ತ್ರ ವ್ಯವಸ್ಥೆಯ ಅಧಿಕಾರಿ (Weapons-systems officer) ಸೇರಿದಂತೆ ಇಬ್ಬರು ಸಿಬ್ಬಂದಿ ಇರುತ್ತಾರೆ.
ರಕ್ಷಣಾ ಕಾರ್ಯಾಚರಣೆ:
ವಿಮಾನ ಪತನಗೊಂಡ ತಕ್ಷಣವೇ ಕಾರ್ಯಾಚರಣೆಗೆ ಇಳಿದ ಅಮೆರಿಕದ ಸ್ಪೆಷಲ್ ಫೋರ್ಸ್ ತಂಡವು, ಇಬ್ಬರು ಸಿಬ್ಬಂದಿ ಪೈಕಿ ಓರ್ವನನ್ನು ಈಗಾಗಲೇ ಸುರಕ್ಷಿತವಾಗಿ ರಕ್ಷಿಸಿದೆ.
ವಿಮಾನದಲ್ಲಿದ್ದ ಎರಡನೇ ಸಿಬ್ಬಂದಿಯ ಪತ್ತೆಗಾಗಿ ಇರಾನ್ ವಾಯುಸೀಮೆಯಲ್ಲೇ ತೀವ್ರ ಶೋಧ ನಡೆಸಲಾಗುತ್ತಿದೆ. ಪತನಗೊಂಡ ಸ್ಥಳದ ಮೇಲೆ ಅಮೆರಿಕದ ಹೆಲಿಕಾಪ್ಟರ್ಗಳು ಮತ್ತು ಇತರ ವಿಮಾನಗಳು ಕೆಳಮಟ್ಟದಲ್ಲಿ ಹಾರಾಟ ನಡೆಸುತ್ತಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ.
F-15E ಅಥವಾ F-35?
ಈ ಬಗ್ಗೆ ಗೊಂದಲ ಸೃಷ್ಟಿಸಲು ಯತ್ನಿಸಿದ ಇರಾನ್ ಮಾಧ್ಯಮಗಳು, ಪತನಗೊಂಡಿರುವುದು ಅಮೆರಿಕದ ಅತ್ಯಾಧುನಿಕ ‘ಎಫ್-35 ಸ್ಟೆಲ್ತ್’ ವಿಮಾನ ಎಂದು ಪ್ರತಿಪಾದಿಸಿದ್ದವು. ಆದರೆ, ಸಿಎನ್ಎನ್ (CNN) ನಡೆಸಿರುವ ಫೋಟೋ ವಿಶ್ಲೇಷಣೆಯ ಪ್ರಕಾರ, ಅದು ಎಫ್-35 ಅಲ್ಲ ಬದಲಾಗಿ ಎಫ್-15ಇ (F-15E) ವಿಮಾನ ಎಂದು ಸ್ಪಷ್ಟಪಡಿಸಿದೆ.
ಅಮೆರಿಕದ ಪ್ರತಿಕ್ರಿಯೆ:
ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಈ ಬೆಳವಣಿಗೆಯ ಕುರಿತು ಸಂಪೂರ್ಣ ಮಾಹಿತಿಯನ್ನು ಪಡೆದುಕೊಂಡಿದ್ದಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಆದರೆ, ಈವರೆಗೆ ಶ್ವೇತಭವನವಾಗಲಿ ಅಥವಾ ಪೆಂಟಗನ್ ಆಗಲಿ ಅಧಿಕೃತವಾಗಿ ಯಾವುದೇ ಹೇಳಿಕೆಯನ್ನು ನೀಡಿಲ್ಲ. ಅಮೆರಿಕ ಮತ್ತು ಇರಾನ್ ನಡುವೆ ಯುದ್ಧ ಘೋಷಣೆಯಾದ ನಂತರ, ಇರಾನ್ ನೆಲದ ಒಳಗೆ ಅಮೆರಿಕದ ಯುದ್ಧವಿಮಾನವೊಂದು ಪತನಗೊಂಡ ಮೊದಲ ಪ್ರಕರಣ ಇದಾಗಿದೆ.
ಪ್ರಸ್ತುತ, ಪತನಗೊಂಡ ಸ್ಥಳದಲ್ಲಿ ಅಮೆರಿಕದ ವಿಶೇಷ ಪಡೆಗಳು ಅತ್ಯಂತ ಜಾಗರೂಕತೆಯಿಂದ ರಕ್ಷಣಾ ಕಾರ್ಯಾಚರಣೆಯನ್ನು ಮುಂದುವರಿಸಿವೆ.
ನಿಮ್ಮ ಕಾಮೆಂಟ್ ಬರೆಯಿರಿ