ಇರಾನ್ ಮೇಲೆ ಅಮೆರಿಕದ ಕಡಲ ದಿಗ್ಬಂಧನ ; ಹಾರ್ಮುಜ್ ಜಲಸಂಧಿಯಲ್ಲಿ ಟ್ರಂಪ್ ಸಮರ ವ್ಯೂಹ: ‘ಮಹಾ ಅಸ್ತ್ರ’ಗಳ ನಿಯೋಜನೆ

ನವದೆಹಲಿ: ಇರಾನ್ ವಿರುದ್ಧದ ಸಂಘರ್ಷ ತೀವ್ರಗೊಂಡ ಬೆನ್ನಲ್ಲೇ ಅಮೆರಿಕದ ಸಶಸ್ತ್ರ ಪಡೆಗಳು ಇರಾನಿನ ಬಂದರು ಮತ್ತು ಕರಾವಳಿ ಪ್ರದೇಶಗಳ ಸುತ್ತ ಕಡಲ ದಿಗ್ಬಂಧನ (Naval Blockade) ವಿಧಿಸಿವೆ. ಈ ಕಾರ್ಯಾಚರಣೆಗಾಗಿ ಅಮೆರಿಕವು 15ಕ್ಕೂ ಹೆಚ್ಚು ಅತ್ಯಾಧುನಿಕ ಯುದ್ಧನೌಕೆಗಳನ್ನು ಅರಬ್ಬಿ ಸಮುದ್ರದಲ್ಲಿ ನಿಯೋಜಿಸಿದೆ.
ಈ ಕಾರ್ಯಾಚರಣೆಯ ಪ್ರಮುಖ ಭಾಗವಾಗಿ ಅಮೆರಿಕದ ಯುಎಸ್‌ಎಸ್‌ (USS) ಟ್ರಿಪೋಲಿ (LHA 7) ಎಂಬ ಬೃಹತ್ ಯುದ್ಧನೌಕೆಯು ಅರಬ್ಬಿ ಸಮುದ್ರದಲ್ಲಿ ಬೀಡುಬಿಟ್ಟಿದೆ. ಈ ನೌಕೆಯಲ್ಲಿ F-35B ಲೈಟ್ನಿಂಗ್ II ಸ್ಟೆಲ್ತ್ ಫೈಟರ್ ಜೆಟ್‌ಗಳು ಮತ್ತು MV-22 ಆಸ್ಪ್ರೇ ವಿಮಾನಗಳು ಕಾರ್ಯಾಚರಣೆ ನಡೆಸುತ್ತಿವೆ ಎಂದು ಯುಎಸ್ ಸೆಂಟ್ರಲ್ ಕಮಾಂಡ್ (CENTCOM) ಖಚಿತಪಡಿಸಿದೆ.
ಯುಎಸ್‌ಎಸ್‌ (USS) ಟ್ರಿಪೋಲಿ ಯುದ್ಧನೌಕೆಯು ಸುಮಾರು 20ಕ್ಕೂ ಹೆಚ್ಚು ಎಫ್-35ಬಿ ಫೈಟರ್ ಜೆಟ್‌ಗಳನ್ನು ಹೊತ್ತೊಯ್ಯುವ ಸಾಮರ್ಥ್ಯ ಹೊಂದಿದ್ದು, ಇರಾನ್ ಕರಾವಳಿಯ ಮೇಲೆ ನಿರಂತರ ನಿಗಾ ವಹಿಸಿದೆ.
ದಿಗ್ಬಂಧನದ ನಿಯಮಗಳು
ಜಿಎಂಟಿ (GMT) ಕಾಲಮಾನದ ಪ್ರಕಾರ ಸೋಮವಾರ ಮಧ್ಯಾಹ್ನ 2 ಗಂಟೆಯಿಂದ ಈ ದಿಗ್ಬಂಧನ ಜಾರಿಗೆ ಬಂದಿದೆ.ಇರಾನ್‌ನ ಅರಬ್ ಗಲ್ಫ್ ಮತ್ತು ಓಮನ್ ಗಲ್ಫ್ ತೀರದ ಬಂದರುಗಳಿಗೆ ಪ್ರವೇಶಿಸುವ ಅಥವಾ ಅಲ್ಲಿಂದ ಹೊರಡುವ ಎಲ್ಲಾ ಹಡಗುಗಳನ್ನು ತಡೆಯಲಾಗುವುದು.ಆದರೆ, ಇರಾನ್ ಅಲ್ಲದ ಇತರ ದೇಶಗಳ ಬಂದರುಗಳಿಗೆ ಹಾರ್ಮುಜ್ ಜಲಸಂಧಿಯ ಮೂಲಕ ಸಂಚರಿಸುವ ಹಡಗುಗಳಿಗೆ ಯಾವುದೇ ಅಡ್ಡಿ ಇರುವುದಿಲ್ಲ ಎಂದು ಸೇನೆ ಸ್ಪಷ್ಟಪಡಿಸಿದೆ.

ಡೊನಾಲ್ಡ್ ಟ್ರಂಪ್ ಖಡಕ್ ಎಚ್ಚರಿಕೆ
ಈ ಕುರಿತು ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಇರಾನ್‌ನ ಸಣ್ಣ ವೇಗದ ಯುದ್ಧನೌಕೆಗಳು (Fast-attack ships) ದಿಗ್ಬಂಧನ ಪ್ರದೇಶಕ್ಕೆ ಬಂದರೆ ಅವುಗಳನ್ನು ತಕ್ಷಣವೇ ನಾಶಪಡಿಸಲಾಗುವುದು ಎಂದು ಎಚ್ಚರಿಸಿದ್ದಾರೆ.
“ಇರಾನ್ ನೌಕಾಪಡೆಯ ಸುಮಾರು 158 ಹಡಗುಗಳು ಈಗಾಗಲೇ ಸಮುದ್ರದ ತಳ ಸೇರಿವೆ. ಈಗ ಉಳಿದಿರುವುದು ಅವರ ಕೆಲವು ಸಣ್ಣ ವೇಗದ ಹಡಗುಗಳು ಮಾತ್ರ. ನಮ್ಮ ದಿಗ್ಬಂಧನದ ಹತ್ತಿರ ಸುಳಿದರೆ, ಅವುಗಳನ್ನು ತಕ್ಷಣವೇ ಸಂಹರಿಸಲಾಗುವುದು,” ಎಂದು ಟ್ರಂಪ್ ಗುಡುಗಿದ್ದಾರೆ. ಅಲ್ಲದೆ, ಸಮುದ್ರದ ಮೂಲಕ ಅಮೆರಿಕಕ್ಕೆ ಬರುವ ಮಾದಕವಸ್ತು ಜಾಲವನ್ನು ಶೇ. 98.2 ರಷ್ಟು ತಡೆಹಿಡಿಯಲಾಗಿದೆ ಎಂದೂ ಅವರು ಇದೇ ಸಂದರ್ಭದಲ್ಲಿ ತಿಳಿಸಿದ್ದಾರೆ.

ಶಾಂತಿ ಮಾತುಕತೆ ವಿಫಲ
ಫೆಬ್ರವರಿ 28 ರಿಂದ ಆರಂಭವಾದ ಅಮೆರಿಕ-ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧವನ್ನು ಕೊನೆಗಾಣಿಸಲು ಪಾಕಿಸ್ತಾನದಲ್ಲಿ ನಡೆದ ಮಾತುಕತೆಗಳು ವಿಫಲವಾದ ಬೆನ್ನಲ್ಲೇ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಉಪಾಧ್ಯಕ್ಷ ಜೆಡಿ ವ್ಯಾನ್ಸ್, ವಿಶೇಷ ಪ್ರತಿನಿಧಿ ಸ್ಟೀವ್ ವಿಟ್ಕಾಫ್ ಮತ್ತು ಜಾರೆಡ್ ಕುಶ್ನರ್ ನೇತೃತ್ವದ ನಿಯೋಗವು ಯಾವುದೇ ಒಪ್ಪಂದವಿಲ್ಲದೆ ಹಿಂತಿರುಗಿದೆ.
ಕಳೆದ ಬುಧವಾರವಷ್ಟೇ ಅಮೆರಿಕ ಮತ್ತು ಇರಾನ್ ನಡುವೆ ಮಾತುಕತೆಗಾಗಿ ಎರಡು ವಾರಗಳ ಕಾಲ ಕದನ ವಿರಾಮ ಘೋಷಿಸಲಾಗಿತ್ತು. ಆದರೆ, ಈಗ ಅನಿರೀಕ್ಷಿತವಾಗಿ ದಿಗ್ಬಂಧನ ವಿಧಿಸಿರುವುದು ಅಂತರಾಷ್ಟ್ರೀಯ ಮಟ್ಟದಲ್ಲಿ ಭಾರೀ ಆತಂಕ ಮೂಡಿಸಿದೆ.