ನವದೆಹಲಿ: ಭಾರತದಲ್ಲಿ ಇಂಟರ್ನೆಟ್ ಲೋಕದಲ್ಲಿ ಭಾರಿ ಸಂಚಲನ ಮೂಡಿಸಿದ್ದ ವಿಡಂಬನೆಯ (Satirical) ಸಾಮಾಜಿಕ ಮಾಧ್ಯಮ ವೇದಿಕೆ ‘ಕಾಕ್ರೋಚ್ ಜನತಾ ಪಾರ್ಟಿ’ (CJP) ಯ ಅಧಿಕೃತ ‘ಎಕ್ಸ್’ (ಟ್ವಿಟರ್) ಖಾತೆಯನ್ನು ಭಾರತದಲ್ಲಿ ಸ್ಥಗಿತಗೊಳಿಸಲಾಗಿದೆ (Withheld). ಈ ವೇದಿಕೆಯ ಸಂಸ್ಥಾಪಕರಾದ ಅಭಿಜೀತ ದಿಪ್ಕೆ ಅವರು ಗುರುವಾರ ತಮ್ಮ ವೈಯಕ್ತಿಕ ಖಾತೆಯ ಮೂಲಕ ಈ ವಿಷಯವನ್ನು ಖಚಿತಪಡಿಸಿದ್ದಾರೆ.
“ನಾವು ನಿರೀಕ್ಷಿಸಿದಂತೆಯೇ, ಕಾಕ್ರೋಚ್ ಜನತಾ ಪಾರ್ಟಿಯ ಎಕ್ಸ್ ಖಾತೆಯನ್ನು ಭಾರತದಲ್ಲಿ ಸ್ಥಗಿತಗೊಳಿಸಲಾಗಿದೆ,” ಎಂದು ಅಭಿಜೀತ ದಿಪ್ಕೆ ಬರೆದುಕೊಂಡಿದ್ದು, ಖಾತೆ ಬ್ಲಾಕ್ ಆಗಿರುವ ಸ್ಕ್ರೀನ್ಶಾಟ್ ಅನ್ನು ಹಂಚಿಕೊಂಡಿದ್ದಾರೆ. ಕಾನೂನುಬದ್ಧ ಬೇಡಿಕೆ/ಆದೇಶದ (Legal Demand) ಹಿನ್ನೆಲೆಯಲ್ಲಿ ಈ ಖಾತೆಯನ್ನು ಭಾರತದಲ್ಲಿ ನಿರ್ಬಂಧಿಸಲಾಗಿದೆ ಎಂದು ‘ಎಕ್ಸ್’ ಸಂಸ್ಥೆ ತಿಳಿಸಿದೆ.
ಇನ್ಸ್ಟಾಗ್ರಾಂನಲ್ಲಿ ಮುಂದುವರಿದ ಹವಾ
‘ಎಕ್ಸ್’ ಖಾತೆಯನ್ನು ನಿರ್ಬಂಧಿಸಲಾಗಿದ್ದರೂ, ಈ ವರದಿ ಸಿದ್ಧವಾಗುವ ಹೊತ್ತಿಗೆ ಕಾಕ್ರೋಚ್ ಜನಪಾ ಪಾರ್ಟಿಯ (CJP) ಇನ್ಸ್ಟಾಗ್ರಾಮ್ ಖಾತೆಯು ಸಕ್ರಿಯವಾಗಿದ್ದು, ಬರೋಬ್ಬರಿ 13.4 ಮಿಲಿಯನ್ (1.34 ಕೋಟಿ) ಫಾಲೋವರ್ಸ್ಗಳೊಂದಿಗೆ ಮುನ್ನುಗ್ಗುತ್ತಿದೆ.
ಕೇವಲ ಒಂದು ವಾರದ ಹಿಂದೆಯಷ್ಟೇ ಇಂಟರ್ನೆಟ್ ಜಗತ್ತಿಗೆ ಪರಿಚಯವಾದ ಈ ವೇದಿಕೆ, ಅತಿ ಕಡಿಮೆ ಅವಧಿಯಲ್ಲಿ ದೇಶಾದ್ಯಂತ ಭಾರಿ ಸಂಚಲನ ಸೃಷ್ಟಿಸಿದೆ. ಇದು ತನ್ನನ್ನು ತಾನು “ಯುವಕರಿಗಾಗಿ, ಯುವಕರಿಂದಲೇ ರಚಿತವಾದ ಯುವ ರಾಜಕೀಯ ರಂಗ” ಎಂದು ಪರಿಚಯಿಸಿಕೊಳ್ಳುತ್ತದೆ.
ಅಭಿಜೀತ ದಿಪ್ಕೆ ಅವರು ಈ ವೆಬ್ಸೈಟ್ನ ಸೃಷ್ಟಿಕರ್ತರಾಗಿದ್ದು, ತಮ್ಮನ್ನು ತಾವು ಈ ‘ಕಾಕ್ರೋಚ್ ಜನತಾ ಪಾರ್ಟಿ’ಯ “ಸಂಸ್ಥಾಪಕ ಅಧ್ಯಕ್ಷರು” ಎಂದು ಕರೆದುಕೊಂಡಿದ್ದಾರೆ. ಈ ವೆಬ್ಸೈಟ್ನ ಅಡಿಬರಹದಲ್ಲಿ (Footnote) ಇದು ಕೇವಲ ಒಂದು ‘ವಿಡಂಬನೆ/ಹಾಸ್ಯ’ (Satire) ವೇದಿಕೆ ಎಂದು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ.
ಲಕ್ಷಾಂತರ ಜನರ ನೋಂದಣಿ
ಈ ಕಾಲ್ಪನಿಕ ರಾಜಕೀಯ ಪಕ್ಷವನ್ನು “ಸೇರಲು” ವೆಬ್ಸೈಟ್ನಲ್ಲಿ ಒಂದು ಫಾರಂ ಅನ್ನು ನೀಡಲಾಗಿದ್ದು, ಈಗಾಗಲೇ 6 ಲಕ್ಷಕ್ಕೂ ಹೆಚ್ಚು ಜನರು ಇದರಲ್ಲಿ ನೋಂದಾಯಿಸಿಕೊಂಡಿದ್ದಾರೆ ಎಂದು ವೇದಿಕೆ ಹೇಳಿಕೊಂಡಿದೆ.
ಗಮನ ಸೆಳೆದ ವಿಶಿಷ್ಟ ಪ್ರಣಾಳಿಕೆ
ಹಾಸ್ಯ ಮತ್ತು ವ್ಯಂಗ್ಯದ ನಡುವೆಯೂ ಈ ಸಿಜೆಪಿ (CJP) ಬಿಡುಗಡೆ ಮಾಡಿರುವ ಪ್ರಣಾಳಿಕೆ ಸಾರ್ವಜನಿಕರ ಗಮನ ಸೆಳೆದಿದೆ. ಅದರ ಪ್ರಮುಖ ಅಂಶಗಳೆಂದರೆ
ನಿವೃತ್ತ ಮುಖ್ಯ ನ್ಯಾಯಮೂರ್ತಿಗಳಿಗೆ (Chief Justices) ರಾಜ್ಯಸಭಾ ಸ್ಥಾನಗಳನ್ನು ನೀಡುವುದರ ಮೇಲೆ ಸಂಪೂರ್ಣ ನಿಷೇಧ.
ಸಂಸತ್ತಿನ ಒಟ್ಟು ಸದಸ್ಯರ ಬಲವನ್ನು ಹೆಚ್ಚಿಸದೆಯೇ, ಮಹಿಳೆಯರಿಗೆ ಶೇಕಡಾ 50 ರಷ್ಟು ಕಡ್ಡಾಯ ಮೀಸಲಾತಿ.
ಪಕ್ಷಾಂತರಿಗಳ (Turncoats) ಮೇಲೆ 20 ವರ್ಷಗಳ ಕಾಲ ಚುನಾವಣೆಗೆ ಸ್ಪರ್ಧಿಸದಂತೆ ಕಠಿಣ ನಿಷೇಧ ಇತ್ಯಾದಿ ಆಗಿವೆ.
ಒಟ್ಟಾರೆಯಾಗಿ, ವ್ಯವಸ್ಥೆಯ ಮೇಲಿನ ಯುವ ಪೀಳಿಗೆಯ ಅಸಮಾಧಾನವನ್ನು ವ್ಯಂಗ್ಯದ ರೂಪದಲ್ಲಿ ಹೊರಹಾಕುತ್ತಿದ್ದ ಈ ವೇದಿಕೆಯ ಖಾತೆಯನ್ನು ಭಾರತದಲ್ಲಿ ನಿರ್ಬಂಧಿಸಿರುವುದು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ