ಹಲ್ಲುಗಳನ್ನು ಆರೋಗ್ಯಕರವಾಗಿಡಲು ಸಾಮಾನ್ಯವಾಗಿ ಬ್ರಷ್ ಮಾಡುವುದು, ಹಲ್ಲುಗಳ ನಡುವಿನ ಭಾಗವನ್ನು ಫ್ಲಾಸ್ನಿಂದ ಸ್ವಚ್ಛಗೊಳಿಸುವುದು ಮತ್ತು ಮೌತ್ರಿನ್ಸ್ ಬಳಸುವುದು ಅಗತ್ಯ. ಆದರೆ ಈ ಮೂರು ಕೆಲಸಗಳನ್ನು ಒಂದೇ ಸಾಧನದ ಮೂಲಕ ಸುಲಭಗೊಳಿಸುವ ಉದ್ದೇಶದಿಂದ ಡೈಸನ್ (Dyson) ಸಂಸ್ಥೆ ಹೊಸ ‘ಕ್ಯಾಮೆರಾಜೆಟ್’ (CameraJet) ಸ್ಮಾರ್ಟ್ ಟೂತ್ಬ್ರಶ್ ಅನ್ನು ಬಿಡುಗಡೆ ಮಾಡಿದೆ.
ಕೃತಕ ಬುದ್ಧಿಮತ್ತೆ (AI) ಆಧಾರಿತ ಕ್ಯಾಮೆರಾವನ್ನು ಹೊಂದಿರುವ ಈ ಟೂತ್ಬ್ರಶ್, ಹಲ್ಲುಗಳ ನಡುವಿನ ಸಣ್ಣ ಅಂತರಗಳನ್ನು ಗುರುತಿಸಿ, ಅಲ್ಲಿಗೆ ಸ್ವಯಂಚಾಲಿತವಾಗಿ ಮೌತ್ರಿನ್ಸ್ ಸಿಂಪಡಿಸಿ ಸ್ವಚ್ಛಗೊಳಿಸುತ್ತದೆ.
ಡೈಸನ್ ಸಂಸ್ಥಾಪಕ ಜೇಮ್ಸ್ ಡೈಸನ್ ಅವರ ಪ್ರಕಾರ, ಹೆಚ್ಚಿನ ಜನರು ಹಲ್ಲುಗಳ ನಡುವಿನ ಭಾಗವನ್ನು ಸರಿಯಾಗಿ ಸ್ವಚ್ಛಗೊಳಿಸುವುದಿಲ್ಲ. ಪ್ಲಾಕ್ (ಹಲ್ಲುಗಳ ಮೇಲೆ ಸೇರುವ ಬ್ಯಾಕ್ಟೀರಿಯಾ ಪದರ) ಹೆಚ್ಚಾಗಿ ಇದೇ ಜಾಗಗಳಲ್ಲಿ ರೂಪುಗೊಳ್ಳುತ್ತದೆ. ಈ ಸಮಸ್ಯೆಗೆ ಪರಿಹಾರ ಕಂಡುಹಿಡಿಯುವ ಉದ್ದೇಶದಿಂದ ‘ಕ್ಯಾಮೆರಾಜೆಟ್’ ಅನ್ನು ಅಭಿವೃದ್ಧಿಪಡಿಸಲಾಗಿದೆ. ಸುಮಾರು ಆರು ವರ್ಷಗಳ ಸಂಶೋಧನೆಯ ಬಳಿಕ 661 ಎಂಜಿನಿಯರ್ಗಳು ಮತ್ತು 30 ದಂತ ತಜ್ಞರ ಸಹಕಾರದಲ್ಲಿ ಈ ಸಾಧನವನ್ನು ರೂಪಿಸಲಾಗಿದೆ.
ಹಲ್ಲುಗಳ ಅಂತರ ಪತ್ತೆಹಚ್ಚುವ ಎಐ (AI) ಕ್ಯಾಮೆರಾ
ಟೂತ್ಬ್ರಶ್ನಲ್ಲಿ 1 ಲಕ್ಷ ಪಿಕ್ಸೆಲ್ ಸಾಮರ್ಥ್ಯದ ಮ್ಯಾಕ್ರೋ ಕ್ಯಾಮೆರಾ ಹಾಗೂ ಬೆಳಕು ವ್ಯವಸ್ಥೆ ಅಳವಡಿಸಲಾಗಿದೆ. ಡೈಸನ್ ಅಭಿವೃದ್ಧಿಪಡಿಸಿರುವ ‘ಗ್ಯಾಪ್ ಆಪ್ಟಿಕಲ್ ಟಾರ್ಗೆಟಿಂಗ್’ ಎಂಬ ಎಐ (AI) ತಂತ್ರಜ್ಞಾನವು ಹಲ್ಲುಗಳ ನಡುವಿನ ಅಂತರಗಳನ್ನು ಗುರುತಿಸುತ್ತದೆ. ಈ ವ್ಯವಸ್ಥೆಗೆ ತರಬೇತಿ ನೀಡಲು ಸುಮಾರು 4.7 ಲಕ್ಷ ದಂತ ಚಿತ್ರಗಳನ್ನು ಬಳಸಲಾಗಿದೆ. ಪ್ರತಿ ಸೆಕೆಂಡಿಗೆ 28 ಚಿತ್ರಗಳನ್ನು ವಿಶ್ಲೇಷಿಸುವ ಈ ತಂತ್ರಜ್ಞಾನ, ಕೇವಲ 100 ಮಿಲಿಸೆಕೆಂಡುಗಳಲ್ಲಿ ಹಲ್ಲುಗಳ ನಡುವಿನ ಜಾಗವನ್ನು ಪತ್ತೆಹಚ್ಚುತ್ತದೆ. ನಂತರ ಆ ಜಾಗಕ್ಕೆ ಮೌತ್ರಿನ್ಸ್ ಸಿಂಪಡಿಸಿ ಸ್ವಚ್ಛಗೊಳಿಸುತ್ತದೆ.
ಮೊಬೈಲ್ನಲ್ಲಿ ಹಲ್ಲುಗಳ ನೇರ ಚಿತ್ರಣ
ವೈ-ಫೈ ಮತ್ತು ಬ್ಲೂಟೂತ್ ಸೌಲಭ್ಯ ಹೊಂದಿರುವ ಈ ಟೂತ್ಬ್ರಶ್ನ್ನು ಮೊಬೈಲ್ ಆ್ಯಪ್ಗೆ ಸಂಪರ್ಕಿಸಬಹುದು. ಇದರ ಮೂಲಕ ಬಳಕೆದಾರರು ತಮ್ಮ ಹಲ್ಲುಗಳ ನೇರ ಚಿತ್ರಣವನ್ನು ನೋಡಬಹುದು. ಆ್ಯಪ್ನಲ್ಲಿ ಯಾವ ಭಾಗವನ್ನು ಚೆನ್ನಾಗಿ ಸ್ವಚ್ಛಗೊಳಿಸಲಾಗಿದೆ, ಎಲ್ಲಿ ಇನ್ನಷ್ಟು ಗಮನ ಬೇಕು, ಬ್ರಷಿಂಗ್ ಮತ್ತು ಫ್ಲಾಸಿಂಗ್ ಬಗ್ಗೆ ಸಲಹೆಗಳು ಹಾಗೂ ವಿಶ್ಲೇಷಣೆಗಳೂ ಲಭ್ಯವಿರುತ್ತವೆ. ಡೈಸನ್ ಪ್ರಕಾರ, ಬಳಕೆದಾರರ ಚಿತ್ರಗಳನ್ನು ಸಾಧನದಲ್ಲಾಗಲಿ ಅಥವಾ ಕ್ಲೌಡ್ನಲ್ಲಾಗಲಿ ಸಂಗ್ರಹಿಸಲಾಗುವುದಿಲ್ಲ.
ಪ್ಲಾಕ್ ತೆಗೆದುಹಾಕಲು ಹೊಸ ತಂತ್ರಜ್ಞಾನ
ಸಿಂಗಾಪುರ ರಾಷ್ಟ್ರೀಯ ವಿಶ್ವವಿದ್ಯಾಲಯದ ದಂತ ವೈದ್ಯಕೀಯ ವಿಭಾಗದ ಸಹಯೋಗದಲ್ಲಿ ಡೈಸನ್ ಹಲವು ವರ್ಷಗಳ ಸಂಶೋಧನೆ ನಡೆಸಿದೆ. ಸಾಮಾನ್ಯ ವಾಟರ್ ಫ್ಲಾಸರ್ಗಳು ಕಿರಿದಾದ ನೀರಿನ ಜೆಟ್ ಬಳಸುತ್ತವೆ. ಇದರಿಂದ ಪ್ಲಾಕ್ನಲ್ಲಿ ರಂಧ್ರ ಉಂಟಾದರೂ ಸಂಪೂರ್ಣವಾಗಿ ತೆಗೆಯಲು ಸಾಧ್ಯವಾಗುವುದಿಲ್ಲ ಎಂದು ಸಂಶೋಧಕರು ಹೇಳಿದ್ದಾರೆ. ಆದರೆ ‘ಕ್ಯಾಮೆರಾಜೆಟ್’ ಕೋನಾಕಾರದ (Conical) ಅಗಲವಾದ ಜೆಟ್ ಬಳಸುತ್ತದೆ. ಇದು ಕಡಿಮೆ ಒತ್ತಡದಲ್ಲಿ ಕಾರ್ಯನಿರ್ವಹಿಸುವುದರಿಂದ ಹಲ್ಲು ಮತ್ತು ದಂತಮಾಂಸಕ್ಕೆ ಹಾನಿಯಾಗುವುದಿಲ್ಲ.
ಯಾವುದೇ ದಿಕ್ಕಿನಲ್ಲಿ ಬಳಸಬಹುದಾದ ಮೌತ್ರಿನ್ಸ್ ಟ್ಯಾಂಕ್
ಟೂತ್ಬ್ರಶ್ನಲ್ಲಿ 12.5 ಮಿಲಿಲೀಟರ್ ಸಾಮರ್ಥ್ಯದ ಮೌತ್ರಿನ್ಸ್ ಟ್ಯಾಂಕ್ ಅಳವಡಿಸಲಾಗಿದೆ. ‘ಎಂಟಿ-ಗ್ರಾವಿಟಿ’ ವಿನ್ಯಾಸದಿಂದ ಸಾಧನವನ್ನು ಯಾವುದೇ ಕೋನದಲ್ಲಿ ಹಿಡಿದರೂ ಜೆಟ್ ಸರಿಯಾಗಿ ಕಾರ್ಯನಿರ್ವಹಿಸುತ್ತದೆ.
ಪ್ರತಿ ಬ್ರಷ್ ಹೆಡ್ನಲ್ಲಿ ರೇಡಿಯೋ ಫ್ರೀಕ್ವೆನ್ಸಿ ಐಡೆಂಟಿಫಿಕೇಶನ್ (RFID) ಚಿಪ್ ಅಳವಡಿಸಲಾಗಿದೆ. ಇದರಿಂದ ಬ್ರಷ್ ಎಷ್ಟು ಬಾರಿ ಬಳಸಲಾಗಿದೆ ಎಂಬುದನ್ನು ಸಾಧನವೇ ಲೆಕ್ಕ ಹಾಕುತ್ತದೆ. ಹೀಗಾಗಿ ಯಾವಾಗ ಹೊಸ ಬ್ರಷ್ ಹೆಡ್ ಅಳವಡಿಸಬೇಕು ಎಂಬ ಮಾಹಿತಿಯೂ ಬಳಕೆದಾರರಿಗೆ ದೊರೆಯುತ್ತದೆ. ಬ್ರಷ್ ಹೆಡ್ ಬದಲಾಯಿಸಬೇಕಾದ ಸಮಯವನ್ನು ಬಳಕೆದಾರರಿಗೆ ತಿಳಿಸಲಾಗುತ್ತದೆ. ಶಬ್ದವನ್ನು ಕಡಿಮೆ ಮಾಡಲು ಪ್ರತಿಯೊಂದು ಬ್ರಷ್ ಹೆಡ್ನಲ್ಲಿ ಸೋನಿಕ್ ಡ್ಯಾಂಪನರ್ ಅಳವಡಿಸಲಾಗಿದೆ.
69% ಹೆಚ್ಚು ಪ್ಲಾಕ್ ತೆರವು
‘ವೇರಿಯಬಲ್ ಸೋನಿಕ್ ಆಸಿಲೇಷನ್’ ತಂತ್ರಜ್ಞಾನದ ಮೂಲಕ ಬ್ರಷ್ನ ಬಿರುಗೂದಲುಗಳು ನಿರಂತರವಾಗಿ ವಿಭಿನ್ನ ಕೋನಗಳಲ್ಲಿ ಚಲಿಸುತ್ತವೆ. ಪ್ರಯೋಗಾಲಯ ಪರೀಕ್ಷೆಗಳ ಪ್ರಕಾರ, ಬಾಯಿ ಒಳಗಿನ ತಲುಪಲು ಕಷ್ಟವಾಗುವ ಭಾಗಗಳಲ್ಲಿ ಈ ತಂತ್ರಜ್ಞಾನವು ಮಾರುಕಟ್ಟೆಯ ಪ್ರಮುಖ ಎಲೆಕ್ಟ್ರಿಕ್ ಟೂತ್ಬ್ರಶ್ಗಳಿಗಿಂತ ಶೇ.69ರಷ್ಟು ಹೆಚ್ಚು ಪ್ಲಾಕ್ ತೆಗೆದುಹಾಕುವ ಸಾಮರ್ಥ್ಯ ಹೊಂದಿದೆ. ಬಳಕೆದಾರರು ಸ್ವಯಂಚಾಲಿತ ಅಥವಾ ಕೈಯಿಂದ ನಿಯಂತ್ರಿಸುವ ಜೆಟ್ ಮೋಡ್ ಆಯ್ಕೆ ಮಾಡಬಹುದು. ಜೊತೆಗೆ ಬ್ರಷಿಂಗ್ ಎಷ್ಟು ಬೇಕು ಎಂಬುದನ್ನೂ ಹೊಂದಿಸಬಹುದು. ಸೂಕ್ಷ್ಮ ಹಲ್ಲು ಮತ್ತು ದಂತಮಾಂಸ ಹೊಂದಿರುವವರಿಗಾಗಿ ವಿಶೇಷ ಮೃದು ಬ್ರಷ್ ಹೆಡ್ ಕೂಡ ಲಭ್ಯವಿದೆ.
₹41 ಸಾವಿರಕ್ಕೂ ಹೆಚ್ಚು ಬೆಲೆ
ಕ್ಯಾಮೆರಾಜೆಟ್’ ಟೂತ್ಬ್ರಶ್ ಬೆಲೆ 499 ಅಮೆರಿಕನ್ ಡಾಲರ್ (ಸುಮಾರು ₹41,000ಕ್ಕಿಂತ ಹೆಚ್ಚು). ಇದರೊಂದಿಗೆ ಎರಡು ಬ್ರಷ್ ಹೆಡ್ಗಳು, ಚಾರ್ಜಿಂಗ್ ಡಾಕ್, ಚಾರ್ಜಿಂಗ್ ಕೇಬಲ್ ಮತ್ತು ಟ್ರಾವೆಲ್ ಕೇಸ್ ದೊರೆಯುತ್ತದೆ. ವಿಶೇಷವೆಂದರೆ, ಚಾರ್ಜಿಂಗ್ ಡಾಕ್ ಕೇವಲ ಮೂರು ಸೆಕೆಂಡುಗಳಲ್ಲಿ ಮೌತ್ರಿನ್ಸ್ ಟ್ಯಾಂಕ್ ಅನ್ನು ಮರುಭರ್ತಿ ಮಾಡುತ್ತದೆ.
ವಿಶೇಷ ಟೂತ್ಪೇಸ್ಟ್ ಬಳಕೆಗೆ ಸಲಹೆ
ಈ ಟೂತ್ಬ್ರಶ್ ಬಳಸುವವರು ಸೋಡಿಯಂ ಲಾರಿಲ್ ಸಲ್ಫೇಟ್ (SLS) ರಹಿತ ಟೂತ್ಪೇಸ್ಟ್ ಮತ್ತು ಪಾರದರ್ಶಕ ಮೌತ್ರಿನ್ಸ್ ಬಳಸುವಂತೆ ಡೈಸನ್ ಸಲಹೆ ನೀಡಿದೆ. ಸಾಮಾನ್ಯ ಟೂತ್ಪೇಸ್ಟ್ನ ನೊರೆ ಕ್ಯಾಮೆರಾದ ಕಾರ್ಯಕ್ಷಮತೆಗೆ ಅಡ್ಡಿಯಾಗಬಹುದು.ಇದಕ್ಕಾಗಿ ಕಡಿಮೆ ನೊರೆ ಉತ್ಪಾದಿಸುವ ವಿಶೇಷ ಟೂತ್ಪೇಸ್ಟ್ ಹಾಗೂ ಮೌತ್ರಿನ್ಸ್ಗಳನ್ನು ಶೀಘ್ರದಲ್ಲೇ ಮಾರುಕಟ್ಟೆಗೆ ತರಲಾಗುವುದು ಎಂದು ಸಂಸ್ಥೆ ತಿಳಿಸಿದೆ.
ಕಡಿಮೆ ಬೆಲೆಯ ಸ್ಮಾರ್ಟ್ ಟೂತ್ಬ್ರಶ್ ಬಯಸುವವರಿಗೆ 100 ಡಾಲರ್ ಬೆಲೆಯ ಒರಲ್-ಬಿ iO ಸೀರೀಸ್ 5 ಉತ್ತಮ ಪರ್ಯಾಯವಾಗಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ